“நீங்க ஸ்டாலினைப் பார்த்தா நான் அமித் ஷாவை பார்ப்பேன்!” மிரள வைக்கும் பெரியார் பல்கலை துணைவேந்தர்...

‘சமூக நீதிக்குப் பாடுபட்ட பெரியாரின் பெயரால் இயங்கும் பல்கலைக் கழகத்திலேயே சாதிப்பாகுபாடுகள் பார்க்கப்படுகிறது. அரசின் விதிமுறைகள் அணுவும் கடைபிடிக்கப்படுவதில்லை!’ - இப்படியொரு குற்றச்சாட்டை வீசியிருகிறார்கள் சேலம் பெரியார் பல்கலைக்கழக ஆசிரியர் - தொழிலாளர் சங்கத்தினர்.1997ல் தொடங்கப்பட்டது முதல் சீராக இயங்கிய இந்தப் பல்கலைக்கழகத்தின் மீது 2010-க்கு பிறகுதான் சர்ச்சைகள் வரத்தொடங்கியன. 2012 -2015 காலகட்டத்தில் பதிவாளராகப் பணிபுரிந்த அங்கமுத்து என்பவர் விதிகளை மீறி செயல்பட்டார் என்று குற்றம்சாட்டில் லஞ்ச ஒழிப்புத் துறையினர் வழக்குத் தொடந்தனர். 2018, டிசம்பரில் கடிதம் ஒன்றை எழுதி வைத்துவிட்டு, அங்கமுத்து தற்கொலை செய்துகொண்டார். தொடர்ந்து சர்ச்சையில் சிக்கிய பல்கலைக்கழகத்தை விசாரிக்க உயர்கல்வித் துறைச் செயலாளர் பழனிசாமி தலைமையில் குழு அமைத்து தற்போதுவரை விசாரணை ஜவ்வாக இழுக்கிறது..இவ்வளவு ரணகளத்திலும் துணைவேந்தரின் சர்வாதிகாரப் போக்கை கட்டுப்படுத்த முடியவில்லை என்று குற்றம்சாட்டுகிறார்கள், பல்கலைக்கழக ஆசிரியர்கள்.பெரியார் பல்கலைக்கழக தொழிலாளர் சங்க செயற்குழு உறுப்பினரும் சட்ட ஆலோசகருமான இளங்கோவனிடம் பேசினோம். “பல்கலைக்கழகத்தில நிர்வாக சீர்கேடுகள், நிதி முறைகேடுகள், ஆசிரியர் விரோத, அலுவலர் விரோத செயல்பாடுகள் தொடர்ந்து நடக்கின்றன. துணைவேந்தர் தனக்கு வானளாவ அதிகாரம் இருப்பதாக நினைத்துக்கொண்டு அடிக்கடி ஊழியர்கள் மீது விசாரணைக்கு உத்தரவிடுகிறார்.போலி குற்றச்சாட்டுகளைச் சொல்லி வழக்குப் போடுகிறார். தனக்கு எதிராகப் பேசும் ஆசிரியர்களை சஸ்பெண்ட் செய்வதோடு, அவர்களுக்கு எதிராக மாணவிகளைத் தூண்டிவிட்டு வழக்குத் தொடரச் சொல்கிறார். பொறுப்புப் பதிவாளராக ஒருவர் மூன்று வருடம்தான் இருக்க முடியும். ஆனால், அரசு விதியை மீறி தற்போது பதிவாளராக இருக்கும் தங்கவேல் ஐந்தரை வருடங்களாக பதவியில் நீடிக்கிறார்..துணைவேந்தர் காட்டு தர்பார் நடத்துவதோடு, பா.ஜ.க பிரமுகராகவே மாறிவிட்டார். கவர்னர் மீட்டிங்குக்கு நாக்பூர் போகிறார். சி.பி.ராதாகிருஷ்ணன் கவர்னர் பதவி ஏற்றபோது அவருக்கு மாலை போட்டு, அந்தப் படத்தை சமூக வலைதளத்தில் போடுகிறார். யாராவது புகார் சொன்னால், ‘நீங்க ஸ்டாலினைப் பார்த்தா, நான் அமித் ஷாவை பார்ப்பேன். நீங்க பொன்முடியைப் பார்த்தா நான் ஆளுநரைப் பார்ப்பேன்’ என்று சொல்லி மிரட்டுகிறார்.