புலி வாலை அல்ல, வாயையே பிளக்கும் பாட்னா கூட்டணி!

- பார்த்திபன், அரசியல் ஆய்வாளர்‘புலி வாலும் கெஜ்ரி வாலும்.. எடுபடுமா எதிர்க்கட்சி கூட்டணி?’ என்கிற தலைப்பில் அரசியல் ஆய்வாளர் என்.சத்தியமூர்த்தி கட்டுரை ஒன்றை எழுதியுள்ளார். பீகார் தலைநகர் பாட்னாவில் ஜூன் 23-ம் தேதி நடைபெற்ற எதிர்க்கட்சிகளின் கூட்டத்தின் வெற்றிகரமான வியூகத்தை பார்த்து சத்தியமூர்த்தி சத்தியமாகவே அஞ்சிவிட்டார் என்பதைதான் இது காட்டுகிறது. எதிர்க்கட்சிகள் தங்களுக்குள் உள்ள வேறுபாடுகளைப் பின்னுக்குத் தள்ளிவிட்டு மோடி ஆட்சியை அகற்ற வேண்டுமென்ற ஒற்றை நோக்கத்தில் ஒன்று கூடி உள்ளனர்..எதிர்க்கட்சிகள் ஒன்றுபட்டு நின்று பா.ஜ.க-வை வீழ்த்திய வரலாற்றை 2004ல் நாடு பார்த்திருக்கிறது. டெல்லி அவசர சட்டம் விஷயத்தில் காங்கிரஸ் தன் நிலையை வெளிப்படுத்த வேண்டும் என கெஜ்ரிவால் நிபந்தனை விதித்தபோதிலும் அவரை மம்தா பானர்ஜி உள்ளிட்ட தலைவர்கள் சமாதானப்படுத்திவிட்டனர். நாடாளுமன்ற பிரச்னையை நாடாளுமன்றக் கூட்டம் கூடும் நேரத்தில் கூடி முடிவு செய்துகொள்ளலாம் என்று காங்கிரஸ் தலைவர் மல்லிகார்ஜுன கார்கேயும் விளக்கம் அளித்துவிட்டார். கெஜ்ரிவாலுக்கு தற்போது உள்ள நெருக்கடியில் அவர் நிச்சயம் எதிர்க்கட்சிகளின் பேச்சை கேட்கத்தான் செய்வார். சத்தியமூர்த்தியோ, கெஜ்ரிவால் ஒருவர் மட்டும் எதிர்க்கட்சியின் ஒற்றுமையை குலைத்து விடுவார் என்பதுபோல் எழுதி இருக்கிறார். உண்மையைப் சொல்லப்போனால் புலி வாலை மட்டுமல்ல, புலியின் வாயையே பிளக்கும் அளவுக்கு வல்லமை கொண்டது எதிர்க்கட்சிகளின் கூட்டணி. மோடியே வீழ்த்தியே தீர்வோம் என்று அவர்கள் உறுதி எடுத்துள்ளனர்.இன்னொன்று, காங்கிரஸ் கட்சி பிரதமர் உரிமையைக் கோரக் கூடாது என்பது போன்ற நெருக்கடியை மற்ற கட்சிகள் தரும் என்பது சத்தியமூர்த்தியின் ஆசை அல்லது கற்பனையாக இருக்கலாம். இருக்கட்டும் அது அவரது விருப்பம். ஆனால், எதிர்க்கட்சிகளின் உறுதிப்பாடு என்னவென்றால் நாட்டில் ஜனநாயகத்தை காப்பாற்ற வேண்டும், அதற்கு மோடி ஆட்சியை வீட்டுக்கு அனுப்ப வேண்டும் என்பதுதான். தி.மு.க. தலைவரும் தமிழ்நாடு முதலமைச்சருமான மு.க.ஸ்டாலின் இதை மிகவும் அழகாக, தெளிவுபட விளக்கி இருக்கிறார். யார் ஆட்சிக்கு வர வேண்டும் என்பதைவிட யார் ஆட்சிக்கு வரக்கூடாது என்பதுதான் முக்கியம் என்பதே ஸ்டாலின் சொன்ன தேர்தல் வியூகம்..இந்தத் தேர்தலை குடியரசுத் தலைவர் தேர்தல் முறைபோல், யார் பிரதமர் என்ற வகையில் நடத்துவதை பா.ஜ.