மேயர் ரைட்டு... ஆபீஸர்ஸ் ராங்கு! டல் அடிக்கிறதா டாலர் சிட்டி?

திருப்பூர் மேயர் பராக் பராக்…பின்னலாடை நகரமான திருப்பூரில் தீர்க்கப்படாத பிரச்னைகள் பல பின்னிக் கிடக்கின்றன. டாலர் சிட்டி டல்லடித்துக் கிடக்கிறது. ஆயத்த ஆடைநகரின் பிரச்னைகளைத் தீர்ப்பதில் மேயர் ஆயத்தமாக இருந்தாலும் அதிகாரிகள் அப்படியில்லை... ஊருக்குள் நுழையும்போதே புகார்க் குரல்கள் காற்றில்கலந்து வருகின்றன.திருப்பூர் மாநகராட்சியின் மேயர் தினேஷ்குமார். அரசியல் வாழ்வில் முதல்முறையாக கவுன்சிலர் பதவியை வென்ற கையோடு, மேயராக வந்தமர்ந்திருக்கிறார். இளரத்தம். அதனாலேயே இவரிடம் சலிக்காத உழைப்பை எதிர்பார்க்கிறார்கள் திருப்பூர்வாசிகள். அது நிறைவேறுகிறதா?ரயில்வே லைனைச் சேர்ந்த சீனியர் வாக்கர்ஸ் கிளப் உறுப்பினர்களிடம் கேட்டோம்... “தினமும் அதிகாலையில மாநகராட்சியின் ஏதோ ஒரு வார்டுல ஜாக்கிங் போனபடியே அவர் ஆய்வு செய்யறதைப் பார்க்க முடியுது. இது சந்தோஷமான விஷயம்தான். ஆனா, திருப்பூர் மாநகராட்சிக்கான வளர்ச்சிக்காக இவர் போடற திட்டங்கள் எல்லாம் யானைப் பசிக்கு சோளப்பொரி மாதிரி இருக்கு!” என்றார்கள்.திருப்பூர் மாநகராட்சியின் முன்னாள் துணை மேயரும் காங்கிரஸின் சிட்டிங் கவுன்சிலருமான செந்தில்குமார் நம்மிடம், “எங்க மாநகராட்சியில மிகப்பெரிய பிரச்னையே குடிதண்ணீர் பிரச்னைதானுங்க. இதுக்கான ஸ்கீம்ல, நாலாவது ஸ்கீம் நிறைவேறிச்சுன்னா மக்கள் ஓரளவு தப்பிச்சுக்குவாங்க. ஆனா, அந்த வேலை ஆமை வேகத்துல நடந்துகிட்டிருக்கு. அதேசமயம், முன்னாடி எல்லாம் 12 நாளுக்கு ஒரு தடவைதான் குடி தண்ணீர் வந்துகிட்டு இருந்துச்சு, இப்ப அந்த இடைவெளியைக் குறைச்சிருக்கறது சந்தோஷம்தான். அதை இன்னும் குறைச்சு, மூணு நாளைக்கு ஒருதடவை தண்ணீர் விடணும். அதேமாதிரி, சாலைகள் எல்லாம் ரொம்பவே டேமேஜாகிக் கிடக்கு. இதையெல்லாம் சீர் செய்யுற பணியை முடுக்கிவிடணும்.அதைவிட முக்கியம், திருப்பூர் மாநகராட்சிக்குன்னு ஒதுக்கும் நிதியை அரசாங்கம் அதிகப்படுத்தணும். மேயர் தினேஷைப் பொருத்தவரைக்கும் மாநகராட்சிப் பணிகளில் வேகமா செயல்படுறார்தான். ஆனா, எந்தப் பணிக்கு முதல்ல முக்கியத்துவம் கொடுக்கணும்கிற அனுபவம் அவருக்கு பத்தல.சின்ன வயசுங்கறதால பரபரன்னு இருக்கிறாரே தவிர, விஷயங்களை ஸ்மார்ட்டா கையாள கத்துக்கோணுமுங்க. இதுல இன்னொரு முக்கியமான விஷயம், என்னதான் மேயர் ஸ்பீடா இருந்தாலும், மத்த அதிகாரிகள் அதுக்கு ஏத்த மாதிரி ஒத்துழைப்பு கொடுக்கிறாங்களாங்கறதுதான் சந்தேகமா இருக்குது. ஏன்னா, அரசு வாகனத்தோட சக்கரங்களே அதிகாரிங்கதான். அவங்க மூவ் பண்ணாம பாவம் மேயர் மட்டும் ஸ்டியரிங்கை அசைச்சு என்ன பிரயோஜனம்” என்றார் நெத்தியடியாக.“அதிகாரிகளின் ஒத்துழைப்பு இல்லை” என்றே கூறும் தி.மு.க. கவுன்சிலர்கள் சிலர், “மாநகராட்சியோட நிர்வாகக் கட்டமைப்புல சில உயரதிகாரிகள் பல வருஷங்களா ஆணியடிச்சா மாதிரி இங்கேயே உட்கார்ந்திருக்காங்க. அவங்கள்லாம், கார்ப்பரேஷன் ஆபீஸை ஏதோ தங்களோட பர்ஸனல் பிசினஸ் ஆபீஸ் மாதிரி நினைச்சுகிட்டு ஆட்டம் போடுறாங்க. வளர்ச்சிப் பணிகளுக்கான பெரிய தடைக்கல்லே இவங்கதான்.