ரீடர்ஸ் ரியாக்ஷன் : அடுத்தவர் பணத்தில் ஆஸ்கர் அவார்டு!

அடுத்தவர் பணத்தில் ஆஸ்கர் அவார்டு! ‘விஜய் பயிலகம் Vs மாணவர் மன்றம் - விஜய்யுடன் போட்டி போடும் தி.மு.க.!’ வம்பானந்தா கலக்கிட்டாரு. அரசியலில் நுழைய முதலில் மாணவர்களைத்தான் அரசியல்வாதிகள் தேர்ந்தெடுப்பது வாடிக்கை. பெற்றோர் யாரும் தன் பிள்ளைகளை அரசியலில் நுழைய விடமாட்டார்கள். `நன்கு படித்து வேலை தேடி குடும்பத்தைப் பார்க்க வேண்டும்' என்று நாக்கில் சர்க்கரையை தடவிவிட்டு பேசும் அரசியல்வாதிகள் மத்தியில் மாணவர்கள்தான் விழித்துக் கொள்ளவேண்டும்.-தே.அண்ணாதுரை, கம்பம் ஜி.எஸ்.டி. வரியால் வணிகர்கள் அடையும் இன்னல்களை தமிழ்நாடு வணிகர் சங்கங்களின் பேரமைப்புத் தலைவர் விக்கிரமராஜா, ‘சுருக்’ என்று உரைக்கும்படி உணர்த்தியிருந்தார். ஜி.எஸ்.டி செலுத்தாத வியாபாரிகளின் விவரங்களை அமலாக்கத்துறையிடம் நிதித்துறை ஒப்படைத்திருப்பது கொடுமையிலும் கொடுமை. அப்பாவி வணிகர்களுக்கு இவ்வளவு தொல்லைகளைக் கொடுத்துவரும் அதிகார வர்க்கம் கார்ப்பரேட் கம்பெனிகளிடம் கைகட்டி நிற்பது கடவுளுக்கே வெளிச்சம்.-ஆர்.வி., கரூர் ‘தெரியாது தெரியாது தெரியாது ஸ்வீட் ட்ரீட்மென்ட் ஷாக் பாலாஜி!’ -மடியில் கனமில்லை என்றால் செந்தில் பாலாஜி உள்ளதை உள்ளபடி சொல்லவேண்டியதுதானே? அதை விட்டுவிட்டு, ‘தெரியாது தெரியாது’ என்று வக்கீல் சொல்லிக்கொடுப்பது மாதிரி ஒப்புவித்தால், தனது தம்பி இருக்கும் திசைக்கு அமலாக்கத்துறையின் கோபம் திரும்பும். அதே தம்பி இவரைக் காட்டிக் கொடுத்தால் எல்லா திசையும் இவர் பக்கம்தான் திரும்பும். கூட்டிக் கழிச்சி பாருங்க கணக்கு சரியா வரும்.-பாரதிமுருகன், மணலூர்பேட்டை.பொம்மன், பெள்ளி இவர்களை வைத்து ‘தி எலிஃபண்ட் விஸ்பரர்ஸ்’ ஆவணப் படத்தை எடுத்து ஆஸ்கர் விருது வாங்கிய இயக்குநர் கார்த்திகி கான்சாவ்ல்ஸ், யானை வளர்ப்புத் தம்பதியிடம் ஒரு லட்சம் ஏமாற்றியதை அறிந்து நெஞ்சு பொறுக்கவில்லை. அடுத்தவர் பணத்தை வைத்து ஆஸ்கர் அவார்டு வாங்கியது எளியோரை ஏமாற்றிய செயல். வாங்கிய பணத்தைத் திருப்பித் தருவதுதான் கார்த்திகிக்கு மரியாதை மட்டுமல்ல, பெரியவர்களை மதிக்கும் செயல்.-எஸ்.மந்திரமூர்த்தி, புதுச்சத்திரம் ஆண்டு முழுக்க திராட்சை அறுவடை, முப்போக நெல் விளைச்சல் என பெயர் பெற்ற கம்பம் பகுதியில் லித்தியம் கிடைப்பதாகக் கூறி துளையிடுவது விவசாயத்தைக் கெடுப்பது மத்திய அரசின் வேலையா? தமிழகத்தின் செழிப்பான பகுதியில் எந்த அரசாக இருந்தாலும் கல்லறை தோண்டாமல் இருந்தால் நல்லது.-சு.ஆறுமுகம், கழுகுமலை