ஆன்லைன் கோளாறு...ஆர்.டி.ஓ. கல்லா தாறுமாறு!

-மனோசௌந்தர்டிரைவர் லைசென்ஸ் வாங்க எட்டு போடுகிறோமோ இல்லையோ துட்டுபோட்டாக வேண்டும் என்பதில் கறாராக இருக்கிறார்கள் கரெப்ஷன் ஆபிஸர்ஸ். இப்போது இவர்கள் ஆன்லைன் சேவையிலும் குளறுபடி செய்து, காசு கறப்பதுதான் டெரர் ட்விஸ்ட்! ஆர்.டி.ஓ துறையில் லஞ்சத்தை ஒழிக்க வேண்டும்; மக்களை அலைகழிக்காமல் பணிகளை எளிமையாக்க வேண்டும் என்பதற்காகதான் ஆர்.டி.ஓ துறையை முழுமையாக கணனி மயமாக்கியது தமிழக அரசு. லைசைன்ஸுக்கு விண்ணப்பது தொடங்கி லைசைன்ஸை புதுப்பிப்பது வரை அனைத்து சேவைகளையும் ஆன்லைனிலேயே பெற முடியும். எட்டு போடுவது போன்ற சில விஷயங்களுக்கு மட்டுமே நேரில் செல்ல வேண்டும். ஆனால், வேண்டுமென்றே ஆன்லைன் சேவையில் குளறுபடிகளை ஏற்படுத்தி, காசு பிடுங்குவதற்காக நேரில் வரவழைக்கிறார்கள் என்பதுதான் இப்போது எழுந்திருக்கும் குற்றச்சாட்டு.இந்தக் குற்றச்சாட்டை எழுப்பியிருக்கும் கரூர் ஆண்டான் கோயிலைச் சேர்ந்த மணிவண்ணன் நடராஜனிடம் பேசினோம். “லைசென்ஸில் என்னுடைய முகவரியை மாற்ற, https://parivahan.gov.in/parivahan/ என்ற வெப்சைட்டில் விண்ணப்பித்தேன். அதில் பெயர், முகவரி, மாநிலம், புதிய முகவரிக்கான ஆதாரம், ஆதார் என அனைத்தையும் உரிய முறையில் பூர்த்தி செய்து, அட்டாச் செய்தபிறகு, செய்த பிறகு அதற்கான கட்டணமான 500 ரூபாயை செலுத்த தமிழ்நாடு கருவூலத்தின் ஆன்லைன் சைட்டுக்குச் சென்றேன். அங்கே ஒரு சலான் காட்டப்பட்டது. அதில் வங்கியின் பெயர், அக்கவுன்ட் நம்பர், பிராஞ்ச், ஐ.எஃப்.எஸ்.சி. கோடு என்று அனைத்து விவரங்களையும் பூர்த்தி செய்தபோதும், ’ஐ.எஃப்.எஸ்.சி. கோடு தவறாக உள்ளது’ என்று குறிப்பிட்டதோடு பணத்தையும் செலுத்த முடியவில்லை. ஆர்.டி.ஓ. அலுவலகத்திற்கு நேரில் போய் கேட்டபோது, ‘எங்களுக்குத் தெரியல. நீங்க ஏதாவது தப்பா அப்ளை பண்ணியிருப்பீங்க’ என்று சொல்லிவிட்டார்கள். மறுபடியும் ஆன் லைன் சென்றால், புதிதாக சலான் கிரியேட் ஆகி அதன் மூலம் ஆன்லைனில் (neft/rtgs) பணம் செலுத்துவதுபோல் காட்டுகிறது. அதோடு, ஐ.எஃப்.எஸ்.சி. கோடு RBIS0GOTNER என்ற நம்பரில் என்.இ.ஆர். என்று முடிகிறது. ஆனால், ஆர்.பி.ஐ. வெப்சைட்டில், தமிழ்நாடு கருவூலத்தின் ஐ.எஃப்.எஸ்.சி. கோடு என்.இ.பி. என்று முடிகிறது. இதுவே, முரண்பாடாக உள்ளது. வழக்கறிஞரான எனக்கே இந்த நிலை என்றால், ஆன்லைன் பயன்பாடுகள் பற்றிய அறியாத சாதாரண மக்களின் நிலையை எண்ணிப் பாருங்கள்” என்றார் ஆதங்கத்துடன்..ஓய்வுபெற்ற ஆர்.டி.ஓ. அதிகாரி ஒருவரிடம் இதுகுறித்துக் கேட்டபோது, “தற்போது, எல்.எல்.ஆர்., ஓட்டுநர் உரிமம், லைசென்ஸ் முகவரி மாற்றம், லைசென்ஸ் புதுப்பித்தல் உள்ளிட்டவை ஆன்லைனில் நடைமுறையில் உள்ளன. ஆனால், மக்கள் நேரில் வராமல் போனால் ஆர்.டி.ஓ. அலுவலகங்களில் கல்லா கட்ட முடியாதே... உதாரணமாக 40 வயதைக் கடந்தவர்கள் தங்களது லைசென்ஸை ஆன்லைனிலேயே புதுப்பித்துக்கொள்ளலாம். ஆனால், இதற்கு தமிழகம் முழுக்க ஆர்.டி.ஓ. புரோக்கர்கள் மூலம் 7 ஆயிரம் ரூபாய் முதல் 10 ஆயிரம் ரூபாய் வரை வசூலிக்கப்படுகிறது. இப்படியெல்லாம் வசூல் வேட்டை நடத்தவே ஆன்லைன் சேவைகளை முடக்கி வைத்திருக்கிறார்கள்!” என்றார்.ஆர்.டி.ஓ. அதிகாரிகளிடம் பேசினால், “இது தொழில்நுட்ப பிரச்னை” என்று நழுவுகிறார்கள். பொய் சொல்றதுக்கு ஒரு அளவு வேணாமா ஆபிஸர்ஸ்... வெட்கமா இல்லை!

ஆன்லைன் கோளாறு...ஆர்.டி.ஓ. கல்லா தாறுமாறு!

Related Stories