மினிமம் பேலன்ஸ் முதல்வரின் மேக்ஸிமம் டென்ஷன்!

``அக்கவுன்ட்ல இருந்த மினிமம் பேலன்ஸை எடுத்துட்டாங்க சுவாமி. அதனால இன்னைக்கு வெறும் பிளாக் டீ தான்”- முகவாட்டத்துடன் சிஷ்யை கொடுத்த டீயை வாங்கிய வம்பானந்தா, “இன்னைக்கு தமிழ்நாட்டோட ஹாட் டாபிக்கே இந்த மினிமம் பேல்ன்ஸ் விஷயம்தான்” என்றபடி கச்சேரியைத் தொடங்கினார். “ மகளிருக்கான உரிமைத் தொகைத் திட்டம், தி.மு.க.வின் செல்வாக்கை பெண்கள் மத்தியில் அமோகமாக உயர்த்தியிருக்கிறது என்பது உண்மைதான். இதற்கு சந்தோஷ சத்தத்துடன் ஆங்காங்கே குமுறல் சத்தங்களும் கேட்கத் தொடங்கியிருக்கின்றன. இதைப் பற்றி முதல்வர் ஸ்டாலினுக்கு கடிதம் ஒன்றை எழுதியிருக்கிறார், சி.பி.எம் கட்சியின் மாநில செயலாளர் கே.பாலகிருஷ்ணன். அதில், ' மகளிரின் வங்கிக் கணக்குக்கு அரசு அனுப்பியுள்ள ஆயிரம் ரூபாயில் இருந்து மினிமம் பேலன்ஸை வங்கிகள் எடுத்துக் கொள்கின்றன. இதனால் ஆயிரம் ரூபாயை முழுமையாக பெற முடியாத நிலை ஏற்பட்டுள்ளது. இதுகுறித்து வங்கித் துறை அதிகாரிகளுடன் பேசி தொகை முழுமையாக கிடைக்க நடவடிக்கை எடுக்க வேண்டும்' எனக் கூறியிருக்கிறார். இந்த மினிமம் பேலன்ஸ் விவகாரத்தால் ஏக டென்ஷனான முதல்வர் இதற்கு உடனடியாக தீர்வு காணும்படி உத்தரவிட்டிருக்கிறார்." ``அமலாக்கத்துறையை வம்பில் சிக்கவைத்துவிட்டாரே கபில் சிபல்?” ``செந்தில் பாலாஜியை, ‘நீங்கள் ஏன் பா.ஜ.க.வில் இணைக்கூடாது?’ என்று அமலாக்கத்துறை கேட்டதாக உச்ச நீதிமன்றத்தில் கபில் சிபல் கூறியதுதான் வைரலாகி வருகிறது. ஆனால், அமலாக்கத்துறை அப்படி கேட்டதான விஷயத்தில் உண்மை இல்லையாம். தி.மு.க.வை கட்டம் கட்டத்தான் செந்தில் பாலாஜியை அமலாக்கத்துறை தூக்கியுள்ளது. எனவே ஊழல் குற்றச்சாட்டில் சிக்கியுள்ள செந்தில் பாலாஜியை பா.ஜ.க.வில் இணைத்தால் அது பா.ஜ.க.வுக்குத்தான் கெட்ட பெயர். தவிர, அண்ணாமலைக்கும் செந்தில் பாலாஜிக்கும் ஆகவே ஆகாது. உண்மையில் செந்தில் பாலாஜிக்கு ஜாமீன் கிடைப்பது அரிது. இந்தநிலையில், இதற்கு அரசியல் சாயம் பூசினால் மட்டுமே, செந்தில் பாலாஜிக்கு ஜாமீன் வாங்க முடியும் என்பதால் இப்படியோரு நாடகத்தை நடத்தியதாக கூறுகிறார்கள்”.