பாழாகும் பவானி: கண் துடைப்புக்காக போராடுகிறார்களா காம்ரேட்கள்?

-எஸ்.ஷக்திஊருக்கே தன் பெயரைச் சூட்டும் அளவுக்கு உயர்வான நீர் ஆதாரமாகத் திகழ்வது பவானி ஆறு. நீலமலையில் உற்பத்தியாகி மூன்று மாவட்டங்களை குளிர்வித்து காவிரியில் கலக்கும் இந்த ஆறு, தொழிற்சாலைகளின் ரசாயனக் கழிவினால் சீரழிக்கப்படுவதை காணச் சகிக்காமல், கொடிபிடித்துக் களமிறங்கியிருக்கிறார்கள், கொங்கு விவசாயிகள்..இதுகுறித்து, தமிழக விவசாயிகள் பாதுகாப்பு சங்கத்தின் ஈரோடு வடக்கு மாவட்ட செயலாளரான நடராஜ் நம்மிடம், “பவானி ஆறு, நீலகிரி மலைய விட்டிறங்கி தரையைத் தொடும்போதே அதை சீர்கெடுக்கத் தொடங்கிடுறாங்க. கோவை மேட்டுப்பாளையத்துல இந்த ஆற்றங்கரையோரத்துல சாய ஆலைகள், வாசனை திரவிய ஆலைகள்னு எக்கச்சக்க ஆலைகள் இருக்கு. கெமிக்கல் நிறைஞ்ச இந்த ஆலைகளோட கழிவுகளை விதிமுறைப்படி சுத்திகரிப்பு செய்யாம பவானியில கலந்துடறாங்க. பவானிசாகர் அணைக்கு வரும்போதே ரசாயனம் கலந்ததாதான், வந்து சேருது இந்த நதி. அங்கேர்ந்து சத்தியமங்கலம் உள்ளிட்ட பகுதிகளை நோக்கி நகருது. அப்போவாச்சும் விட்டு வைக்கிறாங்களா? ‘கோயமுத்தூர்க்காரன் உன்னைப் பாதித்தானே சீரழிச்சான், வா நாங்க மீதியையும் கெடுக்கறோம்’னு ஈரோட்டுல இருக்கிற அட்டை, பேப்பர் கம்பெனிக்காரங்க தங்களோட அக்கிரமத்தை ஆரம்பிச்சுடுறாங்க. அட்டை, பேப்பர் ஆலைகளுக்கு தண்ணீர் தேவை அதிகம். சத்தியமங்கலம் சுற்றுவட்டாரத்துல மட்டும் சுமார் 12 ஆலைகள் பவானிக்கரை ஓரமா அமைஞ்சிருக்குதுங்க. 1987ல கொத்தமங்கலம் பகுதியில முதன்முதலா அட்டைக் கம்பெனி ஒண்ணு ஆரம்பிச்சப்பவே, ‘எங்களோட நீராதாரத்தைக் கெடுக்க வரும் எமனே, ஓடிப்போடா’னு சொல்லி மக்கள் அந்த ஆலைக் கட்டுமானத்தை அடிச்சு நொறுக்கினாங்க. பிறகு, நாம ஆலையை விரட்டிட்டோம். இனி ஆலைகள் இங்கே அமையாதுன்னு மக்கள் நம்பினாங்க. ஆனா, பணம் தின்னி அரசியல்வாதிகள், அதிகாரிகளோட நரி புத்தியால ஒண்ணொண்ணா முளைச்சு, இன்னிக்கு கிட்டத்தட்ட இருபது ஆலைகளுக்கு மேல இருக்கு..சத்தியமங்கலம் வட்டாரத்துல சுமார் மூவாயிரம் ஏக்கருக்கும் மேலான விவசாயம் இந்த ஆலைகளால சீரழிஞ்சுருக்கு. ரசாயனக் கழிவுகள் பூமியில இறங்கறதால நிலத்தடி நீர், கிணற்று நீர் எல்லாமே கெட்டுப் போச்சு. கிணற்றுத் தண்ணி, கெமிக்கல் கரியால எந்தளவுக்கு கெட்டிருக்குன்னு நீங்களே பாருங்க (அதை காண்பிக்கிறார்). ஒருகாலத்துல நாங்க சமையல் பண்ணின எங்க கிணத்துத் தண்ணி இன்னைக்கு நாய்கூட குடிக்க முடியாதபடி கெட்டுப் போயிருக்கு. ஆளுங்கட்சி, எதிர்க்கட்சின்னு எந்தப் பாகுபாடும் இல்லாம, எல்லா கட்சிக்காரங்களும் ஏதோ ஒரு ஆலைக்காவது ஓனராவோ, பார்ட்னராவோ இருக்காங்க.