கள்ளச்சாராய சாவா… அள்ளிக்கோ! மலக்குழி மரணமா… தள்ளிப்போ! பாரபட்சம் காட்டும் தமிழக அரசு…

“கள்ளச்சாராயம் குடிச்சி செத்துப்போனா முதல்வரே நேர்ல போறாரு, 10 லட்சம் நிவாரணம் தர்றாரு. ஆனா, மலக்குழியில இறங்கி செத்துப்போனா போயி பார்க்கக்கூட நாதியில்ல, நிவாரணத் தொகையும் கிடைக்கிறதில்ல. என்னங்க சார் உங்க சட்டம்?” எனும் ஆதங்க குரல் கலங்க வைக்கிறது. மே 15ம் தேதி சென்னை புழல் காவாங்கரை குருசாந்தி நகரைச் சேர்ந்த நிர்மலா என்பவர் வீட்டின் கழிவுநீர் தொட்டியை சுத்தம் செய்யும்போது பாஸ்கரன், இஸ்மாயில் ஆகிய இருவர் விஷவாயு தாக்கி உயிரிழந்தனர். கடந்த ஏழு மாதங்களில் தாம்பரம், மதுரை, ஆவடி, மாதவரம், கும்மிடிப்பூண்டி, புழல் உள்ளிட்ட பகுதிகளில் மட்டும் 14 க்கும் மேற்பட்டோர் மலக்குழியில் மரித்துள்ளனர். ஆனால், இதுபோன்ற அகால சாவுகளில் அரசு என்ன நடவடிக்கை எடுக்கிறது என்று விசாரித்தபோது அம்பலப்படுகிறது பாகுபாடு அவலம்.சென்னை மாநகராட்சியின் புழல் பகுதியில் நடந்த மலக்குழி மரணம் தொடர்பாக சம்பந்தப்பட்ட மாதவரம் -4வது மண்டல அதிகாரி முருகனிடம் கேட்டால், “அப்படியா? அப்படியொரு சம்பவம் நடந்ததா? அதெல்லாம் மெட்ரோ வாட்டர் டிபார்ட்மென்ட்தான் பார்ப்பாங்க “என்றார் கேஷுவலாக..மனிதர்கள் மூலம் கழிவுநீரை அகற்றினால் புகார் தெரிவிப்பதற்கான தமிழக அரசின் 14420 என்ற டோல் ஃப்ரீ நம்பரில் தொடர்புகொண்டால், அவர்களும் அப்படியொரு சம்பவம் நடந்ததா? என்று நமக்கு ஷாக் கொடுத்தார்கள். தொடர்ந்து, மெட்ரோ வாட்டர் தொழில்துறை தொடர்பு மேலாளர் வெங்கடேசன் மற்றும் 4வது மண்டல ஏ.இ. பாக்யலட்சுமி ஆகியோரிடம் கேட்டபோது, “கழிவுநீரை சுத்தம் செய்யவைத்த வீட்டு உரிமையாளர் நிர்மலா கைது செய்யப்பட்டு ஜாமீனில் வெளிவந்துள்ளார்” என்றவர்கள், “தனியாருக்குச் சொந்தமான இடத்தில் நடந்த உயிரிழப்பு என்பதால் அரசு இழப்பீடு வழங்காது. புகாருக்குள்ளானவர்களிடம் வசூலித்துதான் பாதிக்கப்பட்டவர்களின் குடும்பத்திற்கு வழங்குவோம்” என்றார்கள்.இதுபற்றி பேசிய தீண்டாமை ஒழிப்பு முன்னணி பொதுச் செயலாளர் சாமுவேல் ராஜ், “இந்தியாவில் நடைபெறும் விஷவாயு மரணங்களில் 20 சதவிகிதம் தமிழகத்தில்தான் நடக்கின்றன. கொடுங்கையூரில் 5,000 மெட்ரிக் டன் கழிவுகள் உருவாகிறது. அதை, முறையாக அப்புறப்படுத்த நவீன தொழில்நுட்பம் இல்லை. காரணம், துப்புரவுத் துறை வளர்ச்சி அடையவில்லை..தமிழகத்தில் பெரிய மால்கள், ஐ.டி. கம்பெனிகள் உள்ளன. இங்கிருந்து கழிவுகள் எப்படி அப்புறப்படுத்தப்படுகின்றன என்பதைப் பற்றி நகராட்சியோ, மாநகராட்சியோ கவலைப்படுவதில்லை. இதனால், ஒட்டுமொத்த கழிவுகளையும் அகற்றவேண்டிய பொறுப்பு ஒடுக்கப்பட்டவர்கள் தலையில் விழுகிறது.மனிதர்கள் மலம் அள்ளுவதற்கு தடைச் சட்டம் 1993லேயே உள்ளது. மலம் அள்ளும் பணியில் ஈடுபடுத்துவோருக்கு 10 ஆண்டுகள் சிறை தண்டனை, பாதிக்கப்பட்டோருக்கு 15 லட்ச ரூபாய் இழப்பீடு என 2013ல் சட்டம் திருத்தியமைக்கப்பட்டது. ஆனால், இச்சட்டத்தின்படி மலக்குழி சுத்தம் செய்கிறவர்கள் குறித்து இதுவரை முறையான கணக்கெடுப்பே அரசாங்கம் நடத்தவில்லை. அப்படியென்றால் எப்படி ஒழிக்க முடியும்?” என்று கேள்வி எழுப்புகிறார்.