சசிகலா வந்தால் எடப்பாடி சாயம் வெளுத்துவிடும்! சீறும் செந்தமிழன்

ஓ.பன்னீர்செல்வம் சமீபத்தில் டி.டி.வி.தினகரனை சந்தித்து பேசிய பிறகு, அ.தி.மு.க முகாமில் மீண்டும் அரசியல் அதகளம் ஆரம்பமாகிவிட்டது. சசிகலா, தினகரன், பன்னீர் மூவரும் இணைந்து அ.தி.மு.க-வை கைப்பற்ற போவதாக சூளுரைத்திருக்கும் நிலையில், அ.ம.மு.க. துணைப் பொதுச் செயலாளர் செந்தமிழனிடம் சில கேள்விகளை முன்வைத்தோம்...ஓ.பன்னீர்செல்வத்துடன் கூட்டணி தொடருமா?“யார் என்ன சொன்னாலும் ஓ.பி.எஸ்., அ.தி.மு.க.தான். நாங்களும் ஒருகாலத்தில் அ.தி.மு.க.வில் இருந்தவர்கள்தான். எம்.ஜி.ஆர்., ஜெயலலிதாவால் அடையாளம் காட்டப்பட்டவர்கள்தான் இன்று அ.ம.மு.க.வில் இருக்கிறார்கள். அ.தி.மு.க.வில் எங்களுக்கு இழைக்கப்பட்ட துரோகத்தை எதிர்த்து அ.ம.மு.க.வை துவங்கினார், டி.டி.வி.தினகரன். அதே நேரத்தில் எங்களின் பொது எதிரி தி.மு.க. எனவே, தி.மு.க.வை எதிர்க்க வலுவான கூட்டணி அமைக்கப்பட வேண்டும் என்பதில் நாங்கள் உறுதியாக இருக்கிறோம். சுயநலம் கொண்டவர்களிடம் சிக்கி இருக்கிற அ.தி.மு.க-வை மீட்கவேண்டும் என நினைக்கிறார் ஓ.பி.எஸ். எனவே, அவரது கரத்தை நாங்கள் வலுப்படுத்துவோம். தேர்தலை சந்திக்கும்போது அவருடன் கண்டிப்பாக கூட்டணி வைப்போம்.”அ.தி.மு.க. பொதுச் செயலாளராக ஆனபிறகு எடப்பாடியின் அந்தஸ்து உயர்ந்துவிட்டதே?“இதே அ.தி.மு.க. பொதுக்குழு உறுப்பினர்கள் எல்லாம் ஒன்று கூடித்தான் சசிகலாவை பொதுச் செயலாளராகத் தேர்வு செய்தனர். ஆனால், பொதுச் செயலாளர் பதவி தொடர்பான வழக்கு கோர்ட்டில் இருக்கிறது. எனவே, எடப்பாடிதான் கட்சிக்கு நிரந்தரப் பொதுச் செயலாளர் எனக் கருத முடியாது. அரசியல் ரீதியாக மாநிலக் கட்சியாக இருந்தாலும் சரி, தேசியக் கட்சியாக இருந்தாலும் சரி. அக்கட்சிக்கு பலமான தலைமை இருந்தால்தான் வளர்ச்சியை நோக்கிச் செல்ல முடியும். ஆனால் எடப்பாடி பழனிசாமி பலவீனமான தலைமை. இப்படிப்பட்ட தலைமைதான் அ.தி.மு.க.வுக்கு தேவை. அப்படி இருந்தால்தான் நமக்கு பலம் என தி.மு.க. நினைக்கிறது. இது நாளடைவில் மாறி அ.தி.மு.க. சசிகலா வசம் வந்து சேரும். பொறுத்திருந்து பாருங்கள்.”அ.ம.மு.க-வில் சசிகலாவின் பங்கு என்ன?“சசிகலா, அ.தி.மு.க. பொதுச் செயலாளர். அ.ம.மு.க-வையும், சசிகலாவையும் தொடர்புபடுத்தி பார்ப்பதே தவறானது. சசிகலாவுக்கும், எங்களுக்கும் கட்சிரீதியாக எந்தத் தொடர்பும் இல்லை. அதேநேரத்தில் உறவுரீதியாக எங்கள் பொதுச் செயலாளருக்கும், அவருக்கும் இருக்கும் தொடர்பு, பந்தம் இருக்கிறது. அதை யாராலும் பிரிக்கவோ, தடுக்கவோ முடியாது. பெங்களூரு சிறையில் இருந்தபோது சசிகலாவைச் சந்தித்து வந்தார் தினகரன். இப்போதும் தேவைப்பட்டால் சசிகலாவை சந்திக்கிறார்.”அ.ம.மு.க.வுக்கு ‘தலைவர்’ நியமிக்கப்படப்போவதாக சொல்லப்படுகிறதே?“வருடம் ஒரு முறை கட்சியின் தலைவர் யார், பொதுச் செயலாளர் யார், நிர்வாகிகள் யார் என்கிற விவரங்களை தேர்தல் கமிஷனுக்குக் கொடுக்க வேண்டும். 