கர்நாடக தேர்தல்: மோடிக்கு விடப்பட்ட பெரும் சவால்!

வரும் மே 10-ம் தேதி அரங்கேறும் கர்நாடக மாநில சட்டப்பேரவை தேர்தலுக்கான பிரசாரம் களைகட்டி வருகிறது. வழக்கம் போலவே, பிரதமர் நரேந்திர மோடி, இந்த தேர்தலையும் தனது தலைமைக்கு விடப்பட்ட சவாலாகவே எண்ணி பிரசாரம் செய்கிறார். சொல்லப்போனால், அவரது தலைமையை நிரூபிப்பதற்கு கிடைத்த மற்றுமொரு வாய்ப்பு இது. அவருக்கு துணையாக அமித்ஷா, உத்தரப்பிரதேச முதல்வர் யோகி ஆதித்யநாத் உள்ளிட்டோரும் கடந்த பேரவை தேர்தல் போலவே கர்நாடகாவில் செயலாற்றினார்கள்.இங்கு இப்படி என்றால், எதிரணியான காங்கிரஸ் கட்சியில் அகில இந்திய தலைவரான மல்லிகார்ஜீன கார்கே உள்ளிட்டோர் களத்தில் இறங்கி பிரச்சாரம் செய்கிறார்கள். இந்த தேர்தலை முன் வைத்துதான் கர்நாடக மாநிலத்தை சேர்ந்த தலித் சமூக தலைவரான கார்கே, கடந்தாண்டே காங்கிரஸ் கட்சியின் அகில இந்திய தலைவராக நியமிக்கப்பட்டார் என்றும் கூறப்பட்டது..இந்த பின்னணியில், கர்நாடக தேர்தலை ஏதோ மாநிலம் சார்ந்த உள்வீட்டு விவகாரம் மட்டுமே என்று தள்ளி விடமுடியாது. தென் இந்தியாவில் பா.ஜ.க. ஆட்சியில் இருக்கும் ஒரே மாநிலம் கர்நாடகம் மட்டுமே. இன்னும் சொல்லப்போனால், அடுத்த 2024 நாடாளுமன்ற தேர்தலுக்கு இது வெள்ளோட்டம் கூட.இந்த வருடம் இதற்கு முன் நடந்த திரிபுரா, மேகாலயா மற்றும் நாகலாந்து ஆகிய வடகிழக்கு மாநிலங்களில் பா.ஜ.க அணி மீண்டும் வெற்றி பெற்றது. கர்நாடகாவை தொடர்ந்து, காங்கிரஸ் ஆளும் சட்டீஸ்கர் மற்றும் ராஜஸ்தான் ஆகிய மாநிலங்களில் நவம்பர் மற்றும் டிசம்பர் மாதங்களில் பேரவை தேர்தல் நடத்தப்பட வேண்டும். அது போலவே, மற்றொரு தென் மாநிலமான தெலங்கானாவில் டிசம்பரில் தேர்தல். அந்த மாநில முதல்வரும் பெயர் மாற்றம் செய்யப்பட்ட ஆளும் பாரதிய ராஷ்டிர சமிதி தலைவருமான சந்திரசேகர ராவ், பிரதமர் பதவிக்கு ஆசைபடுபவர். அவரை, தேர்தல்ரீதியாக ஒரு தட்டு தட்டி வைப்பது, மோடியின் தேவையும் தேவை..இந்த வருடம் இப்படி என்றால், அடுத்த வருடம் நாடாளுமன்ற தேர்தலை ஒட்டி ஆந்திரப் பிரதேசம், அருணாசலப் பிரதேசம், சிக்கிம் மற்றும் ஒடிசா ஆகிய மாநிலங்களிலும் பேரவை தேர்தல்கள் நடத்தப்படும். அவை அனைத்தையும் மக்களவை தேர்தலுடன் சேர்ந்தே நடத்துவதற்கு தேர்தல் ஆணையம் முடிவு செய்யலாம். மோடியின் ‘ஒரே நாடு, ஒரே தேர்தல்’ கோஷத்துக்கும் இது வலுசேர்க்கலாம். அவ்வாறு நடந்தால், அந்தந்த மாநில பிரச்னைகளை மனதில் கொண்டு மக்கள் இரண்டு தேர்தல்களிலும் வாக்களிப்பார்களா அல்லது இரண்டையும் தனித்தனியாக பார்ப்பார்களா என்பது அரசியல் கட்சிகளுக்கு புரியாத புதிர்.2024 நாடாளுமன்ற தேர்தலைத் தொடர்ச்சியாக அந்தாண்டு அக்டோபர் மாதமே பா.ஜ.