சரி... மோடியின் பிறந்தநாளுக்காக கனஜோராக வசூல்வேட்டை நடந்ததாமே?” ``பிரதமர் மோடியின் 73வது பிறந்தநாளான செப்டம்பர் 16ம் அன்று சென்னையில் ஆயுஷ் ஹோமம், கோ பூஜை மற்றும் கோ தானம் ஆகியவை நடந்தன. இதில், ஆளுநர் தமிழிசை சவுந்தரராஜன், மத்திய மீன்வளத்துறை அமைச்சர் புருஷோத்தமன் ரூபாலா, மத்திய இணை அமைச்சர்கள் எல்.முருகன், வி.கே.சிங் உள்ளிட்டோர் கலந்துகொண்டனர். இதை பா.ஜ.க கோட்ட பொறுப்பாளரும் தமிழிசையின் தீவிர ஆதரவாளருமான வினோஜ் செல்வம் நடத்தினார். இவர் அண்ணாமலையின் ஆதரவாளர்களை நிகழ்ச்சிக்கு அழைக்கவில்லையாம். இது மலை தரப்பை அப்செட் ஆக்கியுள்ளது. இதையடுத்து, இந்த நிகழ்ச்சிக்காக வினோஜ் செல்வம் எங்கெல்லாம் ‘கட்டிங்’ வாங்கினார் என்று டெல்லிக்கு தட்டிவிட்டிருக்கிறது மலை தரப்பு!" ``தி.நகர் சத்யா வீட்டில் நடந்த ரெய்டால், எடப்பாடியின் பல்ஸ் எகிறியதாக சொல்கிறார்களே?” `` அ.தி.மு.க. மாவட்டச் செயலாளர்கள் தி.நகர் சத்யா மற்றும் ஆர்.எஸ்.ராஜேஷ் இடங்களில் ரெய்டு நடத்திய விஜிலென்ஸ், ஏராளமான ஆவணங்களைக் கைப்பற்றியது. இதில் தி.மு.க தரப்புக்கு வேண்டப்பட்டதாக சொல்லப்படும் ரியல் எஸ்டேட் நிறுவனத்திடம் இருந்து நீலாங்கரையில் 10 கோடி ரூபாய் மதிப்புள்ள இடத்தை வாங்கியதற்கான ஆவணங்களும் சிக்கியுள்ளன. இதேபோன்று, அந்த நிறுவனத்துடன் இணைந்து ரியல் எஸ்டேட் வர்த்தகத்தை நடத்தி வந்ததற்கான ஆவணங்களும் சிக்கியுள்ளனவாம். இந்த டீலிங்கை அறிந்து கடும் கோபத்தில் இருக்கிறாராம், எடப்பாடி. ஜெயலலிதா இருந்த காலத்தில் தி.மு.க. நிர்வாகிகளுடன் ஏதாவது பொதுநிகழ்ச்சிகளில் கலந்து கொண்ட புகைப்படம் வந்தால்கூட பதவியைவிட்டே ஜெயலலிதா நீக்கிவிடுவார். ஆனால், `பிசினஸ் டீல் நடத்திவரும் இவர்களை எடப்பாடி என்ன செய்யப் போகிறார்?' என்பதுதான் அ.தி.மு.க. முகாமில் பெரும் எதிர்பார்ப்பாக உள்ளது”.“ஓ.பி.எஸ் பக்கம் ஓசையே இல்லையே?” “யார் சொன்னது... அவர் பல அண்டர்கிரவுண்ட் வேலைகளைச் செய்து வருகிறார். ஒரு சாம்பிள். முதல் அதிரடியாக, எடப்பாடிக்கு எதிராக முக்குலத்தோர் வாக்குகளை திசை திருப்ப முக்குலத்தோர் புலிப்படை நிறுவனத் தலைவர் நடிகர் கருணாஸை பயன்படுத்த முடிவு செய்திருக்கிறாராம். வன்னியர்களுக்கு 10.5 சதவிகித இடஒதுக்கீட்டை எடப்பாடி அறிவித்தபோது, இதர சமூகத்தினர் மத்தியில் அதிருப்தி அலை எழுந்தது. குறிப்பாக, முக்குலத்தோர் சமூகம் கடும் எதிர்ப்பைக் காட்டியது. இதையெல்லாம் வரிசைப்படுத்தி எடப்பாடிக்கு எதிராகப் பேச கருணாஸுக்கு தனி மேடை அமைத்துக் கொடுக்கவும் ஓ.