அரசாணை 354 புறக்கணிப்பு கருணாநிதிக்கு செய்யும் துரோகம் : பொங்கும் மருத்துவர்கள்

முதல்வர் ஸ்டாலின் பதவியேற்ற நேரம். அவர் முன்பாக பூதாகரமாக நின்று அச்சுறுத்திய பிரச்னை, கொரோனா பேரழிவு. ஆனால், அந்தக் காலகட்டத்தில் தூணாகத் தாங்கி நின்றார்கள், அரசு மருத்துவர்கள். அன்று கடவுளுக்கு நிகரென்று பாராட்டிய அரசு, இன்று எங்களை கண்டுகொள்ளாமல் புறக்கணிக்கிறது என்று பொங்குகிறார்கள் 19 ஆயிரம் அரசு மருத்துவர்கள்.பல வருடங்களாக நீடிக்கும் போராட்டம் இது. இப்போது என்ன திடீர் குரல் என்று மருத்துவர்களிடம் கேட்டோம். “2021 ஜூன் 3 ம் தேதி கருணாநிதியின் பிறந்தநாளின்போது அறிவித்ததைப்போலவே 230 கோடி ரூபாய் செலவில் கலைஞர் நினைவு பன்னோக்கு மருத்துவமனையை கட்டி முடித்துவிட்டார்கள். வரும் ஜூன் 5-ம் தேதி கலைஞரின் நூற்றாண்டுவிழாவையொட்டி அதைத் திறப்பதற்காக, ஜனாதிபதி முர்முவை நேரில் சென்று அழைத்திருக்கிறார் ஸ்டாலின். அத்தனை எதிர்ப்புகளுக்கு மத்தியிலும் கலைஞர் பேனா நினைவு சின்னத்தை 81 கோடி ரூபாயில் கடலுக்குள் அமைக்கிறார்கள். ஆனால், அரசு மருத்துவர்களின் நலனுக்காக 2009 ஆம் ஆண்டு கலைஞர் கொண்டுவந்த அரசாணையை நடைமுறைப்படுத்தாமல் கலைஞருக்கு நூற்றாண்டு விழாவைக் கொண்டாடுவது அவருக்குச் செய்யும் துரோகம். அதனால்தான் இப்போது இந்த பிரச்னையை எழுப்புகிறோம்” என்று குற்றம்சாட்டுகிறார்கள் அரசு மருத்துவர்கள். .அரசு மருத்துவர்களுக்கான சட்டப் போராட்டக் குழுத் தலைவர் டாக்டர் பெருமாள் பிள்ளை நம்மிடம், “டி.ஏ.சி.பி (Dynamic Assured Career Progression) எனப்படும் காலம் சார்ந்த ஊதியம் மற்றும் பதவி உயர்வை கடந்த 2009ம் ஆண்டு 354 எண் அரசாணை மூலம் தமிழ்நாட்டில் முதன்முதலில் கொண்டுவந்தார் கருணாநிதி. இதன்படி, 20 ஆண்டுகள் அரசு மருத்துவர்களாக இருந்தால் மத்திய அரசு மருத்துவர்களுக்கு இணையான ஊதியம் கிடைக்கும். அதே 354 அரசாணையில் மறு ஆய்வு செய்து 12 வருடங்கள் அரசு மருத்துவர்களாக இருந்தாலே இந்த சம்பளத்தை வழங்கலாம் என்றும் குறிப்பிடப்பட்டுள்ளது. அதன்படி, ஐந்தாண்டுகளுக்கு ஒருமுறை ஆய்வு செய்து, 20 ஆண்டுகள் என்று இருப்பதை 12 ஆண்டுகள் எனக் குறைத்திருக்க வேண்டும். ஆனால், கடந்த பத்தாண்டு கால அ.தி.மு.க. ஆட்சியில் அந்த அரசாணையை நடைமுறைப்படுத்தவில்லை. அதனால், 2019, அக்டோபர் 28ம் தேதி நாங்கள் போராட்டத்தை முன்னெடுத்தபோது அன்றைய எதிர்க்கட்சித் தலைவர் மு.க ஸ்டாலின் என் கையைப் பிடித்து, ‘திமுக ஆட்சிக்கு வந்ததும் 354 அரசாணையை நடைமுறைப் படுத்துவோம்’என்று வாக்குறுதி அளித்தார். ஆனால், ஆட்சிக்கு வந்து பலமுறை நாங்கள் போராடிய பிறகும் எங்களைப் புறக்கணிக்கிறார்கள்” என்றார் விரக்தியுடன்.அரசு மருத்துவர்கள் மற்றும் பட்டமேற்படிப்பு மருத்துவர்கள் சங்கத்தின் தலைவர் டாக்டர் சாமிநாதன், “மருத்துவக்கட்டமைப்பில் 25 வது இடத்திலுள்ள பீகார், ஜார்கண்டில்கூட அரசு மருத்துவர்களுக்கு மத்திய அரசுக்கு இணையான சம்பளம் வழங்கப்படுகிறது. கர்நாடகா, பாண்டிச்சேரியிலும் அமல்படுத்திவிட்டார்கள். திராவிட மாடல் ஆட்சி என்று சொல்லிக்கொள்ளும் தி.மு.க., கலைஞரின் அரசாணையை அவரது நூற்றாண்டிலாவது நிறைவேற்ற வேண்டும்”என்றார் ஆதங்கத்துடன்.மறைந்த முதல்வர் கருணாநிதிக்கு நினைவுச்சின்னம் வைப்பது மட்டுமல்ல, அவரை நினைவில் வைத்துக்கொள்ளும்படி அவரது ஆணையை நிறைவேற்றுவதும் முக்கியம்!-மனோ சௌந்தர்

அரசாணை 354 புறக்கணிப்பு கருணாநிதிக்கு செய்யும் துரோகம் : பொங்கும் மருத்துவர்கள்

Related Stories