காளை மாட்டை விட்டுட்டாங்க... ஏழை சனத்தை பிடிச்சிக்கிட்டாங்க! கண்ணீர் வடிக்கும் ஜல்லிக்கட்டு போராட்டக்காரர்கள்...

‘தமிழ்நாட்டில் ஜல்லிக்கட்டு நடத்த தடையில்லை’ என்று உச்ச நீதிமன்றத் தீர்ப்பு வந்ததும் அரசியல் கட்சியினர் ஆளாளுக்கு பெருமை பீற்றிக்கொண்டு துள்ளிக்குதிக்கிறார்கள். ஆனால், ஜல்லிக்கட்டுக்காக குடும்பம் குடும்பமாக போராடியவர்கள் கடந்த ஆறாண்டுகளாக வழக்குகளில் சிக்கி சின்னாபின்னமாகிவருவது யாருக்கேனும் தெரியுமா?2017, ஜனவரி 17 முதல் 23ம் தேதி வரை ஜல்லிக்கட்டு தடைச்சட்டத்திற்கு எதிராக சென்னை, மதுரை, கோவை, சேலம் உள்ளிட்ட மாவட்டங்களில் ஏராளமான போராட்டங்கள் நடைபெற்றன. இவை பெரும் புரட்சியாக உக்கிரமடைந்தை அடுத்து ஜல்லிக்கட்டு தடைச்சட்டம் வாபஸ் வாங்கப்பட்ட. ஆனால், போராட்டத்தில் ஈடுபட்டவர்கள் மீது பதியப்பட்ட வழக்குகளில் இருந்து மீள வழித் தெரியாமல் தவிக்கிறார்கள் சாமானிய மக்கள். அவர்களில் ஒருவர்தான் மதுரை நீதிமன்றத்தில் வாய்தாவுக்காக ஐந்தாண்டுகளுக்கு மேலாக அலைந்துவரும் சுடலைமணி. “ எனக்கு மதுரைதான் சொந்த ஊரு. போராட்டம் நடந்த கடைசி நாள் எங்க ஏரியா முழுசும் ஒரே கூட்டம். ஆத்துக்கு நடுவுல ரயில் நிக்குது. அப்பதான்நான் காரியாபட்டியில இருந்து மதுரையில இருக்குற அம்மா வீட்டுக்கு வந்தேன்..உடனே என்னையும் என் அம்மாவையும் போலீஸ் படம் பிடிச்சு கேஸ் போட்டுட்டாங்க. கூட்டம் கூடும்போது யாருண்ணே வேடிக்கை பார்க்கப் போகாம இருப்பாங்க? நான் எவ்வளவோ சொல்லியும் போலீஸ் கேட்கல. நான் வீட்டு வேலைக்குப் போனாதான் என் பிள்ளைக்கு சாப்பாடு. அப்படி இருக்குற எங்க மேல வழக்குப் போட்டுருக்காங்க. கோர்ட்டுக்கு போகக்கூட கையில காசு இல்லைண்ணே.செல்லூர் போலீஸ் வந்து, ’உங்க பொண்ணு, சம்சாரம் எங்க?’னு கேட்டு எங்க அப்பாவை மிரட்டுது. பயத்துல அவருக்கு கைகால் சரியில்லாமல் போயிடுச்சி. என் மகன் படிக்குற ஸ்கூல்ல பசங்கல்லாம், ’ உங்க அம்மா ஜெயிலுக்கு போயிட்டு வந்தவுங்கதானே?’னு கேலி கிண்டல் பண்ணுனதுனால வீட்டையே காலி பண்ணிட்டோம். ஒவ்வொரு மாசமும் வாய்தா போடுறதால வேலையை விட்டு நிறுத்திட்டாங்க. இப்ப வேலையில்லாம அலையுறேன். என் அம்மாவுக்கு வயசு 65. அவங்களும் இந்த வழக்குக்காக அலையுறாங்க. இப்ப கோர்ட் தீர்ப்பு நல்லபடியா வந்துடுச்சு... காளை மாட்டை விட்டுட்டாங்க... ஏழை சனத்தை பிடிச்சிக்கிட்டாங்க... என்னங்கண்ணா நியாயம்?” என்றார் சோகமாக..