டிஷ்யூம்... டிஷ்யூம்... சுந்தரகாண்டம் படித்தால் சுகப்பிரசவம் ஆகுமா?

கூடிய விரைவில் பிரசவத்தையே செயற்கை நுண்ணறிவு ரோபாக்கள் செய்யவிருக்கின்றன. இந்த காலகட்டத்தில் கர்ப்ப காலத்தில் சுந்தரகாண்டத்தைப் படித்தால் சுகப்பிரசவம் நடக்கும் என்று அருள் வாக்கு சொல்லியிருக்கிறார், தெலங்கானா ஆளுநரும் மருத்துவமான தமிழிசை செளந்திரராஜன். இந்துக்கள் இடையே இந்த நம்பிக்கை பரவலானதுதான் என்றாலும், தமிழிசை மகப்பேறு மருத்துவர் என்பதால் பெரும் விவாதமாகியிருக்கிறது அவரது கருத்து! இதுவும் ஒரு விஞ்ஞானம்தான்! ஹெச்.ராஜா, தேசிய செயற்குழு உறுப்பினர், பா.ஜ.க.கருவில் இருக்கும் குழந்தைக்கு வெளியில் இருந்தே சொல்லிக் கொடுக்கலாம் என்கிறது விஞ்ஞானம். இதை மகாபாரத காலத்திலேயே நம் முன்னோர்கள் அறிந்திருக்கிறார்கள். சுபத்திரையின் வயிற்றில் இருந்த அபிமன்யுவுக்கு ‘சக்கர வியூகம் என்றால் என்ன? அதனுள் செல்வது எப்படி?’ என்றெல்லாம் கிருஷ்ணர் சொல்லிக் கொடுத்த கதை மகாபாரதத்தில் இருக்கிறது.அபிமன்யூ சக்கர வியூகத்தை கருவிலேயே கற்றுக்கொண்டான். ஆனால், அதிலிருந்து வெளியே வருவதை கிருஷ்ணர் சொல்லிக் கொடுக்கும் நேரத்தில் சுபத்திரை தூங்கிவிட்டாள். அதனால், வெளியேறும் வியூகத்தை மட்டும் அபிமன்யு உணரவில்லை. இது புராண காலத்திலேயே அறியப்பட்டிருக்கிற உண்மை. ஆனால், தமிழகத்தை பொறுத்தவரை கருணாநிதி என்றோ எழுதிய பேனாவை கடல் நடுவே கவிழ்த்து வைப்பதும், அவர் சமாதியில் ‘முரசொலி’ பேப்பர் வைப்பதும்தான் நம்பிக்கையாகப் பார்க்கப்படுகிறது. இப்படிப்பட்ட மூட நம்பிக்கைக்குச் சொந்தக்காரர்கள் தி.கவும்., தி.மு.கவினரும்தான். அவர்கள், அறிவு சார்ந்த விஷயங்களைப் பேச லாயக்கற்றவர்கள்.வயிற்றில் இருக்கும் குழந்தைக்கு நல்லவிஷயங்களைப் படிப்பது, கேட்பது மூலம் நல்ல விஷயங்களை சொல்லித்தர முடியும். ராமாயணம் போன்ற இதிகாசங்களை சொல்லிக்கொடுப்பதன் மூலம் சுகப்பிரசவத்துக்கு வாய்ப்பு இருக்கிறது. இதைதான் தெலங்கானா கவர்னர் தமிழிசை செளந்திரராஜன் சொல்லியிருக்கிறார்.எந்த ஒரு பாசிட்டிவான விஷயத்தையும் இந்து மதரீதியாகச் சொன்னால் விமர்சிப்பார்கள். கேலி பேசுவார்கள். கேள்வி கேட்பார்கள். ஆனால், இறை நம்பிக்கைகள்ள் இஸ்லாத்திலும், கிறிஸ்தவத்திலும் இருக்கின்றன. அங்கெல்லாம் இந்த பகுத்தறிவாளர்கள் கேள்வி கேட்க மாட்டார்கள். தாயின் மனஓட்டமே கருவில் இருக்கும் குழந்தைக்கும் ஏற்படும். எனவே கருவறையில் இருக்கும் குழந்தைக்கு நல்லொழுக்கங்களையும் நல்ல எண்ணங்களையும் உருவாக்குவது, கர்ப்ப காலத்தில் பெண்களின் முக்கியமான பொறுப்பு. எனவே கீதையின் ஒரு பகுதியையோ அல்லது அத்தியாயத்தையோ கர்ப்பிணிகள் படிக்க வேண்டும். அல்லது,கேட்க வேண்டும். இதையெல்லாம் இதிகாசங்கள் தொடர்பான ஆய்வு நடத்திதான் ஒரு முடிவுக்கு வரவேண்டும் என்பது அவசியமில்லை. இதிகாசங்கள் என்பதெல்லாம் காலங்காலமாக உள்ள நம்பிக்கை..