மாஜி முதல்வர் எடப்பாடி பழனிசாமியோட நெருங்கின சொந்தக்காரரே இங்கே ஆலை நடத்துறார். முதல்வர் வரைக்கும் மனு மேலே மனு எழுதிப் போட்டாச்சு. எந்தப் பிரயோஜனமும் இல்லை. சரியாச் சொன்னா, கம்யூனிஸ்ட் கட்சிக்காரங்க கூட இந்த ஆலைகளோட கைக்கூலிகளா மாறிட்டாங்க, இதைவிடக் கேவலம் வேறென்னங்க வேணும்?’’ என்றார், விரக்தியோடு.பவானி நதி மீட்பு போராட்ட குழுவின் நிர்வாகிகளில் ஒருவரான கிரி. “உழைப்பாளிகளுக்கும் மக்களுக்கும் தோள் கொடுக்க வேண்டிய இந்திய கம்யூனிஸ்ட் கட்சியே சத்தியமங்கலம் வட்டாரத்தில் கார்ப்பரேட்களின் கைக்கூலியாக மாறிவிட்டது. நதியைப் பாழ்படுத்தும் ஆலைகளை எதிர்ப்பதுபோல் போராட்டம் நடத்துகிறது இந்திய கம்யூனிஸ்ட் கட்சி. ஆனால், அது முழுக்க முழுக்க பம்மாத்து வேலைதானே தவிர உண்மை இல்லை..பவானி ஆற்றில் நீர் நிறைந்து ஓடும் மழைக்காலத்தில் ஆலைக் கழிவுகளை ஓடைகளில் திறந்து விடுகிறார்கள். இதனால், பவானி நதி பாழாகிறது. கோடையில், ஆலைக் கழிவை ஆலையைச் சுற்றியுள்ள பூமியில் குழிதோண்டி அப்படியே அதில் இறக்கிடறாங்க. இதனால் நிலவளமும் கெட்டு, பூமியும் மலடாகிடுது.பல வருஷமா இந்த மாசுபட்ட தண்ணீரைக் குடித்து, சுத்தமில்லாத காற்றை சுவாசிக்கும் மக்களுக்கு விதவிதமான நோய்கள் வருகின்றன. இதைத் தவிர்க்க வேண்டுமானால், ரசாயனக் கழிவை சுத்திகரிக்க ஆர்.ஓ. பிளான்ட்டை நிறுவவேண்டும். அல்லது ஆலைகளை மூடவேண்டும். கம்யூனிஸ்ட் கட்சியினர் இந்த இரண்டையுமே வலியுறுத்தாமல், போலியாகப் போராட்டம் நடத்துகிறார்கள். அதனால், நாங்களே பொதுமக்களை திரட்டி வலுவான போராட்டத்தைத் தொடங்கியிருக்கிறோம்!” என்று முடித்தார்..இந்த விவகாரம் பற்றி பவானிசாகர் தொகுதியின் கம்யூனிஸ்ட் கட்சி நிர்வாகிகளிடம் பேசியபோது, “நடராஜ், கிரி எனும் இரு நபர்களும் தங்களைப் பிரபலப்படுத்திக்கொள்வதற்காக எங்கள் மீது பொய்ப்பழி போடுகிறார்கள். இப்படி வதந்தி பேச நாக்கு கூசவில்லையா? எந்த அடிப்படையில் இப்படிப் பிதற்றுகிறார்கள் என்றே தெரியவில்லை. பவானி நதி மீட்புக்காக போராடத் தொடங்கியவர்களே நாங்கள்தான். எங்கள் உயிரைக் கொடுத்தாவது பவானி நதியைக் காப்போம்!’’ என்றார்கள்.தமிழக விவசாயத்துறை அமைச்சர் எம்.ஆர்.கே.பன்னீர்செல்வத்திடம் இந்த விவகாரத்தை விளக்கினோம். “இந்த ஆலைகள் பல வருடங்களாக இயங்கிவருவதாகத் தெரிகிறது. அதேசமயம் தற்போது ஆற்றின் மாசு அதிகரித்திருப்பதால் விவசாயமும் விவசாயிகளும், மக்களும் பாதிப்புற்கு ஆளாகியிருப்பதும் புரிகிறது. விரைவில் இந்த விவகாரத்தை விரிவாக விசாரித்து அரசு உரிய நடவடிக்கை எடுக்கும்!” என்றார்.தண்ணீரில் ரசாயனம் கலப்பது, தாய்ப்பாலில் விஷத்தைக் கலப்பதற்கு சமம்!