சம்பவம் ஒன்று:பட்டாக்கத்தி... கள்ளத் துப்பாக்கி... நிலம் அபகரிப்பு! டெல்டாவை மிரட்டும் பா.ஜ.க. புள்ளிகள்

சமீபத்தில் ஒருநாள் விடியற்காலை 5 மணி. தஞ்சை மாவட்டம், சாக்கோட்டை பகுதி. அங்கே வசிக்கும் கார்த்திகேயன் என்பவரை வழக்கு ஒன்றில் போலீஸார் கைது செய்யச் சென்றார்கள். கேட்டைத் தொட்டதுதான் தாமதம்... பயங்கரமாக குரைத்துக்கொண்டு போலீஸார் மீது சீறிப் பாய்ந்தன அல்சேஷன் நாய்கள். இதைப் பயன்படுத்தி பின்வாசல் வழியாக தப்பியோடிவிட்டார் கார்த்திகேயன். ஒருவழியாக நாய்களை சமாளித்து வீட்டுக்குள் சென்று பார்த்தால், அங்கு ஏராளமான வெடிப்பொருட்கள், விதவிதமான பட்டாக்கத்திகள் குவித்துவைக்கப்பட்டிருதன!.சம்பவம் இரண்டு:திருவிடைமருதூரில் வாகன சோதனையில் போலீஸார் ஈடுபட்டிருந்தபோது அந்த வழியாக வந்த காரைக்காலைச் சேர்ந்த பாலகுரு என்பவரின் காரை சோதனை செய்தனர். காரில் லைசென்ஸ் இல்லாத துப்பாக்கி, பால்ரஸ் குண்டுகள், வெடிப்பொருட்கள் கைப்பற்றப்பட்டன. இவரும் பா.ஜ,க பிரமுகர்தான்.இதையடுத்து டெல்டா மாவட்டங்களில் பா.ஜ.க. கட்சியின் பாதுகாப்பு போர்வையில் ரவுடிகள் தலைதூக்கியிருக்கிறார்களோ என்று மக்கள் மத்தியில் அச்சம் படர்ந்திருக்கிறது. இதுபற்றி போலீஸ் வட்டாரத்தில் பேசினோம். “சாக்கோட்டை கார்த்திகேயன், நாச்சியார் கோவில் காவல் நிலைய ரவுடி பட்டியலில் உள்ளார். இவர் மீது கொலை, கொள்ளை உள்பட பல்வேறு வழக்குகள் உள்ளன. இப்படிப்பட்டவருக்கு பா.ஜ.க-வில் ஓ.பி.சி. அணி மாநிலச் செயலாளர் பதவி கொடுக்கப்பட்டடபோதே பொதுமக்கள் மத்தியில் சலசலப்பு ஏற்பட்டது.. இவரது வீட்டுக்குப் பின்புறம் ரியல் எஸ்டேட் நிறுவனம் நடத்தும் ஒருவர் பிளாட் போட்டிருக்கிறார். அவரிடம் பஞ்சாயத்து செய்து மிகக் குறைந்த விலையில் பத்தாயிரம் சதுர அடி நிலத்தை வாங்கிவிட்டார். ஆனால், அந்த குறைந்த விலையையும் கொடுக்காததுடன், நில உரிமையாளரின் மகளை கடத்திவிடுவேன் என்றும் மிரட்டியிருக்கிறார். இந்த புகாரில் கார்த்திகேயனை கைது செய்ய சென்றபோதுதான் போலீஸார் மீது நாய்களை ஏவிவிட்டு தப்பிவிட்டார். பிறகு கூடுதல் போலீஸாரை வரவழைத்து பின்வாசல் வழியாக வீட்டுக்குள் நுழைந்து சோதனையிட்டபோது வெடிபொருட்கள், பட்டாக்கத்தி, வெற்றுப் பத்திரத்தில் கையெழுத்திடப்பட்ட ஏராளமான ஆவணங்கள் கைப்பற்றப்பட்டன.கார்த்திகேயனின் அக்கா கணவர் திருப்பத்தூர் மாவட்டத்தில் உயரதிகாரியாக இருக்கிறார். அவர்மூலம்தான் இவர் பெரியளவில் மாட்டாமல் தப்பித்துவருகிறார். மேலும், கும்பகோணம் நகரப் பொறுப்பிலிருக்கும் ஒருவர் துணையுடன் தமிழகத்திலுள்ள பெரிய நகைக்கடைகள், நிதி நிறுவனங்கள் ஆகியவற்றில் பணம் கேட்டு மிரட்டுவது, கட்டப்பஞ்சாயத்து செய்வது என இவரது அட்ராசிட்டிகள் நாளுக்கு நாள் அதிகரித்து வருகின்றன” என்றவர்கள் காரில் துப்பாக்கியுடன் சிக்கிய பாலகுருவைப் பற்றியும் விவரித்தார்கள்....“காரைக்கால் அருகே நிரவி பகுதியைச் சேர்ந்தவர், பாலகுரு. போலீஸார் இவரது காரை சோதனை செய்ய முற்பட்டபோது ‘நான் பா.