நியூஸ் பெஞ்ச் ! : சமையல் பாத்திரம் கடத்திவந்தேன்… அய்யனே!

தென்காசி, குற்றாலநாதர் கோயிலில் கொழுந்துவிட்டு எரிகிறது, பழங்கால பாத்திரங்கள் களவுபோன விவகாரம். இங்கு 500 ஆண்டுகளுக்கு முன், சொக்கம்பட்டி ஜமீனால் இங்கே இரு மண்டபங்கள் கட்டப்பட்டன. அங்கு தங்குவோர்க்கு அன்னதானம் வழங்குவதற்காக செம்பு, பித்தளைப் பாத்திரங்களையும் ஜமீன் அளித்திருந்தார். மிகப் பழைமையான இந்தப் பொருள்களை பேரூராட்சி ஊழியர்கள் கடத்திச் சென்றுவிட்டதாக புகார் கொடுத்துள்ளார், கோயில் நிர்வாக அலுவலர் கண்ணதாசன். ‘பழங்கால கல்மண்டபங்களில் பாதுகாப்பில்லாமல் பாத்திரங்கள் இருப்பதால் அதைக் கொண்டு சென்றோம்’ என்று கூலாக விளக்கம் அளித்திருக்கிறார், குற்றாலம் பேரூராட்சி அ.தி.மு.க. தலைவர் கணேஷ் தாமோதரன்! பத்திரமாக இருந்தால் சரிதான்!.கொலை வழக்கில் குளறுபடி; சிக்கலில் ஏ.சி! மதுரை மாவட்டம், குன்னத்தூர் ஊராட்சி மன்றத் தலைவர் கிருஷ்ணராஜூவும் அவர் நண்பர் முனியசாமியும் 2020 அக்டோபரில் கொல்லப்பட்டனர். இந்த வழக்கில் தொடர்புடைய செந்தில்குமாரை போலீஸார் தேடிவந்த நிலையில், அவரின் மனைவி முருகலெட்சுமி ஆட்கொணர்வு மனு தாக்கல் செய்தார். அதை விசாரித்த உயர்நீதிமன்ற மதுரை கிளை, அறிக்கை தாக்கல் செய்யுமாறு தென்மண்டல ஐ.ஜி.க்கு உத்தரவிட்டது. அதன்படி தாக்கல் செய்த அறிக்கையில், ‘செந்தில்குமார், 2021 ஜனவரியில் கொலை செய்யப்பட்டுள்ளார். அந்தக் கொலையில் வரிச்சூர் செல்வம் கைது செய்யப்பட்டுள்ளார். இரட்டைக் கொலை வழக்கு விசாரணையில் செல்லூர் ஏ.சி விஜயகுமார் பல்வேறு குளறுபடிகளை செய்துள்ளார்’ என்று தெரிவிக்கப்பட்டிருந்தது. இதையடுத்து, ‘விஜயகுமார் மீது வன்கொடுமை சட்டத்தின்கீழ் வழக்குப் பதிவு செய்யவேண்டும். துறைரீதியான நடவடிக்கை எடுக்கவேண்டும்’ என்று நீதிபதி உத்தரவிட, காக்கிகள் வட்டாரமே கிடுகிடு. கடமை கண்ணியம் கட்டுப்பாடு முக்கியம்! -பாலா அந்த இடமா... ஆளவிடுங்க சாமி! அரசியல் மற்றும் அடிதடிக்குப் பஞ்சமில்லாத கரூரில் ஸ்பெஷல் பிராஞ்ச் இன்ஸ்பெக்டராக இருந்த செல்வராஜ், கடந்த தீபாவளிக்கு முன்பு பணிமாறுதல் பெற்றார். அதன்பிறகு, அந்தப் பதவிக்கு இதுவரையில் யாரும் நியமிக்கப்படவில்லை. இதற்கிடையில் இரண்டு எஸ்.பி.க்கள்கூட மாறிவிட்டார்கள். ஆனாலும், காவல் நிலையங்கள் மற்றும் காவல் அதிகாரிகளின் செயல்பாடுகளை உளவு பார்த்துச் சொல்லும் ஸ்பெஷல் பிராஞ்ச் இன்ஸ்பெக்டர் பதவிக்கு யாரும் வரவில்லை. கரூரில் அரசியல் தலையீடு அதிகம் இருப்பதால், இந்த இடத்துக்கு வரவே பலருக்கும் ஏக தயக்கம். கரூர்னாலே கலக்கம்தானே?.- விவேக் ஆனந்தன் பஸ் ரூட்... தி.