வம்பானந்தா : ஒற்றைக்காலில் நேரு... நிபந்தனை போட்ட உதயச்சந்திரன்... அடுத்து ஐ.பி.எஸ் டிரான்ஸ்ஃபர்?

“பார்ட் டைம் ஆக உளவுத்துறையில் பணிபுரிகிறீர்களா சுவாமி... அமைச்சர்கள் மாற்றம் தொடங்கி ஐ.ஏ.எஸ். மாற்றங்கள் வரை கடந்த இதழில் புட்டுப்புட்டு வைத்தீருந்தீர்கள்..!” என்ற சிஷ்யையின் பாரட்டை கண்டுக்கொள்ளாமல் நேரடியாக செய்திகளை சொல்லத் தொடங்கினார் வம்பு.“அமைச்சரவை மாற்றம் பரபரப்பு அடங்குவதற்குள் ஐ.ஏ.எஸ் அதிகாரிகள் டிரான்ஸ்ஃபரையும் சுடச்சுட முடித்துவிட வேண்டும் என்பது முதல்வர் முன்னரே திட்டமிட்டதுதான். மாநில கல்விக் கொள்கை தொடங்கி பல விவகாரங்களில் உதயசந்திரன் மீது முணுமுணுப்புகள் வரத் தொடங்கின. அதன் பிறகே உதயசந்திரனை அழைத்து முதல்வர் பேசியிருக்கிறார். அப்போது முதன்மைச் செயலாளர் பதவிக்கு முருகானந்தத்தை பரிந்துரைத்து, அதை முதல்வர் ஏற்றுக்கொண்ட பிறகே நிதித்துறைச் செயலர் பதவிக்குச் செல்ல ஒப்புக்கொண்டாராம் உதயசந்திரன். அடுத்த அதிரடி அமுதா. நேர்மையான அதிகரியான ஊரக வளர்ச்சித்துறை முதன்மை செயலாளர் அமுதாவுக்கும் துறையின் அமைச்சர் ஐ.பெரியசாமிக்கும் ஏகத்துக்கும் முட்டல் மோதல். இதனால் அக்னி நட்சத்திரமாக எரிய ஆரம்பித்தார் அமைச்சர். இன்னொரு பக்கம் தமிழகத்தில் சட்டம் ஒழுங்கு பிரச்னைகளை கையிலெடுத்து எதிர்க்கட்சிகள் பிரச்னை செய்ய ஆரம்பித்துவிட்டன. எல்லாவற்றுக்கும் மேலாக கவர்னரும் ‘தமிழகத்தில் சட்டம் ஒழுங்கு சரியில்லை. தமிழகம் அமைதிப் பூங்காவே இல்லை’ என்று குடைச்சல் கொடுத்துவருகிறார். இவற்றை எல்லாமே சமாளிக்கவே பெரும் நம்பிக்கையுடன் உள்துறைச் செயலாளராக அமுதாவை ஸ்டாலின் டிக் அடித்துள்ளார்...” என்ற வம்புக்கு சூடான ஃபில்டர் காபியைக் கொடுத்தார் சிஷ்யை. அதைப் பருகியபடியே தொடர்ந்தார் வம்பு.“சென்னை மாநகராட்சியில் அமைச்சர்கள், மேயர், கமிஷனர் என முக்கோண மோதல் இருந்துவந்த நிலையில் கமிஷனர் ககன் தீப் பேடியையும் மாற்றியிருக்கிறார் முதல்வர். அவரை சுகாதார துறைச் செயலராக நியமித்தவர், சென்னை மாநகராட்சி கமிஷனராக ராதாகிருஷ்ணனை நியமித்திருக்கிறார். ககன் தீப்பின் மாற்றத்துக்குக் காரணம், அமைச்சர் நேருதானாம். டெண்டர் விவகாரங்களில் நேரு கை காட்டிய திசை பக்கமே ககன் தீப் திரும்பவில்லை என்பதால் கடும் அதிருப்தியில் இருந்த நேரு, ககன் தீப்பை மாற்றியே ஆக வேண்டும் என்று ஒற்றைக் காலில் நின்றிருக்கிறார். அவரது கோரிக்கை இப்போது நிறைவேறியிருக்கிறது. இதை எல்லாம் தாண்டி இன்னொரு விஷயமும் இருக்கிறது... ஐ.ஏ.எஸ் அதிகாரிகள் மாற்றத்தை போலவே விரைவில், ஐ.பி.எஸ் அதிகாரிகள் மாற்றமும் இருக்கும் என்று கோட்டையில் தகவல் கசிகிறது..“ஓஹோ...”“அப்படியே சுடச்சுட இன்னொரு தி.மு.க. செய்தியையும் சொல்லிவிடுகிறேன். தி.மு.