மெரினாவில் வெடிக்கிறதா புரட்சி போராட்டம்?

விக்ரம் லேண்டர் வெற்றிகரமாக தரையிறங்கிய அதே நிமிடங்களில் அலுவலகத்தில் தரையிறங்கினார் வம்பானந்தா. “நிலவின் தென் துருவத்துக்கு நெருக்கமான பகுதியில் வெற்றிகரமாக தரையிறங்கிய உலகின் முதல் நாடு இந்தியாதான் என்கிற சாதனையை இஸ்ரோ படைத்திருக்கிறது” என்று பெருமிதமாகக் கூறிய வம்புவிடம், தட்டு நிறைய கேழ்வரகு புட்டை வைத்துக் கொடுத்த சிஷ்யை, “மிச்சம் வைக்காமல் சாப்பிடுங்கள் சுவாமி” என்று மர்மப் புன்னகை பூத்தார்!“எடப்பாடியின் மதுரை மாநாட்டில் மலை போல உணவு வீணாக்கப்பட்ட விஷயத்தைதானே குத்திக் காட்டுகிறாய். ஆமாம், எடப்பாடி இந்த விஷயத்தில் கடும் அப்செட் என்கிறார்கள். மாநாட்டில் உணவு ஏற்பாடுகளை கவனிக்க முன்னாள் உணவுத்துறை அமைச்சர் ஆர்.காமராஜ் தலைமையில் ஒரு குழு அமைக்கப்பட்டிருந்தது. முன்னாள் அமைச்சர்கள் கே.சி.வீரமணி, எம்.ஆர்.விஜயபாஸ்கர், நிர்வாகிகள் அக்ரி கிருஷ்ணமூர்த்தி, குமரகுரு, செந்தில்நாதன், எம்.பரஞ்சோதி ஆகியோர்தான் அந்தக் குழுவில் இருந்தவர்கள். உணவுக்காக மட்டுமே சிலபல கோடிகளை இறைத்திருந்த நிலையில், அதில் சிலர் விளையாடிவிட்டார்கள் என்று கூறப்படுகிறது. இதனால், கடைசி நேரத்தில் இருப்பதை வைத்து சமைத்ததாகவும் தகவல். இதில் எடப்பாடி அப்செட் என்றாலும் டிஜிட்டல் டீம் நன்றாக வேலை பார்த்ததில் எடப்பாடிக்கு ஏக மகிழ்ச்சியாம்.””அப்படி என்ன அவர்கள் சாதித்துவிட்டார்கள்?””பொதுவாக அ.தி.மு.க எவ்வளவு பெரிய நிகழ்ச்சி என்றாலும் பாரம்பரியத்தைக் கைவிட மாட்டோம் என்று சென்டிமென்ட்டாக பழைய பாணியைதான் கடைபிடிப்பார்கள். ஆனால், இந்த மாநாட்டை முழுக்க முழுக்க டிஜிட்டல் மயமாக்கியிருக்கிறது அ.தி.மு.க. வழக்கமாக மேடை அலங்காரத்துக்காக பூக்கள் மட்டுமே இடம்பெறும். கூடவே தலைவர்களின் படங்கள் ஃபிளக்ஸில் அச்சடிக்கப்பட்டு மேடையில் வைக்கப்படும். ஆனால், மதுரை மாநாட்டில் மேடையில் 160 அடி நீளத்தில் மெகா சைஸ் எல்.சி.டி திரை வைக்கப்பட்டது. சினிமா இசை வெளியீட்டு விழாக்களில் பயன்படுத்தப்படும் இந்த ஸ்கீரினைப் பொருத்துவதற்காகவே மேடையை சினிமா ஆர்ட் இயக்குநர்களை வைத்து தயார் செய்திருக்கிறார்கள். இதில் மாநாடு முடியும் வரை அ.தி.மு.க தலைவர்களின் படங்களும், கட்சி கொடி பறப்பதுபோன்ற காட்சிகளும் இடம்பெற்றன. அதேபோல சினிமாவுக்கு பயன்படுத்தும் ஜிம்மி ஜிப் கேமராவையும் மாநாட்டுக்கு பயன்படுத்தியிருக்கிறார்கள்.”.