ராஜ தந்திரமா... போர் வியூகமா? முரசு கொட்டிய ஸ்டாலின் அரெஸ்ட் லிஸ்ட் ரெடி

மொத்த தேசமும் கிழக்கு நோக்கி பார்வையை திருப்பியிருக்கிறது. காஷ்மீர் ரேஞ்சுக்கு தமிழகத்தை கையாளலாம் என்று நினைத்தவர்களுக்கு கசப்பு மருந்து கொடுத்திருக்கிறது தி.மு.க அரசு. ரெய்டுகள், அமைச்சர் செந்தில்பாலாஜி கைது விவகாரம் என தொடர்ந்து தி.மு.க அரசை சீண்டிவந்த பா.ஜ.க-வை, “தி.மு.க-காரனை சீண்டிப் பார்த்தால், தாங்க மாட்டீங்க...” என ஆவேசமாகப் கொந்தளித்திருக்கிறார் முதல்வர் ஸ்டாலின். இதன் பின்னணியில்தான் விரிகின்றன சீனியர்களின் ராஜதந்திர திட்டங்களும் அது பலிக்காமல்போன ஸ்டாலினின் அதிரடி போர் வியூகமும்! இனி தி.மு.க – பா.ஜ.க என இரு பக்கமும் சிறைகள் நோக்கி தலைகள் உருளலாம் என்பதே கோட்டை வட்டாரத்தின் லேட்டஸ்ட் ரெட் சிக்னல்!தமிழகத்தில் நடக்கும் அரசியல் களேபரங்கள் பற்றி டெல்லியின் மூத்த பத்திரிகையாளர் ஒருவரிடம் பேசினோம் … “அமைச்சர் செந்தில்பாலாஜியை அமலாக்கத் துறை கைது செய்திருப்பதன் மூலம் மத்திய பா.ஜ.க. அரசுக்கும் தி.மு.க. அரசுக்கும் இடையேயான மோதல் உச்சக்கட்டத்தை எட்டியுள்ளது. அமைச்சர் செந்தில் பாலாஜியை கைது செய்து டெல்லிக்கு அழைத்துவந்துவிட வேண்டுமென்ற டெல்லி பா.ஜ.க.வின் அசைன்மென்ட், அமைச்சருக்குநெஞ்சு வலி ஏற்பட்டதன் மூலம் நிறைவேறாமல் போனது.இதய அறுவை சிகிச்சைக்காக காவேரி மருத்துவமனையில் அனுமதிக்கப்பட்டிருக்கும் செந்தில் பாலாஜியிடம், எட்டு நாட்களுக்கு அங்கேயே அமலாக்கத்துறை விசாரணை மேற்கொள்ள செஷன்ஸ் நீதிமன்றம் உத்தரவிட்டுள்ளது. அதிலும் சில நிபந்தனைகளை நீதிபதி பிறப்பித்துள்ளதால், முழுமையான விசாரணையை மேற்கொள்ள முடியுமா என அமலாக்கத்துறை குழம்பிப் போயுள்ளது. இடையில் செந்தில் பாலாஜியை இலாகா இல்லாத அமைச்சராக்க முயன்ற தமிழக முதல்வரின் எண்ணத்திற்கு ஆளுநர் ஆர்.என்.ரவி முட்டுக்கட்டை போட்டதால், தமிழக அரசின் சார்பில் அரசாணை வெளியிட்டு, ராஜ்பவனுக்கு அதிர்ச்சி கொடுத்தார் ஸ்டாலின்.ஆளுநருக்கு அதிகாரம் இல்லை..?ஒரு மாநில அமைச்சரவை குறித்து இந்திய அரசியலமைப்பு சட்டப்பிரிவு 164 தெளிவாக குறிப்பிடப்பட்டுள்ளது. எம்.எல்.ஏக்களால் முதல்வர் தேர்வு செய்யப்படும் நிலையில் அவருக்கு ஆளுநர் பதவிப் பிரமாணம் செய்துவைப்பது வழக்கம். அதன்பிறகு முதல்வர் பரிந்துரையின் பேரில் அமைச்சர்களுக்கான இலாகாக்களை ஆளுநர் நியமனம் செய்கிறார். இந்த சட்டப்பிரிவில் 164-ல் Pleasure of Governor என்ற வார்த்தை பதம் உள்ளது.