சிண்டிகேட் கூட்டத்தில் கலந்து முடிவெடுக்காமல், தன்னிச்சையாகவே பலரை சஸ்பெண்ட் செய்துள்ளார். இவரது செயல்பாடுகளில் சாதிய பாகுபாடுகளும் கலந்திருப்பதுதான் கொடுமையிலும் கொடுமை. பல்கலைக்கழகத்தில் நடக்கும் ஊழல்களை விசாரிக்கும் அரசின் விசாரணக்குழுவுக்கு, கோப்புகளைக் கொடுப்பது முதல் எல்லாமே பொறுப்பு பதிவாளர் தங்கவேல்தான். குற்றம்சாட்டப்பட்டு இருப்பவரே ஃபைல்களைக் கையாள்வது என்ன நியாயம்? ஐ.ஏ.எஸ். அதிகாரி ஒருவரை பதிவாளராக நியமித்து, விசாரணையை முறையாக நடத்தவேண்டும் என்பது எங்கள் கோரிக்கை” என்றார் சீரியஸாக..பெயர் வேண்டாம் என்று பேசிய சில பேராசிரியர்கள், “இங்கு இடஒதுக்கீட்டுமுறையை முற்றிலுமாக புறக்கணித்துவிட்டார்கள். தமிழ்த்துறைத் தலைவர் முருகன், வணிகவியல் துறைத் தலைவரான அவரின் மனைவி சுமதி, நூலகர் முருகன், பேராசிரியர் பழனிவேல் இப்படிப் பலர் இடஒதுக்கீடு விதிமுறைகளைக் காற்றில் பறக்கவிட்டு துணைவேந்தரின் சாதிப் பாசத்தால் போஸ்டிங் பெற்றிருக்கிறார்கள். பட்டியல் சமூகத்துக்குப் போகவேண்டிய இடங்கள் கவுண்டர் சமூகத்துக்குப் போகின்றன.முன்னாள் பதிவாளர் அங்கமுத்து ஆறு பேர் மேல் குற்றம்சாட்டி கடிதம் எழுதிவைத்துவிட்டு தற்கொலை செய்துக்கொண்டார். இதுவரை அந்த ஆறு பேர்மீது எந்த நடவடிக்கையும் எடுக்கப்படவில்லை. அந்த வழக்கையே ஊற்றி மூடிவிட்டார்கள். லேட்டஸ்டாக, நாக் கமிட்டி என்று சொல்லி ஒன்றரைக் கோடி ரூபாய் செலவு செய்திருக்கிறார், துணைவேந்தர் ஜெகநாதன். இதிலும் எந்த நடவடிக்கையும் எடுக்கவில்லை..எல்லாவற்றுக்கும் மேலாக, ‘எம்.டெக். படிப்பு நடத்த அனுமதி இல்லை’ என்று சட்டமன்றத்தில உயர்கல்வித் துறை அமைச்சர் பேசியதன் பிறகு, அதே படிப்புக்கு விளம்பரம் கொடுக்கிறார், துணைவேந்தர். ஆக, அமைச்சருக்கும் அரசாங்கத்துக்கும்கூட இவர் பயப்படவில்லை” என்றார்கள் கோபமாக.பா.ம.க. சேலம் மேற்குத் தொகுதி எம்.எல்.ஏ. அருள் நம்மிடம், “சமூக நீதிக்கு எதிராக நடந்துக்கொள்கிறது பெரியார் பல்கலைக்கழகம். கேள்வி கேட்டாலே சஸ்பெண்ட், மெமோ என்று சர்வாதிகாரம் செய்கிறார்கள். இடஒதுக்கீடு முறைப்படி நடக்கவே இல்லை. ஒரே சமுதாயத்தைச் சேர்ந்தவர்கள் துறைத் தலைவராக இருப்பது எப்படி என்று தெரியவில்லை. ஊழல் அதிகரித்துவிட்டது. விசாரணைக் குழுவிடம் விரிவாக சொல்லியிருக்கிறேன்” என்றார்.இதுகுறித்து பல்கலைக்கழக பொறுப்பு பதிவாளர் தங்கவேலிடம் கேட்டோம். “சாமி கும்பிட்டுட்டு இருக்கேன். அப்புறம் பேசுறேன்” என்றார். துணைவேந்தர் ஜெகநாதனைத் தொடர்புகொண்டோம். “நான் மீட்டிங்கில் இருக்கிறேன்... பிறகு பேசுகிறேன்”என்றார். சொன்னபடி பேசாததால் மீண்டும் தொடர்புகொண்டபோது, செல்போன் அணைத்து வைக்கப்பட்டிருந்தது. பல்கலைக்கழகம் நல்லதொரு குடும்பமாக இருக்கவேண்டுமே தவிர குழப்பமாக அல்ல! - கே.பழனிவேல்

“நீங்க ஸ்டாலினைப் பார்த்தா நான் அமித் ஷாவை பார்ப்பேன்!” மிரள வைக்கும் பெரியார் பல்கலை துணைவேந்தர்...

Related Stories