கர்நாடகா தேர்தல் ; பா.ஜ.க-வுக்கு அடி... எடப்பாடி கையில் வெடி!

தனக்கு ஒரு கண் போனாலும் எதிரிக்கு இரண்டு கண்களும் போனால் கைக்கொட்டி சிரிப்பார்களே... அப்படியொரு கொண்டாட்ட நிலைக்கு வந்துள்ளார் அ.தி.மு.க பொதுச் செயலாளர் எடப்பாடி பழனிசாமி. இத்தனை நாட்களாக தன்னைப் பாடாய் படுத்திய பா.ஜ.க டெல்லி தலைமையும், தமிழகத்தின் அண்ணாமலையும் கர்நாடகாவில் மண்ணைக் கவ்விய காட்சிகளைப் பார்த்து வெடி வெடித்து கொண்டாடவும் அவர் தயாராகிவிட்டார்; இனி கூட்டணியின் மொத்த கடிவாளமும் எடப்பாடி வசம்தான் என்கிறது அ.தி.மு.க வட்டாரம்.34 ஆண்டுகளுக்குப் பிறகு பிரம்மாண்டமான வெற்றியை கர்நாடகத்தில் ருசித்திருக்கிறது காங்கிரஸ். தேர்தலுக்கு முந்தைய, பிந்தைய கணிப்புகள் அனைத்தையும் தவிடுபொடியாகி 135 தொகுதிகளில் வெற்றிபெற்றுள்ளது காங்கிரஸ். இந்த வெற்றி 2024 நாடாளுமன்றத் தேர்தலிலும் எதிரொலிக்கும் என்று காங்கிரஸ் முகாம் உற்சாகத்தில் முழக்கமிட... அவர்களை தாண்டியும் உற்சாக மூடுக்கு வந்திருக்கிறது தமிழக அ.தி.மு.க-வின் எடப்பாடி முகாம்.இது தொடர்பாக பா.ஜ.க. மூத்த நிர்வாகி ஒருவரிடம் பேசினோம். ” கர்நாடகா தேர்தலில் பா.ஜ.க-வின் வெற்றி தோல்வி என்பது 2024 நாடாளுமன்ற தேர்தலிலும் எதிரொலிக்கும் என்பதால், அங்கு ஆட்சியைத் தக்கவைக்க மோடியும் அமித் ஷாவும் படாதபாடுபட்டு வியூகங்களை வகுத்தனர். ஆனாலும் ஊழல் மற்றும் உட்கட்சி பிரச்னைகளால் இந்தத் தேர்தலில் மண்ணை கவ்விவிடுவோம் என்று ஏற்கெனவே டெல்லி மேலிடம் சந்தேகப்பட்டது..அள்ளிவிட்ட சந்தோஷ்!இந்த நிலையில்தான் உள்ளே புகுந்த கட்சியின் தேசிய அமைப்பு செயலாளர் பி.எல்.சந்தோஷ், ’கவலை வேண்டாம். தமிழக பா.ஜ.க தலைவர் அண்ணாமலைக்கு கர்நாடகாவில் ரொம்ப நல்ல பெயர் உள்ளது. அவர் இங்கு கர்நாடக சிங்கம் என்று பெயர் எடுத்ததால்தான், தமிழக பா.ஜ.க தலைவராகவே நியமிக்கப்பட்டார். அவரை வைத்து பிரச்சாரம் செய்தால் மொத்தத்தையும் அள்ளிவிடலாம் என்று வாய்க்கு வந்ததை ‘அள்ளிவிட்டார்’. இதைத் தொடர்ந்துதான் தமிழக பா.ஜ.க தலைவர் அண்ணாமலையை கர்நாடக சட்டமன்ற தேர்தலில் மேலிட இணை பொறுப்பாளராக நியமித்தார்கள்.