எடப்பாடிக்கு மோடியின் `ஒன் டு ஒன்' சிக்னல்!

``சீமான் மாமா என்னை மன்னிச்சுடுங்க. நான் பழையபடி பெங்களூருவுக்கே திரும்பப் போறேன்” என்று திடீர் பல்டி அடித்துவிட்டாரே, சுவாமி?” மிளகாய் பஜ்ஜிக்கு பக்கத்தில் சூடாக பாதாம் பாலை வைத்துவிட்டு வம்பானந்தாவின் பதிலுக்காக காத்திருந்தார், சிஷ்யை.சிஷ்யையை நக்கலாகப் பார்த்த வம்பு, “அது 11 வருடங்களுக்கு முன்பு வழக்கை வாபஸ் வாங்கியபோது பேசிய வீடியோ. அண்ணனைக் காப்பாற்ற பலவழிகளில் முயன்றுவரும் தம்பிகளின் வேலைகளில் அதுவும் ஒன்று. இந்தமுறை எவ்வளவோ அழுத்தங்கள் வந்தபோதும் வழக்கை வாபஸ் வாங்கும் முடிவில் விஜயலட்சுமி இல்லையாம். தொடர்ந்து போராடுவதால், ‘தம்பிகளால் உயிருக்கு ஆபத்து’ என்று பாதுகாப்பு கோரி மீண்டும் காவல் நிலையம் சென்றிருக்கிறார்.விஜயலட்சுமி விவகாரத்தால் சீமானுக்கு இன்னொரு பின்னடைவும் ஏற்பட்டுள்ளது. செப்டம்பர் 12 அன்று வளசரவாக்கம் போலீஸார் சம்மன் அனுப்பியிருந்தார்கள் அல்லவா? அதற்கு முந்தைய நாள், நாம் தமிழர் கட்சியின் வாட்ஸ்ஆப் குழுக்களில், ‘அண்ணன் விசாரணைக்கு வரும்போது அனைவரும் காவல்நிலையத்தில் திரள வேண்டும்’ என உத்தரவு பறந்தது. ஆனால், குழுவில் இருந்த தம்பிகளில் சிலர், ‘எல்லோரும் வேலைக்குச் செல்பவர்கள். இது அண்ணனின் தனிப்பட்ட வழக்கு. இதற்காக காவல் நிலையம் வந்து நேரத்தை வீணடிக்க முடியாது’ எனக் கறார் காட்ட, அதிர்ந்துபோய்விட்டனர், நாம் தமிழர் நிர்வாகிகள்".``ஓஹோ...மகளிர் உரிமைத்தொகை விரைவில் கிரடிட் ஆகப்போகிறதாமே?”``ஆமாம். கடந்த இரு தினங்களாக விண்ணப்பதாரர்களின் வங்கிக் கணக்குகளுக்கு ஒரு ரூபாய் அனுப்பி வைக்கப்பட்டு சோதனை செய்யப்படுகிறது. இதுகுறித்த தகவலும் குறுஞ்செய்தியாக அனுப்பப்படுகிறது.`தவறான வங்கிக் கணக்குகளுக்கு உரிமைத் தொகை சென்றுவிடக்கூடாது' என்ற எண்ணத்தில் இவ்வாறு செய்வதாக அதிகாரிகள் தெரிவிக்கின்றனர். இதில், வங்கிக்கணக்கு சரியாக இல்லாதபட்சத்தில் தபால் நிலையத்துக்கு அழைத்துச் சென்று சேமிப்பு கணக்கையும் தொடங்கிக் கொடுக்கிறார்கள். இத்திட்டம் நடைமுறைக்கு வரும்போது, `தேர்தல் வாக்குறுதிகளில் 100 சதவிகிதத்தை நிறைவேற்றிவிட்டோம்’ என்று முழங்கவும் தயாராகி வருகிறார், முதல்வர் ஸ்டாலின்..“தொகை கிரடிட் ஆகும்போது, சனாதான சர்ச்சையும் சற்று அடங்கும் அல்லவா?”“ ஆனால், உதயநிதியின் சனாதன சர்ச்சை அவ்வளவு சுலபமாக முடிவதுபோல் தெரியவில்லை. ஆ.ராசா, பொன்முடி உள்ளிட்ட தி.மு.க. தலைவர்கள் உதயநிதியின் பேச்சுக்கு வலுசேர்க்கும் வகையில் சில கருத்துகளைத் தெரிவித்தனர். இது, தி.மு.க.வுக்கு இந்துக்கள் மத்தியில் நெருக்கடியை ஏற்படுத்திக் கொடுத்திருக்கிறது. இதுகுறித்து உளவுத்துறை கொடுத்த ரிப்போர்ட்டில், `குறிப்பிட்ட பிரிவு மக்களுக்கு தி.மு.க. மீது கோபத்தை ஏற்படுத்தியிருக்கிறது' என சுட்டிக் காட்டப்பட்டுள்ளது. இதனால் சற்று அப்செட் ஆன ஸ்டாலின், `தி.மு.க.வினர் யாரும் சனாதனம் குறித்துப் பேச வேண்டாம்' என தடை போட்டுவிட்டாராம்.