பி.எஸ் தயாராகி வருகிறார். இதற்கு கருணாஸும் பச்சைக் கொடி காட்டிவிட்டாராம்." “ஓஹோ...” என்றபடியே பிஸ்கெட்டை கடித்தபடியே கச்சேரியைத் தொடர்ந்தார் வம்பு. “செப்டம்பர் 16ம் தேதியன்று கோவை, தென்காசி உள்ளிட்ட மாவட்டங்களில் என்.ஐ.ஏ. அதிகாரிகள் அதிரடி சோதனை நடத்தினர். இதில், கோவையில்தான் அதிக இடங்களில் சோதனை நடத்தப்பட்டது. குறிப்பாக, கடந்த ஆண்டு கோட்டை ஈஸ்வரன் கோவில் அருகில் கார் குண்டு வெடித்து ஜமேஷா முபின் என்ற இளைஞர் இறந்தார். அதை மையப்படுத்தியே ரெய்டு நடத்தப்பட்டது. குனியமுத்தூரில் உள்ள அரபிக் கல்லூரியில் படித்தவர்களின் வீடுகள்தான் அதிகம் டார்கெட் செய்யப்பட்டன. `இங்கே பயின்றவர்களுக்கு ஆயுத பயிற்சி அளிக்கப்பட்டதா?' என்ற கோணத்தில் விசாரணை நடந்துள்ளது. கோவை மாநகராட்சியின் 82வது வார்டு பெண் கவுன்சிலரான முபசீராவின் வீட்டில் ரெய்டு நடந்ததும், அவரின் கணவரும் விசாரணை வளையத்தில் கொண்டு வரப்பட்டதும் பரபரப்பைக் கிளப்பியுள்ளது. ’அரசியல் மற்றும் தேர்தல் உள்நோக்கத்துடன் ரெய்டு நடந்துள்ளது. பிரதமரின் பிறந்தநாளை பரபரப்பாக்க எங்களை டார்கெட் செய்வது சரியா?' என இஸ்லாமிய சமூகத்தினர் மத்தியில் குமுறல் வெளிப்பட்டுள்ளது".`` கோவை மேயரும் அடிக்கடி சர்ச்சையில் சிக்குகிறாரே?" `` ஆமாம். கோவை மேயர் கல்பனா, அவரின் அம்மா மற்றும் தம்பிக்கு எதிராக எதிர்வீட்டு பெண் சரண்யா பகீர் புகார்களை கிளப்பினார். இந்த விவகாரம் அடங்குவதற்கு முன், மேயரின் தம்பி குமார் பற்றி அடுத்த சர்ச்சை கிளம்பியுள்ளது. அதாவது, செந்தில்பாலாஜி அமலாக்கதுறையால் கைது செய்யப்பட்ட பிறகு, ஒரு ஜீப்பில் கத்தை கத்தையாக காகிதங்களைக் கொண்டுவந்து எரித்ததாகவும், அதில் எரியாத சில காகிதங்களில், ‘பண பரிமாற்றம்’குறித்த தகவல்கள் இருப்பதாக செய்தி வெளியானது. `அது செந்தில்பாலாஜி தொடர்பான ஆவணங்களா?' என்று எரிந்த காகித துணுக்குகளில் உள்ள தகவல்களை வைத்து எதிர்க்கட்சிகள் வரிந்துகட்டிக் கொண்டு கிளம்பியுள்ளன. `அமலாக்கத்துறையின் அடுத்த ரவுண்டில் மேயரின் தம்பி சிக்குவாரா?' என உடன்பிறப்புகளே கேட்கின்றனர்" ``சரிதான்.." `` கோவையின் பொறுப்பு