க. தலைவர் ஸ்டாலின் ஞாயிறு அன்று மாவட்டச் செயலாளர்கள் மற்றும் தொகுதி பார்வையாளர்களுடன் காணொலியில் ஆலோசனை நடத்தினார். அதில்,” நாடாளுமன்ற தேர்தலில் 39 தொகுதிகளிலும் தி.மு.க. வெற்றி பெற வேண்டும். அதற்காக நீங்கள் கடுமையாக உழைக்க வேண்டும். பூத் வாரியாக கட்சியில் நியமிக்கப்பட்டு உள்ள ஒவ்வொரு நிர்வாகிகளுடனும் நீங்கள் தொடர்பு கொண்டு பேச வேண்டும். சில மாவட்டச் செயலாளர்களின் செயல்பாடுகள் திருப்திகரமாக இல்லை. கட்சியில் உழைப்பவர்களுக்கு மட்டுமே இடம். உங்களால் சரியாக கட்சி பணியை செய்ய முடியவில்லை என்றால் நீங்களே ஒதுங்கிக்கொள்ளுங்கள். இல்லையென்றால், கட்சி பதவியிலிருந்து நீக்கப்படுவீர்கள்”என்று சாட்டையை சுழற்றியிருக்கிறார்..“சூரியன் கொஞ்சம் ஓவராகவே தகிக்கிறது... கர்நாடக தேர்தல் செய்திகள் ஏதும் உண்டா சுவாமி?”“கவர் ஸ்டோரியையும் படித்தேன். கர்நாடக தேர்தல் தொடர்பான தனி ஸ்டோரியையும் படித்தேன். இரண்டிலுமே சிலரை வைத்து செய்திருக்கிறீர்கள்... சரி, என்னிடமும் சில தகவல்கள் இருக்கின்றன, கேளும்... பா.ஜ.க தேசியப் பொதுச்செயலாளர் சி.டி.ரவி சிக்கமங்களூரு தொகுதியில் போட்டியிட்டார். இவர் நான்கு முறை தொடர்ந்து அதே தொகுதியில் வெற்றி பெற்றவர். எனவே இப்போதும் மிகுந்த நம்பிக்கையுடன் அதே தொகுதியில் போட்டியிட்டார் . ஆனால், எட்டாயிரம் வாக்குகள் வித்தியாசத்தில் தோல்வியை தழுவியதுதான் மிச்சம்.இதில் கவனிக்கப்படவேண்டிய விஷயம் இதுதான். இவரை எதிர்த்து போட்டியிட்ட காங்கிரஸ் வேட் பாளர் தம்மையா ஒரு காலத்தில் பா.ஜ.க-வில் பயணித்தவர். இதே ரவியிடம் பி.ஏவாக இருந்தவர். வளர்த்த கடா மார்பில் பாய்ந்துவிட்டதே என்று ரத்தக்கண்ணீர் வடித்துக்கொண்டிருக்கிறாராம் ரவி. அதேநேரத்தில் ரவியின் பழைய நண்பர்கள் அவரது தோல்வியை கொண்டாடித்தீர்க்கிறார்கள். காரணம், தமிழக மேலிடப் பொறுப்பாளராக இருந்துகொண்டு தனது சில்மிஷங்களை கர்நாடகா முழுக்க அரங்கேற்றி பெரும் வெறுப்பை சம்பாதித்து வைத்திருந்தாராம் ரவி.. “சரிதான்... அண்ணாமலையின் மனநிலை என்னவாம் சுவாமி?”“கர்நாடக தேர்தல் தொடர்பாக தனக்கு கொடுக்கப்பட்ட பில்ட் அப்களை ரசித்தாலும், அண்ணாமலைக்கு உள்ளூற உதறல் இருந்ததாம். அதனால், தனக்கு ஒதுக்கப்பட்ட தொகுதிகளின் பணிகளை தமிழகத்தைச் சேர்ந்த கட்சிப் புள்ளிகள் பலருக்குப் பிரித்துக் கொடுத்திருந்தார். ஆனால், அவர்களில் பலரும் பேருக்கு ஆஜர் ஆகிவிட்டு பாதியில் எஸ்கேப் ஆனது தேர்தல் முடிவுகளுக்குப் பிறகுதான் தெரிந்திருக்கிறது. அந்தக் கருப்பு ஆடுகளின் பட்டியலை எடுத்து அவர்களை பிரியாணி போடும் முடிவில் இருக்கிறார் அண்ணாமலை.”“போதும் தமிழகத்துக்கு வாருங்கள் சுவாமி” என்றபடி வம்புவுக்கு முன்னால் வெஜிடபிள் பப்ஸ் வைத்தார் சிஷ்யை.