தூர்வாருங்க... கமிஷனை வாராதிங்க! எச்சரிக்கை மணியடிக்கும் டெல்டா விவசாயிகள்...

சமீபத்தில் டெல்டா பகுதியின் ஆறுகளை தூர்வார தமிழக அரசு 80 கோடி ரூபாய் ஒதுக்கியது. இந்தத் தொகையை யானைப் பசிக்கு சோளப்பொரி என்று குறிப்பிடும் விவசாயிகள், அதிலும் பாதியளவு ஊழலிலேயே கரைந்துவிடும் என்பதால், வரும் பருவ மழைக் காலத்தில் காலத்தில் விளைநிலங்கள் வெள்ளக்காடாகிவிடும் என்று எச்சரிக்கை மணி அடிக்கிறார்கள்!இதுகுறித்து நம்மிடம் விரிவாக பேசினார் அனைத்து விவசாயிகள் கூட்டமைப்பின் ஒருங்கிணைப்புக் குழுத் தலைவர் பி.ஆர்.பாண்டியன், “கடந்த பத்தாண்டுகளாக தமிழக அரசு தூர் வாருவதற்கான நிதியை மிகக் குறைவாகவே ஒதுக்கிவருகிறது. அதிலும் தூர்வாருவதைவிட நிதியை வாரிச்சுருட்டுவதிலேயே அதிகாரிகள் தீவிரம் காட்டுகிறார்கள். அரசியல்வாதிகள், அதிகாரிகள், ஒப்பந்ததாரர்களின் கமிஷன் சுமார் 45 சதவிகிதம் போக எஞ்சியிருக்கும் நிதியில்தான் அரைகுறை வேலைகளை பார்க்கிறார்கள். பல இடங்களில் தூர்வாராமலே, தூர்வாரியதாகக் கணக்கு காட்டுகிறார்கள். இதனால், பருவநிலை மாற்றம் ஏற்படும்போதெல்லாம், ஆறுகளில் நீரோட்டம் தடைபட்டு, வெள்ள பாதிப்புகள் ஏற்படுகின்றன..தூர்வாரப்பட்டதற்கு முன்பு ஒரு ஆறு எப்படி இருந்தது, தூர்வாரியப் பிறகு எப்படி இருந்தது என்பதை ஆய்வு செய்து ஆதாரங்களுடன் பதிவு செய்ய வேண்டும். அதற்கேற்ப நிதி ஒதுக்க வேண்டும். அப்படி ஒதுக்கும் நிதியில் பணிகளை முறையாக மேற்கொள்ள வேண்டும். அப்போதுதான் வெள்ளப்பெருக்கின் போது விவசாயம் பாதிக்கப்படாது. ஆனால், ஆறுகளை தூர் வார தற்போது ஒதுக்கப்பட்டிருக்கும் 80 கோடி ரூபாய் நிதி யானைப்பசிக்கு சோளப்பொரி போலதான்.ஆசிய வளர்ச்சி வங்கித் திட்டத்தின் கீழ் கடந்த 2016-ம் ஆண்டு அப்போதைய முதல்வர் ஜெயலலிதா 952 கோடி ரூபாய்க்கு அனுமதி பெற்று காவிரி டெல்டாவில் அனைத்து ஆறுகளையும் அவை கடலில் கலக்கும் முகத்துவாரம் வரை மறு சீரமைப்பு செய்ய திட்டமிட்டார்..முதல்கட்டமாக 540 கோடி ரூபாயில் அரிச்சந்திரா, அடப்பாறு, முள்ளியாறு உள்ளிட்ட ஆறுகளும் அதன் கிளை ஆறுகளும் சீரமைக்கப்பட்டன. அதன்பிறகு, இரண்டாம் கட்ட பணிகளுக்கான நிதியை பெற்று ஆறுகளை சீரமைக்க தமிழக அரசு எந்த நடவடிக்கையும் எடுக்கவில்லை.இதனால் சீரமைக்கப்படாத ஆறுகளில் புதர்கள் மண்டி, கரைகள் பலம் இழந்து காணப்படுகின்றன. திருச்சி, தஞ்சாவூர், திருவாரூர் மாவட்டங்களில் கனமழையால் ஏற்படும் வெள்ள அபாயங்களை தணிப்பவை இதுபோன்ற ஆறுகள்தான். ஆனால் பாமணி ஆறு, கோரையாறு மற்றும் அவற்றின் கிளை ஆறுகளில் தண்ணீர் செல்லவே வழியில்லை. இதனால், பெருமழைக் காலங்களில் பெரும் பாதிப்பு ஏற்பட்டு, விளைநிலங்கள் வெள்ளத்தில் மூழ்கும்.