கர்நாடகாவில் தோற்றுப்போன மதவாதம்! மோடி – ஷா மாஜிக் அவுட்

தேக்கி வைத்திருந்த அத்தனை கோபத்தையும் ஓங்கி குத்தி ஆத்திரத்தை தீர்த்துக்கொண்டிருக்கிறார்கள் கர்நாடகா வாக்காளர்கள். கர்நாடகாவில் மோடி - ஷா தலைமை வைத்து செய்யப்பட்டிருக்கிறது. இந்துக் கடவுள் அனுமான் பெயரில் மதவாத அரசியல் செய்ய நினைத்த இருவருக்கும், 80 சதவிகித இந்துக்களைக் கொண்ட கர்நாடகா வாக்காளர்கள் வழங்கிய தண்டனை இது. இன்னும் சொல்லப்போனால், கடந்த முறை மக்களின் ஆணையை மதிக்காமல், தங்களது ‘ஆபரேஷன் லோட்டஸ்’ குதிரை பேரம் மூலம் ஆட்சியைப் பிடித்த பா.ஜ.கவுக்கு, சில ஆண்டுகள் பொறுமையாக காத்திருந்து நெத்தியடியாக ஜனநாயக தீர்ப்பை வழங்கி இருக்கிறார்கள் மக்கள்!இதற்கு முன்னரும் மோடி – ஷா தலைமையில் பா.ஜ.க., பிற மாநிலங்களிலும் தோல்வியைத் தழுவி இருக்கிறதுதான்... ஆனால், கர்நாடகாவில் கட்சியின் தோல்வி உறுதி என்பது பல மாதங்களுக்கு முன்பே தெரிந்துவிட்டது. அதனாலேயே, மோடி அதை கௌரவ பிரச்னையாக மாற்றி, அடுத்த ஆண்டு நாடாளுமன்றத் தேர்தலுக்கு வௌ்ளோட்டம் விட்டு பார்த்தார். ஒரு பிரயோஜமும் இல்லை... வழக்கம்போல் மோடி வெளிநாட்டுக்குச் சென்றிருந்தால், அவரது கௌரவமாவது மிஞ்சி இருக்கும்..இத்தனைக்கும் பா.ஜ.க., கடந்த 2018 பேரவை தேர்தலில் பெற்ற 32 சதவிகித வாக்குகளை தக்க வைத்துக்கொண்டுள்ளது. ஆனால், அந்தக் கட்சியைத் தோற்கடிக்க வேண்டும் என்ற முடிவோடு, முன்னாள் பிரதமர் தேவே கௌடாவின் மகன் குமாரசாமியின் மதசார்பற்ற ஜனதா தளத்தின் 18 சதவீத வாக்காளர்களில் ஐந்து சதவிகிதத்தினர் காங்கிரஸ் பக்கம் சாய்ந்தார்கள். காங்கிரஸ் 43 சதவிகித வாக்குகளைப் பெற்றது. இதன் காரணமாகவே, காங்கிரஸ் கட்சி கடந்த முறையைவிட 51 இடங்களை அதிகம் பெற்று, 135 இடங்களில் வென்றுள்ளது. பா.ஜ.க-வின் 104 இடங்கள் 66ஆக குறைந்துள்ளது. ம.ஜ.த-வின் தொகுதிகளும் 37ல் இருந்து 18ஆக குறைந்தது. மொத்தம் 234ல், மீதமுள்ள நான்கு இடங்களில் சுயேச்சைகள் வெற்றி பெற்றனர்.தொடர்ந்து, அடுத்த வருடம் நாடாளுமன்றத் தேர்தல் காரணமாக, கர்நாடகாவில் காங்கிரஸ் ஆட்சியை நாடே கூர்ந்து கவனிக்கும். உள்கட்சி பூசலுக்கு பெயர் போன மாநிலத்தில், ஆட்சியின் ஸ்திரதன்மை முக்கியமாகிவிடும். மாநிலத்தின் உள்ளேயோ, ஸ்திரதன்மையோடு கட்சியை வெற்றி பெறசெய்த கிராமப்புற வாக்காளர்களுக்கு முக்கியமான விலைவாசி, வேலைவாய்ப்பு, ஊழல் ஒழிப்பு, வெளிப்படையான ஆட்சி ஆகிய பிரச்னைகளில் உடனடி தீர்வுகளை கொடுக்க வேண்டும். இது எதுவுமே எளிதல்ல..மதவாத அரசியல்பசவராஜ் பொம்மை தலைமையிலான பா.ஜ.க., அரசு ஊழல் மற்றும் செயலற்ற தன்மை ஆகிய காரணங்களால், மக்களின் ஆதரவை வெகுவாக இழந்திருந்தது. போதாததற்கு, கட்சியின் மூத்த தலைவரான எடியூரப்பாவை தேர்தலுக்கு ஒரு வருடத்திற்கு முன் வீட்டிற்கு அனுப்பியதை அவர் சார்ந்த வட மாவட்டங்களில் பா.ஜ.