தேடியது தினக்கூலி வேலை... கிடைத்தது திருநங்கை வேடம்!

`எது அசல்... எது போலி?' எனக் கண்டறிய முடியாத அளவுக்கு திருநங்கைகளை வைத்து நடக்கும் புது பிசினஸ், ஐதராபாத் காவல்துறையின் நிம்மதியைக் கெடுத்திருக்கிறது. பிச்சை எடுப்பதிலும் மார்க்கெட்டிங் யுக்தியைக் கடைபிடித்த கும்பல், இப்போது கம்பி எண்ணுவதுதான் லேட்டஸ்ட் நிலவரம்.பிச்சை எடுப்பதில் என்ன புது யுக்தி? என யோசிக்கிறீர்களா? சமூக ஆர்வலர் முரளிதரன் கூறுவதைக் கொஞ்சம் கேளுங்கள். “இன்று இந்தியாவின் பெருநகரங்கள் அனைத்திலும் சக்கைபோடுபோடும் பிசினஸ் என்றால் அது பிச்சை எடுப்பதுதான். காரணம், பிச்சை எடுப்பதை இயலாதவர்கள் மட்டுமே செய்வதில்லை. அதை ஒரு பெரிய பிசினஸாகவே மாற்றி சக்கைபோடு போட்டுக் கொண்டிருக்கிறது, மோசடிக் கும்பல்.குறிப்பாக, சாதாரண பிச்சைக்காரர்களைவிட திருநங்கை பிச்சைக்காரர்களுக்கு பெங்களூர், மும்பை, ஐதராபாத், கொல்கத்தா போன்ற நகரங்களில் பெரிய டிமாண்ட் உண்டு. அங்கெல்லாம் திருநங்கைகளை தெய்வமாக வணங்கும் வழக்கம் உண்டு. ஒரு வீட்டில் குழந்தை பிறந்தால்கூட, அங்கு வந்து 10 ஆயிரம், 20 ஆயிரம் ரூபாயை பெற்றுச் செல்லும் திருநங்கைகள் இருக்கிறார்கள். அந்தளவுக்கு அவர்களுக்கு மரியாதை உண்டு.இந்நிலையில், கடந்த சில நாட்களாக திடீரென்று ஐதராபாத் நகரில் திருநங்கைகளின் எண்ணிக்கை அதிகரிக்கத் தொடங்கியது. இருட்டத்தொடங்கியதும் ஷாப்பிங் மால்கள், கோயில்கள், டிராஃபிக் சிக்னல்கள், சப்வே போன்ற இடங்களில் வாகனங்களை மடக்கி வலுக்கட்டாயமாக கைதட்டிப் பிச்சை கேட்கும் சம்பவங்கள் அதிகரித்தன..பிச்சை கொடுக்க மறுப்பவர்களின் சட்டையைப் பிடித்து இழுப்பது, கெட்ட வார்த்தைகளில் திட்டுவது, எச்சில் துப்புவது போன்ற காரியங்களிலும் ஈடுபட்டுள்ளனர். `பணம் கொடுக்காத கோபத்தை இப்படிக் காட்டுகிறார்கள்' என நினைத்து மக்களும் விட்டுவிட்டனர். இதன் தொடர்ச்சியாக, பகல் வேளைகளிலும் வீடு வீடாகச் சென்று மாமூல் கேட்கும் புது பழக்கம் தொடங்கியுள்ளது. பணம் கொடுக்கவில்லை என்றால் அங்கும் எச்சில் அர்ச்சனையை அரங்கேற்றியுள்ளனர்.இதனால் கடுப்பான மக்கள், ஐதராபாத் நகர காவல்துறையினரிடம் புகார் கொடுத்தனர். இந்தப் புகாரின் அடிப்படையில் செகந்திராபாத் ரயில்நிலையம், பாரடைஸ், ஹூப்லி பஸ் நிலையம் போன்ற இடங்களில் அதிரடி சோதனை நடந்தது. அப்போது, பொதுமக்களிடம் மிரட்டி காசு வசூல் செய்துகொண்டிருந்த சுமார் 15 திருநங்கைகள் கைது செய்யப்பட்டனர். அப்போது அவர்களின் நடத்தையில் சந்தேகம் தோன்றவே, போலீஸார் தீவிர விசாரணை நடத்தினர். அப்போதுதான் அந்த ‘திடுக்’ தகவல் வெளியானது" என விவரித்த முரளிதரன்,``கைது செய்யப்பட்ட 15 திருநங்கைகளும், உண்மையில் திருநங்கைகளே இல்லை. அவர்கள் அனைவரும் பீகாரைச் சேர்ந்த இளைஞர்கள். பீகாரில் இருந்து வேலைக்காக குடும்பம் குடும்பமாக ஐதராபாத் வந்து தங்கியுள்ளனர். அங்கு வேலை தேடியவர்களை அணுகிய சில புரோக்கர்கள், ‘திருநங்கை’ வேடத்தில் பிச்சை எடுக்கும் ஐடியாவை கொடுத்துள்ளனர்.