கிள்ளிக்கூட தராத அண்ணாமலை!2011 2019 காலகட்டத்தில் கர்நாடகா மாநிலத்தில் காவல்துறையில் பல்வேறு பதவிகளை வகித்த அனுபவம் அவருக்கு இருந்ததால் உடுப்பியில் 5 , சிக்மகளூருவில் 5, தாவணகெரேவில் 7 , ஷிவமொகாவில் 7 , கோலாருவில் 6 , மாண்டியாவில் 7 , ஹாசனில் 7 , தட்சிண கன்னடாவில் 8 , பெங்களூரில் 28 , உத்தர கன்னடாவில் 6 தொகுதிகள் என கர்நாடகாவில் 10 மாவட்டங்களில் 86 தொகுதிகளுக்கான பொறுப்பு அண்ணாமலையிடம் நம்பி ஒப்படைக்கப்பட்டது. ஆனால், இந்த 86ல் 53 தொகுதிகளில் பா.ஜ.க-வுடன் அண்ணாமலைக்கும் சேர்த்து அல்வா கொடுத்துவிட்டார்கள் வாக்காளர்கள். இது அண்ணாமலைக்கு பெரும் பின்னடைவுதான் “ என்றார்..பா.ஜ.க., தோல்வி பற்றி பேசிய அ.தி.மு.க மூத்த தலைவர் ஒருவர், ”அண்ணாமலை தமிழக பா.ஜ.க., தலைவராக பொறுப்பேற்ற நாள் முதலே ’நாங்கள்தான் எதிர்க்கட்சி’ என்ற தோரணையில் செயல்பட ஆரம்பித்தார். ஆளும்கட்சியான தி.மு.க-வை மட்டுமில்லாது கூட்டணி பங்காளிகளான எங்களையும் அவர் அடிக்கடி சீண்டினார். இதனால் அண்ணாமலை செயல்பாடுகள் மீது எடப்பாடி உள்பட அ.தி.மு.க-வினருக்கு கடும் வெறுப்பு ஏற்பட்டது. அண்ணாமலையின் கருத்துகளால் அ.தி.மு.க - பா.ஜ.க கூட்டணியில் விரிசல் உருவாகி, மாறி மாறி இரு தரப்பினரும் விமர்சித்து கொண்டார்கள்.தி.மு.க அமைச்சர்களின் சொத்துப்பட்டியலை வெளியிட்ட கையோடு, ‘அ.தி.மு.க-வினரின் சொத்துப் பட்டியலும் வெளியிடப்படும்’ என்றார். எல்லாவற்றுக்கும் மேலாக ஒருகட்டத்தில், ’தமிழகத்தில் பா.ஜ.க., தனித்துப் போட்டியிடும்; அ.தி.மு.க-வுடன் கூட்டணி இல்லை’ என்று தன்னிச்சையாகக் கொக்கரித்தார் அண்ணாமலை. இன்னொரு சந்தர்ப்பத்தில் எடப்பாடியின் போஸ்டர்களை தீவைத்து எரித்தார்கள் அண்ணாமலை ஆதரவாளர்கள். இரு தரப்பினரின் பேச்சுகளைக் கேட்ட தொண்டர்கள் காதுகளைப் பொத்திக்கொள்ள நேரிட்டது. இது டெல்லி வரை எதிரொலிக்கவே ஒருகட்டத்தில் பதறிப்போன அமித் ஷா, ‘பா.ஜ.க-வுடன் அ.தி.மு.க. கூட்டணியில் இருக்க்கிறது’ என்று பேட்டி அளித்து நிலைமையை சமாளிக்க வேண்டியிருந்தது.தொடர்ந்து கடந்த ஏப்ரல் மாதம் தனது சகாக்களுடன் டெல்லி என்ற எடப்பாடி, அங்கு அமித்ஷாவை சந்தித்துப் பேசினார். அப்போது அண்ணாமலையையும் வரவழைத்து, எடப்பாடியுடனான மோதலுக்கு முற்றுப்புள்ளி வைத்தார் அமித் ஷா. அதேசமயம் அமித் ஷா, நட்டா ஆகியோர் 15 தொகுதிகளை பா.ஜ.க-வுக்கு வழங்க வேண்டுமென எடப்பாடியிடம் உத்தரவிடும் தொனியில் கேட்டார்கள். ஆனாலும் பிடிகொடுக்காத எடப்பாடி, ’கடந்த முறை வழங்கிய 5 தொகுதிகளை மட்டுமே வழங்க முடியும்’ என்று கூறியபோதும், அவரை சட்டை செய்யாத அமித் ஷா, ’நாங்கள் சொல்வதை செய்யுங்கள், ஓ.