ரவீந்திரநாத், எடப்பாடி பழனிசாமி...பின்னே ஸ்டாலின்? - வேகமெடுக்கும் வழக்குகள்

`ஒண்ணே ஒண்ணு கண்ணே கண்ணு' என ஜெயித்த ஒரே ஒரு எம்.பி பதவியும் பறிபோனதில் ஓ.பன்னீர்செல்வத்தைவிட எடப்பாடி பழனிசாமி தரப்பு அதிர்ச்சியின் உச்சத்தில் இருக்கிறதாம். காரணம், ரவீந்திரநாத்தை போல அவர் தொடர்பான வழக்கும் வேகமெடுத்து வருவதுதான்..அ.தி.மு.க. ஒருங்கிணைப்பாளராக இருந்த ஓ.பன்னீர்செல்வத்தின் மகன் ரவீந்திரநாத், 2019ல் நடந்த நாடாளுமன்றத் தேர்தலில் தேனி தொகுதியில் போட்டியிட்டார். அப்போது, ஆவணங்களை திருத்தியதாகவும் வாக்காளர்களுக்குப் பணம் கொடுத்து தேர்தலில் வெற்றி பெற்றதாகவும் அவர் மீது புகார் எழுந்தது.இதுதொடர்பாக, தேனியைச் சேர்ந்த பொறியாளர் மிலானி என்பவர், ரவீந்திரநாத்தின் வெற்றியை எதிர்த்து சென்னை உயர்நீதிமன்றத்தில் வழக்குத் தொடர்ந்தார். வழக்கை விசாரித்த நீதிமன்றம், `ரவீந்திரநாத் வெற்றி பெற்றது செல்லாது’ என கடந்த ஜூலை 6ம் தேதி தீர்ப்பளித்தது. இதன்பிறகு ரவீந்திரநாத் மேல்முறையீடு செய்வதற்கு வசதியாக அத்தீர்ப்பை 30 நாள்களுக்கு நிறுத்தி வைப்பதாகவும் அறிவித்தது நீதிமன்றம்..ஒற்றைத் தலைமைக்கு எதிராக ஓ.பன்னீர்செல்வம் நீதிமன்றத்தில் போராடி வரும் நிலையில், ஒரு சிலரைத் தவிர, மொத்த நிர்வாகிகளும் எடப்பாடி பழனிசாமி பக்கம் இருப்பதால் பன்னீர்செல்வத்தால் சிறு துரும்பைக்கூட கிள்ளிப் போட முடியவில்லை.இந்தநிலையில், ரவீந்திரநாத்துக்கு எதிரான தீர்ப்பு ஓ.பன்னீர்செல்வம் தரப்பை மிகவும் சோர்வடைய வைத்திருக்கிறது. இதனை உற்சாகமாக கொண்டாட வேண்டிய எடப்பாடி தரப்போ படுசைலண்டாக இருப்பது, பல்வேறு சந்தேகங்களை ஏற்படுத்தியுள்ளது.ரவீந்திரநாத்துக்கு எதிராக மட்டுமல்ல, எடப்பாடி பழனிசாமிக்கு எதிராகவும் வழக்கு தொடர்ந்திருக்கிறார் மிலானி. அவர் நம்மிடம், ``2021 சட்டமன்றத் தேர்தலில் எடப்பாடி தொகுதியில் பழனிசாமி போட்டியிட்டார். அவர், தனது வேட்புமனு மற்றும் பிரமாணப் பத்திரத்தில் சொத்து விவரம் உட்பட பல்வேறு முக்கிய தகவல்களை தவறாகத் தெரிவித்துள்ளார். எனவே அவர் மீது மக்கள் பிரதிநிதித்துவச் சட்டத்தின்கீழ் நடவடிக்கை எடுக்கவேண்டும் என்று வலியுறுத்தி வழக்கு தொடர்ந்தேன்.