வம்பானந்தா : சி.பி.ஐ-க்கு தடா... சி.ஆர்.பி.எஃப்-க்கு கூடுதல் அதிகாரம்... ஜார்ஜ் கோட்டை Vs செங்கோட்டை முற்றும் போர்!

“அமலாக்கத்துறை உங்களைச் சுற்றி வளைக்கும்வரை காத்திருக்காமல், இதயத்தில் அடைப்புகள் ஏதும் இருக்கிறதா என தெரிந்துகொள்ள, ஒரு ஃபுல் பாடி செக் அப் பண்ணிக்கொள்ளலாமே சுவாமி?’’ குறும்பு மூடில் எண்ட்ரி கொடுத்த சிஷ்யை, வம்பானந்தாவுக்கு தடபுடல் ஸ்நாக்ஸ்களுடன் இதயத்துக்கு இதமான மாதுளை ஜூஸைப் பரிமாறினார். “உன் பாணியில்தான் செந்தில் பாலாஜி கைது செய்யப்பட்ட அன்று, சோஷியல் மீடியாக்களில் பலரும், அவருக்கு இதயத்தில் மூன்று அடைப்பு என்று மருத்துவ அறிக்கை வந்தபோது ‘டிராமா’ என்று ட்ரோல் செய்தனர். ஆனால், அதே செய்தியை மத்திய அரசு அனுப்பி வைத்த ஈ.எஸ்.ஐ. மருத்துவர்களும் கன்ஃபர்ம் செய்த போது, தி.மு.க.வின் முக்கிய நிர்வாகிகள் மன உளைச்சலுக்கு ஆளாகி, ‘மிருகத் தன்மை கொண்ட கமென்ட்டுகள்’ என்று தங்கள் நெற்றிக்கண்ணைத் திறக்க ஆரம்பித்தார்கள்.இன்னொரு பக்கம் அதே நாளில் ஓமந்தூரார் மருத்துவமனையில் சிகிச்சைக்காக வந்திருந்த பொதுமக்கள் அடைந்த மன உளைச்சலையும் சொல்லி மாளாது. செந்தில் பாலாஜி அட்மிட் ஆனதால் பரபரப்பின் உச்சத்தில் இருந்த மருத்துவமனையில் அன்றைய தினத்தில் மட்டும் சுமார் 12 இருதய சிகிச்சைகள் ரத்து செய்யப்பட்டதாம். தவிர, முதல்வர் தொடங்கி அத்தனை அமைச்சர்களும் மருத்துவமனையை முற்றுகை இட்டதால் அங்கு இயல்பு நிலை பாதிக்கப்பட்டு மருத்துவர்களும், செவிலியர்களும் கையைப் பிசைந்துகொண்டு நிற்கவேண்டிய நிலையே ஏற்பட்டது”.“ஜாதகப்படி ஆகஸ்ட் வரை அண்ணாமலைக்கு சோதனைக் காலம் என்றீர்கள். ஆனால் டாப் கியரில் அரசியல் செய்கிறாரே சுவாமி?” “அவர் அடுத்தடுத்து டெல்லிக்கு அனுப்பும் ஸ்கிரிப்டுகள் உடனுக்குடன் ஓகே ஆவதால் ஓவர் உற்சாகத்தில்தான் இருக்கிறார். அதிலும் அ. தி.மு.க-வை உசுப்பேற்றிய வகையில் மேலிடத்துக்கு மெத்த மகிழ்ச்சி. இதன் தொடர்ச்சியாக ஜூலை 9ம் தேதி தொடங்குவதாக இருந்து, நிறுத்தி வைக்கப்பட்டிருந்த பாத யாத்திரையை விரைவில் தொடங்கவிருக்கிறார். திருச்செந்தூரில் பாதயாத்திரையை தொடங்கி சென்னையில் முடிக்க முடிவு செய்து இருக்கிறார். ஆனால் இது முழு பாதயாத்திரையாக இருக்காது என கட்சி வட்டாரங்கள் சொல்கின்றன.