பி.எஸ்., சசிகலா, தினகரன் ஆகியோரையும் சேர்த்துகொள்ளுங்கள். மற்றவற்றை கர்நாடகா தேர்தலுக்கு பிறகு ஜூன் மாதம் பேசி முடித்து கொள்ளலாம்’என்று எடப்பாடியை லெஃப்ட்டில் டீல் செய்து அனுப்பி வைத்தார்.ஆனால், இதற்கெல்லாம் இப்போது பா.ஜ.க அனுபவிக்கிறது. கர்நாடகா தேர்தலில் அண்ணாமலையின் தேர்தல் வியூகம் பா.ஜ.க-வை படுகுழியில் தள்ளிவிட்டிருக்கிறது. இதிலிருந்து இரண்டு விஷயங்கள் தெளிவாகிவிட்டன... ஒன்று, அண்ணாமலை கர்நாடக சிங்கம் என்ற பிம்பம் அங்கு நொறுங்கிவிட்டது. பி.எல்.சந்தோஷின் ஜம்பமும் பலிக்கவில்லை..பா.ஜ.க ஓரளவு வலுவாக உள்ளதாக கருதப்படும் கர்நாடகாவிலேயே அந்தக் கட்சிக்கு இந்த நிலை என்றால், தமிழகத்தில் சொல்லவா வேண்டும்? இங்கு பா.ஜ.க படுவீக்காகவே உள்ளது. கட்சியின் வளர்ச்சி பற்றி பி.எல்.சந்தோஷ் மற்றும் அண்ணாமலை மேலிடத்திற்கு கொடுத்த ரிப்போர்ட்கள் எல்லாமே ஆதாரமற்றது என்று நிரூபிக்க இதை வாய்ப்பாக பயன்படுத்த எடப்பாடி முடிவு செய்துவிட்டார்” என்றார் முத்தாய்ப்பாக!இந்தநிலையில்தான் மே 12-ம் தேதி தனது பிறந்தநாளை சேலம் இல்லத்தில் கொண்டாடிய எடப்பாடி, மறுநாள் மே 13-ம் தேதி கர்நாடகா தேர்தல் முடிவுகள் வெளியாகும் என்பதற்காகவே சேலத்தில் இருந்து சென்னை வந்தார். அவரது சென்னை வருகையை அறிந்த அ.தி.மு.க. நிர்வாகிகள் பசுமைவழி சாலை வீட்டிற்கு காலை 8 மணி முதலே வரத் தொடங்கினர். அப்போது மூத்த நிர்வாகிகளுடன் கர்நாடகா தேர்தல் முடிவுகள் குறித்து ஆலோசனை செய்துக்கொண்டிருந்தார் எடப்பாடி.ஐந்து தொகுதிகள் மட்டுமே!இதுபற்றி நம்மிடம் பேசிய அ.தி.மு.க-வின் இரண்டாம் கட்ட தலைவர் ஒருவர், ”கர்நாடகா தேர்தல் வாக்கு எண்ணிக்கை தொடங்கியது முதலே, டி.வியில் தேர்தல் முடிவுகளை உன்னிப்பாக கவனிக்கத் தொடங்கினார் எடப்பாடி. காலை 7 மணி தொடங்கி 9 மணி வரை பா.ஜ.க முன்னிலை வகித்துவந்தது. இதனால் மோடி, அமித் ஷா, ஜே.பி.நட்டா உட்பட கர்நாடக பா.ஜ.க தலைவர்கள், பொறுப்பாளராக பணியாற்றிய அண்ணாமலை ஆகியோருக்கு வாழ்த்து செய்தி தயார் செய்யுமாறு தன் உதவியாளருக்கு உத்தரவிட்டார் எடப்பாடி. அப்படி வாழ்த்துக் கடிதம் தயாராகிக்கொண்டிருந்த நேரத்தில் ரிசல்கள் ரிவர் கீயர் எடுத்து கர்நாடகாவில் படுகுழியில் புதைந்துக்கொண்டிருந்தது பா.ஜ.க..