மு.க புள்ளியின் தனி ரூட்! மாங்கனி மாவட்டத்தின் ஆளும்கட்சி முக்கிய நிர்வாகி ஒருவர் தன்னுடைய செல்வாக்குள்ள ஏரியாவில் ஏழு பஸ் ரூட்டுகளை புதிதாக வாங்கியிருக்கிறாராம். ‘அரசு பதவி எதுலயும் இல்ல. மாவட்டப் பதவியை மட்டுமே வச்சிகிட்டு ஏகப்பட்ட சொத்துகளை வாங்கி குவிக்கிறார். பணம் எப்படி வருதுன்னே தெரியலை. விஷயம் தலைமை காதுக்குப் போயும் கூப்பிட்டு விசாரிக்கலை. பொறுப்பு அமைச்சர்கிட்ட நெருக்கமா இருக்கிறதால, பயமே இல்லாம பணம் குவிக்கிறாங்க. இதெல்லாம் தலைமைக்கு தெரியாதா என்ன?’ என உடன்பிறப்புகள் மத்தியில் ஏக குமுறல்.- பழனிவேல் ஒற்றை சீட்டு... யாருக்கு வேட்டு? 2024 நாடாளுமன்றத் தேர்தலில் `புதுச்சேரியில் யாருக்கு சீட்டு?' என்ற விவாதம் தி.மு.க-காங்கிரஸ் கூட்டணியில் எழுந்துள்ளது. காங்கிரஸ் கட்சியின் சிட்டிங் தொகுதி என்பதால், எம்.பி.யாக இருக்கும் வைத்தியலிங்கத்தைக் களம் இறக்கலாம் எனக் கூறப்படுகிறது. முன்னாள் முதல்வர் நாராயணசாமி, முன்னாள் எம்.எல்.ஏ. அனந்தராமன் ஆகியோர் கோதாவில் குதித்துள்ளனர் என்.ஆர்.காங்கிரஸ் தலைவரும் முதல்வருமான ரங்கசாமியோ, `கல்விக்குழும அதிபர் நாராயணசாமியை நிறுத்தலாமா?' என்ற யோசனையில் இருந்தார். தற்போது, பா.ஜ.க.வுக்கு தொகுதியை ஒதுக்க முடிவு செய்திருப்பதாக தகவல் வெளியாகியுள்ளது. பா.ஜ.க.வின் நியமன எம்.எல்.ஏ. வி.பி.ராமலிங்கம், சபாநாயகர் ஏம்பலம் செல்வம் ஆகியோர் லிஸ்ட்டில் இருந்தாலும் அதிக வாய்ப்பு, அமைச்சர் நமச்சிவாயத்துக்கே என்பது லேட்டஸ்ட் நிலவரம். புதுச்சேரி... கச்சேரி! -பி.கோவிந்தராஜு .எம்.எல்.ஏ.வை சீண்டிய கலெக்டர்! மயிலாடுதுறையில் உள்ள வில்லியநல்லூர், திருமங்கலம் ஆகிய ஊராட்சிகளில் வேளாண்மை மற்றும் உழவர் நலத்துறை சார்பில் புதிய கட்டடங்கள் திறப்பு விழா நடந்தது. இதில், அமைச்சர் மெய்யநாதன் முன்பாகப் பேசிய காங்கிரஸ் எம்.எல்.ஏ ராஜ்குமார், ‘எனக்குத் தெரிவிக்காமல் விழா ஏற்பாடுகளை எப்படிச் செய்தீர்கள்? ஊராட்சி நிகழ்ச்சிகளுக்கு அமைச்சரை அழைப்பது சரியல்ல. மாவட்ட நிர்வாகத்துக்கு புரோட்டோகால்கூட தெரியவில்லை' எனப் பொரிந்தார்.மாவட்ட ஆட்சியர் மகாபாரதியோ, `எம்.எல்.ஏவுக்குதான் ’புரோட்டோகால்’ தெரியவில்லை. நாங்கள் ’புரோட்டோகால்’படி கல்வெட்டில் பெயர்களைப் போட்டுத்தான் நிகழ்ச்சியை நடத்துகிறோம்' என்றார். தொகுதியில் எந்தக் கட்டடம் கட்டப்பட்டாலும் கல்வெட்டில் தன்னுடைய பெயர் மட்டுமே இருக்கும்படி எம்.எல்.ஏ ராஜ்குமார் செயல்படுவதையே கலெக்டர் மறைமுகமாக குத்திக்காட்டியதாக பேச்சு கிளம்பியுள்ளது. ஆட்சியரின் `அரசியல் பன்ச்'! - விவேக் ஆனந்தன்