லைட்மேன் : அப்பாவுக்கு விஜய்யின் 3 அன்புக் கட்டளைகள்!

‘ரஹ்மான் இசை நிகழ்ச்சியை திட்டமிட்டு நாசம் செய்ததே விஜய் ஆன்டனிதான்’ என்று ஒரு யூடியூப் சானல் குற்றம்சாட்ட அவர்கள் மீது, ரத்தம் கொதிக்க பாயும் விஜய் ஆண்டனி, ஒரு பெரும் தொகையை மான நஷ்ட ஈடாகக் கேட்க வழக்கறிஞர்களுடன் ஆலோசித்து வருகிறார். கூடவே ‘அந்தத் தொகையை நலிவடைந்த இசைக்கலைஞர்கள் குடும்பத்துக்கு வழங்க முடிவு செய்திருக்கிறேன் என்பதால் தமிழ் சினிமாவின் ஒட்டுமொத்த இசைக்கலைஞர்களும் என் பக்கம் நிற்பார்கள்” என்கிறார் விஜய் ஆன்டனி. ‘பிக்பாஸ்’ படப்பிடிப்பு நிறைவு பெற்றவுடன் அ.வினோத்துடன் இணையும் ’கமல் 233’ மணிரத்னத்துடன் இணையும் ‘கமல் 234’ ஆகிய இரு படங்களையும் கலந்துகட்டி படப்பிடிப்பில் கலந்துகொள்ள முடிவு செய்திருந்தார் கமல். ஆனால், ’எவ்வளவு தாமதமானாலும் பரவாயில்லை. வினோத் படத்தை முடித்துவிட்டே வந்து சேருங்கள். என் படத்தில் நடிக்கும்போது குறுக்கு சால் ஓட்டக்கூடாது’ என்று கறாராகச் சொல்லிவிட்டாராம் மணிரத்னம். இப்படத்துக்கு சிம்புவுக்குப் பதிலாக ஜெயம் ரவியும் அவருக்கு ஜோடியாக த்ரிஷாவும் ஒப்பந்தம் செய்யப்பட்டிருக்கிறார்கள். மைனர் அறுவை சிகிச்சை மேற்கொண்டு மருத்துவமனையில் ஓய்வெடுத்து வந்த தந்தை எஸ்.ஏ. சந்திரசேகரை விஜய் சந்தித்தார் அல்லவா? அப்போது, ‘இனி படங்கள் இயக்கவேண்டாம். நிகழ்ச்சிகள் எதிலாவது கலந்துகொள்ளும்போது பொதுவெளியில் அரசியல் கருத்துகள் எதுவும் பகிரவேண்டாம். என்ன காரணத்துக்காகவும் ஊடகங்களுக்கு பேட்டி தரவேண்டாம்’ என்று மூன்று அன்புக் கட்டளைகள் பிறப்பித்திருக்கிறாராம் மகன். ’இந்த மூன்று சமாசாரங்களையும் பின்பற்றினால் நான் அடிக்கடி உங்களை சந்திப்பேன். நீங்களும் எப்போது வேண்டுமானாலும் என் வீட்டுக்கு வரலாம்’ என்று சொல்லி விடைபெற்றாராம். ‘ஜவான்’ பட ரிலீஸுக்கு முன்பு விடப்பட்ட பல கப்ஸாக்களில் ஒன்று விஜய் அதில் ஒரு குட்டி ரோலில் நடித்திருக்கிறார் என்பது. ஆனால் அந்தச் செய்தியை பரப்பியதே இயக்குநர் அட்லீதான் என்பதை நடிகை பிரியாமணி அம்பலப்படுத்தியிருக்கிறார். ‘என்னை ஜவானில் கமிட் செய்தபோது இப்படத்தில் விஜய்யும் நடிக்கிறார். அவருக்கு உங்களோடு காம்பினேஷன் காட்சிகூட உள்ளது என்று பொய் சொன்னார்’ என்று வட இந்திய சானலுக்கு அளித்த பேட்டி ஒன்றில் போட்டு உடைத்திருக்கிறார் பிரியாமணி. படத்துல வக்கிற சீன் மட்டுமல்ல. பேசுற பேச்சுகூட எல்லாமே பொய்யா கோப்பால்? சீக்ரெட் அடுத்த மாதம் ரிலீஸாகவிருக்கிற அரசியல் நடிகரின் படத்தை அட்டர்ஃப்ளாப் ஆக்க எதிர்முகாம் இப்போதே குழிபறிக்கும் வேலைகளில் இறங்கிவிட்டதாம். நள்ளிரவுக் காட்சிகள் பொதுவாகவே கட் என்று இருக்க, அப்படத்துக்கு காலை 9 மணிக் காட்சிகள்கூட ஓகே ஆகாதாம். அடுத்தபடியாக கூடுதல் விலை வைத்து விற்பதற்கு எப்படியெல்லாம் செக் வைக்கலாம் என்று நிபுணர்களிடம் ஆலோசனை கேட்கப்பட்டு வரப்படுகிறதாம்.