ரீடர்ஸ் ரியாக்ஷன் :லாஜிக் இல்லாத மேஜிக்!

`எப்போ எவன் சறுக்குவான் ஒரே அமுக்கா அமுக்கி புதைத்துவிடலாம்' என கண்களில் விளக்கெண்ணெய் விட்டுக்கொண்டு காத்திருந்தவர்கள் கண்களுக்கு குளிர்ச்சியாக நடிகர் ரஜினிகாந்த் யோகி காலில் விழுந்து ஆசி பெற்றது பழம் நழுவி வாயில் விழுந்தது போலாகிவிட்டது.-என்.ஏ.நாகசுந்தரம், குஞ்சன்விளை ‘அனைத்து மத ஆதரவாளரா அண்ணாமலை? பா.ஜ.க.வில் திடீர் பதற்றம்...’ கட்டுரை பல சந்தேகங்களை ஏற்படுத்தியுள்ளது. அண்ணாமலை யாத்திரை செல்வது ஏன்? ஒன்று, பா.ஜ.க.வை தமிழகத்தில் தன் தலைமையில் ஆட்சி அமைப்பது, இரண்டு அ.தி.மு.க. கூட்டணியுடன் களத்தில் இறங்குவது, மூன்று தனித்து நின்று ஓட்டுவங்கி எவ்வளவு என்று பார்த்து 2026ல் களம் இறங்குவது, இதற்காகத்தான் எல்லா மதத்தினரையும் பார்த்து கைகூப்புவது. முடிவு மக்களின் விரல்களில் உள்ளது.-தே.மாதவராஜ், கோயம்புத்தூர் ‘பொதுப்பாட திட்டத்துக்கு தடா.. சைலேந்திரபாபு நியமனத்துக்கு நோ! தொடரும் ஆளுநர் Vs அறிவாலய யுத்தம்’ கட்டுரை, ஆளுநருக்கும் -அரசுக்கும் இடையே நிகழ்ந்துவரும் பனிப்போரை வெளிச்சம் போட்டுக்காட்டியிருந்தது. ஆளுநரின் நடவடிக்கைகள் தேவையற்ற ஒன்று என வாதிடும் தி.மு.க.வினர், அங்குள்ள அமைச்சர்கள் முதல் கட்சியின் மேடைப் பேச்சாளர்கள் வரை அரசியல் சட்டத்தின் விதிமுறைப்படி நியமிக்கப்பட்டுள்ள ஆளுநரை சீண்டிவருவதையும் கவனத்தில் கொள்ளவேண்டும்.-இரா.வளையாபதி, தோட்டக்குறிச்சி.மெரினாவில் ஜல்லிக்கட்டு போராட்டம் வெடித்து உலகையே வியக்கவைத்ததற்கு காரணம் முழு வீச்சில் இளைஞர்கள் கூட்டத்தின் ஒட்டுமொத்த பங்களிப்புதான். மற்றொரு புரட்சிப் போராட்டம் மெரினாவில் வெடிக்கப் போகிறதா? வேடிக்கையாக இருக்கிறது. ஜல்லிக்கட்டு போராட்டத்தில் ஒரு லாஜிக் இருந்தது. அரசியல்வாதிகள் இதை மேஜிக் என்று நம்பி களத்தில் இறங்குவது வீண்! புரட்சி, போராட்டம் என்க் கூறி இந்த அரசியல்வாதிகள் எந்த ஆணியும் புடுங்கவேண்டாம் என்பதுதான் தமிழக மக்களின் எதிர்ப்பார்ப்பு!-பாரதிமுருகன், மணலூர்பேட்டை ‘ஜெயிலர்’ பட வெற்றி தந்த உற்சாகம் இமயமலைக்கு ரஜினி சென்றது சரி. அங்கிருந்து உத்தரப்பிரதேசம் சென்று சில ஆன்மிகவாதிகளைச் சந்தித்துள்ளார். ராஜா பையா என்ற தாதாவை சந்தித்ததன் விளைவு அவருக்கு கெட்ட பெயர்தான். இதை எப்படி போக்கப்போகிறார் என்பதற்கு அவர் வந்தால் விடை கிடைத்துவிடும்.-சு.ஆறுமுகம், கழுகுமலை ‘உலக சாதனை படைத்த ‘விக்ரம்’ லேண்டர்... இந்தியாவின் புதிய வொண்டர்’ கட்டுரையைப் படித்தேன். அதில் சந்திராயன் 1 திட்டத்தில் மயில்சாமி, 2ல் வனிதா முத்தையா, மங்கல்யான் திட்டத்தில் சுப்பையா அருணன், சந்திராயன் -3ல் வீரமுத்துவேல் என்ற அனைவரும் நமது அரசுப் பள்ளி மாணவர்கள் என்பதும் அவர்கள் அரசுப் பள்ளியில் தமிழ் பாடத்திட்டத்தின் கீழ் படித்தவர்கள் என்பதும் வெகுசிறப்பு. ஆனால் தற்போது அரசுப் பள்ளிகளின் தரம் கேள்விக்குறியாக மாறி வெகுநாட்களாகிவிட்டது.-அ.குணசேகரன், புவனகிரி