அதாவது, ஒரு தொகுதியில் இருந்து இன்னொரு தொகுதிக்கு பஸ் மூலம் பயணிப்பதே திட்டம். அதே நேரத்தில் ஒரு சில செலக்டிவ் தொகுதிக்குள் முழுவதுமாக நடைபயணத்தில் ஈடுபடுகிறார் அண்ணாமலை. டிசம்பர் மாதம் வரை ஆறு மாதங்கள் வரை தொடர்ந்து பாதயாத்திரையை நடத்த அண்ணாமலை திட்டம் தீட்டி இருக்கிறார். இதற்கு முன்பு ஜூலை 4ம் தேதி கன்னியாகுமரியில் மாபெரும் பொதுக்கூட்டத்தை நடத்த ஏற்பாடுகள் தீவிரமாக நடந்து வருகிறது. 50 ஆயிரம் பேர் வரை மாநாட்டில் பங்கேற்க வைக்க வேண்டும் என்பதே அண்ணாமலையின் டார்கெட்.”“அப்படியே கட்சிக்காரர்கள் சிலருக்கும் டார்கெட் வைத்திருப்பதாக ஒரு தகவல்?”“ஊழல் செய்தவர்கள் லிஸ்ட்டில் ஜெயலலிதா பெயர் வரை கொண்டு வந்துவிட்ட வகையில் தனது க்ளீன் இமேஜோடு சேர்த்து கட்சியில் உள்ள குட்டி குட்டி கட்டப்பஞ்சாயத்தார்களின் பட்டியலையும் கலெக்ட் செய்ய ஆரம்பித்து அவர்களைக் களையெடுக்கும் முயற்சியில் இருக்கிறாராம் மலை. அந்த லிஸ்டில் எக்கச்சக்கமாய் வந்து சிக்கிக்கொண்டவர் தென்சென்னை மாவட்ட பா.ஜ.க தலைவர் காளிதாஸ். இவர் புதிதாக 38 லட்சம் ரூபாய்க்கு ‘இன்னோவா’ கார் வாங்கி இருக்கிறார். பா.ஜ.க தலைவராக தமிழிசை இருந்தபோது அவரின் தீவிர ஆதரவாளர் காளிதாஸ். இப்போது அண்ணாமலையிடம் மிக நெருக்கமாக இருக்கிறார். இவர் வாங்கிய புதிய கார் குறித்த விவரங்கள் எதுவும் அண்ணாமலைக்கு தெரியாது. ஆனால் எதிர்கோஷ்டியினர் இது குறித்து அண்ணாமலைக்கு புகாராக தட்டி விட்டிருக்கிறார்கள். சில தஸ்தாவேஜூகளையும் புகாருடன் இணைத்திருக்கிறார்கள்..இந்த சந்தர்ப்பத்தில், ‘பூத் கமிட்டி’ அமைப்பது தொடர்பாக அண்ணாமலை தலைமையில் கட்சி அலுவலகத்தில் ஆலோசனைக்கூட்டம் நடந்தது. அப்போது ஒரு கிளை தலைவரை போனில் தொடர்பு கொண்ட காளிதாஸ் தனது கெத்தை காட்டுவதற்காக ‘லவுட் ஸ்பீக்கர்’ மூலம் பேச ஆரம்பித்தார். அப்போது அக்கிளை நிர்வாகி, ‘அண்ணே நான் தி.மு.கவுக்கு போய் இரண்டு வருடம் ஆகிவிட்டது. இப்போது என்னை அழைக்கலாமா’ என கேட்க தலையில் அடித்துக் கொண்ட அண்ணாமலை இன்னோவா வந்த பாதையை விசாரிக்க ஆரம்பித்திருக்கிறாராம்” “ஈ.வி.கே.எஸ். இளங்கோவன் கடுப்பில் இருக்கிறாராமே?”“அதுவா... கொரியர் பார்த்து அவர் வெறியராக மாறிய சமாச்சாரம் அது. தமிழக காங்கிரஸ் செயல் தலைவர் மற்றும் ஆரணி தொகுதி எம்.பி-யுமான விஷ்ணுபிரசாத்தின் மகள் திருமணம் வரும் ஜூலை மாதம் 7-ம் தேதி சென்னையில் நடக்கிறது. இதை முன்னிட்டு, திருமண அழைப்பிதழ்களை வி.