டிங்கரிங் வேலை பார்க்கும் செல்வமோ, “சுட்டெரிக்குற வெயில்ல ரயில் பாலத்துல நின்னுட்டு பசங்க குடிக்கத் தண்ணி கேட்டாங்க. என் வீட்டுல இருந்த அஞ்சு தண்ணி கேனை கொண்டுபோய் போலீஸ்காரவுங்களுக்கும் சேர்த்துதான் கொடுத்தேன். போலீஸ் கடைசி நாள்ல ஏரியாவுல புகுந்து எல்லாரையும் வீடு புகுந்து அடிச்சி, என்மேலயும் வழக்குப் போட்டுட்டாங்க. தவிச்ச வாய்க்கு தண்ணி கொடுத்த பாவத்துக்கு அஞ்சு வருசமாக வாய்தாவுக்கு அலையறேன். ஒவ்வொரு மாசமும் நான் வேலையை விட்டுட்டு இந்த வழக்குக்காகப் போயிட்டு வந்தா, ஒரு நாள் கூலி ரெண்டாயிரம் ரூபாய் நஷ்டம். தமிழக அரசு எங்க மேல இருக்குற கேஸை வாபஸ் வாங்கணும்“ என்றார்..செல்லூர் தத்தனேரி பகுதியைச் சேர்ந்த குமரன், ” மேல அண்ணாதோப்பு பகுதியைச் சேர்ந்த வெங்கடேஷ் தன்னோட தம்பியை தேடிப்போனார். அவரைப் பிடிச்சு காலை உடைச்சி, ரெண்டு கேஸை போட்டுட்டாங்க. வேடிக்கை பார்க்கப் போன சட்டக் கல்லூரி மாணவர் சாகுல் மேல கேஸைப் போட்டதால அவரால பார் கவுன்சிலில் பதிவு செய்ய முடியலை. இவரைப் போல பல மாணவர்கள், பட்டதாரி இளைஞர்கள் வெளிநாடு போக முடியலை. பாஸ்போர்ட் வாங்க முடியலை. போலீஸ் இவங்களை அடிக்கடி தேடி வர்றதால எங்க ஏரியா இளைஞர்கள் பலர் ஊரைவிட்டே வெளியேறிட்டாங்க. தமிழக சட்டமன்றத்துல சிறப்பு தீர்மானம் கொண்டுவந்து ஜல்லிக்கட்டு தடை சட்டத்துக்கு எதிராக போராடியவங்க மீது போடப்பட்ட வழக்குகளை எல்லாம் வாபஸ் வாங்கணும்” என்றார்.ஜல்லிக்கட்டு வழக்குகளை இலவசமாக நடத்தி வரும் மதுரை வழக்கறிஞர் சரவணன், ”கடந்த 2018ம் ஆண்டு ஜல்லிக்கட்டு வழக்கு சி.பி.சி.ஐ.டி.யிடம் ஒப்படைக்கப்பட்டது. மதுரையில் மட்டும் சுமார் 150 பேர் மீதான வழக்குகள் நடக்கின்றன. 2021ம் ஆண்டு அப்போதைய முதல்வர் எடப்பாடி பழனிசாமி ஜல்லிக்கட்டு போராட்டத்தில் ஈடுபட்டவர்கள் மீதான வழக்குகளை வாபஸ் பெறுவதாக அறிவித்தார். அதன்படி தமிழகம் முழுவதும் சட்ட விரோதமாகக் கூடியது, கோஷம் போட்டது உள்ளிட்ட பிரிவுகளில் வழக்குப் பதியப்பட்ட சுமார் 5 ஆயிரம் பேர் மீதுள்ள வழக்குகள் மட்டுமே வாபஸ் பெறப்பட்டது.பொதுச் சொத்துக்களை சேதப்படுத்தியதாக பதியப்பட்ட வழக்குள் கொண்ட சுமார் 200 பேர் மீதான வழக்குகளை வாபஸ் பெறாமல் ஏமாற்றிவிட்டார்கள். சட்டம் இயற்றுவதற்கு மூலகாரணமே போராட்டக்காரர்கள்தான். அவர்கள் மீது போடப்பட்டுள்ள வழக்குகளை வாபஸ் பெறவேண்டும். இந்த வழக்குகளால் வேலையை இழந்திருக்கும் இளைஞர்களுக்கு அரசு வேலை வழங்கி அவர்களின் வாழ்க்கையில் ஒளியேற்ற முதல்வர் மனது வைக்க வேண்டும் ‘’ என்றார். பிடிமாடுகள் அல்ல போராட்டக்காரர்கள்! -பாலா

Related Stories