க. விரும்புகிறது. பிரதமர் யார் என்ற அடிப்படையில் எதிர்க் கட்சிகளுக்குள் மோதல், இதனால் குழப்பம் வரும் என்ற விருப்பத்தையும் சத்தியமூர்த்தி மறைமுகமாக வெளியிட்டுள்ளார். கற்பனையான வாதங்கள் மூலம் எதிர்க்கட்சிகளுக்கு இடையே சிண்டு முடிய அவர் மெனக்கெடுவது புரிகிறது. அதேபோல் அமெரிக்காவுக்கு மோடி சென்றிருந்த நேரத்தில் இந்தக் கூட்டம் நடந்ததால் பத்திரிகைகள், தொலைக்காட்சிகளில் செய்திகள் எதிர்பார்த்த அளவில் இடம்பெறவில்லை என்ற தனது அற்ப மகிழ்ச்சியையும் வெளிப்படுத்தி உள்ளார். ஆனால், உண்மை நிலவரம் வேறாக இருந்தது. ஆங்கில மற்றும் இந்தி ஊடகங்கள் வழக்கத்திற்கு மாறாக அன்றைய நாள் முழுவதும் பாட்னா கூட்டம் பற்றிய செய்திகளை வெளியிட்டதை எதிர்க் கட்சிகளே சற்று ஆச்சர்யத்துடன்தான் பார்த்தன. நாட்டின் அரசியல் காற்று திசை மாறி வீச ஆரம்பித்துவிட்டதை நொய்டா ஊடகங்களே உணர ஆரம்பித்திருக்கின்றன என்பதுதான் உண்மை.பிரதமர் யார் என்பதை தேர்தலுக்குப் பின்பு முடிவு செய்துகொள்ளலாம் என்று காங்கிரஸ் கட்சியும் தெரிவித்துவிட்டது. எதிர்க்கட்சிகள் வெளியிட இருக்கிற குறைந்தபட்ச கொள்கை திட்டம்தான் எதிர்க் கட்சிகளின் பிரதமர் வேட்பாளர் எனலாம். மம்தா பானர்ஜி, சரத் பவார், நிதிஷ் குமார், கெஜ்ரிவால் ஆகியோர் பிரதமர் பதவிக்காக போட்டியிடக் கூடும் என்ற ஆரூடத்தையும் அவர் வெளியிட்டுள்ளார். இதில் குறிப்பாக கெஜ்ரிவால் அதிக இடங்களை கேட்டு காங்கிரஸ் கட்சிக்கு நெருக்கடி தருவார் என்ற கருத்தையும் சத்தியமூர்த்தி சொல்லியுள்ளார். கெஜ்ரிவாலுக்கு டெல்லியில் 7 மக்களவை இடங்களும், பஞ்சாப்பில் 13 மக்களவை இடங்களும் உள்ளன. 543 மக்களவை இடங்களில் இந்த 20 இடங்கள்தான் தேர்தலையே தீர்மானிக்க இருப்பதுபோல் கெஜ்ரிவால் குழப்பம் விளைவிப்பார் என்று தன் நப்பாசையை வெளியிட்டுள்ளார் சத்தியமூர்த்தி. கெஜ்ரிவால் மறைமுகமாக பா.ஜ.க-வுக்கு உதவும் காரியத்தை இனி செய்ய மாட்டார், செய்தாலும் மக்கள் அதை ஏற்றுக்கொள்ள மாட்டார்கள்..தமிழ்நாட்டை பொறுத்தவரை செந்தில் பாலாஜி வழக்கு மூலம் எதிரணியை முடித்துவிட பா.ஜ.க. முனைப்பாக உள்ளதாம். தி.மு.க. விஷயத்தில் கடவுள் எதிர்ப்பு, இந்து எதிர்ப்பு, இந்தி எதிர்ப்பு போன்ற பிரச்னைகளை பூதாகரமாக்கி வாக்காளர்களை கவர முடியுமாம். இந்து எதிர்ப்பு என்ற கட்டுக்கதையை தி.மு.க. எளிதில் முறியடித்துவிட முடியும். 2019 மக்களவை தேர்தலும் அதற்கு ஓர் உதாரணம். அதானி போன்றவர்களின் மிகப்பெரிய பகாசுர ஊழல்களுக்கு உறுதுணையாக இருக்கும் பா.ஜ.க., மாநில கட்சிகளை நோக்கி ஊழல் என்று சொல்வதை மக்கள் ஏற்க மாட்டார்கள். எதிர்க் கட்சிகள் இடையே ஒற்றுமை வராது என்று நம்பிக்கொண்டிருந்த பா.ஜ.க-வும் அதன் ஆதரவாளர்களும் பாட்னா மாநாட்டின் வெற்றியைக் கண்டு உளற ஆரம்பித்துள்ளனர். எத்தனை சத்தியமூர்த்திகள் வந்தாலும், அவர்கள் என்ன செய்தாலும், மோடி ஆட்சி தமிழ்நாட்டுக்குச் செய்து வரும் வஞ்சனைகளை மறைத்துவிட முடியாது. தி.மு.க கூட்டணி அதை வலிமையாக எடுத்துச் சொல்லி மோடியின் சர்வாதிகார ஆட்சிக்கு முடிவு கட்டும் என்பது நிச்சயம்!