அந்தர் பல்டி அடிக்கிறார் ஸ்டாலின் ! பழ.கருப்பையா பாய்ச்சல்

மாற்றம் ஒன்றே மாறாதது என்பதுபோல் அரசியலில் தன் இருப்பிடத்தை மாற்றிக்கொள்ளத் தயங்காதவர், பழ.கருப்பையா. கட்சிகள் பல மாறி, காட்சிகள் பல கண்டு இப்போது தமிழ்நாடு தன்னுரிமைக் கழகம் என்று தனிக்கட்சி தொடங்கியிருக்கிறார். அரசியல் நிகழ்வுகளை போட்டுத் தாக்கத் தயங்காத அவரை, அமித் ஷாவின் தமிழக வருகைக்குப் பின் , சட்டென்று மாறுது வானிலையாக அரசியல் மாற்றங்கள் பலவும் அரங்கேறி வரும் நிலையில், சந்தித்தோம்.உங்களின் புதிய கட்சி உறுப்பினர் சேர்க்கை, 2024 நாடாளுமன்ற தேர்தல் பணிகள் எப்படி இருக்கிறது ?தமிழ்நாடு தன்னுரிமை கழகம் ஆறுமாதக் குழந்தை. கட்சி உறுப்பினர் சேர்க்கை போன்ற பணிகள் நடந்து வருகின்றன. எனினும் 2024 நாடாளுமன்ற தேர்தலில் போட்டியிடும் சூழல் ஏழவில்லை. கட்சியை வலுப்படுத்திய பிறகே பொதுத்தேர்தல்களை சந்திக்க முடிவு செய்துள்ளோம்.செந்தில் பாலாஜி கைதை பா.ஜ.க.வின் பழிவாங்கும் நடவடிக்கையாக பார்க்கிறீர்களா ?2014ம் ஆண்டு அ.தி.மு.க.வில் அமைச்சராக இருந்த செந்தில் பாலாஜி செய்த முறைகேடுகளை அப்போது எதிர்க்கட்சித் தலைவராக இருந்த ஸ்டாலின் பட்டியலிட்டார். அதோடு, ஒன்றல்ல, இரண்டா எடுத்து சொல்ல என பாடலைக் கூட ஸ்டாலின் செந்தில் பாலாஜி குறித்து பாடினார். அந்த நபர் தற்போது தண்டிக்கப்படுவதை அரசியல் பழிவாங்கும் நடவடிக்கை எனச் சொல்வது எந்த வகையில் நியாயம். ஸ்டாலின் முரண்பாடுகிறாரா அல்லது பல்டி அடிக்கிறாரா? பாஜகவுக்கும் இதற்கு என்ன தொடர்பு இருக்கிறது?செந்தில்பாலாஜி கைதை வைத்து திமுக அரசியல் ஆதாயம் அடைய பார்க்கிறதா ?செந்தில் பாலாஜி ஊழல் செய்துவிட்டார் என தி.மு.க. தான் குற்றம்சாட்டியது. அவர் திமுகவில் ஐக்கியமானவுடன், மிகமுக்கிய இலாகா அவருக்கு ஒதுக்கப்படுகிறது. பாட்டிலுக்கு 10 ரூபாய் அதிகமாக வசூல் செய்தும், கரூர் கம்பெனி வைத்துக்கொண்டும் அவர் டாஸ்மாக்கில் செய்த முறைகேடுகள் தொடர்பான ஆவணங்களை வைத்துதான் அமலாக்கத்துறை செந்தில் பாலாஜியை கைது செய்து விசாரிக்க முடிவு செய்தது. செந்தில் பாலாஜி நிலைப்பாட்டில் உச்சநீதிமன்றம் உத்தரவு போட்டது. அதன் மீது அமலாக்கத்துறை நடவடிக்கை எடுக்கும் போது, ஊழல் அமைச்சரைக் காக்க நினைப்பதோடு, அதை அரசியல் ஆதாயத்திற்காக மாற்ற நினைப்பது தி.மு.க.வுக்கு கோவலமாக இல்லையா. வெட்கமாக இல்லையா? திமுக ஊழல் பேராறு என்றால் அதில் வந்து சேர்ந்த செந்தில் பாலாஜி பெரிய கிளைப் பேராறு. அமலாக்கத்துறை செயல்பாட்டை தேசியத் தலைவர்கள் எதிர்க்கிறார்களே ?தவறு செய்பவர்கள் எந்தக் கட்சியைச் சேர்ந்தவராக இருந்தாலும் தண்டிக்கப்பட வேண்டும். ஊழல்வாதியை காக்க நினைப்பது நல்ல அரசியல் கிடையாது. கார்கே, இதை பா.ஜ.க.வின் பழிவாங்கல் என்கிறார். நீதிமன்ற உத்தரவைப் பின்பற்றுவது எப்படி பழிவாங்கும் நடவடிக்கையாகும். இது கூடவா தெரியாமல்அகில இந்தியத் தலைவராக கார்கே இருக்கிறார். அதே போன்று யெச்சூரி பேசுகிறார். லஞ்சம் வாங்குவது தெள்ளத் தெளிவாகத் தெரியும்போது, அந்த நபருக்கு ஆதரவாக தேசியத் தலைவர்கள் பேசுவது நல்லது கிடையாது.