பதவிக்காக சாதி மோதலை தூண்டிவிடுகிறாரா ஜான்பாண்டியன்? பதற்றத்தில் தென்காசி!

சாதிப் பிரச்னையால் தகிக்கிறது தென்காசி மாவட்டத்தின் மேலப்பாவூர் கிராமம். இங்கே தேவர் மற்றும் தேவேந்திர குலத்தவர் இடையே ஏற்பட்ட மோதலால் எந்நேரம், என்ன நடக்குமோ என்று அச்சத்தில் உறைந்திருக்கிறார்கள் மக்கள்.தென்காசி மாவட்டம், பாவூர் சத்திரம் அருகில் இருக்கிறது மேலப்பாவூர் கிராமம். இங்கு தேவேந்திர குலத்தினருக்கு பாத்தியப்பட்ட முப்பிடாதி அம்மன் கோயில் கொடைவிழாவுக்கு, தமிழக மக்கள் முன்னேற்றக் கழகத் தலைவர் ஜான் பாண்டியன், ஆண்டுதோறும் வருவது வழக்கம். இந்த ஆண்டு அவரை வரவேற்று போஸ்டர் ஒட்டப்பட்டதிலிருந்தே பிரச்னை ஆரம்பமாகியிருக்கிறது.இதுபற்றி பேசிய தமிழக மக்கள் முன்னேற்றக் கழக மாவட்டச் செயலாளர் கண்மணி மாவீரன், “முப்பிடாதி அம்மன் கோயிலுக்கு தலைவரை வரவேற்று ஒட்டப்பட்டிருந்த போஸ்டரில் சிலர் சாணியைக் கரைத்து ஊற்றியிருக்கிறார்கள். படத்தை அரிவாளால் கீறியிருக்கிறார்கள். இதனால் டென்ஷனான மக்கள், தலைவர் படத்தை அவமதித்தவர்களை கைது செய்யக்கோரி உண்ணாவிரதப் போராட்டம் நடத்தினார்கள்.இதை அறிந்த தலைவர் அங்கு சென்று அமைதி காக்கும்படி கேட்டுக்கொண்டார். பிறகு அங்கு கழகக் கொடியை ஏற்றி விட்டு வந்துவிட்டார். அதன் பிறகு, அங்கு வந்த லோக்கல் தேவர் சமூகத்தினர், தலைவர் கொடியேற்றி வைத்ததற்கு எதிர்ப்புத் தெரிவித்துள்ளார்கள். அதனால், போலீஸார் கொடிக்கம்பத்தை பிடுங்கிச் சென்றுவிட்டனர். இதுதான் தேவேந்திர குல மக்களை கொதிக்கவைத்திருக்கிறது. சாலைமறியலில் ஈடுபட்டார்கள். போலீஸார், போஸ்டரை அவமதித்ததாக மேலப்பாவூர் பஞ்சாயத்து துணைத் தலைவர் தங்க சேதுவை கைது செய்த பிறகே சாலை மறியல் கைவிடப்பட்டது” என்றார்..கொடிக்கம்பத்தை அகற்றக் கோரி தேவர் சமூக மக்கள் போராட்டம் தொடங்கியதை அடுத்து சாதிய மோதல் ஏற்படும் சூழல் உருவானது. உடனடியாக எஸ்.பி. சாம்சன் தலைமையில் 500க்கும் அதிகமான போலீஸார் குவிக்கப்பட்டனர். இந்த நிலையில், நேதாஜி சுபாஷ் சேனைத் தலைவரும் விசாரணைக் கைதிகளின் பற்களைப் பிடுங்கிய ஏ.எஸ்.பி. பல்வீர்சிங் விவகாரத்தை வெளியில் கொண்டுவந்தவருமான வக்கீல் மகராஜன் ஸ்பாட்டிற்கு வர முயற்சித்தார். அவரை பாவூர்சத்திரத்திலேயே மடக்கி போலீஸ் கைது செய்ததையடுத்து நெல்லை மாவட்டத்தில் பல இடங்களிலும் மறியல் போராட்டம் தொடங்கியது.இதுகுறித்து தேவர் சமூகத்தைச் சேர்ந்த மேலப்பாவூர் மருதையா, “கடந்த வருடம் எங்கள் பகுதியில் லைட் கம்பம் நட்டு பிரச்னையை ஏற்படுத்திய ஜான்பாண்டியன், தற்போது கொடிக்கம்பத்தை நட்டு பிரச்னையை ஏற்படுத்தியிருக்கிறார். தேவர் சமூக மக்களை அவமதிக்கும் விதமாக பேசியிருக்கிறார். எம்.பி. தேர்தலில் தென்காசி தொகுதியில் போட்டியிட வேண்டும் என்பதற்காக சாதிய மோதலைத் தூண்டுகிறார். அவரைக் கைது செய்யவேண்டும்” என்றார் கோபமாக. போலீஸ் தரப்பில் பேசியபோது, “காவல்துறையின் தீவிர முயற்சியால் இருதரப்பு மோதல் தவிர்க்கப்பட்டிருக்கிறது. தற்போது இருதரப்புமே அமைதிக்கு ஒத்துழைப்பதாகக் கூறியிருக்கிறார்கள்” என்றார்கள். சாதிய முட்செடியை முளையிலேயே கிள்ளி எறிய வேண்டும்.- துரைசாமி

பதவிக்காக சாதி மோதலை தூண்டிவிடுகிறாரா ஜான்பாண்டியன்? பதற்றத்தில் தென்காசி!

Related Stories