கேள்வி கேட்டா கேஸ் போடுவோம்! ஆர்.டி.ஓ. அலுவலக அவலம்...

இது நாள்வரை ஆர்.டி.ஐ. சட்டத்தின்படி கேள்வி கேட்பவர்களை பதில் சொல்லாமல் அலைக்கழிப்பார்கள் அல்லது எதையாவது சொல்லி ஒப்பேத்தி வைப்பார்கள் அதிகாரிகள். இப்போது லேட்டஸ்ட்டாக ஆர்.டி.ஐ.யில் கேள்வி கேட்டவர் மீது வழக்கு தொடர்ந்து, புதுவித டார்ச்சரை ஆரம்பித்துள்ளார்கள்.சென்னையைச் சேர்ந்த ஆர்.டி.ஐ. செயற்பாட்டாளர் காசிமாயன். ஆர்.டி.ஐ. சட்டத்தின் கீழ் கேள்விகள் கேட்டு அரசின் பல்வேறு துறைகளில் நடக்கும் குளறுபடிகளை அம்பலப்படுத்துபவர். இவர்மீதுதான் இப்படியொரு வழக்கை பாய்ச்சியிருக்கிறார்கள் ஆர்.டி.ஓ. அலுவலக ஊழியர்கள்.என்ன நடந்தது? என்று காசிமாயனிடமே கேட்டோம். ‘‘டி.என்.பி.எஸ்.சி. மோட்டார் வாகன ஆய்வாளர் கிரேடு -2 தேர்வில் மோசடி நடந்திருப்பதை தகவல் அறியும் உரிமைச் சட்டம் மூலம் தெரிந்துகொண்டேன். தொடர்ந்து, நான் போட்ட ஆர்.டி.ஐ. மனுக்கள் மற்றும் நீதிமன்ற வழக்குகள் காரணமாக, சரியான முறையில் தேர்வு செய்யப்படவேண்டும் என்று 2022, மார்ச் மாதம் நீதிமன்றம் உத்தரவிட்டதுடன், 33 பேர் நியமனத்தையும் ரத்து செய்துவிட்டது.இந்தநிலையில் தமிழ்நாடு போக்குவரத்துத் துறை பணியாளர் சங்கத் தலைவராக இருக்கும் ரகு என்பவர் என்னிடம் போனில், ‘டிரான்ஸ்ஃபர் போஸ்ட்டிங்குக்கு முந்தைய ஆட்சியாளர்களைவிட இன்றைய ஆட்சியில் அஞ்சு மடங்கு அதிகமாகிடிச்சே. இதையெல்லாம், வெளிக்கொண்டுவர மாட்டீங்களா?’ என்று கேட்டார்.அதை அப்படியே ரெக்கார்டு செய்து, 2021 டிசம்பர்- 4ம் தேதி போக்குவரத்துத் துறைக்கு புகாராகக் கொடுத்தேன். 17 மாதங்கள் ஆகியும் துறை ஆணையர் நிர்மல்ராஜ் எந்த நடவடிக்கையும் எடுக்காமல் காலம் தாழ்த்திவந்தார். அன்றைக்கு தகவல் கொடுத்த ரகுவே இப்போது சங்கரன்கோவில் நீதிமன்றத்தில் 2 லட்சரூபாய் கேட்டு என்மீது வழக்குத் தொடர்ந்துள்ளார். இன்னொரு சங்கத்தைச் சேர்ந்த சுப விஜயகுருசாமி என்பவர், நான் அரசு அதிகாரிகளை மிரட்டி பணம் வாங்கும் நோக்கத்தில் செயல்படுவதாக புகார் அனுப்பியுள்ளார். மக்கள் வரிப்பணத்தில் சம்பளம் வாங்கிக்கொண்டு ஊழல் செய்பவர்களை நான் அம்பலப்படுத்துகிறேன். அந்தக் கோபத்தில் ஆதாரமற்ற குற்றச்சாட்டுகளைச் சுமத்தி என்னை மிரட்டுகிறார்கள்’’ என்றார் வேதனையோடு..இது குறித்து போக்குவரத்துத் துறை பணியாளர் சங்கத் தலைவர் ரகுவிடம் கேட்டபோது, ‘‘அந்த ஆடியோ ஃபேப்ரிகேட் செய்யப்பட்டது. என்னை பர்சனலாக டார்கெட் செய்து, தொடர்ந்து காசிமாயன் ஆர்.டி.ஐ. மனுக்களை அனுப்பியதால் அவர் மீது சட்ட ரீதியான நடவடிக்கையில் இறங்கியிருக்கிறேன்’’ என்றார். மற்றொரு போக்குவரத்துத் துறைப் பணியாளர் சங்கத் தலைவர் சுப.விஜயகுருசாமியோ, தொடர்ந்து ஆர்.டி.ஐ-யில் ‘‘கேள்விகளைக் கேட்டு டார்ச்சர் கொடுக்கிறார். எங்களால் வேலை செய்ய முடியவில்லை’’ என்றார்.போக்குவரத்து ஆணையர் நிர்மல்ராஜ் ஐ.ஏ.எஸ்.ஸிடம் இதுகுறித்து கேட்டதற்கு, ‘‘காசிமாயன் கொடுத்த புகாரின் அடிப்படையில் ரகு மீது துறை ரீதியான நடவடிக்கை எடுக்க இருக்கிறோம்’’ என்றார்.லஞ்சம் வாங்காத ஆர்.டி.ஓ அலுவலகம் என்று தமிழகத்தில் ஒன்றையாவது சுட்டிக்காட்ட முடியுமா? இவர்களுக்கு எல்லாம் வழக்கு தொடர என்ன யோக்கியதை இருக்கிறது?

கேள்வி கேட்டா கேஸ் போடுவோம்! ஆர்.டி.ஓ. அலுவலக அவலம்...

Related Stories