ரவுடிகளின் கூடாரமா தஞ்சை பா.ஜ.க?

“வேலியில ஓடுன ஓணானை வேட்டிக்குள்ள விட்டுக்கிட்ட கதை…” என்பார்கள். அப்படிதான் ரவுடிகள் பட்டியலில் இருப்பவர்களை எல்லாம் கட்சியில் சேர்த்துக்கொண்டு படாதபாடு படுகிறார்கள் கமலாலயப் பேர்வழிகள். இதற்கு சரியான உதாரணம், தஞ்சாவூர் பா.ஜ.க!பா.ஜ.க.வில் ஓ.பி.சி அணியின் மாநில செயலாளராக பொறுப்பு வகித்து வருபவர் சாக்கோட்டை கார்த்திகேயன். இவர் மீது கொலை, கொள்ளை, கட்டப்பஞ்சாயத்து, நிதி நிறுவனங்களை மிரட்டுவது என பல்வேறு வழக்குகள் நிலுவையில் உள்ளன. நாச்சியார்கோவில் காவல் நிலைய ரவுடிகள் பட்டியலிலும் இவரது பெயர் உள்ளது.கடந்த மாதம், ரியல் எஸ்டேட் அதிபரிடம், குறைந்த விலைக்கு நிலத்தை பத்திரப்பதிவு செய்து தரும்படி கேட்டதோடு, அந்த அதிபரின் மகளை கடத்திவிடுவதாக மிரட்டியதாகப் புகார் எழுந்தது. அந்தப் புகாரின்பேரில் போலீசார் வழக்குப்பதிவு செய்து தலைமறைவான கார்த்திகேயனை தேடிவந்தனர். அத்துடன் அவரது வீட்டை சோதனையிட்டபோது, ஏராளமான வெடிபொருட்களும் ஆயுதங்களும் கைப்பற்றப்பட்டன..இந்நிலையில், ரியல் எஸ்டேட் அதிபரை மிரட்டிய வழக்கில் ஜாமீன் வாங்கிய கார்த்திகேயன், சில நாள்களுக்கு முன்பு கும்பகோணம் நகரில் உள்ள பா.ஜ.க அலுவலகத்துக்கு வந்தார். அங்கிருந்த மாவட்ட தலைவர் சதீஷ்குமாரிடம், ‘என்னுடைய பெயரை ஏன் கூட்ட அழைப்பிதழில் போடவில்லை?’ எனக் கேட்டு தகராறு செய்துவிட்டு, கொலை மிரட்டல் விடுத்தார்.இந்தச் சம்பவம் கட்சியின் மற்ற நிர்வாகிகளிடையே அச்சத்தை ஏற்படுத்தியது. `அசம்பாவித சம்பவம் நடைபெறும் முன் கட்சித் தலைமை நடவடிக்கை எடுக்கவேண்டும்' என்று அவர்கள் கோரிக்கை வைத்து வருகின்றனர். இதில், கார்த்திகேயன் மிரட்டும் சி.சி.டி.வி காட்சிகளும் வைரலாகி வருகின்றன.``என்ன நடந்தது?'' என்று தஞ்சை வடக்கு மாவட்ட பா.ஜ.க தலைவர் சதீஷ்குமாரிடம் கேட்டோம். ``சமீபத்தில்தான் சாக்கோட்டை கார்த்திகேயனை கட்சியில் சேர்த்து மாநில பொறுப்பு கொடுக்கப்பட்டது. அவருக்கு கட்சியின் கொள்கை என்ன? எப்படி நடந்துகொள்வது? என எதுவும் தெரியவில்லை. தேசிய சிறுபான்மை அணியின் செயலாளர் வேலூர் இப்ராஹிம் கலந்துகொண்ட கூட்டத்திலும் இதேபோல் தகராறு செய்தார்.வரும்போதே பத்துக்கும் மேற்பட்ட அடியாட்களுடன் வந்தார். கட்சி அலுவலகத்தில் இருந்த என்னுடைய ஆதரவாளர்கள் அவரை சமாதானப்படுத்தி அனுப்பிவைத்தனர். அவர் மாநில பொறுப்பில் இருப்பதால் தலைமைக்கு புகார் செய்துள்ளேன். மாநிலத் தலைவர் அண்ணாமலையும் மற்ற பொறுப்பாளர்களும் நடைபயணத்தில் பிஸியாக இருக்கின்றனர். அவர் மீது நடவடிக்கை எடுக்கவேண்டியது மாநில தலைமைதான்” என்றார்.