ஆனாலும் சட்டப்படி மாநில முதல்வருக்குதான் இதில் அதிகாரம் உள்ளது என்று பல்வேறு வழக்குகளில் பல்வேறு மாநில நீதிமன்றங்கள் தங்களது தீர்ப்பில் தெளிவாகக் குறிப்பிட்டுள்ளன. இந்த சட்டப்பிரிவு 164 குறித்து முதல்வரிடம் ஆர்.எஸ்.பாரதி, என்.ஆர்.இளங்கோ உள்ளிட்ட மூத்த சட்ட வல்லுநர்கள் தெளிவாக விளக்கினர். அதன் அடிப்படையிலும், சட்டப்பேரவை செயலாளர் சீனிவாசன் உள்பட பேரவை அதிகாரிகளுடன் தீவிர ஆலோசனை நடத்திய அடிப்படையிலும்தான் இலாகா இல்லாத அமைச்சராக செந்தில்பாலாஜி தொடர்வார் என்கிற அராசணை வெளியிடப்பட்டுள்ளது..டெல்லியில் இருந்து வந்த மெசேஜ்பதிலுக்கு வரும் தி.மு.க. அரசுக்கு அதிர்ச்சி வைத்தியம் கொடுக்க திட்டமிட்டது ராஜ்பவன். அதாவது, 356-வது சட்டப்பிரிவைதான் தற்போது பயன்படுத்த முடியாத நிலை உள்ளது. ஆனால், அதற்கு பதிலாக 355 சட்டப்பிரிவை தமிழக அரசுக்கு எதிராக பயன்படுத்தலாமா என்று தீவிர ஆலோசனையில் இறங்கியிருக்கிறது ராஜ்பவன். இதைத் தொடர்ந்து, தி.மு.க அரசு வெளியிட்ட செந்தில்பாலாஜி தொடர்பான அரசாணை விவகாரத்தை உள்துறை அமைச்சகத்திற்கு ஆளுநர் ஆர்.என்.ரவி தெரிவித்திருக்கிறார்.இதையடுத்து, தமிழக அரசின் அரசாணையை ரத்து செய்யும் அதிகாரம் தொடர்பாக மத்திய அரசின் தலைமை வழக்கறிஞருடன் ஆலோசனை செய்யும் வரை அமைதியாக இருக்குமாறு மத்திய உள்துறை அமைச்சர் அலுவலகத்தில் இருந்து ஆளுநருக்கு தகவல் அனுப்பப்பட்டுள்ளது.ஒருவேளை 355 சட்டப்பிரிவை அமல்படுத்த மத்திய பா.ஜ.க. அரசு, ஆளுநருக்கு ஒப்புதல் கொடுக்கும்பட்சத்தில், ஆறு மாதங்களுக்கு தி.மு.க அரசின் மொத்த அமைச்சரவையும் செயல்பட முடியாமல் முடங்கும் நிலை ஏற்படும். அதற்கான சாத்தியக்கூறுகளை ராஜ்பவன் தீவிரமாக ஆராய்ந்து வருகிறது.கண்காணிப்பு வளையத்தில் அமைச்சர்கள்கூடவே, தி.மு.க. அமைச்சர்கள் சிலரும் மத்திய ஏஜென்சிகளின் கண்காணிப்பு வளையத்திற்குள் கொண்டுவரப்பட்டுள்ளனர். அவர்களின் நடவடிக்கைகள், மூவ்கள் கண்காணிக்கப்படுவதுடன் அலைபேசிகளையும் ஒட்டுக் கேட்கும் ஏற்பாடுகள் தொடங்கிவிட்டன. அந்தப் பட்டியலில் முதலில் இருப்பவர் பி.டி.ஆர்.பழனிவேல் தியாகராஜன். அவரிடம் ஆடியோ தொடர்பாக விசாரணை மேற்கொள்ள வேண்டுமென அ.தி.மு.க., பா.ஜ.க உள்ளிட்ட கட்சிகள் தொடர்ந்து மத்திய அரசையும், ஆளுநரையும் வலியுறுத்தி வருகின்றன. தற்போது இந்த ஆடியோ தொடர்பாக பி.டி.ஆரை விசாரணைக்கு அழைக்க தயாராகிவருகிறது அமலாக்கத் துறை.இதேபோல் அமைச்சர்கள் சிவசங்கர், அனிதா ராதாகிருஷ்ணன், மூர்த்தி, கே.என்.நேரு, துரைமுருகன், கீதாஜீவன், ஐ.பெரியசாமி, மா.