“எடப்பாடி மாடர்னாகிவிட்டார் என்று சொல்லுங்கள். அந்த புரட்சித் தமிழர் பட்டம்…”“ரொம்பவும் இழுக்காதே. அதையும் நானே சொல்லிவிடுகிறேன், இதை எடப்பாடிக்கு கொடுக்க முதலில் ஆசைப்பட்டது முன்னாள் அமைச்சர் ஆர்.பி.உதயகுமார்தானாம். அவருக்கு நெருக்கமானவரான நெல்லை பாலு மூலம் இதற்கான லாபிகள் நடந்திருக்கின்றன. முன்னதாக எடப்பாடிக்கு இந்த பட்டம் அளிக்க சிலபல ஆதினங்களை அழைத்தார்களாம். ஆனால், அங்கிருந்து சரியான தகவல் வராததால், நிலையூரை சேர்ந்த சாமியார் சுப்பிரமணியன் எனபவரை வைத்து அந்த பட்டத்தை கொடுத்திருக்கிறார்கள்!”“கரூரில் டாஸ்மாக் அதிகாரி ஒருவரை மாற்றிவிட்டார்களாமே?””ஆம், எல்லாம் நமது ரிப்போர்ட்டர் இதழில் வெளியான செய்தியின் எதிரொலிதான். கரூர் கம்பெனி என்கிற ஐடியாவுக்கு மூளையாக இருந்த கரூர் மாவட்ட டாஸ்மாக் மேலாளர் சண்முக வடிவேல் பற்றி நமது இதழில் எழுதியிருந்தோம். இவரைப் பற்றி டாஸ்மாஸ் தொழிற்சங்க நிர்வாகிகளும் குமுறலை வெளிப்படுத்தி இருந்தார்கள். இந்தநிலையில்தான், இவருக்கு மாற்றுப் பணியிடம் அளிக்காமல், ரிலீவ் செய்திருக்கிறார்கள்.”“ரஜினி அப்டேட்ஸ் எதுவும் சுவாமி?”“ஜார்கண்ட், உத்தரப்பிரதேசம் இங்கெல்லாம் சென்ற ரஜினி உ.பி. முதல்வர் யோகி ஆதித்யநாத், சமாஜ்வாடி கட்சித் தலைவர் அகிலேஷ் யாதவ் ஆகியோரை சந்தித்தார். கூடவே உ.பி ஆளுநர் ஆனந்தி பென், ஜார்க்கண்ட் ஆளுநர் சி.பி.ராதாகிருஷ்ணன் ஆகியோரையும் சந்தித்தார். இதன் பின்னணியில் ஒரு விஷயத்தை சொல்கிறார்கள். அதாவது, வடமாநிலங்களில் இருக்கும் சுரங்கங்களில் முதலீடு செய்வது குறித்து ரஜினியின் குடும்பம் ஆலோசித்துவருகிறதாம். ஒருவேளை அந்த தொழிலில் இறங்கினால், மேற்படி நபர்களின் ஆதரவு தேவை என்பதாலேயே இந்த சந்திப்புகள் என்கிறார்கள்.”“தமிழக பா.ஜ.க என்றதும் ஒருவர் செல்போனையே எடுப்பதில்லை என்கிற குற்றச்சாட்டுதான் நினைவுக்கு வருகிறது…”“பா.ஜ.க அமைப்புச் செயலாளர் கேசவ விநாயகம்தானே. அண்ணாரின் செல்போன் எப்போதும் ஆன்லைனில் இருப்பதாகதான் கிரின் சிக்னல் காட்டுகிறதாம். ஆனால், கட்சி பிரச்னைகள் தொடர்பாக சிலர் போன் அடித்தால் அவர் போனை எடுப்பதே இல்லையாம். அதேசமயம், ஒரு குரூப் வாட்ஸ் அப்பில் மெசேஜ் செய்தால் மட்டும், ப்ளு டிக் காட்டி, உடனடியாக பதிலும் போட்டுவிடுகிறாராம். அதை துணைத் தலைவர் பதவியில் ஒருவர் மற்ற நிர்வாகிகளிடம் சொல்லி பெருமையாக தனது செல்போனை காட்ட மற்றவர்கள் கொதித்துப் போய்விட்டார்களாம்.”.“பா.ஜ.க மாநில தலைவர் அண்ணாமலை பற்றி அப்டேட்ஸ் உண்டா சுவாமி?”