எடப்பாடி மீது நான் தொடர்ந்திருப்பது கிரிமினல் வழக்கு. இவ்வழக்கின் தீர்ப்பை என்னால் கணிக்க முடியாது. ஆனால், அவருக்கு எதிராக அமையும் என ஒருவித எதிர்பார்ப்பு இருக்கிறது. இந்த வழக்கில் இருந்து பழனிசாமி அவ்வளவு எளிதாக தப்பிக்க முடியாது. அந்த அளவுக்கு 100 சதவிகிதம் தகுதியான வழக்கு இது.இதுதொடர்பாக எம்.பி.க்கள் மற்றும் எம்.எல்.ஏ.க்கள் வழக்கை விசாரிக்கக் கூடிய நீதிமன்றத்தில் பார்ட்டி இன் பெட்டிஷனராக நானே ஆஜராகி வாதாடினேன். எடப்பாடி பழனிசாமி மீது நான் சொல்லி இருக்கக்கூடிய புகாருக்கு அவ்வளவு எளிதில் எஃப்.ஐ.ஆர் போடமாட்டார்கள். இதை கோர்ட் முறையாக விசாரித்த பிறகு, `எடப்பாடி பழனிசாமி மீது போலீஸார் எஃப்.ஐ.ஆர் போடவேண்டும்' என உத்தரவிட்டது. .இவ்வழக்கில், `போலீஸார் எஃப்.ஐ.ஆர் போட வேண்டும்' என நான் வலியுறுத்தவில்லை. ஆனால் நீதிமன்றம் வழக்கின் ஸ்திரத்தன்மையை உற்று நோக்கியது. பிறகு தாமாகவே முன்வந்து இவ்வழக்கில் எடப்பாடி பழனிசாமி மீது போலீஸார் எஃப்.ஐ.ஆர் போட வேண்டும் என உத்தரவிட்டது.வழக்கின் தீவிரம் மற்றும் வழக்கு செல்லும் வேகம் எடப்பாடி தரப்பை பாதித்திருக்கிறது. இதைத்தொடர்ந்து ‘வழக்கை ரத்து செய்ய வேண்டும்’ என பழனிசாமி உயர்நீதிமன்றத்தில் மனுதாக்கல் செய்து இருக்கிறார். இது தொடர்பான விசாரணை கடந்த ஜூன் 6ம் தேதி வந்திருக்க வேண்டும். ஆனால், இதுவரை வரவில்லை.தேர்தலின்போது, சொத்து விவரங்களை தேர்தல் கமிஷனுக்கு கொடுக்கப்படும் அஃபிடவிட்டில் தெளிவாக தெரிவிக்க வேண்டும். ஆனால், பழனிசாமி அப்படிச் செய்யவில்லை. அதேபோல் சின்னத்துக்கான ஏ மற்றும் பி படிவத்தில் பன்னீர்செல்வம் மற்றும் பழனிசாமி ஆகியோர் கையெழுத்துப் போட அதிகாரம் இல்லை. இதனால் வழக்கில் சாட்சியாக சேர்க்கப்பட்டிருக்கிறார் பன்னீர்செல்வம்.அதாவது, அ.தி.மு.க சட்ட விதிகளின்படி தேர்தல் மூலம் `பொதுச் செயலாளர்’ தேர்வு செய்யப்பட வேண்டும். அவர்தான் `ஏ’ மற்றும் `பி’ படிவத்தில் கையெழுத்திடும் அதிகாரம் படைத்தவர். நாடாளுமன்ற விதிப்படி தகுதியான நபர்கள் மட்டுமே படிவங்களில் கையெழுத்திட வேண்டும். கழக ஒருங்கிணைப்பாளர், இணை ஒருங்கிணைப்பாளர் என இரண்டு பேர் வேட்பாளரின் சின்னத்துக்கான படிவங்களில் கையொப்பமிட்டது தவறு.2021 சட்டசபைத் தேர்தலில் அ.தி.மு.