அதாவது, குழந்தைகளை வைத்து பிச்சை எடுக்க வைத்த கும்பல்களுக்கு காவல்துறையால் சிக்கல் ஏற்படவே, இப்படியொரு மாற்று யோசனையை செயல்படுத்தியுள்ளனர். இந்து மதத்தில் ஆழ்ந்த நம்பிக்கை கொண்ட மக்கள், திருநங்கைகளுக்கு பிச்சையிடுவதை வழக்கமாக வைத்துள்ளனர். அதனால் வருமானத்துக்கும் குறைவு இல்லை. ஒருவேளை பணம் கொடுக்காமல் சென்றாலும் அவர்களுடன் சண்டைபோட திருநங்கைகளால் முடியும். அவ்வளவு எளிதில் காவல்துறையும் நெருங்காது. .இதை அடிப்படையாக வைத்து பெரும் பணம் பார்த்திருக்கிறது, அந்தக் கும்பல். அதிலும் ஒரு சின்ன சிக்கல், சிட்டி முழுக்க பிச்சையெடுக்க வேண்டுமானால் நூற்றூக்கணக்கில் திருநங்கைகள் வேண்டும். அதைப் பற்றி யோசித்தபோதுதான், பீகாரில் இருந்து கும்பல் கும்பலாக வந்திறங்கிய இளைஞர்கள் கண்ணில் தென்பட்டுள்ளனர். அவர்களை அணுகிய புரோக்கர்கள், நாளொன்றுக்கு தலா 200 ரூபாய் சம்பளம் கொடுத்து, திருநங்கை வேடம்போட்டு பிச்சை எடுக்க வைத்துள்ளது தெரியவந்தது.போலி திருநங்கைகள் கைது செய்யப்பட்டதுமே, அவர்கள் கூறிய தகவலை வைத்து ஐந்து பேரை மடக்கியது ஐதராபாத் போலீஸ். ஆனால், அந்த நெட்வொர்க் தொடர்பான முக்கியப் புள்ளிகள் இன்னும் சிக்கவில்லை. அவர்களைத் தீவிரமாக தேடிவருகின்றனர். இது ஏதோ ஐதராபாத்தில் மட்டும் நடக்கும் சம்பவம் என்று அசால்டாக இருந்துவிட முடியாது.சென்னையிலும் பல்லாவரம், ஸ்கைவாக், பள்ளிக்கரணை, ஓ.எம்.ஆர் சாலை, புறநகர் ரயில்கள், கோயம்பேடு என்று பல இடங்களிலும் திருநங்கைகள் தொல்லை உள்ளது. இதையும் காவல்துறை கவனிக்கவேண்டும். ஐதராபாத்தைப்போல சென்னையிலும் டூப்ளிகேட் திருநங்கைகளைக் கண்டறிந்து காவல்துறை நடவடிக்கை எடுக்க வேண்டும்" என்றார்.டூப்ளிகேட் திருநங்கைகள் குறித்து ஐதராபாத் போலீஸாரிடம் கேட்டபோது, ``புகாரின் அடிப்படையில் நடவடிக்கை எடுத்தோம். தொடர்ந்து விசாரணை நடந்து வருகிறது" என்றனர்.``சென்னையில் இதுமாதிரியான நிகழ்வுகளைத் தடுக்க காவல்துறை நடவடிக்கை எடுக்குமா?" என்று மாநகர காவல் ஆணையர் சந்தீப் ராய் ரத்தோரிடம் கேட்டபோது, ``இதுவரை அப்படி எந்தப் புகாரும் எங்களிடம் வரவில்லை. ஒருவேளை வந்தால், நிச்சயம் அதன்மீது விசாரணை நடத்தப்பட்டு நடவடிக்கை எடுக்கப்படும்" என்று மட்டும் பதில் அளித்தார்.எப்படியெல்லாம் கிளம்பறாங்க! - அபிநவ்