“2024 நாடாளுமன்றத் தேர்தலில் தென்சென்னை தொகுதியை வாங்கியே ஆக வேண்டும் என்று சபதம் எடுத்துள்ளாராம் அண்ணாமலை. மற்றபடி டெல்லிக்கும் அ.தி.மு.க தரப்புக்கு இடையே வரமாட்டேன் என்றும் சொல்லிவிட்டாராம். அதன்படி டெல்லி நேரடியாக எடப்பாடி, தினகரன் ஆகியோரிடம் மூவ் செய்துவருகிறது. கடந்த நாடாளுமன்றத் தேர்தலில் தே.மு.தி.க-வை பசையாக கவனித்து உள்ளே இழுத்ததுபோல இம்முறை எடப்பாடி, தினகரம், ஓ.பி.எஸ்., சசிகலா ஆகியோரை தேசிய ஜனநாயக கூட்டணிக்குள் இழுக்க பெரும் திட்டம் தீட்டப்பட்டுள்ளதாம்.””ஹோட்டல்களில் மலிவு விலை உணவு வழங்குவது பற்றி ஆலோசனை நடக்கிறதாமே?”“சாப்பாடு விஷயத்தில் சரியாக மோப்பம் பிடித்துவிடுகிறாய்” என்று சிஷ்யைக் கலாய்த்த வம்பு, “ஆமாம், சமீபத்தில் முக்கிய ஹோட்டல்களின் உரிமையாளர்களிடம் தமிழக அரசு ஆலோசனை செய்திருக்கிறது. ஏற்கெனவே கருணாநிதி முதல்வராக இருந்தபோது ஹோட்டல்களில் 20 ரூபாய்க்கு சாப்பாடு வழங்க உத்தரவிட்டார். இப்போது அதேபோல ஹோட்டல்களில் சராசரியாக 100 ரூபாய் என்றிருக்கும் ஃபுல் மீல்ஸை சில நிபந்தனைகளுடன் 50 ரூபாய்க்கு வழங்க முடியுமா? என்று தமிழக அரசு சார்பில் கேட்கப்பட்டிருக்கிறது. விரைவில் இதற்கான அறிவிப்பு வரலாம்.”“மெரினாவில் இன்னொரு புரட்சியை நடத்த ரகசியமாக ஏற்பாடுகள் நடக்கின்றனவாமே?”“அப்படிதான் தகவல்கள் வருகின்றன. 2017-ல் சென்னை மெரினா கடற்கரையில் ஜல்லிக்கட்டுக்காக உலகமே வியந்து பார்த்த பிரமாண்டமான புரட்சிப் போராட்டம் நடந்தது அல்லவா. அப்போது ஆளுங்கட்சியான முதல்வராக இருந்த பன்னீர்செல்வமே அதற்கு மறைமுக ஆதரவு கொடுத்ததாகவும் கூறப்பட்டது. இப்போது விரைவில் மெரினாவில் அதேபோன்றதொரு மாபெரும் புரட்சிக் கூட்டத்தைக் கூட்ட தமிழகத்தின் பிரதான கட்சி ஒன்று திட்டமிட்டுள்ளதாம். நீட் எதிர்ப்பை மையமாக வைத்து கூட்டத்தை கூட்ட திட்டமிட்டிருக்கிறார்கள். குறிப்பாக, தமிழகம் முழுவதுமுள்ள பள்ளி, கல்லூரி மாணவர்களை திரட்டுவதே இவர்களின் நோக்கமாம். நீட் தேர்வுக்கு எதிராக குரல் கொடுப்பது மட்டுமல்ல… அடுத்த தலைமுறை வாக்குகளை குறி வைத்தும் இந்த முன்னேற்பாடாம். இதை மோப்பம் பிடித்த மத்திய உளவுத்துறை இதுகுறித்து உடனடியாக டெல்லிக்கு தகவல் அனுப்பியிருக்கிறது. ஆளுநர் மாளிகையும் இந்த மூவ்களை உற்று கவனித்துவருகிறது!” “காங்கிரஸில் புகைச்சல் நிற்காது போலவே சுவாமி?” “ஆமாம், இப்போது வாரிசு புகைச்சல் தொடங்கியிருக்கிறது. வாரிசுகள் எம்.