அமைச்சர் முத்துசாமியிடம் மேயர் மீதான புகார்கள் குறித்துக் கேட்டால், ’குற்றச்சாட்டுகள் குறித்து விசாரிக்கப்படும்’ என்கிறார். ஆனால், மேயர் மீது புகார் சொன்ன பெண்ணின் வீட்டை காலி செய்ய கடும் நெருக்கடிகள் தரப்படுகிறது. பள்ளி செல்லும் இரண்டு பிள்ளைகள் இருப்பதால் தவிக்கிறது, அந்தக் குடும்பம்.” “மதுரையில் இருந்தும் முணுமுணுப்பு எழுந்திருக்கிறதே சுவாமி?” ”மதுரை மீனாட்சி அம்மன் கோயில் விவகாரம்தானே. முன்னதாக மீனாட்சி அம்மன் கோயிலுக்கு அறங்காவலர் குழு நியமனம் தொடர்பாக பி.டி.ஆர் தயாரித்திருந்த பட்டியல் ரத்து செய்யப்பட்டது அல்லவா… இதைத் தொடர்ந்து சமீபத்தில் அந்த கோயிலுக்கு தக்காராக பிரபல தொழிலதிபர் குடும்பத்தில் இருந்து பெண்ணொருவரை நியமித்தார்கள். நேர்மையாக தொழில் செய்துவரும் கெளரவமான குடும்பம் என்பதால் இதில் சர்ச்சை எழவில்லை. இந்த நிலையில் ஏற்கெனவே பி.டி.ஆர் கொடுத்த பட்டியல் கேன்சல் செய்யப்பட்டதாலும், தற்போது அமைச்சர் மூர்த்தி தரப்பிலிருந்து ஒரு பட்டியல் கொடுத்துள்ளதாலும் தக்காருக்கு உறுதுணையாக இருக்க வேண்டிய ஐந்து பேர் கொண்ட குழுவை நியமிக்க முடியாமல் தவித்துவருகிறது அறநிலையத்துறை. இதனால், மீனாட்சி அம்மன் கோயில் தொடர்பான அத்தனை வேலைகளும் வளர்ச்சிப் பணிகளும் ஸ்தம்பித்துள்ளன. குழு இல்லாமல் தக்கார் மட்டுமே நியமித்து என்ன பலன், குழுவை நியமிப்பதில் என்ன குழப்படி? என்று புலம்புகிறார்கள் பக்தர்கள்” என்றபடி நடையைக் கட்டினார் வம்பு.டெல்லி வாத்தியார் `மல்லிகார்ஜுன கார்கேவை பிரதமர் வேட்பாளராக அறிவிக்கலாமா?' என காங்கிரஸ் கட்சியின் மூத்த தலைவர்களின் ஆலோசனையை அரவிந்த் கெஜ்ரிவால், நிதீஷ் குமார் ஆகியோர் மறுத்துள்ளனர். தி.மு.க தலைவர் ஸ்டாலினும் இதை ஏற்கவில்லை. `ராகுல் காந்தியைத்தான் பிரதமர் வேட்பாளராக அறிவிக்கவேண்டும்' என்று தி.மு.க தரப்பிலிருந்து பிரஸ்ஸர் கொடுக்கப்பட்டுள்ளது. ஆனால், அதற்கு ராகுல் இதுவரை பிடிகொடுக்கவில்லையாம். இந்தியில் ட்விட்டர், ஃபேஸ்புக் போன்ற சமூகவலைதளங்களில் பிரசாரத்தைத் தொடங்கியுள்ளது, தி.மு.க. `இந்தி மொழிக்கு எதிராகப் பேசும், தி.மு.க தற்போது மட்டும் எதற்காக இந்தியில் பிரச்சாரம் செய்ய வேண்டும்?' என்று பா.ஜ.க.வினர் கலாய்த்துத் தள்ளுகின்றனர். -சுவாமி வம்பானந்தா