லைட்மேன் : அவன் இவன் விக்னேஷ் சிவன்

‘ஜெய்பீம்’அட்லீஸ்ட் அரை டஜன் விருதுகளாவது கிடைக்கும் என்று நம்பிக்கையுடன் காத்திருந்து, பிராந்திய மொழிக்கான விருதுகூட கிடைக்காத நிலையில் வெறுப்பின் உச்சத்துக்கே போய்விட்டாராம் சூர்யா. இதேபோல் ஜூரிகள் அதிக ஆரவாரத்துடன் ரசித்த பா.ரஞ்சித்தின் ‘சார்பட்டா பரம்பரை’க்கும் ஒரு விருது கூட வழங்கப்படாதது தேசிய விருதின் லட்சணத்தை சந்தி சிரிக்க வைக்கிறது. # த ஜூரிஸ் ஃபைல்ஸ் தேசிய விருதுகள் அறிவிப்பால் சூர்யாவை விட அதிக வெக்ஸுக்கு ஆளாகியிருப்பவர் நடிகர், இயக்குநர் பார்த்திபன். தியேட்டர் வசூல்களில் சொதப்பினாலும் தனது ‘இரவின் நிழல்’சிலபல தேசிய விருதுகளை அள்ளும் என்று அவர் காத்திருந்த நிலையில், அப்படத்துக்கு, ஷ்ரேயா கோஷலுக்கு சிறந்த பாடகிக்கான விருது மட்டுமே வழங்கப்பட்டுள்ளது. இது போன்ற சமயங்களில் பொதுவாக மனசுக்குள்ளேயே மருகும் பார்த்திபன் இம்முறை ‘ என் ‘இரவின் நிழல் இதுவரை 120 சர்வதேச விருதுகளை வென்றுள்ளது...ஏ இந்தியாவே’ என்று மனம் விட்டுக் கதறியிருக்கிறார். # விருதே உன் விலை என்ன? இன்ன காரணம் என்று தெரியாமலே இண்டஸ்ட்ரி மேல் ஏகப்பட்ட கோபத்திலும் வெறுப்பிலும் இருக்கும் நயன்தாரா, தற்போது நடித்துக்கொண்டிருப்பது ‘ நயன் 75’ என்று தற்காலிகமாகப் பெயரிடப்பட்டிருக்கும் புதுமுக இயக்குநர் நிலேஷ் கிருஷ்ணாவின் படம். இதன் படப்பிடிப்புக்கு நயனுடன், அவரின் உதவியாளராக ஆஜராகத் தொடங்கி, தொடக்கத்தில் ஒன்றிரண்டு கரெக்ஷன்கள் மட்டும் சொல்ல ஆரம்பித்த விக்னேஷ் சிவன் சில தினங்களாக இயக்குநர் வேலையில் ஓவராக தலையிட ஆரம்பித்துவிட்டாராம். கணவரின் தலையீட்டை நயனும் ரசிப்பதால் சிவனே என்று சகித்துக்கொள்கிறாராம் நிலேஷ். # அவன் இவன் விக்னேஷ் சிவன் கடந்த இரண்டு ஆண்டுகளுக்கும் மேலாக தனது நடமாட்டத்தை ரகசியமாக வைத்திருக்கும் அனுஷ்கா ஷெட்டி நடித்து முடித்திருக்கும் ’மிஸ் ஷெட்டி மிஸ்டர் பொலிஷெட்டி’படம் மிக விரைவில் திரைக்கு வரவிருக்கிறது. எனினும் இப்பட புரமோஷனுக்கும்கூட அனுஷ்கா வெளியே தலைகாட்டப் போவதில்லையாம். ‘ஷெட்டி பொலிஷெட்டி’படமே அனுஷ்காவின் சொந்தத் தயாரிப்பு என்பதால், படப்பிடிப்பு நடக்கும் இடங்கள் ரகசியம் காக்கப்பட்டு, அப்படக் குழுவினர் தவிர யாரும் கடந்த இரண்டு ஆண்டுகளில் அனுஷ்காவை சந்தித்தது இல்லை. ‘இப்படி அனுஷ்கா மறைந்திருந்தே வாழும் மர்மம் என்ன?’ என்பதுதான் டோலிவுட்டின் மில்லியன் டாலர் கேள்வி. #அஷ்கா புஷ்கா அனுஷ்கா சீக்ரெட்ரம் நடிகரின் வாரிசு படத்திலிருந்து ஜகா வாங்கிக்கொண்டதுபோல மேலும் இரு தமிழ்ப் படங்களின் அட்வான்சையும் திருப்பிக் கொடுத்திருக்கிறாராம் புயலானவர். அந்த இசையமைப்பாளருக்கு சூப்பர் நடிகரே பி.ஆர்.ஓ. பார்க்கும் நிலையில், ’இரைச்சலுக்கும் இசைக்கும் வித்தியாசம் தெரியாத இண்டஸ்ட்ரிக்கெல்லாம் நான் ஏன் இசையமைக்கணும்?’ என்று கொந்தளித்துக் குமுறிக் கிடப்பதால் இந்த முடிவு. இனி அவர் வருடத்துக்கு ஒரு படம் பண்ணுவதே சந்தேகம் என்கிறார்கள் சக இசைக்கலைஞர்கள்!