இதையடுத்து, சாக்கோட்டை கார்த்திகேயனிடம் பேசினோம். “என்னை அண்ணாமலைதான் நியமனம் செய்தார். அந்த காழ்ப்புணர்ச்சி காரணமாக மாவட்ட பொறுப்பிலுள்ளவர்கள் என்னை ஒதுக்குகின்றனர். தலைமையில் எனக்கு நல்ல பெயர் இருப்பதும் இவர்களுக்குப் பிடிக்கவில்லை. எனக்கென்று இருக்கும் ஆதரவாளர்களையும் புறக்கணிக்கின்றனர்..பாபநாசத்துக்கு வானதி வந்தபோதும், நாச்சியார்கோவிலுக்கு வேலூர் இப்ராஹிம் வந்தபோதும் அழைப்பிதழில் என்னுடைய பெயரைப் போடாமல் தவிர்த்தனர். ஒரு கிளை நிர்வாகியின் பெயரைக்கூட விடாமல் நோட்டீஸில் போட்டவர்கள் மாநில பொறுப்பிலுள்ள என் பெயரை ஏன் போடவில்லை? இதைக் கேட்கத்தான் சென்றேன். அதுவும் என்னுடன் வந்தவர்கள் அனைவருமே இளைஞர் அணி பொறுப்பாளர்கள்தான். கட்சி நிதி மற்றும் நிகழ்ச்சிக்கு ஆட்களை அழைத்து வருவது போன்ற விஷயங்களுக்கு என்னைத் தேடுகின்றனர். ஆனால், மற்ற விஷயங்களில் புறக்கணிக்கின்றனர்.அதேபோல், அனைவரும் சாதிரீதியாக செயல்படுகின்றனர். நான் தகராறு செய்யப் போகவில்லை. இடையே அவர் என்னை அடிக்க வந்ததால் நான் கோபப்பட்டேன். பின்னர் இருவரும் சமாதானமாகிவிட்டோம். ஆனால் நான் கோபப்பட்ட வீடியோவை மட்டும் வைத்துக்கொண்டு மிரட்டுவதாக பரப்புகின்றனர். என்னிடம் தலைமை கேட்கும்போது உரிய விளக்கம் தருவேன்'' என்றார்.``ரவுடிப் பட்டியலில் உங்கள் பெயர் இருக்கிறதே?'' என்றோம். `` மாவட்ட துணைத் தலைவர் வேதா என்பவரின் பெயரும்தான் ரவுடிப் பட்டியலில் இருக்கிறது. அவரை மட்டும் ஏன் புறக்கணிப்பதில்லை? நான் கட்சிக்கு வந்த பின்னர் என் மீது எத்தனை வழக்குகள் உள்ளன? இப்போது போடப்பட்ட வழக்கும் பொய் வழக்குதான். அதுவும் சம்பந்தப்பட்ட நபர் என் மீது எந்த புகாரும் கொடுக்கவில்லை. அவரது மகளை கடத்திவிடுவேன் என்று சொல்வதற்கு இது ஒன்றும் சினிமா இல்லை” என்றார்..மீண்டும் சதீஷ்குமாரை தொடர்பு கொண்டு கேட்டபோது, ``வானதி சீனிவாசன் பங்கேற்ற கூட்டத்தின்போது இவர் ஒரு வழக்கில் தலைமறைவாக இருந்தார். அப்படியே பெயரை போட்டாலும் எந்த கூட்டத்திலும் கார்த்திகேயன் கலந்துகொண்டதே கிடையாது” என்றார்.தஞ்சை பஞ்சாயத்து குறித்து பா.ஜ.க மாநில பொதுச்செயலாளர் கருப்பு முருகானந்தத்திடம் பேசினோம். “இதுதொடர்பாக எழுத்துப்பூர்வமாக இருவரிடமிருந்தும் புகார்கள் எதுவும் வரவில்லை. வாய்மொழியாகத்தான் சாக்கோட்டை கார்த்திகேயன் புகார் செய்தார். மாவட்ட தலைவர் சதீஷ்குமாரிடம் கேட்டபோது, `கார்த்திகேயன் மீது போலீஸார் வழக்குப்பதிவு செய்து தேடிவருவதால் தலைமறைவாக இருந்தார். அதனால் அவரது பெயரை போடவில்லை' என்றார். அதேபோல், பா.ஜ.க.வில் சாதிரீதியாக செயல்படுகிறார்கள் என்பது தவறான குற்றச்சாட்டு. யாரையும் சாதி பார்த்துப் புறக்கணிப்பதில்லை. சாக்கோட்டை கார்த்திகேயன் சொல்வது பொய்யான புகார்” என்றார்.மிஸ்டு கால் கொடுத்தே ரவுடிகளை சேர்த்திருப்பாங்க போல! - ஆர்.விவேக் ஆனந்தன்