சுப்பிரமணியன் மற்றும் தி.மு.க எம்.பி-க்கள் ஆ.ராசா, ஜெகத்ரட்சகன், டி.ஆர்.பாலு உள்ளிட்ட சுமார் 15 பேர்களை அமலாக்கத்துறை விசாரணை வளையத்திற்குள் கொண்டுவர முடிவு செய்துள்ளது. இதன் மூலம் தி.மு.க அரசுக்கு தொடர் நெருக்கடி கொடுத்து நாடாளுமன்றத் தேர்தல் பணிகளை செய்யவிடாமல் முடக்கிவிடலாம் என்பதே டெல்லி பா.ஜ.க-வின் அரசியல் கணக்கு.ராஜ தந்திரத்திற்கு தடாஇதற்கிடையே மேற்கண்ட நெருக்கடிகள் குறித்து தகவல் அறிந்த தி.மு.க-வின் சீனியர்கள் இருவர் இதுகுறித்து தனியாக நீண்ட நேரம் ஆலோசித்துள்ளனர். அதாவது ‘டெல்லியை பகைத்துக்கொள்ள வேண்டாம். அதேசமயம் ஒட்டிகொள்ளவும் வேண்டாம்’ என்பதே அவர்களின் லாஜிக். அப்போது அவர்களது பேச்சு மறைந்த தி.மு.க தலைவர் கருணாநிதியின் ராஜதந்திர மூவ்கள் பற்றி திரும்பியிருக்கிறது… ‘அண்ணே, தலைவர் கலைஞர் இப்ப இருந்திருந்தா இப்படி எல்லாம் நடக்க விட்டிருக்க மாட்டார். இப்பகூட ஒண்ணும் கெட்டுப்போயிடலை, கட்சித் தலைமை அனுமதி கொடுத்தா, காங்கிரஸ்காரங்க ரொம்ப துள்ளிக்கிட்டு இருக்காங்க. அவங்களை ஒரு தட்டு தட்டலாம். அப்புறம் பிரச்னைன்னு வந்தா, சி.எம். காங்கிரஸை கண்டிச்சி ஒரு அறிக்கை விட்டாபோதும். டெல்லி பா.ஜ.க சைலன்ட் ஆகிடும். டெல்லியில நாங்க பேசிக்கிறோம். கலைஞர் இருந்திருந்தா இதைத்தான் செஞ்சிருப்பார்’ என்று பேசியிருக்கிறார்கள். தொடர்ந்து அவர்களில் ஒருவர், சூப்பர் சீனியரிடம் ‘அண்ணே என் பேச்சு எல்லாம் அவர்கிட்ட எடுபடாது. நீங்கதான் இந்த விஷயத்தை தலைவர்கிட்ட பேசணும்’ என்றிருக்கிறார்.அந்த சூப்பர் சீனியரும் தயங்கி தயங்கி இந்த விஷயத்தை சித்தரஞ்சன் சாலை தரப்பில் பாஸ் செய்துள்ளார்… அதாவது, ’தலைவர் கலைஞர் இருந்திருந்தால், இந்த விஷயத்தில் மத்திய பா.ஜ.க-வுக்கு நம் மீது இருக்கும் கோபத்தை குறைக்கத்தான் விரும்பியிருப்பார். இப்போதும் காலம் கடந்துவிடவில்லை... தவிர நமக்கு சுமையாக இருக்கும் காங்கிரஸை கழற்றிவிட இதுதான் சரியான தருணம். அந்தக் கட்சியை நான் டீல் செய்துகொள்கிறேன். மற்றவை எல்லாம் சுபமாக நடக்கும். டெல்லியில் நம் சீனியர் எம்.பி.க்கள் சிலர் பார்த்துக்கொள்வார்கள். நம் ஆட்சிக்கு ஒரு குடைச்சலும் வராது’ என்று அட்வைஸ் செய்திருக்கிறார்.இதற்கு பதில் ஏதும் சொல்லாத முதல்வர் தரப்பு இதுகுறித்து தனக்கு நெருக்கமான சிலரிடம் ஆலோசித்துள்ளது. அவர்களோ, ’வார்த்தைக்கு வார்த்தை திராவிட மாடல் என்று சொல்கிறோம். பா.ஜ.க-வின் சித்தாந்ததுக்கு நேரதிரானது திராவிட மாடல் சித்தாந்தம். நமது பலமே சமூக நீதி சிந்தனைதான். ஒருபோதும் பாசிச பா.