மார்கோனியை வளைத்த `மணல்' பாபு வழக்கு! -வைகோவை மிரளவைத்த மயிலாடுதுறை

- ஆர்.விவேக் ஆனந்தன்ம.தி.மு.க பொதுச் செயலாளர் வைகோவுக்கு அதிர்ச்சி வைத்தியம் கொடுத்திருக்கிறார், மயிலாடுதுறை ம.தி.மு.க மா.செ மார்கோனி. `பா.ஜ.க போவார்.. தி.மு.க போவார்' என்ற ஹேஸ்யங்களை எல்லாம் பொய்யாக்கி கூண்டோடு அவர் அ.தி.மு.க.வில் ஐக்கியமானதுதான் ஹைலைட்..``என்ன நடந்தது?'' - மார்கோனியிடம் பேசினோம். “ம.தி.மு.க.வுல முப்பது வருஷமா இருந்தேன். கடந்த பக்ரீத் பண்டிகை நாளில் மயிலாடுதுறை மாவட்ட அ.தி.மு.க. செயலாளர் பவுன்ராஜ் என் வீட்டுக்கு வந்தார். ‘இங்கே இருந்து என்ன சாதிக்கப்போறீங்க.பேசாம அ.தி.மு.க.வுக்கு வந்துடுங்க… உங்களுக்கு உரிய மரியாதை தர்றோம்’ன்னு கூப்பிட்டாரு. ’எதுவுமே சாதிக்கலைன்னாலும் பரவாயில்லை. நான், ம.தி.மு.க.வை விட்டு வரமாட்டேன்’ன்னு சொன்னதும் எழுந்து போயிட்டாரு.மறுநாள் எனக்கு சந்திராஷ்டமம். அதனால, வீட்டுல இருக்கவேண்டாம்னு தீர்மானிச்சு, ஒகேனக்கல் போய் ரெண்டுநாள் தங்கிட்டுத் திரும்பி வந்தேன். இங்கே வந்துபார்த்தா, பவுன்ராஜ் என் வீட்டுக்கு வந்தது, நான் ஒகேனக்கல் போனது ரெண்டையும் முடிச்சுப்போட்டு யாரோ தலைமைகிட்ட தப்பா போட்டுக் கொடுத்திருக்காங்க. வைகோ என்னை அழைச்சு விசாரிக்காமலே பதவி நீக்கம் செய்துட்டார். இது எனக்குப் பெரும் மன உளைச்சலை ஏற்படுத்திடுச்சு.என்னை மேலும் அவமானப்படுத்தற மாதிரி, அவசரக்கூட்டம் நடத்தி, புதுசா ஒரு மாவட்டச் செயலாளரை நியமிக்க தீர்மானம் நிறைவேத்திட்டாங்க. அதோட, ம.தி.மு.க. இணையதளத்துல என்னைப் பத்தி அவதூறான கருத்துகளைப் பதிவிட்டாங்க. விசாரிச்சப்போ இதையெல்லாம் செய்யச் சொன்னவர், துரை வைகோன்னு தெரியவந்துச்சு.கட்சிக்காக உண்மையா உழைச்சதுக்கு மதிப்பில்லைன்னு புரிஞ்சுகிட்டதால, ம.தி.மு.க.வுல இருந்து விலகத் தீர்மானிச்சேன். என்னை நம்பி கட்சிக்கு வந்த சீர்காழி மற்றும் மயிலாடுதுறையைச் சேர்ந்த 28 பொறுப்பாளர்கள், தொண்டர்கள்னு எல்லாருமா சேர்ந்து ம.தி.மு.க.வுல இருந்து கூண்டோட ராஜினாமா செய்துட்டோம். உண்மையா இருக்கறவங்களுக்கு கட்சியில இடமில்லைங்கற நிலைதான் இப்போ ம.தி.மு.க.வில இருக்கு” என்றார்.``சேலம் மாவட்ட சுற்றுப்பயணத்தில் இருந்த எடப்பாடியை சந்தித்ததால்தான், உங்கள் மீது நடவடிக்கை எடுக்கப்பட்டது என ம.தி.மு.க. தரப்பில் சொல்லப்படுகிறதே?" என்றோம்.“எடப்பாடியை அன்னிக்கு நான் சந்திக்கவேயில்லை. தவறே செய்யாத என் மேல பொய்க்குற்றம் சுமத்தினாங்க. அதான், அவங்க சொன்னதையே உறுதி செய்யற மாதிரி, எடப்பாடியை சந்திச்சு அ.தி.மு.க.வுல இணையப் போறோம். ஆளே இல்லாத கட்சியிலயே அயராம உழைச்சவன் நான். அ.தி.மு.க.வுல என்னோட செயல்பாடுகளைப் பார்த்து நிச்சயம் ஆச்சரியப்படுவாங்க” என்றார்.மார்கோனியின் முடிவு குறித்து அ.தி.மு.க. தரப்பில் பேசியபோது, “சீர்காழி அ.தி.மு.க. நகரச் செயலாளர் வினோத், ‘கட்சிக்காக என்னால் இனி செலவு செய்யமுடியாது’ என்றதால், வசதி படைத்த மார்கோனி அ.தி.மு.க.வுக்கு அழைத்துவரப்பட்டுள்ளார். தவிர, மார்கோனி மேல் இருக்கும் அ.தி.மு.க. பிரமுகர் மணல்பாபு கொலை வழக்கையும் எளிதில் முடிவுக்கு கொண்டு வந்துவிடலாம் என உறுதி கொடுக்கப்பட்டதையடுத்தே மார்கோனியின் வரவு நிகழ்ந்திருக்கிறது” என்றனர்.ஆதாயம் இருந்தால்தானே அது அரசியல்!