டெல்லிக்கு எஸ்... தமிழ்நாட்டில் நோ! பலத்த குழப்பத்தில் பா.ம.க

தேர்தல் தேதி நெருங்கும் வரையில், சகல கட்சிகளையும் சகட்டுமேனிக்கு விமர்சிக்கும் பா.ம.க.வின் கூட்டணி வியூகத்தை யாராலும் கணிக்க முடியாது. அதிலும், `டெல்லியில்தான் கூட்டணி, தமிழ்நாட்டில் இல்லை' என அறிவித்திருப்பதால், அரசியல் அரங்கில் கூடுதல் சலசலப்பு.`தமிழகத்தில் அ.தி.மு.க. கூட்டணியில் பா.ம.க. தொடர்கிறதா?' என மதுரையில் பா.ம.க தலைவர் டாக்டர் அன்புமணியிடம் நிருபர்கள் கேள்வி எழுப்பினர். அதற்குப் பதில் அளித்தவர், `டெல்லி அளவில் பா.ஜ.க. தலைமையிலான தேசிய ஜனநாயக கூட்டணியில் பா.ம.க அங்கம் வகிக்கிறது. ஆனால், தமிழ்நாட்டில் என்.டி.ஏ. கூட்டணியில் நாங்கள் இல்லை’ என்றார்.கூடவே, `தி.மு.க.வும் இதற்கு முன் டெல்லியில் ஒரு நிலைப்பாடு, தமிழகத்தில் ஒரு நிலைப்பாடு என எடுத்து இரட்டைக் குதிரையில் சவாரி செய்திருக்கிறது' எனவும் விளக்கம் கொடுத்தார்.``பா.ம.க.வின் வியூகம்தான் என்ன?'' என அக்கட்சி நிர்வாகிகள் சிலரிடம் பேசினோம். ``2014 நாடாளுமன்றத் தேர்தலில் பா.ஜ.க. கூட்டணியில் எட்டு தொகுதிகளில் பா.ம.க. போட்டியிட்டது. அதில், அன்புமணி மட்டும் தருமபுரியில் வெற்றி பெற்றார். அடுத்து வந்த 2016 சட்டமன்றத் தேர்தலில், `மாற்றம் முன்னேற்றம் அன்புமணி' என்ற முழக்கத்தை முன்வைத்து தனித்துக் களமிறங்கினோம். இதில் வெற்றி பெறாவிட்டாலும், 5 சதவிகித வாக்குகள் கிடைத்தன.அடுத்துவந்த 2019 நாடாளுமன்றத் தேர்தலில் யாரும் எதிர்பார்க்காத வகையில் அ.தி.மு.க. கூட்டணியில் 7 தொகுதிகளில் போட்டியிட்டது பா.ம.க. ஆனால், அனைத்திலும் தோல்வியே கிடைத்தது. ஆனால், அதே காலகட்டத்தில் வடமாவட்டங்களில் நடந்த இடைத்தேர்தலில் அ.தி.மு.க வெற்றிபெற்றது. இதன்மூலம், ஆட்சியை தக்கவைத்துக் கொண்டார், எடப்பாடி பழனிசாமி.தற்போது அ.தி.மு.க.வின் முழு கட்டுப்பாடும் எடப்பாடி பழனிசாமியின் பக்கம் வந்துவிட்டது. டெல்லியில் கூட்டணிக் கட்சிகளின் கூட்டத்தைக் கூட்டிய பிரதமர் மோடி, எடப்பாடியை தனது பக்கத்தில் அமர வைத்துக் கொண்டார். இதனால் எடப்பாடிக்கு தனி அந்தஸ்து கிடைத்தது.அதேகூட்டத்தில், பா.ம.க. தலைவர் அன்புமணி கலந்து கொள்ளாமல் முன்னாள் மத்திய இணையமைச்சர் ஏ.கே.மூர்த்தியை அனுப்பி வைத்தார். இதன்மூலம், `தமிழகத்தில் என்.டி.ஏ. கூட்டணியில் மனக்கசப்போடுதான் இருக்கிறோம்' என்பதை டெல்லிக்கு உணர்த்தினார்.தவிர, வட மாவட்டங்களில் பா.ம.க.வை சேர்ந்த பலரையும் தன்பக்கம் பா.ஜ.க. இழுத்துக் கொண்டிருப்பதிலும் அன்புமணிக்கு கோபம். இந்தக் கோபத்தைத்தான் மதுரையில் நடந்த செய்தியாளர் சந்திப்பில் வெளிக்காட்டினார்.அதேநேரம், `தி.மு.க கூட்டணிக்குள் பா.ம.