க. ஆளும் மஹராஷ்டிரம் மற்றும் ஹரியானாவில் பேரவைத் தேர்தல்கள் நடைபெறும். மக்களவை தேர்தலில் ஒருவேளை பா.ஜ.க. வெற்றி பெறவில்லை என்றே வைத்துக்கொள்வோம். அப்போது, மஹராஷ்டிராவில் மட்டுமாவது, பேரவை தேர்தலுக்கு முன்னரே, மீண்டும் ஆட்சிமாற்றம் ஏற்பட வாய்ப்பு உள்ளது.இது தவிர கர்நாடகா சார்ந்த உண்மை ஒன்றுள்ளது. அந்த மாநில தேர்தல்களில், பா.ஜ.க இதுவரை வாக்கு சதவீதத்தில் ஒரு முறைகூட முன்னணியில் இருந்தது இல்லை. கட்சி தேர்தலில் தோற்றுவிடுமோ என்ற எண்ணம் இருக்கும் சூழ்நிலையில், இது மிகவும் முக்கியமான விஷயம். மாநிலம் முழுமைக்கும், சாதி, மதம் பார்க்காமல் வசதி படைத்தவர்கள் பா.ஜ.க-வையும், ஏழை பாழைகள் மற்றும் நடுத்தர மக்கள் எதிரணியினரை ஆதரிப்பதாகவும் அரசியல் ஆய்வாளர்கள் கருதுகின்றனர்..இந்த பின்னணியில்தான், பா.ஜ.க. தலைமை கர்நாடக தேர்தலில் மோடியை முன்னிறுத்தி பிரசாரத்தை மேற்கொள்கிறது. காரணம், உள்ளுர் சரக்கு விலை போகாதோ என்கிற பயம். கடந்த இரண்டு மூன்று வருடங்களாகவே மாநிலத்தை ஆளும் பசவராஜ் பொம்மை அரசு மக்களிடையே செல்வாக்கை இழந்துவிட்டது என்ற தோற்றத்தை பா. ஜ.க. தலைவர்களே பரப்பிவந்தனர். இதன் பின்னணியில் அவரால் முதல்வர் பதவியை இழந்த மூத்த தலைவர் எடியுரப்பா உள்ளிட்டோர் இருப்பதாகக் கருதப்பட்டது.இது போதாது என்று முதல்வர் பசவராஜ் பொம்மையின் ஆட்சியில் லஞ்சம், ஊழல் மலிந்து செயல்படாத அரசாக மாறிவிட்டதாக நேரடியாகவே குற்றம் சாட்டப்பட்டது. மாநில அரசின் திட்டப்பணிகளை செயல்படுத்தும் ஒப்பந்ததாரர்களின் அசோசியேஷன் இதுகுறித்து முதலமைச்சரிடமே மனு அளித்தது. அதைத் தொடர்ந்து 40 சதவிகித லஞ்சம் கேட்கப்படுவதாக போரட்டம் கூட நடத்தினார்கள். இவற்றின் பின்னால் யார் இருந்தார்கள் என்பது தெரியவில்லை. என்றாலும், தேசிய அளவில் கர்நாடக அரசின் பெயர் ரிப்பேரானது.இவ்வளவு சேதாரங்களுக்கு இடையில்தான் மோடியின் பிரசாரம் உத்தி கர்நாடக பா.ஜ.க-வுக்கு தேவையாக இருக்கிறது. அகில இந்திய அளவில், மோடிக்கு நிகரான மக்கள் செல்வாக்கு உள்ள தலைவர் ஒருவரை கூட, கடந்த ஒன்பது, பத்து ஆண்டுகளில் எதிர்கட்சிகளால் தனித்தோ அல்லது கூட்டாகவோ முன்னிறுத்த முடியவில்லை. பேரவை தேர்தலில் பா.ஜ.க-விற்கு எதிராக வாக்களித்த மாநிலங்களில்கூட, மக்களவை தேர்தலில் அந்தக் கட்சியை ஆதரித்துள்ளார்கள். மோடி தலைமையை ஏற்று, அவருக்கு வாக்களித்து வந்துள்ளார்கள்.என்றாலும், இந்த பிரசாரங்களில் எல்லாம் மோடி வழக்கம் போல் நேரு, காந்தி குடும்பத்தாரையே தொடர்ந்து தாக்கிவருகிறார். எப்போது ராகுல் காந்தி சிறை தண்டனை கொடுக்கப்பட்டு, நாடாளுமன்ற உறுப்பினர் பதவியையும் இழந்து விட்டாரோ, அப்போதே அவரை தனது தேர்தல் எதிரியாக தொடர்ந்து மோடி அரசியல் செய்வது, குண்டு இல்லாமல் துப்பாக்கி சுடுவதற்கு சமம். ஆதனால்தானோ என்னவோ, ‘இலவசங்கள்’ என்று திராவிட மாடலை தொடர்ந்து மோடி தாக்கிவிட்டு, கர்நாடக தேர்தல் அறிக்கையில், பா.