ரீடர்ஸ் ரியாக்ஷன் : புலனாய்வுத் திறனுக்கு நற்சான்றிதழ் !

‘எதிர்காலத்தில் ஒரு தமிழரை பிரதமர் ஆக்காமல் விடமாட்டோம்’ என்று ஸ்ட்ராங்காக ஒரு பிட்டைப் போட்டு சென்னை வந்திறங்கிய அமித் ஷாவை சந்திப்பதில், ஓ.பி.எஸ்., இ.பி.எஸ். இருவருமே போட்டி போட்டுக்கொண்டு ஆப்சென்ட்! அதற்குக் காரணம், ‘நான் எதுக்குப் போகணும், புறக்கணித்தால்தான் நம் அருமை புரியும்’ என்பதுதான் என்கிறார்கள். இந்த விஷயத்தில் இருவரும் காட்டிய அக்கறையை கட்சியை வளர்ப்பதில் காட்டி இருந்தால் அ.தி.மு.க. அதலபாதாளத்துக்கு போய் இருக்குமா?- பாரதிமுருகன், மணலூர்பேட்டை.தமிழக அரசியலில் எம்.ஜி.ஆருக்குப் பின் ஜெயலலிதா. அவருக்குப் பின் திரையுலகப் பெரும் புள்ளிகள் இல்லை. ‘நாம் அரசியலில் நுழைந்தால் ஆட்சி நமக்கே’ என கமல், ரஜினி துடியாய்த் துடிக்க...கமல் முந்திக்கொண்டு கட்சி ஆரம்பித்து தேர்தலிலும் நின்று பரிதாபத் தோல்வியைக் கண்டார். அதைப் பார்த்த ரஜினி, கவுரவமாக அரசியல் வேணாம் என ஒதுங்க... ஆழம் தெரியாமல் அரசியலில் குதிக்க ஆசைப்படுகிறார், நடிகர் விஜய். அவரும் கொஞ்சம் அரசியலில் அனுபவம் பெறட்டுமே..!-என்.ஏ.நாகசுந்தரம், குஞ்சன்விளை.ரேஷன் அரிசி கடத்தல்காரர்களின் மாவு கடத்தல் டெக்னிக்கை வெட்டவெளிச்சம் ஆக்கியிருந்த ‘அரிசி போயி மாவு வந்தது டும் டும் டும்! கடத்தலை தடுக்க முடியாமல் தவிக்கும் அதிகாரிகள்’ என்ற கட்டுரை உமது புலனாய்வுத் திறனுக்கு நற்சான்றிதழ் பெறும் அளவுக்குத் தகுதியானது. கடத்தல்காரர்களுக்குத் துணை போகமாட்டோம் என்ற உறுதிப்பாட்டோடு அதிகாரிகள் களம் இறங்கினால் கடத்தல் ரேஷன் அரிசி மாவாக உருமாற்றம் பெறும் முன்பே அரிசி கடத்தலைத் தடுக்க முடியும்.-ஆர்.வி, கரூர்..‘அமித் ஷா ஆஃபர்! சிக்காத சண்டைக் கோழி... தெறித்து ஓடிய மாவீரன்’ என்ற தலைப்பில் விஷாலும் சிவகார்த்திகேயனும் அரசியல் வலையில் சிக்காமல் தப்பியதை சுவாமி வம்பானந்தா, வேகமும் விறுவிறுப்புமாக விளக்கிய விதம், அருமை. மற்ற பத்திரிகைகளில் வராத புதுப்புதுத் தகவல்களை தன் பாணியில் சொல்வது, சுவாமிக்கே உரிய சிறப்பு!- ஜே.தனபாலன், நஞ்சுண்டாபுரம்.‘தங்களுக்குத் தெரியாத சட்டம் ஒன்றும் இல்லை மை லார்ட்!’ கட்டுரை செம தூள் கிளப்பிவிட்டது. ‘ ஐம்பது ஆண்டு காலமாக நடக்கும் அவலத்தை யார் தட்டிக் கேட்கப் போகிறார்களோ?’ என்று இருந்த விஷயம், உமது புண்ணியத்தில் ஒரு முடிவுக்கு வந்து விட்டது. இந்தப் பதிவை தமிழகத்தில் உள்ள ஒவ்வொரு காவல் நிலையத்திலும் ஃபிரேம்போட்டு மாட்டவேண்டும். இந்த நிலையை யார் மாற்றப் போகிறார்களோ... அது, ஆண்டவனுக்குத்தான் வெளிச்சம்!-தே.மாதவராஜ், இராமநாதபுரம்.பிரதமரா, முதல்வரா? யார் ஸ்டிக்கரை ஒட்டுவது? என்ற ஈகோ யுத்தத்தால் சென்னையை அடுத்த பூந்தமல்லியில் பயன்பாட்டுக்கு வராமல் 250 கால்நடை ஆம்புலன்ஸ்கள் நிறுத்தப்பட்டுள்ளது வேதனை. வாகனத்தில் யார் படம் இருக்கிறது என்பதைவிட, மக்களுக்கு உதவும் வகையில் மாக்களுக்கான ஆம்புலஸ்களைப் பயன்பாட்டுக்குக் கொண்டுவருவதுதான் முக்கியம். இதை உணர்ந்து,கால்நடைத்துறை அமைச்சர் உடனடி நடவடிக்கை எடுக்கவேண்டும். -சு.ஆறுமுகம், கழுகுமலை.