க., ஆதரவு லிங்காயத் சமூகம் ரசிக்கவில்லை. கடந்த 2013 தேர்தலுக்கு முன்னர் அவர் தனிக் கட்சி துவங்கி, பா.ஜ.க-வின் தோல்விக்கு காரணமானதற்கு, பழிவாங்கப்படுவதாக அவர்கள் கருதினார்கள்.இதை சரிக்கட்ட மோடி - ஷா டீம் முன்னெடுத்த மதம் மற்றும் சாதி அரசியல் இப்போது எடுபடவில்லை. குறிப்பாக, ‘ காங்கிரஸ் வெற்றிபெற்றால், மாநிலத்தில் மதக்கலவரம் வெடிக்கும்’ என்று அமித் ஷா பிரசாரம் செய்தது, அவர்தான் நாட்டின் உள்துறை அமைச்சரா என்று வாக்காளர்களை அதிர்ச்சியடைய செய்தது. தேர்தல் அரசியலுக்கு அனுமனை துணைக்கு அழைத்தவர்கள், பெங்களூரு - ஓசூர் சாலையில், எலட்ரானிக் சிட்டி மேம்பாலத்திற்கு கீழே இருந்த நூற்றாண்டு பழைமையான அனுமன் சிலையை, நகர அபிவிருத்தி என்ற பெயரில் இடித்து தள்ளியதை நடுநிலை வாக்காளர்கள் மறக்கவில்லை..கடந்த ஆண்டு, உத்தரப்பிரதேச பேரவை தேர்தலை மனதில் வைத்து, ’முஸ்லீம் மாணவிகள் பர்தா அணிந்து வரக்கூடாது’ என்ற பசவராஜ் பொம்மை அரசு போட்ட உத்தரவு தேசிய அளவில்... ஏன்? உலகளவில் பேசுபொருளானதை அந்த மாநில மக்கள் ரசிக்கவில்லை. தற்போது கர்நாடகா தேர்தல் காலத்தில் பா,ஜ.க., ஆட்சி செய்யும் வடகிழக்கு மாகாணமான மணிப்புரில் அரங்கேறிய இந்து - கிறிஸ்தவர்கள் இடையிலான வன்முறை குறித்த தெளிவு அங்கிருந்து இங்கு வந்து வேலை செய்யும் சக தொழிலாளர்கள் மூலம் கர்நாடகா வாக்காளர்களுக்கு கிடைத்திருந்தது.காங்கிரஸின் அரவணைப்புகர்நாடக தேர்தலில் மோடி - ஷாவின் வியூகங்களை எதிர்கொள்ளவே மாநிலத்தின் மண்ணின் மைந்தரான பட்டியல் சமூகத்தைச் சேர்ந்த மல்லிகார்ஜீன் கார்கேவை கட்சியின் தேசிய தலைவராக கடந்த ஆண்டே தேர்வு செய்திருந்தது. பிற உள்ளுர் தலைவர்களில் முன்னாள் முதல்வர் சித்தராமையா பின்தங்கிய வகுப்பினர். மாநிலக் கட்சி தலைவர் சிவகுமார், வொக்கலிக சமூகத்தைச் சார்ந்தவர். இந்த கூட்டு, பா.ஜ.க போல் பிரிவினை அரசியல் செய்யாமல், சீரான மெஷின் போல் ஒருங்கிணைந்து செயல்பட்டு, கோயிலுக்குச் செல்லும் அதே நேரம், அனைத்து தரப்பினரையும் அரவணைத்துச் சென்றது. இது கர்நாடகாவின் இளைய தலைமுறை வாக்காளர்களுக்கு புதியதோர் அனுபவம்.அவர்களை பொருத்தவரையில், காங்கிரஸ் ஆட்சியின் பழைய ஊழல் குற்றச்சாட்டுகளைவிட, மோடி அரசின் அதானி விவகாரம் போன்றவை கண் முன்னே நின்றது. மோடி ஆட்சியில் சி.பி.ஐ., வருமான வரித்துறை ஆகியவற்றை எதிர்கட்சி தலைவர்கள் மேல் ஏவி விட்டு, பின்னர் அவர்கள் மீதான வழக்குகளை ஆறப்போடுவதும், இளம் தலைமுறை வாக்காளர்களுக்கு ஜனநாயகத்தின் மேல் இருந்த நம்பிக்கையை சிதைத்திருந்தது. எல்லாம்வற்றுக்கும் மேலாக தனது நடைபயணத்தால் வாக்காளர்களிடம் நம்பிக்கை பெற்றிருந்த ராகுல் காந்தியை தகுதி நீக்கம் செய்ய வைத்தது வாக்காளர்களிடம் கோபத்தை ஏற்படுத்தியிருந்தது. இவை எல்லாம் சேர்ந்துதான் ஓட்டுக்களாக மாறி காங்கிரஸை வெற்றிபெற வைத்துள்ளது..முள் கிரீடம்!