க சார்பில் வெற்றி பெற்ற அனைவரின் வெற்றியும் தவறானது. தேர்தல் ஆணையத்திடம் தவறான உறுதிமொழி கொடுத்து அ.தி.மு.கவினர் வெற்றி பெற்றிருக்கிறார்கள். இதை எதிர்த்து ஒவ்வொரு தொகுதிக்கும் சென்று நானே வழக்குத் தொடர முடியாது. நான் ஒரு ‘சாம்பிள்’ காட்டிவிட்டேன். அவ்வளவுதான்'' என்றவர்,``2018ம் ஆண்டு வரை தேனி மாவட்ட தி.மு.க இளைஞரணி அமைப்பாளராக இருந்தேன். இப்போது இதுபோன்ற பொதுநல வழக்குகளில் மட்டுமே கவனம் செலுத்தி வருகிறேன்'' என்கிறார் புன்சிரிப்புடன்.எடப்பாடிக்கு எதிரான வழக்கு குறித்து அ.தி.மு.க.வின் சட்ட ஆலோசகரும் முன்னாள் எம்.எல்.ஏவுமான ஐ.எஸ்.இன்பதுரையிடம் கேட்டபோது, ``எடப்பாடி பழனிசாமிக்கு எதிரான மனு தாக்கல் செய்தவர் எடப்பாடி தொகுதியைச் சேர்ந்தவரோ, அவருக்கு எதிராக தேர்தலில் போட்டியிட்டவரோ அல்ல. வேட்புமனுவில் எந்த தவறான தகவலும் எடப்பாடி பழனிசாமி தெரிவிக்கப்படவில்லை.எனவே, இந்தப் புகார் விசாரணைக்கு உகந்ததல்ல. ஓராண்டு கால அவகாசத்துக்குப் பிறகு இப்புகார் தாக்கல் செய்யப்பட்டுள்ளது. இதை கருத்தில் கொள்ளாமல் சேலம் நீதிமன்றம் விசாரணைக்கு உத்தரவிட்டிருக்கிறது. இவ்வழக்கை சட்டப்படி சந்திப்போம். தி.மு.க நினைப்பதுபோல் எதுவும் நடக்காது" என்றார் உறுதியாக..எடப்பாடி மீதான வழக்கை தி.மு.க.வின் முன்னாள் நிர்வாகியான மிலானி கையில் எடுத்து இருப்பதால், அ.தி.மு.க தரப்பும் பதிலுக்கு உச்ச நீதிமன்றத்தில் நிலுவையில் இருக்கும் கொளத்தூர் தொகுதி தேர்தல் வழக்கை தீவிரப்படுத்தி இருக்கிறது.அதாவது, 2011ல் நடந்த தமிழக சட்டசபைத் தேர்தலில் கொளத்தூர் தொகுதியில் போட்டியிட்டார் ஸ்டாலின். அவரை எதிர்த்து அ.தி.மு.க. சார்பில் போட்டியிட்ட சைதை துரைசாமி, 3000 வாக்குகள் வித்தியாசத்தில் வெற்றி வாய்ப்பை இழந்தார்.இந்தத் தேர்தலில், வாக்காளர்களுக்கு பணம் கொடுத்து ஸ்டாலின் வெற்றி பெற்றதாக சென்னை உயர்நீதிமன்றத்தில் வழக்குத் தொடர்ந்தார். ஆனாலும் வழக்கு தள்ளுபடி செய்யப்பட்டது. உச்ச நீதிமன்றத்தில் மேல்முறையீடு செய்தார். வழக்கின் விசாரணை முடியும் தறுவாயில் இருக்கிறது. வழக்கின் தீர்ப்பு ஸ்டாலினுக்கு எதிராக வந்தால் அவர் முதல்வர் தகுதியை இழப்பார் எனக் கணக்குப் போட்டு காய்களை நகர்த்தி வருகிறது, அ.தி.மு.க.வழக்குகள் வேகமெடுக்கும் காலம்போல.