மாநகராட்சிகிட்டயிருந்து மக்கள் அனுமதி பெற வேண்டிய பல விஷயங்கள்ல கட்டிங், கரப்ஷன் ஆட்டம் போடுறதுக்குக் காரணிகளும் இவங்கதான். உள்ளாட்சித் துறை அமைச்சர் நேருவும் முதல்வரும் இதுல நேரடியா தலையிட்டு இந்தக் களைகளை எடுத்துட்டா, கூடிய சீக்கிரமே திருப்பூர் சிங்கப்பூராகவே மாறினாலும் ஆச்சரியமில்லை” என்கிறார்கள்.உள்ளூர்வாசிகளும், உட்கட்சி ஆட்களும் சொல்வதெல்லாம் சரி, எதிர்க்கட்சியான அ.தி.மு.க. மாநகராட்சி கவுன்சில் குழுத் தலைவர் திருப்பதி என்ன சொல்கிறார்? “சொத்து வரி, குப்பை வரின்னு எல்லா வரிகளையும் உயர்த்தியிருக்காங்க. பனியன் தொழில் நசிஞ்சு போயிருக்குற நிலையில இப்படி வரியை உயர்த்தினா மக்கள் எப்படி சமாளிப்பாங்க? இதைத்தான் நாங்க கடுமையா எதிர்க்கறோம். அதேமாதிரி வரி விதிப்புல குழப்பங்களும், ஏற்றத்தாழ்வுகளும் இருக்குது. அதை சரிசெய்து முறைப்படுத்தினாலே பல பிரச்னைகள் தீரும்.இதையெல்லாம் செய்ய மாநகராட்சியோட நிர்வாகக் கட்டமைப்புல போதுமான பணியாளர்கள் இல்லை. இதை முதல்ல சரி பண்ணணும். அதோட, அதிகாரத்தை முறைகேடாப் பயன்படுத்துற அதிகாரிகள் மேல கடுமையான நடவடிக்கை எடுக்கணும்..எதிர்க்கட்சிங்கிற பாகுபாடெல்லாம் நாங்க பார்க்குறதில்லை. திருப்பூர் மாநகராட்சியின் வளர்ச்சிக்காகவும், மக்கள் நலனுக்காகவும் சென்னைக்கே வந்து முதல்வரை சந்திச்சு கோரிக்கை வைக்கவும் தயாரா இருக்கோம். மேயரைப் பொருத்தவரைக்கும் எந்தப் பிரச்னையும் இல்லை. யார் போய் கருத்துச் சொன்னாலும் காது கொடுத்துக் கேட்கறார். அரசியல் காழ்ப்புணர்ச்சி காட்டுறதில்லை. ஆனா, தாட்பூட்னு இவங்க பெருமை அடிச்சிக்கிற அளவுக்கு வளர்ச்சி இல்லையே... அதுக்கு இன்னும் அதிக தூரம் பயணிக்கணும்”என்றார் அழுத்தமாக.மேயர் தினேஷ்குமாரை சந்தித்து விளக்கம் கேட்டோம்... “மேயராகப் பதவியேற்ற நிமிடத்திலிருந்து இந்த நொடி வரையில் மாநகராட்சியின் அத்தனை துறைகளிலும் நான் என்னென்ன பணிகள் பண்ணியிருக்கேன் என்பதை யார் வேண்டுமானாலும் செக் செய்துகொள்ளலாம். எல்லா ஆவணங்களும் தயார். எந்த ஒளிமறைவுமில்லாமல் வெளிப்படையான நிர்வாகமே நடத்துறோம்.வரவு செலவின் ஒவ்வொரு ரூபாயையும் விளக்கி முழு நீளப் புத்தகமாகத் தயாரித்துக் கொடுத்திருக்கிறேன். ஒவ்வொரு நூறு நாட்களிலும் மேயராக நான் என்ன பணிகள் செய்திருக்கிறேன் என்பதையும் அடுத்த நூறு நாட்களுக்கு என்ன செய்யப்போகிறோம் என்பதையும் பிரின்ட் செய்து வெளியிடுகிறேன். அதனால் இதைச் செய்தேன், அதைச் செய்தேன் என்று, பொய்யாக எதையும் நான் தம்பட்டம் அடிக்க முடியாது.