தவிர, `மதவாதம், மணிப்பூர் கலவரம் என பல விஷயங்களை மறைக்க, சனாதன செய்தியை திரித்து மக்களை திசை திருப்ப பா.ஜ.க. பார்க்கிறது. பா.ஜ.க.வினரின் இந்த தந்திரத்தை உணர்ந்து செயல்பட வேண்டும். கவனச் சிதறலுக்கு இடம் கொடுக்கக்கூடாது’ என்றும் அறிவுறுத்தி அறிக்கை ஒன்றை வெளியிட்டார், ஸ்டாலின்.இந்த அறிக்கை வெளியான அடுத்த ஒரு மணிநேரத்தில் பத்திரிகையாளர்களை சந்தித்த உதயநிதி, `சனாதனத்தைக் கடந்த 200 வருடங்களாக எதிர்த்து வருகிறோம். அதனால். அதனைப் பிறகு பார்த்துக்கொள்ளலாம். தற்போது பா.ஜ.க.வை ஆட்சிப் பொறுப்பில் இருந்து அகற்ற வேண்டும். அதில்தான் நமது கவனம் இருக்க வேண்டும்' என நேரடியாகவே அப்பாவின் விருப்பத்தை அறிவித்துவிட்டார்".`` இனியாவது சர்ச்சை அடங்குகிறதா பார்ப்போம். சரி சுவாமி.. திடீரென டெல்லி பறந்திருக்கிறாரே எடப்பாடி?””மதுரையில் மாநாடு, மாவட்ட செயலாளர்கள் கூட்டம் என 24 மணிநேரமும் தன்னை பிஸியாக காட்டிக்கொள்ளும் எடப்பாடி பழனிசாமி. கடந்த 14-ம் தேதி காலை 10 மணியளவில் டெல்லி கிளம்பிச் சென்றிருக்கிறார். இதற்கான காரணம் ரொம்பவே சிம்பிள். கடந்த அ.தி.மு.க. ஆட்சி காலத்தில் டெல்லியில் கட்சி அலுவலகத்தின் கட்டுமான பணிகளை வேகமாக நடந்து வந்தது. கொரோனா தொற்று ஊரடங்கு உள்பட பல்வேறு காரணங்களால் பணிகள் ஆமை வேகத்தில் நடந்தன. கூடவே, பொதுச்செயலாளர் விவகாரத்தில் முடிவு வரும்வரை டெல்லி அலுவலக கட்டுமானப் பணிகளை முடிக்கவும் தடை போட்டுவிட்டார். தற்போது அனைத்து விவகாரங்களும் எடப்பாடிக்கு சாதகமாகிவிட்டதால், டெல்லி அ.தி.மு.க. அலுவலக கட்டட பணிகளை விரைந்து முடித்து திறப்புவிழா நடத்தவும் எடப்பாடி தயாராகிவிட்டார்"``நல்ல விஷயம்தானே?"``அதில் இன்னொரு அரசியல் நகர்வும் இருக்கிறது. டெல்லி அலுவலக திறப்புவிழாவில் பிரதமர் மோடி, உள்துறை அமைச்சர் அமித் ஷா உள்ளிட்ட பா.ஜ.க. தலைவர்களையும் என்.டி.ஏ. கூட்டணியில் உள்ள கட்சித் தலைவர்களையும் அழைத்து தன்னை தேசிய அளவில் முன்னிலைப்படுத்திக் கொள்ளவும் எடப்பாடி முடிவு செய்துள்ளார். அந்தவகையில், மோடி, அமித் ஷா, ஜே.பி.நட்டா ஆகியோரை சந்தித்து அலுவலக திறப்புவிழாவுக்கு தேதி ஒதுக்கித் தருமாறு கேட்பதுதான் இந்தப் பயணத்தின் நோக்கமாம்”``டெல்லி விசிட்டை அ.தி.மு.க ரொம்பவே கொண்டாடுகிறதே?"``உண்மைதான். `இந்தமுறை எடப்பாடியின் டெல்லி விசிட் செம சக்சஸ்' என்கிறார்கள். பிரதமர் மோடியிடம் எடப்பாடி பழனிசாமி பேச வேண்டுமானால் அவரது தனிச் செயலர்கள் மூலமாகத்தான் பேச முடியும். ஆனால், இந்தமுறை தன்னை நேரடியாக அணுகுவதற்கு செயலர் ஒருவரை கைகாட்டியதாக தகவல். இந்த `ஒன் டு ஒன்' சிக்னலால் எடப்பாடி ரொம்பவே ஹேப்பி. கூடவே, பன்னீர்செல்வத்தை ஓரம்கட்டுவதிலும் டெல்லி உறுதியாக இருப்பதால், டபுள் சந்தோஷத்தில் இருக்கிறாராம், எடப்பாடி"“மணல் அதிபர்களை குறிவைத்து ரெய்டு நடப்பது ஒருபுறம் என்றால், முன்னாள் மணல் அதிபரை மையமாக வைத்து ஒரு சர்ச்சை ஓடிக்கொண்டிருக்கிறதே?”. ``ஆமாம். 2006-2011 தி.மு.