2021-ல் தமிழக சட்டசபைத் தேர்தல் நடந்ததால், கட்சி நிர்வாகிகள் தொடர்பான விவரங்களை சமர்ப்பிக்கவில்லை. எனவே, தேர்தல் ஆணையத்திடம் நிர்வாகிகள் லிஸ்ட்டை சமர்ப்பிக்க கால அவகாசம் கேட்டிருக்கிறோம். இப்போதைய நிலவரப்படி தினகரன் பொதுச் செயலாளர். கட்சித் தலைவர் பதவிக்கு யார் பொருத்தமானவர் என்பதை அவர்தான் முடிவு செய்வார்.”.தமிழக பா.ஜ.க. தலைவர் அண்ணாமலை, அ.தி.மு.க. மாஜி அமைச்சர்களின் சொத்துப் பட்டியலை வெளியிடப்போவதாக சொல்லப்படுகிறதே?”தி.மு.க. ஆட்சிக்கு வருவதற்கு முன்பு, ‘நாங்கள் ஆட்சிக்கு வந்தால் தவறு செய்யக்கூடிய அ.தி.மு.க. அமைச்சர்கள் மீது கடும் நடவடிக்கை எடுப்போம். சிறையில் தள்ளுவோம்’ என்றார்கள். ஆனால், பேருக்கு ‘ரெய்டு’மட்டும் நடத்தி இருக்கிறார்கள். அவர்கள் மீது வழக்குகூட பதியவில்லை. எனவே, தமிழக பா.ஜ.க. தலைவர் அண்ணாமலையாவது சொத்துக் குவிப்பில் ஈடுபட்ட அ.தி.மு.க.வினரைப் பற்றிய விவரங்களை வெளியிட வேண்டும். மக்கள் பணத்தைக் கொள்ளையடித்தவர்கள் யாராக இருந்தாலும் அவர்கள் தண்டிக்கப்பட வேண்டியவர்கள்தான்.”தினகரன் மற்றும் சசிகலாவுக்கு அ.தி.மு.கவில் இடமில்லை எனச் சொல்கிறார்களே? ”தினகரனையும் சசிகலாவையும் அ.தி.மு.க.வில் சேர்த்துக்கொள்ள வேண்டும் என்று யாரேனும் யாரிடமாவது கோரிக்கை வைத்தார்களா? இல்லை, ஏதாவது ஓர் இடத்திலாவது, ‘நாங்கள் அ.தி.மு.க.வில் சேரப்போகிறோம்’என்று இவர்கள் சொன்னார்களா? அ.தி.மு.க-வில் இவர்களைச் சேர்த்துக்கொள்ள ஏன் பயப்படுகிறீர்கள்? கட்சிக்குள் சசிகலா வந்தால் எடப்பாடியின் அரசியல் சாயம் வெளுத்துவிடும். இயக்கம் வலுவடைந்தால் பலருக்கு முகவரி இல்லாமல் போய்விடும். எனவே, ஜெயக்குமாரைப் போன்றவர்கள் தேவையில்லாமல் புலம்பிவருகிறார்கள்.2024 நாடாளுமன்றத் தேர்தலில் பா.ஜ.க.வுடன் கை கோப்பீர்களா?2024ல் நடைபெறப்போவது நாடாளுமன்றத் தேர்தல். ‘பிரதமர் யார்’ என்பதைப் பொருத்துதான் மக்கள் வாக்களிப்பார்கள். இத்தேர்தலைப் பொருத்தவரை பா.ஜ.க.வும், காங்கிரஸும் மட்டுமே பிரதமர் வேட்பாளர்களை அறிவிக்கும் நிலையில் இருக்கின்றன. காங்கிரஸ் கூட்டணியில் தி.மு.க. இருப்பதால் அதில் நாங்கள் இருக்க முடியாது. யாருடன் தேர்தல் கூட்டணி என்பதை இந்த ஆண்டு இறுதிக்குள் டி.டி.வி.தினகரன் முடிவு செய்வார். தேவைப்பட்டால் நாங்கள் தனித்துக்கூட போட்டியிடுவோம்.அ.தி.மு.க. மீண்டும் ஆட்சியைப் பிடிக்குமா?2021 தேர்தலில் அ.ம.மு.க.வுடன் கூட்டணி அமைத்திருந்தாலே அ.தி.மு.க. மீண்டும் ஆட்சியைப் பிடித்திருக்கும். தி.மு.க. ஆட்சிக்கு வரவேண்டும் என்பதற்காக மறைமுகமாக உதவி செய்தவர், எடப்பாடி பழனிசாமி. அதிகார போதையால் அன்று எங்களை ஏற்க மறுத்தார்கள். 2021ல் வலுவான கூட்டணி அமைத்திருந்தால் ஜெயலலிதா சொன்னது போல் தொடர்ந்து அ.தி.மு.க.வே ஆட்சியில் இருந்திருக்கும். இதை எடப்பாடி பழனிசாமி உணரவேண்டும். - கணேஷ்குமார்படங்கள் : ம.செந்தில்நாதன்

சசிகலா வந்தால் எடப்பாடி சாயம் வெளுத்துவிடும்! சீறும் செந்தமிழன்

Related Stories