மலக்குழி மரணங்கள் தொடர்பாக ஆய்வு செய்துவரும் பழங்குடியினர் பாதுகாப்புச் சங்கத் தலைவர் முருகப்பன் ராமசாமி, “அரசாங்கமோ, தனியார் நிறுவனமோ, ஒப்பந்ததாரரோ மலக்குழி மரணங்களுக்கு 15 லட்ச ரூபாய் கொடுக்கவேண்டும் என்று உத்தரவு உள்ளது. ஆனால், உடனடியாக கொடுப்பதில்லை. பல்வேறு அழுத்தங்களுக்குப் பிறகுதான் 10 லட்ச ரூபாய் மட்டுமே வழங்கப்படுகிறது..அதேபோல், மலக்குழி சுத்தம் செய்யும் பணியில் ஈடுபடுத்தியவர்கள் வழங்கவில்லை என்றால் அரசே இழப்பீட்டை வழங்கவேண்டும் என்றும் நீதிமன்றம் கூறியிருக்கிறது. இதை அதிகாரிகள் பின்பற்றுவதில்லை. மலக்குழி மரணம் தொடர்பாக சஃபாய் கர்மாச் சாரி அந்தோலன் அமைப்பு செய்த ஆய்வில் 1993ம் ஆண்டு முதல் 2022 வரை இந்தியாவில் நடந்த 989 மலக்குழி மரணங்களில் 218 மரணங்கள் தமிழகத்தில் மட்டுமே நடந்துள்ளன. மற்ற மாநிலங்களை ஒப்பிடும்போது தமிழகம்தான் மலக்குழி மரணங்களில் முதலிடத்தில் உள்ளது. இதுவரை மலக்குழியை சுத்தம் செய்யும் குற்றத்தில் ஈடுபடுத்திய ஒருவர்கூட தண்டிக்கப்படவில்லை. அரசு சாரா நிறுவனங்கள் செய்த ஆய்வில் 123 லட்சம் பேர் மலம் அள்ளும் பணியில் ஈடுபடுவதாக தெரியவந்துள்ளது. 1973ல் மனிதனே மனிதனை இழுத்துச் செல்லும் கை ரிக்ஷா முறையை ஒழித்துக்கட்டியவர் கருணாநிதி. அவரின் மகன் மு.க.ஸ்டாலின் மனிதனின் மலத்தை மனிதனே அகற்றும் அவலத்தை ஒழித்துக் கட்டுவார் என்று எதிர்பார்த்து காத்திருக்கிறோம்” என்றார்..இதுகுறித்து ஆதி திராவிடர் , பழங்குடியினர் நலத் துறை செயலாளர் ஆனந்த் ஐ.ஏ.எஸ்.ஸிடம் கேட்டபோது, “இதுபோன்ற மரணங்களுக்கு மாநகராட்சிதான் பொறுப்பு. உயிரிழந்தவர்கள் எஸ்.சி., எஸ்.டி.யாக இருந்தால் வன்கொடுமைத் தடுப்பு சட்டத்தின்படி சம்பந்தப்பட்டவர்கள் மீது வழக்குப்பதிவு செய்வதோடு ஆறரை லட்ச ரூபாய் முதற்கட்டமாக இழப்பீடு வழங்குவோம்” என்றார். சமூக ஆர்வலர் வாசுகி பாஸ்கர் நம்மிடம், “தனியாருக்கு சொந்தமான இடத்தில் நடக்கும் மலக்குழி மரணங்களுக்கு அரசு இழப்பீடு வழங்காது, தனியாரிடமிருந்து வசூலித்துதான் வழங்குவோம் என்கிறார்கள். அப்படியென்றால், கள்ளச்சாராயம் குடித்து மரணம் ஏற்படும்போது, கள்ளச்சாராயத்தை விற்று கோடிக்கணக்கில் பணம் சம்பாதிக்கு தனியார் ஆட்களிடமிருந்து இழப்பீட்டை வசூலித்து வழங்கவேண்டிதானே? அரசாங்கம் ஏன் இழப்பீடு வழங்கவேண்டும்? மலக்குழி மரணங்களின்போது மாவட்ட ஆட்சியர் நேரில் சென்று பார்க்கவேண்டும் என்று சட்டம் சொல்லியும்கூட நேரில் சென்று பார்ப்பதில்லை. ஏன் இந்த பாரபட்சம்?” என்று கேட்கிறார். நியாயம்தானே… பதில் வைத்திருக்கிறதா இந்த அரசு? -மனோசௌந்தர்

கள்ளச்சாராய சாவா… அள்ளிக்கோ! மலக்குழி மரணமா… தள்ளிப்போ! பாரபட்சம் காட்டும் தமிழக அரசு…

Related Stories