இரண்டு ஏக்கர் இலவச நிலத்தில் கோயில், கோழிப்பண்ணை! கருணாநிதியின் கனவுத்திட்ட குளறுபடிகள்

ஒரு ப்ளாஷ்பேக்… கடந்த 2006 சட்டசபை தேர்தல் அறிக்கையில் நிலமற்ற ஏழைகளுக்கு இரண்டு ஏக்கர் நிலம் இலவசம் என்றது தி.மு.க. அப்போது ’அவ்வளவு நிலம் எங்கே இருக்கிறது?’ என்று கேள்வி கேட்டார் எதிர்க்கட்சித் தலைவராக இருந்த ஜெயலலிதா. இப்போதும் அதே கேள்விதான்… என்ன கொஞ்சம் மாற்றிக் கேட்க வேண்டியதாக இருக்கிறது… “அன்றைக்கு கருணாநிதி கொடுத்த இலவச நிலம் இப்போது எங்கே இருக்கிறது?” என்பதுதான் அந்த கேள்வி. 2006 செப்டம்பர் 17ம் தேதி பெரியார் பிறந்த நாளில் திருவள்ளூர் மாவட்டத்தில் ஏழை விவசாயிகளுக்கு இரண்டு ஏக்கர் நிலம் வழங்கும் திட்டத்தைத் தொடங்கி வைத்தார் அன்றைய முதல்வர் கருணாநிதி. இதுபற்றி ஆர்.டி.ஐ. மூலம் விவரம் பெற்றிருக்கும் சமூக ஆர்வலர் வேலாயுதம் நம்மிடம், “தமிழக அரசின் இரண்டு ஏக்கர் இலவச நிலம், தர்மபுரி மாவட்டத்தில் சுமார் ஆயிரத்துக்கும் மேற்பட்டவர்களுக்கு வழங்கப்பட்டுள்ளது. பெரும்பாலான நிலங்கள் தகுதியான பயனாளிகளுக்கு வழங்கவில்லை. ஏற்கெனவே நிலம் வைத்திருப்பவர்கள், அரசு ஊழியர்கள், விவசாயி அல்லாதவர்களுக்கும்தான் வழங்கப்பட்டுள்ளது..இலவச நிலத்தை 30 வருடங்களுக்கு குத்தகையோ, விற்பனையோ செய்யக்கூடாது. ஆனால், பலரும் நிலத்தை விற்றுவிட்டு டவுனுக்குப் போய்விட்டார்கள். ஆலம்பாடி, கருங்கல்பாடி கிராமங்களில் சர்வே எண்கள் 103/4, 104/15, 170/7, 110/5 ஆகியவற்றில் உள்ள சுமார் 17 ஏக்கர் நிலத்தை தனியார் கோழிப்பண்ணைக்கு விற்றுவிட்டார்கள்.நிலமற்ற விவசாயிகளுக்கு வழங்கிய நிலத்தின் பட்டா ஆவணத்தில் உள்ள பெயர், ஊர், சர்வே எண் ஆகியவற்றில் குளறுபடி செய்துள்ளார்கள். ஒருசிலருக்கு சிட்டாவை கணினியில் ஏற்றவில்லை. இதனால், அந்த விவசாயிகளுக்கு பயிர்க்கடன், மானியம் எதுவும் கிடைப்பதில்லை” என்றார்.. தர்மபுரி மாவட்டம் கோட்டப்பட்டி பகுதியைச் சேர்ந்த செல்வி, “பெரியப்பட்டி ஊராட்சி, தாணிப்பாடி கிராமத்துல ரெண்டு ஏக்கர் பட்டாவோட கொடுத்தாங்க. ஆனா, அரசாங்க பேப்பர்ல என் பெயரை ஏத்தலை. சிட்டா கிடைக்காம ரொம்ப சிரமப்படுறேன்” என்றார் விரக்தியுடன்!செங்கப்பாடியைச் சேர்ந்த முருகன், “ என் மனைவி பேர்ல ரெண்டு ஏக்கர் நிலம் கொடுத்தாங்க. ஆனா, பட்டாவுல என் மனைவி பேர் பஷியா என்பதற்கு பதிலா புஷ்பானு மாத்தி எழுதிட்டாங்க. மாத்தி தரச் சொன்னா இப்ப வரைக்கும் அலைய விடுறாங்க. எதுவுக்கும் வழியில்லாம தரிசா கிடக்குது நிலம்” என்றார் சோகத்துடன்!பென்னாகரம் ராஜாவூரைச் சேர்ந்த பார்வதியோ, “அரசு கொடுத்த ரெண்டு ஏக்கர் நிலத்துல 12 வருஷமா சோளம், ராகின்னு பயிர் செஞ்சுகிட்டிருந்தேன். கொரோனா வந்தப்போ, பெங்களூருல உள்ள மகன்களோட தங்கிட்டேன். ரெண்டு வருஷம் கழிச்சு ஊருக்கு வந்து பாக்கறேன்... என் தோட்டத்துல ஒரு கோயில் கட்டியிருக்காங்க. கேட்டா, சர்வே நெம்பர்ல கோளாறுங்கிறாங்க. இப்ப வரைக்கும் முடிவே இல்லாம பிரச்னை போயிட்டு இருக்கு...” என்றார், கலங்கியபடி..தர்மபுரி மாவட்ட வருவாய் அலுவலர் அனிதாவிடம் பேசினோம். “இரண்டு ஏக்கர் இலவச நிலம் வழங்கும் திட்டத்தில், சிட்டா போன்ற வருவாய்க் கணக்கில் சரியான ஆவணங்கள் வைத்து பதிவேற்றினால், பதிவாகிவிடும். இல்லை என்றால், உரிய ஆவணங்களுடன் வருவாய்க் கோட்டாட்சியருக்கு விண்ணப்பித்தால் அவர் ஆய்வு செய்து சிட்டா, ‘அ’ பதிவேடுகளில் பதிவேற்ற நடவடிக்கை எடுப்பார். அரசு வழங்கும் நிலத்தை 30 வருடங்களுக்குள் விற்பது, வாங்குவது சட்டத்துக்குப் புறம்பானது. அதுபற்றி உரிய ஆதாரங்களோடு புகார் கொடுத்தால், அந்த நிலத்தை ரத்து செய்து அரசு தரிசு நிலத்தில் சேர்த்துவிடுவோம். பாதிக்கப்பட்டவர்கள் உரிய ஆவணங்களோடு வந்து பார்த்தால் உரிய நடவடிக்கை எடுக்கப்படும்!” என்றார். தானமாகத் தந்ததாக இருந்தாலும் நிதானமாக சரிபார்ப்பதுதான் நல்லது! -பொய்கை கோ.கிருஷ்ணா