“எடப்பாடி – பன்னீர் மோதல் மீண்டும் சூடுபிடிக்க ஆரம்பித்துள்ளது. சந்திக்கிற நபர்களிடமெல்லாம் எடப்பாடியை வார்த்தைகளால் வறுத்தெடுத்து விமர்சனம் செய்து வருகிறார் பன்னீர். ஆனால், பன்னீருக்கு நேர் மாறாக எடப்பாடியைப் பற்றி எதையும் பேசாமல், எப்படியாவது அ.தி.மு.க-வுக்குள் நுழைந்து விட வேண்டும் என்பதில் மட்டுமே கண்ணும் கருத்துமாக இருக்கிறார் சசிகலா..இந்த நிலையில்தான் சமீபத்தில் கர்நாடக எல்லைக்குள் அமித் ஷா தரப்பை சந்தித்து பேசினாராம் சசிகலா. அப்போது, ‘அ.தி.மு.க பிரிந்திருப்பது தி.மு.க-வுக்குத்தான் சாதகம். இதை எடப்பாடிக்கு புரிய வையுங்கள்’என்றிருக்கிறார். அதற்கு அமித் ஷா தரப்பில், ‘முதலில் தினகரன், பன்னீருடன் நீங்கள் ஒன்று சேருங்கள். எடப்பாடி விவகாரத்தை நாங்கள் பார்த்துக்கொள்கிறோம்’ என்று சொல்லப்பட்டதாம்” என்ற வம்பு அடுத்த சங்கதிக்குள் நுழைந்தார். “சென்னை மாநகராட்சி சார்பில் செயல்படும் 'அம்மா’உணவகத்தில் மாற்றங்கள் செய்வது தொடர்பாக இரண்டு லட்சத்து 13 ஆயிரம் பேரிடம் ஆய்வு நடத்தப்பட்டிருக்கிறது. இதில் 80 சதவிகிதம் பேர் மதிய உணவில் மாற்றம் கொண்டுவர வேண்டும் என்று சொல்லியிருக்கிறார்கள். அதேபோல் உணவு வகைகளின் விலையை ஏற்றலாமா என்பது குறித்து கேட்டதற்கு, ‘மக்களை பாதிக்காத வகையில் குறைந்தளவு விலை ஏற்றலாம். தவறில்லை’ என்கிறரீதியில் பதில்கள் வந்திருக்கின்றனவாம். இப்படி பொது மக்களிடம் சேகரிப்பட்ட விவரங்கள் தமிழக அரசுக்கு அறிக்கையாக அனுப்பி வைக்கப்பட்டிருக்கிறது.அரசு ஒப்புதல் கிடைத்தவுடன் இது நடைமுறைக்கு வரலாம். அது மட்டுமல்ல... ‘அம்மா’ உணவகங்களில் தற்போது வழங்கப்படும் மெனுவில் மாற்றம் செய்யவும் முடிவு செய்யப்பட்டிருக்கிறது. மதிய சாப்பாட்டில் புதிய வகை உணவுகள் வரப்போகின்றன. ஐந்து ரூபாய்க்கு தேநீர் வழங்குவது குறித்தும் ஆலோசனை நடக்கிறது’ என்ற வம்பு தனது வாட்ஸ் ஆப்பில் வந்த பிரேக்கிங் செய்தியை வாசித்துவிட்டுத் தொடர்ந்தார்.“கர்நாடக முதல்வர் யார் என்பதில் குழப்பம் வந்தே தீரும் என்பது அனைவரும் எதிர்பார்த்ததுதான். இந்தநிலையில், கர்நாடக காங்கிரஸ் தலைவர் டி.கே.சிவக் குமாரை மே 13ம் தேதி இரவு போனில் தொடர்புகொண்டார் சோனியா. அப்போது அவர், ‘உங்கள் கழுத்தை நெரிக்கும் அளவுக்கு மத்திய அரசு உங்கள் மீது வழக்குகளைப் பாய்ச்சியிருக்கிறது. உங்களை முதல்வராக்கினால் இன்னும் சோதனைக்குள்ளாக்கி விடுவார்கள்’ என சொல்ல, ஆமோதித்தபடியே அதை ஏற்றுக்கொண்டாராம் சிவக்குமார். அதேபோல் வரும் 2025 வரை ஜாதக கட்டப்படி சிவக்குமாருக்கு நேரம் சரி இல்லாததால், அமைதி காக்க முடிவு செய்திருக்கிறார். இறுதிக்கட்ட நிலவரப்படி சித்தராமைய்யாதான் முதல்வர்” என்ற எக்ஸ்குளூசிவ் தகவலுடன் நடையைக் கட்டினார் வம்பு.

வம்பானந்தா : ஒற்றைக்காலில் நேரு... நிபந்தனை போட்ட உதயச்சந்திரன்... அடுத்து ஐ.பி.எஸ் டிரான்ஸ்ஃபர்?

Related Stories