பி., அல்லது எம்.எல்.ஏ ஆகிய பதவிகளில் இருந்தால், ஒரு குடும்பத்தில் ஒருவருக்கு மட்டுமே பதவி என்று முடிவு செய்திருக்கிறது டெல்லி தலைமை. இதையடுத்து, ப.சிதம்பரம் மற்றும் திருநாவுக்கரசர் ஆகியோர் அப்செட்டில் இருக்கிறார்கள். ப.சி-யின் மகன் சிவகங்கை எம்.பி-யாகவும், திருநாவுக்கரசரின் மகன் அறந்தாங்கி தொகுதியின் எம்.எல்.ஏ-வாகவும் இருப்பதால் தந்தை - மகன் இருவரில் ஒருவருக்கு மட்டுமே சீட் என்று இப்போதே கறாராக கூறிவிட்டது கட்சித் தலைமை!”.“தி.மு.க-வை விட்டுவிட்டீர்களே சுவாமி?”“தி.மு.க தகவல்கள் இல்லாமல் நம் உரையாடல் நிறைவடையாது பெண்ணே…மாவட்டச் செயலாளர்கள் மீது கோபத்தில் இருக்கிறார் ஸ்டாலின். கட்சிரீதியாக மாவட்டங்கள் மேலும் பிரிக்கப்படும் என்கிறார்கள். 72 மாவட்டங்கள் 80 வரை உயரலாம். இந்தப் பட்டியலை ஆலங்குளம், அம்பாசமுத்திரம் ஆகிய தொகுதிகளை இணைத்து ஒரு மாவட்டத்தை உருவாக்குவது மட்டும் இப்போதைக்கு உறுதியாகியிருக்கிறது. அடுத்து, வி.சி.க தலைவர் திருமாவளவன் மீதும் கோபத்தில் இருக்கிறாராம் முதல்வர் ஸ்டாலின். சமீபத்தில் நாங்குநேரி விவகாரத்தைக் கண்டித்து திருநெல்வேலியில் நடந்த ஆர்ப்பாட்டத்தில் பேசிய திருமா, ‘தி.மு.க கூட்டணியில் நாம் இருப்பதை சிலர் விரும்பவில்லை. காவல்துறையில் சாதி வெறிகொண்ட சிலர் தாழ்த்தப்பட்ட சமூகத்தை தனிமைப்படுத்த முயற்சிக்கின்றனர். விடுதலை சிறுத்தைகள் கட்சியையும் தி.மு.க கூட்டணியில் இருந்து வெளியேற்ற நினைக்கிறார்கள்’ என்று கொந்தளித்திருந்தார்.””திருமாவுக்கு ஏன் இவ்வளவு கோபம் சுவாமி?”“அவருக்கு தி.மு.க-விலும் சிலர் மீது சந்தேகம் என்கிறார்கள். அதாவது பா.ம.க கூட்டணியை தி.மு.க கூட்டணிக்கு இழுக்க நீண்டகாலமாகவே தி.மு.க-வில் ஒரு தலைவர் காய்நகர்த்தி வருகிறார். இப்போதும் அந்த தலைவர் உளவுத்துறை மூலம் காய்நகர்த்தி முதல்வருக்கு விடுதலை சிறுத்தைகள் கட்சியைப் பற்றி எப்போதுமே நெகட்டிவான ரிப்போர்ட்கள் அனுப்பி வைக்கிறார் என்பது திருமாவின் சந்தேகம்… அதனால்தான் இப்படி கொந்தளித்தாராம்!”பையில் இருந்து இரண்டு ஃபைவ் ஸ்டார் சாக்லேட்களை எடுத்த வம்பானாந்தா, “இதோ பிடி, ஒன்று இஸ்ரோவின் சாதனைக்கு, மற்றொன்று உலக செஸ் சாம்பியன் இறுதிப் போட்டியில் இந்திய கிராண்ட் மாஸ்டர் பிரக்யானந்தா, முதல் நிலை வீரரான நார்வேயின் மேக்னஸ் கார்ல்சனை சமன் செய்து உலக சாதனை புரிந்ததற்கு…” என்றபடியே புல்லட்டை உதைத்து பறந்தார் வம்பானந்தா! - சுவாமி வம்பானந்தா