க ஆட்சியில் ஆற்று மணல் விவகாரத்தில் கொடிகட்டிப் பறந்தவர், மூன்றெழுத்து தி.மு.க புள்ளி. இவர், தற்போது 500 கோடி ரூபாய் அளவுக்குக் கடனாளியாக மாறியிருப்பதுதான் ஆச்சர்யம். தற்போது இவரின் சொத்துகள் அனைத்தும் ஏலத்துக்கு வந்திருக்கிறது. உடன்பிறப்புகள் மத்தியில் வள்ளலாக வலம்வந்த மூன்றெழுத்து புள்ளி, தி.மு.க.வின் கட்சி அலுவலகமான கலைஞர் அறிவாலயத்தை தன்னுடைய சொந்த இடத்தில் சொந்த செலவில் கட்டிக் கொடுத்தவர்.மற்ற மாவட்டங்களில் உள்ள கட்சி அலுவலகங்கள் எல்லாம் பொதுச்செயலாளர் பெயரில்தான் பதிவு செய்யப்பட்டுள்ளன. ஆனால், இவரின் மாவட்டத்தில் மட்டும் தன் பெயரிலேயே பதிவு செய்து வைத்திருந்தார். தனது சொத்துகளை வங்கியில் அடமானம் வைக்கும்போது அறிவாலயத்தையும் சேர்த்து அடமானம் வைத்துவிட்டார். வங்கியில் 500 கோடி கடன் இருப்பதால் அறிவாலயத்தை மட்டும் அடமானத்திலிருந்து மீட்கும் வழிதெரியாமல் உடன்பிறப்புகள் உறைந்து போயுள்ளனர்".“தி.மு.க.வினருக்கு இப்படியும் ஒரு சோதனை?”``அப்படியே தென்சென்னை இணை கமிஷனர் திஷா மிட்டலுக்கு வந்த சோதனையையும் சொல்லிவிடுகிறேன். சனாதனம் குறித்த சர்ச்சைப் பேச்சுக்காக உதயநிதி மீது தமிழகம் முழுவதும் காவல்நிலையங்களில் புகார் கொடுக்கப்பட்டு வருகிறது அல்லவா? இந்த விவகாரத்தில் இதுவரை உதயநிதி மீது 40 காவல்நிலையங்களில் சி.எஸ்.ஆர் பதிவு செய்யப்பட்டுள்ளது. இது பா.ஜ.க முகாமில் உற்சாகத்தை ஏற்படுத்தியுள்ளது. ஆனால், இந்தத் தகவல் இதுவரை அதிகார மையத்துக்கு சென்றடையவில்லையாம்.சென்னையில் நடந்த முற்போக்கு எழுத்தாளர்கள் மற்றும் கலைஞர்கள் சங்க மாநாட்டில் சனாதனம் குறித்து உதயநிதி பேசியபோது, அறநிலையத்துறை அமைச்சர் சேகர்பாபுவும் அமர்ந்திருந்தார். இதைத் தொடர்ந்து, `அமைச்சர் பதவியில் இருந்து சேகர்பாபு விலக வேண்டும்' என்பதை வலியுறுத்தி தமிழக பா.ஜ.க சார்பில் செப்டம்பர் 11ம் தேதி போராட்டம் நடந்தது.இந்தப் போராட்டத்தில் ஈடுபட்ட பா.ஜ.கவினரை, காலையில் கைது செய்து மாலையில் விடுவித்தனர். ஆனால், பா.ஜ.க தலைவர் அண்ணாமலையை மட்டும் போலீஸார் கைது செய்யவே இல்லை. அவரை அப்படியே அனுப்பிவிட்டனர். இது முதல்வருக்கு தெரியவரவே, காவல்துறை உயர் அதிகாரிகளை அழைத்துப் பேசினார். முடிவில், துணை கமிஷனர் திஷா மிட்டல் காத்திருப்போர் பட்டியலுக்கு மாற்றப்பட்டார்” என விவரித்துவிட்டு, வாட்ஸ்ஆப்பில் வந்த ரெய்டு செய்திகளுக்குள் மூழ்கத் தொடங்கினார், வம்பு.டெல்லி வாத்தியார்புதிய நாடாளுமன்ற கட்டடத்துக்கான திறப்புவிழா செப்டம்பர் 19ம் தேதியன்று நடத்தத் திட்டமிடப்பட்டுள்ளது. அன்று, `அவைக்குள் மோடி நுழையும்போது அனைத்து எம்.பி.க்களும் எழுந்து நின்று கைதட்டவேண்டும்' என்று பா.ஜ.க.வினர் முடிவெடுத்துள்ளனர். அதேநாளில், நாடாளுமன்ற ஊழியர்களுக்கு தாமரை சின்னம் பொறித்த புத்தாடைகளை பரிசளித்து, அவற்றை அணிந்து வரவும் அறிவுறுத்த உள்ளனர். இதையறிந்து, விழாவைப் புறக்கணிக்க இந்தியா கூட்டணி முடிவெடுத்திருப்பதாக தகவல். - சுவாமி வம்பானந்தா