ஜ.க அரசுக்கு அடிபணிந்துவிடக் கூடாது. தவிர தமிழகத்தில் பா.ஜ.க எதிர்ப்பு அரசியல்தான் ஓட்டுக்களைப் பெற்றுத் தரும்’ என்று சொல்லி சீனியர்களின் ராஜதந்திர வியூகங்களுக்கு முட்டுக்கட்டை போட்டுவிட்டனர். ஸ்டாலினும் அதை ஏற்றுக்கொண்டார். அதையடுத்தே ஸ்டாலின் “தி.மு.க-காரனை சீண்டினா தாங்க மாட்டீங்க’ என்கிற வீடியோ எச்சரிக்கையையும் வெளியிட்டார்.களமிறங்கிய காவல்துறை!இதையடுத்து, தி.மு.க அரசைப் பற்றி அவதூறு கருத்துகளை வெளியிட்டு வரும் பா.ஜ.க. நிர்வாகிகளை வளைத்து வளைத்து கைது செய்யும் வேலையில் காவல்துறை களமிறங்கியது. ஏற்கெனவே பா.ஜ.க. நெசவாளர் பிரிவு மாநிலச் செயலாளர் மின்ட் ரமேஷ், பா.ஜ.க. தொழில் துறைப் பிரிவு துணைத் தலைவர் செல்வகுமார், பா.ஜ.க. தூத்துக்குடி வடக்கு மாவட்ட சமூக ஊடகப் பிரிவு செயலாளர் செல்வபாலன், பா.ஜ.க. தொழில்நுட்பப் பிரிவு தூத்துக்குடி மாவட்டச் செயலாளர் இசக்கி, கன்னியாகுமரி மாவட்ட பா.ஜ.க ஆதரவாளரான வழக்கறிஞர் செந்தில்குமார் ஆகியோர் கைது செய்யப்பட்ட நிலையில், அண்ணாமலையின் வலதுகரமாக பார்க்கப்படும் பா.ஜ.க. மாநிலச் செயலாளர் எஸ்.ஜி.சூர்யாவை ஜூன் 16-ம் தேதி காவல்துறை கைது செய்தது. தொடர்ந்து ஜூன் 17-ம் தேதி நள்ளிரவு மதுரையில் பா.ஜ.க கிழக்கு மண்டல செயலாளர் ஆனந்தராஜ், 28வது வார்டு பட்டியல் அணி மண்டலத் தலைவர் மலைச்சாமி, பட்டியல் அணி மாநில செயற்குழு உறுப்பினர் வைரமுத்து ஆகியோரை ஆட்கடத்தல், அடிதடி வழக்கில் கைது செய்துள்ளது காவல் துறை..தவிர, தமிழகம் முழுவதும் பா.ஜ.க. நிர்வாகிகள் மீதான புகார்கள் தூசித்தட்டப்பட்டு வருகின்றன. மாநில உளவுத்துறை மாவட்டங்கள் வாரியாக கைது செய்யப்பட வேண்டிய பா.ஜ.க நபர்களின் பட்டியலை தயாரித்துவருகிறது. முதல்வர் இந்த பட்டியலை டிக் செய்த மறு நிமிடமே மாநிலம் முழுவதும் பா.ஜ.கவினர் மீதா கைது படலம் ஆரம்பமாகும். அவர்களுக்கு தனி ’கவனிப்பு’ இருக்கிறது” என்றார் விரிவாக. அடுத்து அ.தி.மு.க. மாஜிக்கள்? இதேபோல் எதிர்க்கட்சியான அ.தி.மு.க-வுக்கும் செக் வைக்க முடிவு செய்துள்ளது தி.மு.க. அரசு. அதன்படி லஞ்ச ஒழிப்பு போலீஸார் ரெய்டு நடத்தியுள்ள மாஜி அ.தி.மு.க., அமைச்சர்களில் கே.பி.அன்பழகன், சி.விஜயபாஸ்கர் மீது வழக்குப் பதிவு செய்யப்பட்ட நிலையில், முதற்கட்டமாக இந்த இருவரையும் கைது செய்து அ.தி.மு.க-வுக்கு ஷாக் கொடுக்க தி.மு.க. தயார் ஆகிவிட்டது என்கிறார்கள் விவரமறிந்தவர்கள். உங்க சண்டையில மக்கள் திட்டங்களை மறந்துடாதீங்க! -பாபுபடங்கள் : ம.செந்தில்நாதன்