பாஜகவுக்கு எதிராக எதிர்க்கட்சிகள் செயல்பாடு சரியில்லை என நினைக்கிறீர்களா ?இந்திய ஜனநாயகம் படுமோசமாக இருக்கிறது என்றால், காங்கிரஸ் கட்சிக்கு சிந்திக்கும் திறன் குறைவாக இருப்பதுதான் காரணம். அதே போல 1952-ல் பெரிய கட்சியாக இருந்த கம்யூனிஸ்ட்டு கட்சி, இன்றைக்கு ஒரு எலியின் வாலைப் போல இருக்கிறது. அதற்கும் இப்போது இருக்கும் தலைவர்கள் தான் காரணம். முத்தரசன் திமுகவினுடைய கிளைச் செயலாளர். இந்திய கம்யூனிஸ்ட்டு கட்சியை ஒழித்துவிட்டுப் போவதற்காக அந்தக் கட்சிக்கு தலைமை தாங்குகிறார். முத்தரசன் ஆறு மாதம் பேசாமல் இருந்திருந்தால், இந்திய கம்யூனிஸ்ட்டு கட்சி 6 அடி உயர்ந்திருக்கும்.மார்க்சிஸ்ட்டு கம்யூனிஸ்ட் கட்சியும் இவர்களைப் போல ஆகிவிட்டார்கள். கம்யூனிஸ்ட்டுகளை பொருத்தவரை எந்த சமரசமும் செய்துகொள்ள மாட்டார்கள். சரி எது, தவறு எது என மனதில் பட்டதைத் தெளிவாகப் பேசுவார்கள். இவர்களால் தான் இந்த நாட்டில் எதிர் சிந்தனை வளரவில்லை.அப்படியென்றால் பாஜக செயல்பாடுகளைப் பாராட்டுகிறீர்களா ?பாஜக ஒரு இந்துத்துவ அமைப்பு; மதவெறியான அமைப்பு. நான் சமயச் சார்ப்பற்றவன். பாஜகவின் செயல்பாடுகளை நான் பாராட்டவில்லை. டெல்லியில் அரசு அதிகாரிகள் நியமனம் தொடர்பாக ஆம்ஆத்மி வழக்கில், நீதிமன்றம் தீர்ப்பு அளித்து. அந்த மை காய்வதற்குள், நீதிமன்றத் தீர்ப்புக்கு எதிராக மத்திய பாஜக அரசு அரசாணை வெளியிடுகிறது. இந்த விவகாரத்தில் பாஜகவுக்கு எதிராக எதிர்கட்சிகள் ஒருங்கிணைந்து குரல் கொடுத்திருக்க வேண்டும். அதே நேரத்தில் ஜனநாயகத்தைக் காப்பற்ற எதிர்க்கட்சித் தலைவர்கள் ஒன்று சேர்வதை விட்டு விட்டு, ஊழல்வாதி செந்தில் பாலாஜியைக் காப்பாற்ற ஒன்று சேர்வது எந்த வகையில் நியாயம்? அதை எப்படி ஏற்று கொள்ளமுடியும்? பாஜகவை பொருத்தவரை நல்ல கட்சி இல்லை என்பது தான் எனது கருத்து.ஆளுநர் ஆர்.என்.ரவி செயல்பாட்டை எப்படிப் பார்க்கிறீர்கள் ?இந்த ஆளுநர் நம்முடைய நாகரிகம், பண்பாடு, மொழி, கலாசாரம் எல்லாவற்றிற்கும் இடையூறனாவர். அவர் ஒரு இந்துத்துவ வெறியர். ஆர்.எஸ்.எஸ் காரர், பார்ப்பன மேலாண்மையை நிலைநாட்டுவதற்காக வந்தவர், அவர்களுக்குச் சொந்த மதம் கிடையாது. ஆகவே அவர் இதைத்தான் செய்வார். வெட்டிதனமாக பேசக்கூடியவராக, பாஜகவின் ஏஜென்டாகத் தான் ஆளுநர் ஆர்.என்.ரவி இருக்கிறார். ஆளுநர் மீது எந்த விதமான நல்ல அபிப்ராயம் கிடையாது. அதே நேரத்தில் செந்தில் பாலாஜி விஷயத்தில் ஆளுநர் ஆர்.என்.ரவி நடவடிக்கையை விமர்சனம் செய்யமுடியாது.எந்த அரசியல்வாதியும், அமைச்சரும் நேர்மையானவர்கள் இல்லையா ?சுதந்திரத்திற்கு முன்பு கூட அயோக்கியதனமான ஆட்சி முறைதான் இருந்து வந்தது. காந்தி தான் பொதுவாழ்க்கைக்கு வந்து, அரசியலில் தூய்மையை ஏற்படுத்தினார். 1920 - 1950 ஆண்டுகாலத்தில் காந்தி வாழ்ந்தபோது எந்த ஊழல்வாதிகள் இருந்தார்கள். நாடு முழுவதும் யோக்கியர்கள் தான் அரசியலுக்கு வந்தார்கள். ஆனால் இப்போது இருக்கும் அமைச்சர்கள் யோக்கியர்களா? முப்பது அமைச்சர்கள் இருந்தால் அனைவரும் அயோக்கியர்கள். அவனவன் தனது தகுதிக்கு ஏற்றாற்போல சுரண்டுகிறான்.