க வரவேண்டும்' என்பதில் அமைச்சர் துரைமுருகன் உறுதியாக இருக்கிறார். இதுதொடர்பாக, தி.மு.க தலைமையிடம் சில தகவல்களையும் அவர் தெரிவித்திருக்கிறார். அதில், `நம்முடன் எத்தனைக் கட்சிகள் இருந்தாலும் வடமாவட்டங்களில் பா.ம.க. இருந்தால்தான் எம்.பி. தேர்தலில் அதிக இடங்களைப் பிடிக்க முடியும். வடமாவட்டங்களுக்கு பா.ம.க., தென் மாவட்டங்களுக்கு காங்கிரஸ் மற்றும் முஸ்லிம் அமைப்புகள், ம.தி.மு.க உள்ளிட்ட கட்சிகள் வைத்துக்கொண்டாலே போதும். இதனால், வி.சி.க.வும் பண்ருட்டி வேல்முருகனும் கூட்டணியைவிட்டு வெளியேறுவார்கள். அவர்கள் போனாலம் கவலையில்லை' எனக் கூறியதாகத் தெரிகிறது..இந்தநிலையில், என்.எல்.சி.யின் விவசாய நிலங்களைக் கையகப்படுத்தும் விவகாரம் பூதாகரமானது. என்.எல்.சி. தலைமை அலுவலகத்தை 28-ம் தேதி முற்றுகையிடப் போவதாக பா.ம.க அறிவித்தது. அந்தப் போராட்டத்துக்கு அனுமதி வழங்க காவல்துறை தயங்கியது. பின்னர், போராட்டத்துக்கு அனுமதி கிடைத்தது. அதுவும், நெய்வேலி இந்திரா நகர் ஆர்ச் கேட் பகுதி என்பது இதுவரை யாரும் போராட்டம் நடத்தாத பகுதி. அங்கே போராட்டம் நடத்த அனுமதி கொடுத்ததன் மூலம் தமிழக அரசு பா.ம.க.வுக்கு சலுகை காட்டுவதாகவே அரசியல் வட்டாரத்தில் பேச்சு எழுந்தது. ஆனால், அந்தப் போரட்டம் வன்முறையில் முடிந்தது.இதுதொடர்பாக, `அ.தி.மு.க.வும் பா.ஜ.க.வும் பா.ம.க.வுக்கு ஆதரவாக குரல் கொடுக்கும்' என்று அன்புமணி நம்பினார். ஆனால், இரண்டு கட்சிகளும் ஆதரவும் கொடுக்கவில்லை; தமிழக அரசைக் கண்டிக்கவும் இல்லை. இந்தக் கோபம்தான், `தமிழகத்தில் என்.டி.ஏ அணியில் நாங்கள் இல்லை' என அன்புமணியை பேச வைத்திருக்கிறது.அதேசமயம், தி.மு.க.வுக்கு பா.ம.க. தூதுவிடவில்லை, தி.மு.க.தான் துரைமுருகன் மூலம் பா.ம.க.வை வளைக்கப் பார்க்கிறது. `2026 சட்டமன்றத் தேர்தலில் கூட்டணி அமைச்சரவைக்கு யார் உத்தரவாதம் தருகிறார்களோ அவர்களோடுதான் கூட்டணி' என்கிற மந்திரக்கோலை பா.ம.க கையில் எடுத்துள்ளது. இது டெல்லிக்கும் சேர்த்தே விடப்பட்ட சமிக்ஞைதான்.ஒருவேளை, தி.மு.க. கூட்டணியில் பா.ம.க அங்கம் வகிப்பதாக இருந்தால், `இந்தியா' கூட்டணியின் ஆட்சி அமைந்தால், அமைச்சர் பதவி தருவதாக உத்தரவாதம் அளித்தால் அந்த அணிக்குச் செல்வதை பரிசீலனை செய்வோம். அதேநேரம், 2026 சட்டமன்றத் தேர்தலில் ஒருமித்த கட்சிகளோடு கூட்டணி அமைத்து கூட்டணி ஆட்சி அமைப்பதுதான் பா.ம.க.வின் இலக்கு'' என்றனர், விரிவாக.``நாடாளுமன்றத் தேர்தலில் யாரோடு கூட்டணி?'' என்ற கேள்வியை பா.ம.க. செய்தித் தொடர்பாளர் வழக்கறிஞர் கே.பாலுவிடம் முன்வைத்தோம். அரைமணி நேரம் கழித்து இணைப்பில் வருவதாகக் கூறினார். அதன்பிறகு அவரைத் தொடர்பு கொள்ள முடியவில்லை. - பி.கோவிந்தராஜு