ஐ.பி-க்கள் அனைவருக்கும் கொரியர் மூலமே அனுப்பி வருகிறார். இது இரண்டாம் கட்ட தலைவர்களை மிகவும் சூடேற்றி இருக்கிறது. ஈ.வி.கே.எஸ்-க்கும் அழைப்பிதழ் கொரியரில் வர டென்ஷன் ஆன இளங்கோவன் ‘நானும் மொய்ப்பணத்தை கொரியரில் அனுப்பி வைக்கவா?’ என்று காட்டமாகக் கேட்க, பதறிய விஷ்ணு வருத்தம் தெரிவித்திருக்கிறார். தொடர்ந்து கையோடு அழைப்பிதழை நேரில் சென்று வைத்து இளங்கோவனை விழாவுக்கு வரவேற்றார் விஷ்ணு.’’“வானதி விவகாரம் ஒன்று கோவையில் புகைகிறதே?” “கோவை தெற்கு தொகுதி எம்.எல்.ஏ. வானதியின் சட்டமன்ற உறுப்பினர் அலுவலகம் கோவை ரேஸ்கோர்ஸ் பகுதியில் உள்ளது. கடந்த 12-ம் தேதி மாலையில், அடையாளம் தெரியாத ஒரு நபர் அதனுள் நுழைந்து, உள்அறைகளுக்குள் புகுந்து தாழ்ப்பாளிட முயன்றபடியே விநோதமாக ஏதேதோ பேசினார். எம்.எல்.ஏ. அலுவலகத்தில் பணிபுரியும் விஜயன் என்பவர் அவரை திட்டி, வெளியே தள்ளினார். இதில் ரோட்டில் விழுந்த அந்த நபர் எழுந்து போய்விட்டார். இவைஅனைத்தும் அலுவலக சி.சி.டி.வி-யில் பதிவாகியுள்ளன. வானதி அறிவுறுத்தியபடி ரேஸ்கோர்ஸ் போலீஸில் புகாரும் செய்தார் விஜயன்..இந்த நிலையில் அந்தஅடையாளம் தெரியாத நபர் அடுத்த சில மணி நேரங்களில் கோவை அண்ணா சிலை சிக்னல் அருகே பிணமாக கண்டெடுக்கப்பட்டார். இந்நிலையில், வானதி அலுவலக பணியாளர் தள்ளிவிட்டதால் அதிக உடல்நிலை பாதிக்கப்பட்டு அவர் உயிரிழந்ததாக சிலர் கிளப்பிவிட்டனர். இதனால் கோவை பரபரப்பானது. ஆனால் அந்த நபர் இறந்து கிடந்த பகுதியின் சி.சி.டி.வி காட்சிகளை ஆய்வு செய்த போலீஸ், அந்தநபர் அவ்வழியே வந்த அரசு பேருந்தினுள் பாய்ந்து விழுந்து தற்கொலை செய்து கொண்டதை கண்டறிந்து உறுதிப்படுத்தியது.ஆனாலும் பரபரப்புகள் போய்க்கொண்டுள்ளன. இந்த விவகாரத்தில் சுமார் 30 பிளஸ் வயதுடைய அந்த நபர் யாரென்று அடையாளம் கண்டறிய போலீஸ் திணறிவருகிறது. அதே வேளையில் இன்னும் சில விஷயங்களும் இந்த விவகாரத்தில் சர்சையாகியுள்ளன. அதாவது அந்த நபர் பாய்ந்து விழுந்து பஸ்ஸில் அடிபட்ட நிலையிலும் பஸ்ஸை நிறுத்தாமல் டிரைவர் இயக்கியுள்ளார். அது ஏன்? சம்பவம் நடந்த ஸ்பாட்டுக்கு வெகு அருகில்தான் போலீஸ் கமிஷனர் அலுவலகம், கலெக்டர் அலுவலகம், அரசு மருத்துவமனை, எஸ்.