அதேபோல காவிரி டெல்டாவில் பாசன மதகுகள் மற்றும் கதவணைகளை பராமரிப்பதற்கான நிதியும் பல ஆண்டுகளாக ஒதுக்கப்படவில்லை. இதனால் பாசனத்துக்கு தண்ணீரைக்கொண்டு செல்லமுடியவில்லை. வெள்ளக்காலங்களில் தண்ணீரை வடியவைக்க முடியவில்லை. ஏற்கெனவே கோடியக்கரை தொடங்கி அதிராம்பட்டினம் வரையிலான அலையாத்தி காடுகளை இறால் பண்ணைகளுக்கு தாரைவார்த்து விட்டார்கள். அங்கு கடலுக்குள் ஆற்று நீர் செல்ல வழியில்லாமல் போய்விட்டது..இந்த ஆறுகளை நம்பி இரண்டு லட்சம் ஏக்கர் விளை நிலங்கள் இருக்கின்றன. அரசின் அலட்சியத்தால் இவை பாசன பயன்பாட்டை இழப்பதுடன், வெள்ளப்பெருக்கில் பயிர்கள் மூழ்கிவிடும் அபாயமும் ஏற்படும். எந்த ஆண்டும் இல்லாத அளவுக்கு இந்த ஆண்டு மழை கூடுதலாக இருக்கும் என்று இந்திய வானிலை மையம் அறிவித்துள்ளது. எனவே இனியும் தாமதிக்காமல் ஆசிய வளர்ச்சி வங்கியின் நிதியைப் பெற்று, போர்க்கால அவசரத்தில் ஆறுகளை தூர்வார வேண்டும்” என்றார் அக்கறையுடன்.பொன்னையைச் சேர்ந்த விவசாயி வீரசேனன், “ஆண்டுதோறும் தூர்வாரும் பணி மேற்கொள்வதற்கு முன்பு விவசாயிகளை அழைத்து ‘எந்தெந்த இடங்களில் தூர்வாரவேண்டும்?’ என்று கருத்துக் கேட்பார்கள். இந்தாண்டு அதைக்கூட செய்யவில்லை. தவிர, அந்த ஆண்டில் எந்தெந்தப் பணிகளைச் செய்யத் திட்டமிடப்பட்டிருக்கிறது என ஒரு பட்டியல் தருவார்கள்; அதையும் செய்யவில்லை. இதனால் விவசாயிகளே கூடிப்பேசி, எந்தெந்த ஆறுகளில் தூர்வார வேண்டும் என்று மாவட்ட ஆட்சியரிடம் மனு கொடுத்திருக்கிறோம்..இவை எல்லாவற்றையும் விட முக்கியம், ஊழல் இல்லாமல் இந்தப் பணிகளை செய்வதுதான். வேளாண் பொறியியல் துறையில் விவசாயிகளுக்கு மணிக்கு இவ்வளவு என வாடகை நிர்ணயம் செய்து ஜே.சி.பி., ஹிட்டாச்சி போன்ற இயந்திரங்களைக் கொடுக்கிறார்கள். ஆனால், பணியின் போது தூரத்தைக் கணக்கிட்டு பில் எழுதி விடுகிறார்கள். அப்படிச் செய்யாமல் நேரத்தின் அடிப்படையில் வாடகை நிர்ணயம் செய்ய வேண்டும். அப்படி செய்தால், தற்போது ஒதுக்கப்பட்டிருக்கும் நிதியிலேயே இன்னும் கூடுதலாக வேலை செய்து விவசாயிகளை பயன்பெற வைக்கலாம்” என்றார்.இதுகுறித்து வேளாண் துறையின் மண்டல செயற் பொறியாளர் ராமமூர்த்தியிடம் பேசினோம், “ஆசிய வளர்ச்சி வங்கி நிதியைப் பெறுவதற்கான முயற்சிகள் நடந்துவருகின்றன. தூர்வாரும் பணிக்கான இயந்திரங்களை தூரக் கணக்கு வாடகைக்கு பதில், மணிக்கணக்கு வாடகை நிர்ணயம் செய்யவே முடிவெடுத்திருக்கிறோம்” என்றார்.வரும்முன் காப்பதே நல்லரசு! வீ.மாணிக்கவாசகம்

தூர்வாருங்க... கமிஷனை வாராதிங்க! எச்சரிக்கை மணியடிக்கும் டெல்டா விவசாயிகள்...

Related Stories