ஜ.க. பிற கட்சிகளுக்குபோட்டியாக இலவசங்களை அள்ளித் தெளித்திருப்பதைக் கண்டும் காணாததுபோல இருக்கிறார்..கர்நாடக தேர்தலில் வெற்றி பெறுவது காங்கிரஸ் கட்சிக்கு அரசியல் நிர்பந்தம். காங்கிரஸின் வெற்றி, பா.ஜ.க-வை எதிர்க்கும் அனைத்து மாநிலக் கட்சிகளுக்கும் முக்கியம். கர்நாடகாவில் அரசு அமைக்கும் தகுதியை, காங்கிரஸ் கட்சி சில பல எம். எல். ஏ-க்கள் எண்ணிக்கையில் இழந்தாலும், அந்த தோல்வி,பெரும் தோல்வி தான்.காரணம், இந்த தோல்வியின் தாக்கம் கர்நாடகாவுடன் நின்றுவிடாது. பச்சையாக சொன்னால், எதிர்க்கட்சி ஆளும் மாநிலங்களில் பின் வாசல் வழியாக வலைபோட்டு ஆட்சியை கவிழ்ப்பதை ஒரு கலையாகவே மாற்றிவிட்ட பா.ஜ.க. தன் கைவரிசையை ராஜஸ்தான் மற்றும் சட்டிஸ்கர் மாநிலங்களிலும் காட்ட முயலும். காங்கிரஸ் தலைமையில் இல்லை என்றாலும், அந்தக் கட்சியை உள்ளடக்கிய தேசிய அணிக்கான முயற்சியில் தொய்வு ஏற்படும்.கர்நாடகாவில் பா.ஜ.க. தோல்வி அடைந்தால், அதன் தாக்கமும் அகில இந்திய அளவில் உணரப்படும். கர்நாடக மாநிலத்தை போலவே, மத்தியிலும் ஆளும் கட்சிக்கான எதிர்ப்பலை தோன்றியிருக்கிறது என்ற தோற்றம் ஏற்படும். குறிப்பாக, நடுநிலை வாக்காளர்கள் அப்படி நினைக்கத் தொடங்குவார்கள். இந்த வாக்களர்கள்தான், பல்வேறு மாநிலங்களிலும் பா.ஜ.க-வுக்கு தொடர்ந்து வாக்களித்து வெற்றி பெற செய்துவருகின்றனர்.பா.ஜ.க அல்லது காங்கிரஸ் ஆகிய இரு கட்சிகளுக்குமே மெஜாரிட்டி கிடைக்கவில்லை என்றால், யாருமே தற்போது கண்டுகொள்ளாமல் இருக்கும் தேவ கௌடாவின் மதசார்பற்ற ஜனதாவிற்கு மவுசு உயரும். கடந்த முறை,பா.ஜ.க-விற்கு பின்னால், இரண்டாவதாக வந்த காங்கிரஸ் கட்சியின் முதுகில் ஏறி சவாரி செய்த தேவே கௌடாவின் மகன் குமாரசாமி முதல்வரானார். சில மாதங்களுக்கு பின், பா.ஜ.க-வின் ஆட்சி கவிழ்ப்பு அட்டகாசங்களுக்கு அவரது அரசு பலியாயிற்று.இந்த முறையும் பா.ஜ.க. தேர்தல் முடிந்த பின்னர் பின்வாசல் வழியாக கர்நாடகாவில் பதவிக்கு வந்தால், அது நாடு முழுவதும் அதிர்வலைகளை உண்டாக்கும். மோடி-அமித் ஷா பிரச்சாரம் எடுபடவில்லை என்ற எண்ணம் உருவாகும். அனைத்து எதிர்கட்சிகளும், ‘ஜனநாயக படுகொலை’ என்ற பழைய பாட்டின் அடிப்படையில் ஓரணியில் திரளுவர்.அதைத் தொடர்ந்து, மீண்டும் மோடிக்கு பதிலாக மத்திய அமைச்சர் நிதின் கட்காரி மற்றும் உத்தரப்பிரதேசத்தின் யோகி ஆதித்யநாத் ஆகியோரின் பெயர்கள் மீண்டும் ஒரு சுற்று வரும். அவ்வாறு நிகழுமேயானால், இந்த முறை, அமித் ஷா பெயரும் அந்த லிஸ்டில் இடம் பெற்றால் ஆச்சரியப்பட தேவையில்லை.

கர்நாடக தேர்தல்: மோடிக்கு விடப்பட்ட பெரும் சவால்!

Related Stories