பி. அலுவலகம் எல்லாமே உள்ளன. ஆனாலும் இப்படியொரு உடல் சாலையோரம் கிடப்பது என்பது போலீஸின் கவனத்துக்கு வர வெகு நேரமாகியுள்ளது, அது ஏன்? இதை எல்லாம் சுட்டிக்காட்டி கடுமையான விமர்சனங்கள் எழுகின்றன. பதில் கிடைக்கிறதா பார்ப்போம்...”என்றவருக்கு சூடான மசால் வடையைக் கொடுத்தார் சிஷ்யை.அதைக் கொறித்த வம்பு, “செந்தில்பாலாஜியின் இடங்களில் ரெய்டு, கைது சம்பவங்களுக்கு பிறகு அதிரடி முடிவை எடுத்துள்ளது தமிழக அரசு. அதாவது, தமிழகத்தில் எவர் இடங்களிலும் நுழைந்து சோதனையிட சி.பி.ஐ-க்கு அளிக்கப்பட்டிருந்த அனுமதியை ரத்து செய்துள்ளது. இனி தமிழ்நாட்டில் சி.பி.ஐ. விசாரணை நடத்த வேண்டும் என்றால் தமிழக அரசின் முன் அனுமதி அவசியம். ஏற்கெனவே பஞ்சாப், தெலங்கானா, மேற்குவங்கம், கேரளா, ராஜஸ்தான் உள்ளிட்ட சில மாநிலங்கள் இதேபோன்ற உத்தரவைப் பிறப்பித்துள்ள நிலையில் தாமதமாக விழித்துக்கொண்டிருக்கிறது தமிழக அரசு...”“ஓஹோ...””இதற்கு பதிலடியாக மத்திய அரசும், சி.ஆர்.பி.எஃப் உள்ளிட்ட மத்திய காவல் படைகளுக்கான அதிகாரத்தை அதிரடியாகக் கூட்டியிருக்கிறது. இதுவரை வருமான வரித்துறையினரோ அமலாக்கத் துறையினரோ சோதனைக்குச் செல்லும்போது உள்ளூர் காவல்நிலைய அதிகாரிகளுக்கு தகவல் தெரிவித்து வந்தனர். ஆனால் இனிமேல் ரெய்டு செல்லும்போது, அந்தந்த மாவட்டங்களில் உள்ள மத்திய காவல் படையிடமும் தகவல் தெரிவிக்க வேண்டும். அவர்களது பாதுகாப்புடன்தான் இனி ரெய்டுகள் நடக்க வேண்டும் என்று முடிவெடுக்கப்பட்டுள்ளது” என்றபடி நடையைக் கட்டினார் வம்பு!.டெல்லி வாத்தியார்# அமித்ஷா தமிழகம் வந்தபோது, மின்சாரம் துண்டிக்கப்பட்ட விவகாரம் பிரதமர் மோடியை டென்ஷாக்கி இருக்கிறது. இதையடுத்து மத்திய உள்துறைச் செயலகத்தில் இருந்து தமிழக காவல் துறையிடம் விளக்கம் கேட்டார்களாம். அவர்களும் உக்கிரத்தை தாங்க முடியாமல் ஏதேதோ சொல்லி கூல்படுத்தியுள்ளனர். அதன் பிறகே மோடியின் கோபம் சற்று தணிந்துள்ளது.# சில காலத்திற்கு முன்பு தொடர்ந்து அதானியை வைத்து காங்கிரஸ் உள்ளிட்ட எதிர்கட்சிகள் அரசியல் செய்து வந்த நிலையில், திடீரென்று அனைவரும் சைலென்ட் ஆகிவிட்டனர். காரணம் சரத் பவார்! சமீபத்தில் சரத் பவாரை சந்தித்துப் பேசினார் அதானி. அப்போது அனைத்து கட்சிகளுக்கும் சேர்த்து, அதானியுடன் ஒரு நல்ல உறவை ஏற்படுத்திவிட்டார் சரத் பவார். அதன் தொடர்ச்சியாக அனைத்து கட்சிகளுக்கும் நன்கொடையாக, அதானி குரூப்பிடமிருந்து ஏராளமான ஸ்வீட் பாக்ஸ்கள் கைமாற உள்ளன.