திராவிட மாடலுக்கு போட்டியா லோக்பவன் மாடல்? ஆளுநர் ஆர்.என்.ரவியின் அடுத்த அவதாரம்!

தி.மு.க-வின் திராவிட மாடல் கோஷம் திக்கெட்டும் ஒலிப்பதை உற்று நோக்கும் பா.ஜ.க., தன் அடுத்த மூவை ஆளுநரை வைத்தே நகர்த்தத் தொடங்கியிருக்கிறது. அதன் வெளிப்பாடாகவே பலதரப்பட்ட மக்களுடன் தினம் தினம் சந்தித்து திராவிட மாடலுக்கு போட்டியாக லோக்பவன் மாடலை நடத்திவருகிறார் ஆளுநர் ஆர்.என்.ரவி!இதுகுறித்து ஆளுநர் மாளிகையின் உயரதிகாரி ஒருவரிடம் பேசினோம்... “ஆளுநர் பதவி அலங்காரப் பதவியல்ல. ஜனநாயக நாட்டில் ஒரு முதல்வர்தான் மக்களை சந்திக்க வேண்டும் என்றில்லை, ஆளுநரும் மக்களை சந்திக்கலாம். அவர்களின் குறைகளைக் கேட்டு உதவலாம். அந்த வகையில் பல்வேறு நிகழ்ச்சிகளை ராஜ்பவன் நடத்திவருகிறது.‘மீட் அண்ட் கிரீட்’அதில் ஹைலைட் எனலாம். தமிழகத்தின் இளம் சாதனையாளர்களை சந்தித்து அவர்களை ஊக்கப்படுத்துவதுதான் இந்த நிகழ்ச்சியின் நோக்கம். புதிதாகத் தொடங்கப்பட்ட ‘ஸ்டார்ட் அப்’-களின் உரிமையாளர்கள், இளம் தொழிலதிபர்கள் தொடங்கி பெரும் தொழிலதிபர்கள் வரை பலரையும் இந்த நிகழ்ச்சியில் சந்திக்கிறார் ஆளுநர். வில் வித்தை, நீச்சல், ஸ்கூபா டைவிங் உள்ளிட்ட விளையாட்டுகளில் அபாரத் திறமையை வெளிப்படுத்தும் குழந்தைகளைசந்தித்துப் பேசி அவர்களுக்கு உற்சாகமூட்டியுள்ளார்..இந்தியாவின் இளம் ஸ்கூபா டைவர் தாரகை ஆராதனாவை ஆளுநர் சந்தித்த பிறகே டிஸ்கவரி சேனல் அவரை வைத்து புரோகிராம் நடத்தியது. தற்போது இந்தியாவின் பல மாநிலங்களில் இருந்தும் இந்த நிகழ்ச்சியில் கலந்துகொள்வதற்காக இ-மெயில்கள் வந்த வண்ணம் உள்ளன.அடுத்து, தமிழகம் முழுவதும் உள்ள விவசாயிகளை சந்தித்துப் பேசி வருகிறார் ஆளுநர். விவசாயிகளின் பிரச்னைகளை கேட்பதோடு, நவீன தொழில்நுட்பத்தை விவசாயத்தில் புகுத்தி வாழ்வாதாரத்தை மேம்படுத்திக்கொள்ள ஆலோசனைகளையும் வழங்கி வருகிறார்.தொடர்ந்து ‘திங்க் டு டேர்’என்ற நிகழ்ச்சி. ‘ரிஸ்க் எடுப்பதற்கு சிந்தியுங்கள்’ என்று அர்த்தம். இந்தியாவில் திறமையான பட்டதாரிகள் பலர், ஐ.ஏ.எஸ்., ஐ.பி.எஸ்., ஆகிய சிவில் சர்வீஸ் தேர்வுகளை எழுத ஆசைப்படுகிறார்கள். அவர்களுக்கு ஆலோசனை வழங்கும் நிகழ்ச்சிதான் திங்க் டு டேர். இதில் ஆளுநர் கலந்துகொண்டு, சிவில் சர்வீஸ் தேர்வுகளில் உள்ள முதல்நிலை, இடைநிலை மற்றும் நேர்முகத் தேர்வை எதிர்கொள்வது எப்படி என்று மூன்று மணிநேரம் பயிற்சிகளை வழங்கியிருக்கிறார். இதற்கும் பெரிய வரவேற்பு கிடைத்துள்ளது..அடுத்து தமிழகம் முழுவதும் சட்டம், தொழில்துறை, விளையாட்டு, நீதித்துறை போன்ற பல துறைகளில் கலக்கிவரும் பெண்களை சந்தித்துப் பேசியுள்ளார். இதுதவிர பல சாதனைப் பெண்களை கவுரப்படுத்தியுள்ளார். தன்னலம் கருதாமல் மக்கள் தொண்டாற்றி வரும் 250 என்.