அந்தப் புத்தகத்தை கையோடு எடுத்து வந்து மக்கள் கேள்வி கேட்கிறார்கள். அதனால் நான் தப்பிக்கவே முடியாது. நேர்மையாக வேலை பார்க்கிறேன்... ஒரு பைசாகூட முறைகேடு செய்வதில்லை. அதேசமயம், என்னோட பணிகளில் அதிகாரிகளின் ஒத்துழைப்பு இருக்கிறதா, இல்லையா? என்று நான் ஆராய்வதில்லை. யாரையும் குற்றமும் சொல்லும் பழக்கம் எனக்கு இல்லை. நிதிக்காக அரசாங்கத்தையே எதிர்பார்த்து நிற்காமல், மாநகராட்சியில் எங்கெல்லாம் நிதி வீணாகிறது, எங்கெல்லாம் முறைகேடாக எடுக்கப்படுகிறது எனப் பார்த்து அந்த விஷயங்களை முதலில் தடுத்தேன். குறிப்பாக, குப்பைகளை வாகனங்களில் கொண்டுசெல்வதில் நடந்த முறைகேடுகளுக்கு செக் வைத்ததன் மூலமாக பல லட்சங்கள் மக்கள் நிதி காப்பாற்றப்பட்டது. இதுபோலவே பல துறைகளில் நடந்துகொண்டிருந்த முறைகேடுகளைத் தவிர்த்து, அதன் மூலம் நிதியை சேமித்து, மக்கள் நலத் திட்டங்களுக்கு முதலீடு செய்கிறோம்.‘நமக்கு நாமே’திட்டம் மூலமாக கடந்த ஒரு வருடத்தில் 12.5 கோடி ரூபாய் மதிப்பில் நாற்பத்தொரு பணிகளை செய்து முடித்துள்ளோம். 165 கிலோமீட்டருக்கு ரோடு போட்டுள்ளோம். செப்டம்பர் மாதத்திற்குள் முழுமையாக மெயின் ரோடு போட்டு முடிக்கத் திட்டமிட்டுள்ளோம். 4வது குடிநீர்த் திட்டம் இப்போது விரைவுபடுத்தப்பட்டுள்ளது.புற்றுநோயாளிகளுக்காக சுமார் 32 கோடி ரூபாயில் ஒருங்கிணைந்த சிறப்பு மருத்துவமனை அமைப்பதற்குத் தயாராக இருக்கிறோம். அரசின் அனுமதி கிடைத்தால் வேலை துவங்கிவிடும். வரும் ஆண்டில் மாநகராட்சிக்குள் எட்டாயிரத்து சொச்சம் புதிய மின்விளக்குகளும், 4,700 மின் சிக்கன விளக்குகளாகவும் மாற்றும் நடவடிக்கையில் இறங்கியுள்ளோம். அடுத்த ஆண்டில் இவை எல்லாம் செய்யப்பட்டு இருக்கும். இல்லாவிட்டால் நீங்களே என்னிடம் வந்து கேள்வி கேளுங்கள். மாநகராட்சியின் அனைத்து மின் விளக்குகளுக்கும் பார் கோடு கொடுக்கப் போகிறோம். இதன் உதவியால், எந்த விளக்கு பழுது என்று மக்கள் சொன்ன அடுத்த சில மணி நேரத்தில் அது சரிசெய்யப்பட்டு இணையத்தில் தகவல் தெரிவிக்கப்படும்.வரி விதிப்பு என்பது அரசின் கொள்கை. இருந்தாலும் திருப்பூருக்கு சலுகைகள் பெறுவதற்காக முதல்வரிடம் கோரிக்கை வைத்திருக்கிறேன். நான் மிகுந்த சிரத்தை எடுத்து செய்யும் பணிகளில் முக்கியமானது மாநகராட்சிப் பள்ளிக் குழந்தைகளுக்கான வசதிகளை மேம்படுத்துவதுதான். குறிப்பாக, பெண் குழந்தைகளின் நலனுக்காக பனியன் கம்பெனிகளிடம் ஆவணபூர்வமாக நிதி பெற்று வகுப்பறை, கழிப்பறை, இலவச நாப்கின் வழங்குதல் மாதிரியான பணிகளை செய்துவருகிறோம்.அமைச்சர் உதயநிதியை தொடர்ந்து சந்தித்து, திருப்பூர் மாநகராட்சிக்கு சிறப்பு விளையாட்டு மேம்பாட்டுத் திட்டங்களைத் தரவேண்டும் என்று வலியுறுத்திவருகிறேன. கூடிய விரைவில் திருப்பூர் பெரிதாக ஜொலிக்கும் பாருங்கள்”என்றார், தன்னம்பிக்கையோடு. “அதிகாரிகள் சிலரது செயல்பாடுகளால் மாநகராட்சியின் பெயர் கெடுகிறதாமே?” என்று மாநகராட்சி கமிஷனர் பவன்குமாரிடம் கேட்டோம். “நான் இங்கே பதவியேற்று மூணு மாதங்கள்தான் ஆகின்றன. அப்படி எந்தப் புகாரும் இல்லை, ஆதாரத்தோடு வந்தால் நடவடிக்கை எடுக்கப்படும்!” என்றார் சுருக்கமாக.திருப்பூர் மக்களுக்கு நல்ல திருப்பங்கள் வர வேண்டும்!-எஸ்.ஷக்தி

மேயர் ரைட்டு... ஆபீஸர்ஸ் ராங்கு! டல் அடிக்கிறதா டாலர் சிட்டி?

Related Stories