கர்நாடகா தேர்தலின் வெற்றி, காங்கிரஸ் கட்சிக்கு தேசிய அளவில் முக்கியத்துவத்தை கொடுத்துள்ளது. அது முள் கிரீடமும்கூட. இந்த ஒரே ஒரு வெற்றியைக் காட்டி, பீஹார் முதல்வர் நிதிஷ் குமாரின் அனைத்து எதிர்கட்சிகள் கூட்டு முயற்சிக்கு சோனியா - ராகுல் தலைமை முட்டுக்கட்டை போடக்கூடாது. இன்னமும் வட மாநிலங்களில் அந்த கட்சிக்கு செல்வாக்கு இல்லை என்பதை நினைவில்கொள்ள வேண்டும்.எதிர்வரும் மாதங்களில் காங்கிரஸ் ஆட்சி செய்யும் ராஜஸ்தான், சட்டிஸ்கர், மற்றும் பாஜக-வின் மத்தியப்பிரதேசம் ஆகிய மாநிலங்களில் பேரவைத் தேர்தல்களில், காங்கிரஸ் தனது செல்வாக்கை நிரூபிக்க வேண்டும். கர்நாடகா தேர்தல் பா.ஜ.க-வின் தென்னிந்திய கனவுகளை சிதைத்தாலும், அடுத்தடுத்து தெலங்கானா, ஆந்திரா, குறிப்பாக அந்தக் கட்சி ஆட்சி கனவில் மிதக்கும் ஒடிசா ஆகிய மாநில பேரவை தேர்தல்களையும் சோனியா - ராகுல் தலைமை கருத்தில் கொள்ள வேண்டும். ராஜஸ்தான், சட்டிஸ்கர் மற்றும் மத்தியப்பிரதேச தேர்தல்களில் காங்கிரஸ் கட்சியின் வெற்றி தோல்விகளே மம்தா பானர்ஜி, அரவிந்த் கேஜ்ரிவால், அகிலேஷ் யாதவ், ஏன், நிதிஷ் குமார் ஆகியோர் தேசிய அரசியலில் அந்தக் கட்சியை எந்த லெவலில் ஏற்றுக்கொள்ளவார்கள் என்பதை முடிவு செய்யும்.இதற்கு ஒரே விலக்கு, தமிழகத்தை ஆளும் திமுக-வும் முதல்வர் ஸ்டாலினும். இது ஸ்டாலினின் அறிக்கையிலும் தெரிந்தது. அவர்களைப் பொருத்தவரை கர்நாடகா தேர்தல் முடிவு என்பது, இங்கே குடைச்சல் கொடுத்துக்கொண்டிருக்கும் தமிழக பா.ஜ.க., தலைவர் அண்ணாமலைக்கும் சேர்ந்து கிடைத்த குட்டு. அண்ணாமலையின் பொறுப்பில் இருந்த மண்டியா, கோலார் ஆகிய மாவட்டங்களில் பா.ஜ.க மொத்தமுள்ள 13 இடங்களில் ஒன்றில்கூட வெற்றி பெறவில்லை. அது போன்றே, பாஜக-வின் தமிழக பொறுப்பாளரான சி.டி. ரவி, தனது சொந்த தொகுதியில்கூட வெற்றிபெற முடியவில்லை.யோகியின் பிரதமர் குறி!கர்நாடகா தேர்தல் முடிவுகள் வெளியான அதேநாளில் உத்தரப்பிரதேசத்திலும் உள்ளாட்சித் தேர்தல் முடிவுகள் வெளியாகின. அதில் முதல்வர் யோகி தலைமையிலான ஆளும் பா.ஜ.க., அதிக இடங்களில் வெற்றி பெற்றுள்ளது. இது, எதிர்கட்சிகளுக்கான சவால் மட்டுமல்ல... நாடாளுமன்ற தேர்தலுக்கு முன்னரே பிரதமர் பதவி ரேஸுக்கு யோகி களத்தில் இறங்குவதற்கான வௌ்ளோட்டமும்கூட.அதனால்தானோ என்னவோ, தேர்தல் தோல்வி நிச்சயம் என்றிருந்த கர்நாடகா களத்தில் இருந்து அவர் நைசாக வெளியேறிவிட்டார். மோடி - ஷா தலைமையோ, கர்நாடகாவின் வட மாவட்டங்களில் வாழும் மராத்திய வாக்காளர்களை கவரும் வண்ணம் மத்திய அமைச்சர் நிதின் கட்காரியைகூட களத்தில் இறக்கவில்லை. பா.ஜ.க-வின் இரட்டையர்கள், நிதினையும் அடுத்த வருடம் பிரதமர் பதவிக்கான போட்டியாளராக மட்டுமே பார்த்தார்கள். மொத்தத்தில் இரட்டைர்களின் ஜாலம் கர்நாடகாவில் எடுபடவில்லை என்பது அந்தக் கட்சியின் உள்ளேயும் ஒரு புயலைக் கிளப்பக் கூடும்!

கர்நாடகாவில் தோற்றுப்போன மதவாதம்! மோடி – ஷா மாஜிக் அவுட்

Related Stories