ஜ.க.வில் ஒரு வி.ஐ.பி. என் காரையே சோதனை செய்கிறீர்களா?’ என்று எகிறியிருக்கிறார். அதைக் கண்டுகொள்ளாமல் சோதனையிட்டதில் ஸ்டெப்னி டயருக்குக் கீழேயிருந்து உரிமம் பெறாத துப்பாக்கி ஒன்று, 150 தோட்டாக்கள், இரண்டரை கிலோ எடையுள்ள வெள்ளை மற்றும் மஞ்சள் நிற சல்ஃபர் பவுடர், இரண்டு கிலோ எடையுள்ள பால்ரஸ் குண்டுகள் உள்ளிட்ட வெடிபொருட்கள் இருந்துள்ளன. இவரைப் பற்றி விசாரித்தபோது பகீர் தகவல்கள் கிடைத்தன.வாரம்தோறும் திண்டுக்கல் சிறுமலை, தாண்டிக்குடி, பன்றிமலை ஆகிய பகுதிகளில் மான் வேட்டைக்காகச் செல்வார். திரும்பி வரும்போது காரில் மான் கறி இருக்கும். ஆனால், அன்றைய தினம் வேட்டையில் மான் கிடைக்காததால் தப்பிவிட்டார். இதற்கிடையே பாலகுருவின் காரில் வந்த மற்றொரு நபர் கும்பகோணத்தில் இறங்கிவிட்டதாக தகவல் கிடைத்தது. அதுகுறித்தும் விசாரித்து வருகிறோம். காரைக்காலில் படுகொலை செய்யப்பட்ட முன்னாள் அமைச்சர் ஒருவரின் மகனுடன் சேர்ந்துகொண்டு இடப்பிரச்னை தொடர்பாக சிலரைக் கொலை செய்யும் நோக்கத்துடன் துப்பாக்கி, தோட்டாவுடன் பாலகுரு வலம் வந்ததாகவும் ஒரு தகவல் கிடைத்துள்ளது. அதேபோல இலங்கை அகதிகளை கள்ளப்படகு மூலம் ஆஸ்திரேலியாவுக்கு அழைத்துச்செல்ல முயன்ற ஒரு கும்பலுடன் பாலகுருவுக்கு தொடர்பு இருந்தது கண்டுபிடிக்கப்பட்டு, இவர் மீது ஆட்கள் மற்றும் டீசல் கடத்தல் வழக்கும் நிலுவையில் உள்ளது”என்றனர் விரிவாக.திருவிடைமருதூர் டி.எஸ்.பி. ஜெகபர் சித்திக்கிடம் பேசினோம். “நில மோசடி, நிலத்தின் உரிமையாளரை மிரட்டியது போன்ற வழக்குகளுக்காக கைது செய்யச் சென்றபோது, பயங்கர நாய்களை அவிழ்த்துவிட்டு பின் வாசல் வழியாக தப்பித்துவிட்ட கார்த்திகேயனைத் தீவிரமாகத் தேடிவருகிறோம். காரில் உரிமம் பெறாத துப்பாக்கி, தோட்டா, வெடிப்பொருட்கள் வைத்திருந்ததற்காகக் கைது செய்யப்பட்ட பா.ஜ.க. பிரமுகர் பாலகுருவிடமும் தீவிர விசாரணை நடைபெறுகிறது” என்றார். பா.ஜ.க.வினரின் இதுபோன்ற ரவுடியிஸ செயல்பாடுகள் குறித்து அந்தக் கட்சியின் மாநிலப் பொதுச்செயலாளர் கருப்பு முருகானந்தத்திடம் பேசினோம். “கார்த்திகேயன் மீது நடவடிக்கை எடுக்கச் சொல்லி மாவட்டத் தலைமை பரிந்துரைத்துள்ளது. மாநிலத் தலைவர் தற்போது கர்நாடக தேர்தலில் இருப்பதால் அவர் வந்தவுடன் முடிவு செய்யப்படும். காரைக்கால் வேறு மாநிலமாக இருப்பதால் பாலகுரு பற்றி எனக்கு எதுவும் தெரியாது. ஒரு மாவட்டத்தில் ஐந்தாயிரம் பேர் வரை பொறுப்பில் இருக்கின்றனர். குற்றச் செயல்புரிபவர்களுக்கு எப்போதும் பா.ஜ.க.வில் இடமில்லை. அதேசமயம், போலீஸார் ரவுடி பட்டியலில் யாரை வேண்டுமானாலும் சேர்த்துவிடுகின்றனர்” என்றார்.ரவுடியிஸம் யார் செய்தாலும் காக்கிகளின் கம்பு சுழற்றட்டும்!-ஆர்.விவேக் ஆனந்தன்

சம்பவம் ஒன்று:பட்டாக்கத்தி... கள்ளத் துப்பாக்கி... நிலம் அபகரிப்பு! டெல்டாவை மிரட்டும் பா.ஜ.க. புள்ளிகள்

Related Stories