உடனே வாழ்த்து செய்திகளை நிறுத்தி வைக்கச் சொன்னவர் நிமிர்ந்து அமர்ந்து, ‘பா.ஜ.கவின் தோல்வி நமக்கு நல்லதுதான். இதை வைத்தே 2024 நாடாளுமன்றத்தேர்தலில் ஐந்து சீட்டுகள் மட்டுமே தர முடியும் என்று கறாராகச் சொல்லிவிட முடியும். அதியும் மீறி மீண்டும் நமக்கு அழுத்தம் கொடுத்தால், தமிழகத்தில் பா.ஜ.க பூத் கமிட்டி லிஸ்ட்டை கொடுத்து நம் வழிக்குக் கொண்டு வருவோம். இனி பா.ஜ.க மேலிடம் நம்மிடம் அழுத்தம் கொடுக்க முடியாது. கர்நாடக தேர்தல் முடிவுகளை சொல்லியே அவர்களை வாயடைக்க செய்துவிடலாம். அண்ணாமலைக்கும் தக்க பாடம் கற்பிப்பது போலாயிற்று’ என்று நிம்மதி மூடுக்கு வந்திருக்கிறார் எடப்பாடி” என்றார். இதுகுறித்து அ.தி.மு.க மூத்தத் தலைவர் பொன்னையிடம் கேட்டோம்... “நாடாளுமன்றத் தேர்தலுக்கு இன்னும் ஓராண்டு உள்ளது. கர்நாடகத்தில் பா.ஜ.க-வின் தோல்வி எங்கள் கூட்டணியில் எந்த தாக்கத்தையும் ஏற்படுத்தாது. தொகுதி பங்கீடு குறித்து எடப்பாடி மட்டுமே முடிவு செய்வார்” என்றார்.இந்த விவகாரம் தொடர்பாக பா.ஜ.க-வின் மாநில துணைத்தலைவர் திருப்பதி நாராயணனிடம் கேட்டபோது, ”கர்நாடகா என்ற ஒரு மாநில தேர்தலில் வெற்றி பெற்றதற்காகவே இத்தனை குதி குதிக்கிறார்கள். இந்த ஒரு தோல்வியால் பா.ஜ.க-வை சாய்த்து விட முடியாது. சட்டீஸ்கர், மத்தியப்பிரதேசம், ராஜஸ்தான் ஆகிய மாநிலங்களில் தேர்தல் வரவுள்ளது. நாடாளுமன்றத் தேர்தலுக்கும் ஓராண்டு அவகாசம் உள்ளது. இப்போது கூட்டணி குறித்தும் தொகுதி பங்கீடு குறித்தும் பேசுவது தேவையில்லாதது” என்றார்.கூட்டிக் கழித்துப் பார்த்தால், கர்நாடகா தேர்வுகள் முடிவுகள் எடப்பாடியை உற்சாக மூடுக்குக் கொண்டுவந்திருக்கின்றன. அதேசமயம், அ.தி.மு.க நிர்வாகிகள் இன்னொரு விஷயத்தையும் எதிர்பார்த்துக் காத்திருக்கிறார்கள். ஒரு மாதம் முன்பு, “என்னையும் மீறி நாடாளுமன்றத் தேர்தலில் பா.ஜ.க., அ.தி.மு.க-வுடன் கூட்டணி வைக்குமானால் நான் என் பதவியை ராஜினாமா செய்துவிடுவேன்” என்று அண்ணாமலை பொங்கியிருந்தார்.இப்போதுள்ள சூழலில் கூட்டணி நிச்சயம் அமையத்தான் போகிறது; கர்நாடகத்திலும் அண்ணாமலையின் வியூகங்கள் தோல்வி அடைந்துள்ளன. சொன்னபடி அண்ணாமலை ராஜினாமா செய்வாரா என்று கேட்கிறார்கள் அ.தி.மு.க நிர்வாகிகள்! - பாபு, அபிநவ்

கர்நாடகா தேர்தல் ; பா.ஜ.க-வுக்கு அடி... எடப்பாடி கையில் வெடி!

Related Stories