சுந்தரகாண்டத்தை ஆய்வு செய்தாரா தமிழிசை?டாக்டர் எழிலன், தி.மு.க., எம்.எல்.ஏமருத்துவப் படிப்பில் முதல் ஐந்தரை வருடம் எம்.பி.பி.எஸ். படிக்கிறார்கள். பிறகு பிரசவத்துக்கான மருத்துவப் படிப்பு மூன்று வருடம் படிக்கிறார்கள். இப்படிப் படித்த பிறகே மருத்துவப் பயிற்சி செய்கிறோம். மகாராணி விக்டோரியாவுக்கே பிரசவம் பார்த்தவர், ஏ.எல்.முதலியார். அவரது புத்தகத்தைத்தான் பிரசவத்துக்கான பாடத்திட்டத்தில் படிப்போம்.ஆய்வுகளின் அடிப்படையில் அமைந்ததுதான் மருத்துவம். படித்த படிப்பு மற்றும் அனுபவத்தின் அடிப்படையில்தான் ஒரு மருத்துவர் அட்வைஸ் செய்வார். ராமாயணம், மகாபாரதம் உட்பட இதிகாச புத்தகங்கள் எதையும் படித்து பிறருக்கு நாங்கள் ‘அட்வைஸ்’செய்வதில்லை. இதிகாசங்களை படித்ததன் மூலம் பலன் அடைந்த நூறு பெண்களை யாராவது காட்ட முடியுமா?மகப்பேறு மருத்துவர் என்ற முறையில் தமிழிசை இது தொடர்பாக ஏதாவது ஆய்வுகள் நடத்தி இருக்கிறாரா? சர்வதேச மருத்துவ அமைப்புகள் இதுகுறித்து ஆய்வு நடத்தி, முடிவுகளை வெளியிட்டு இருக்கின்றனவா? மருத்துவ ‘அட்வைஸ்’செய்வதற்கு இதுபோன்ற தரவுகள் மிகவும் அவசியம். பிரசவத்தில் தாய், சேய் இறப்பு சதவிகிதம் நார்வே, ஸ்வீடன், கியூபா, அமெரிக்கா நாடுகளில் மிகக் குறைவு. அங்கெல்லாம் இதுபோல ராமாயணம், மகாபாரதம் படித்ததாகத் தெரியவில்லை.கேரளா, தமிழகம் உட்பட சில முற்போக்கு இயக்கம் வளர்ந்த மாநிலங்களில் இருக்கின்ற குறியீடுகளுடன், ராமாயணம் மற்றும் மகாபாரதம் படிக்கக் கூடிய உத்தரப்பிரதேசம் மற்றும் மத்தியப்பிரதேசம் போன்ற மாநிலங்களில் தாய்,சேய் இறப்பு சதவிகிதத்தை ஒப்பிட்டு பாருங்கள். உண்மை தெரியும். மருத்துவத் துறையினர், துறை சார்ந்த அறிவுரை வழங்கும்போது ஆய்வுக்குட்பட்ட செய்திகளைச் சொல்லாமல் மூட நம்பிக்கையை வளர்ப்பது போலவும், குறிப்பிட்ட மதம் சார்ந்த நூல்களை ’புரமோட்’ செய்வது போலவும் பேசுவது ஜனநாயகத்துக்கு எதிரானது. இது அறிவியல் விழிப்புணர்வுக்கான அடிப்படையும் கிடையாது.கர்ப்பிணிகளுக்கு ஒவ்வொரு மாதமும் என்னென்ன பரிசோதனைகள் செய்ய வேண்டும், கால்வீங்குவது முதல் உடல் சோர்வுவரை பலவித அறிகுறிகள் தெரியும்போது எப்படி சிகிச்சை செய்யவேண்டும், எப்போது ஸ்கேன் செய்ய வேண்டும் என்பதெல்லாம் முக்கியம். கர்ப்பிணிகளையும் சிசுவையும் பாதுகாக்க இப்படி பல வழிமுறைகள் உள்ளன. இதனால்தான் முத்துலட்சுமி மகப்பேறு திட்டத்தை செயல்படுத்தினார் முன்னாள் முதல்வர் கருணாநிதி.இத்திட்டத்தின்கீழ் கர்ப்பிணிகளை அரசு மருத்துவமனையில் இருந்து தொடர்ந்து ஆய்வு செய்து விசாரிப்பார்கள். தகுந்த அறிவுரைகள் அளிப்பார்கள். உரிய சிகிச்சைகளைக் கொடுப்பார்கள். இதோடு உரிய உதவித் தொகையும் வழங்கப்படும். இப்படிச் செய்வதால் தாய், சேய் இறப்புகள் குறைந்துவிட்டன. இது எங்கே இருக்கிறது? இதிகாசங்களைப் பேசி மூட நம்பிக்கைகள் வளர்ப்பது எங்கே இருக்கிறது? -கணேஷ்குமார்