ஜி.ஓ.க்களின் நிறுவனர்களையும் தனியாக அழைத்துப் பாராட்டியுள்ளார், ஆளுநர். ஊட்டியில் உள்ள ஆளுநர் மாளிகையில் பழங்குடியின மக்களைச் சந்தித்து அவர்களுக்குத் தேநீர் விருந்து கொடுத்து கௌரவித்துள்ளார். ராமநாதபுரம் மாவட்டத்திற்குச் சென்று விவசாயிகளுடன் கலந்துரையாடல், மீனவர்களின் இல்லங்களுக்குச் சென்று அவர்களுடன் உணவருந்தியது போன்ற நிகழ்ச்சிகளும் பாமர மக்களை கவர்ந்துள்ளன. பிளஸ் டூ தேர்வில் மாநில அளவில் ரேங்க் எடுத்த மாணவ, மாணவிகளை அழைத்து கௌரவித்தார் ஆளுநர். அதில் கடையநல்லூரைச் சேர்ந்த ஏழை மாணவி ஷப்ரீன் இமானா, பொருளாதார சூழ்நிலை காரணமாக சென்னைக்கு வரமுடியாது என்று தெரிவித்ததையடுத்து, ஆளுநர் மாளிகையே அவரை அழைத்து வரும் பொறுப்பையும் ஏற்றுக்கொண்டது. முதல்முறையாக திருநங்கைகளை வரவழைத்து அவர்களுடனும் கலந்துரையாடலை ஆளுநர் நடத்தியுள்ளார்..இனி முப்படைகளைச் சேர்ந்த ஓய்வுபெற்ற ராணுவ வீரர்கள், நேதாஜியுடன் இணைந்து போரிட்டவர்கள், தியாகிகள் என்று பலரையும் சந்தித்து கௌரவிக்க உள்ளார். இப்படி இதுவரை எந்த ஆளுநருமே செய்யாத வகையில் மக்களுடன் மிகவும் நெருக்கமாக இருந்து வருகிறார், தமிழக ஆளுநர். அதனால்தான் ‘ராஜ்பவன்’, ‘லோக் பவனாக’ மாறியுள்ளது. என்னதான் தி.மு.க. அரசு, ‘இது திராவிட மாடல் அரசு’எனச் சொல்லிக்கொண்டாலும், உண்மையில் மக்களுடன் பயணிப்பவர் என்னவோ ஆளுநர்தான்.” என்றார் விரிவாக.ஆளுநருடன் கலந்துரையாடிய விவசாயி முருகேசனிடம் பேசினோம். “மதுரை பக்கத்தில் உள்ள மேலைகால்தான் எனக்கு சொந்த ஊர். இந்தியாவிலேயே முதல் ஆளாக பிளாஸ்டிக்குக்கு மாற்றாக வாழை மட்டையைப் பயன்படுத்தி கைப்பை, கூடை, பர்ஸ் போன்ற விதவிதமான பொருட்களை உற்பத்தி செய்து வருகிறோம். எங்களையும் மதித்து அழைத்து கலந்துரையாடிய ஆளுநரின் செயல் எங்களுக்கு ஆச்சர்யமாக இருந்தது” என்றார்.தி.மு.க.வின் செய்தி தொடர்பு செயலாளர் கான்ஸ்டன்டைன் ரவீந்திரனிடம் இதுபற்றி கேட்டோம். “ஆளுநர் பதவியே ஒரு காலாவதியாகிப் போன பதவி. ஒரு பள்ளிக்கூடத்தில் வாட்ச்மேனிடம் சாவி கொடுப்பது பிரின்ஸ்பல் அறையில் சென்று அமர்வதற்கு அல்ல. கதவை திறந்து, மூடுவதற்குத்தான். அதை வாட்ச்மேன் புரிந்துகொண்டு நடக்க வேண்டும். பா.ஜ.க-வை பொறுத்தவரை அரசியலமைப்பு, நீதிமன்றம் ஆகிய இரண்டிலும் மக்கள் நம்பிக்கை இழக்க வேண்டும் என்று கருதுகிறது. இப்படிப்பட்ட ஆட்சிதான் உத்தரப்பிரதேசத்தில் நடந்து வருகிறது. அது கட்டுக்கோப்பில்லாத ஓர் ஆட்சி மாடல். அந்த ஆட்சி மாடலின் மறு உருவம்தான் இந்த லோக் பவன் மாடல்” என்றார். மக்களுக்கு சேவை செய்வதில் போட்டி போடுவது ஆரோக்கியமான விஷயமே! - அபிநவ்

திராவிட மாடலுக்கு போட்டியா லோக்பவன் மாடல்? ஆளுநர் ஆர்.என்.ரவியின் அடுத்த அவதாரம்!

Related Stories