விரக்தி... ஏமாற்றம், ஓட்டம், மிரட்டும் மணல் மாஃபியா

தோண்டத் தோண்ட வரும் மணலைப்போலவே விசாரிக்க விசாரிக்க மணல் குவாரிகள் பற்றி வரும் அட்ராசிட்டிகள் திகில் அடைய வைக்கின்றன. கடந்த ஏப்ரல் 25ம் தேதி. தூத்துக்குடி கோவில்பத்து பகுதியின் கிராம நிர்வாக அலுவலரான லூர்து ஃபிரான்சிஸ் என்பவரை பட்டப்பகலில் அவரது அலுவலகத்திலேயே வைத்து கூலிப்படையினர் கொடூரமாக வெட்டி கொலை செய்தனர். மணல் கொள்ளையால் நடக்கும் எத்தனையோ விவகாரங்கள் மூடி மறைக்கப்பட்டிருந்தாலும், கொல்லப்பட்டவர் வி.ஏ.ஓ. என்பதாலும், கொலை நடந்தது அரசு அலுவலகம் என்பதாலும் விவகாரம் சூடுபிடிக்க ஆரம்பித்தது. தொடர்ந்து இந்த கொலையில் ஈடுபட்டதாக கலியாவூரைச் சேர்ந்த ராமசுப்பிரமணியன், மாரிமுத்து ஆகியோரைக் கைது செய்தது காவல்துறை. போலீஸ் விசாரணையில் மணல் திருட்டைத் தடுக்க அவர் போலீஸில் புகார் கொடுத்ததே கொலைக்குக் காரணம் என்று தெரிய வர... ஒட்டுமொத்த வி.ஏ.ஓ. சமூகமே அச்சத்தில் உறைந்திருக்கிறது..லூர்து ஃபிரான்சிஸ் கொலை செய்யப்பட்ட கோவில்பத்து அருகில்தான் அகரம் கிராமம் இருக்கிறது. அந்த கிராமத்தைச் சேர்ந்த பாலகிருஷ்ணன் என்கிற விவசாயி, மணல் கடத்தல் குறித்து புகார் செய்தார். அதனால் அவரது உயிருக்கு அச்சுறுத்தல் ஏற்பட்டது. நீதிமன்றத்தை நாடி அவர் போலீஸ் பாதுகாப்பு பெற்றார். கடந்த இரண்டு வருடமாக போலீஸ் பாதுகாப்புடன் சுற்றிக்கொண்டிருக்கிறார்.ஆனால், அரசு ஊழியரான வி.ஏ.ஓ.வுக்குப் பாதுகாப்பு இல்லாமல் போய்விட்டது. அதுமட்டுமல்ல, ஃபிரான்ஸிஸ் கொல்லப்பட்ட பிறகும் சில வி.ஏ.ஓ-க்களுக்கு தொடர்ந்து மணல் மாஃபியாக்களிடமிருந்து மிரட்டல் வருவதால், தங்கள் பாதுகாப்பை உறுதிசெய்வதற்காக கைத்துப்பாக்கியை வழங்க வேண்டுமென தமிழ்நாடு வி.ஏ.ஓ-க்கள் சங்கம் கோரிக்கை விடுத்திருக்கிறார்கள். தூத்துக்குடி கொலை சம்பவமே சூடு ஆறாத தன்னை டிராக்டர் ஏற்றிக் கொலைசெய்ய முயன்றதாக தர்மபுரி மாவட்டம், மெனசி ஊராட்சி வி.ஏ.ஓ. இளங்கோ, பாப்பிரெட்டிப்பட்டி காவல்நிலையத்தில் புகார் அளித்துள்ளார்.இளங்கோவிடம் பேசினோம். “மே 1-ம் தேதி ராத்திரி வழக்கம்போல வேலையைமுடிச்சிட்டு வீட்டுக்குக் கிளம்பும்போது, மெனசி பகுதியில் லாரியில் கனிமங்கள் கடத்தப்படுவதாக தகவல் கிடைச்சுது. சம்பவ இடத்துக்கு டூ வீலர்ல போனேன். வழியில, குண்டல மடுவு காளியம்மன் கோயில் பக்கத்துல உளி கற்களை ஏற்றிக்கிட்டு ஒரு டிராக்டர் பயங்கர வேகமாப் போச்சு. நான் அதை தடுத்த நிறுத்த முயற்சி செஞ்சப்ப அந்த டிராக்டர் நிக்காமல என் மேல் ஏத்திக் கொல்லும் அளவுக்கு வந்து வேகமாப் போச்சு. நான் உயிர் தப்பிச்சது கடவுள் புண்ணியம். அந்த டிராக்டர் நம்பர், TN 29 டி TZ 2538. இந்த கும்பலுக்கு மெனசி ஊராட்சி மன்றத் தலைவர் அன்பரசு, பூதநத்தம் ஊராட்சி மன்றத் தலைவர் அருணாச்சலம், துணைத் தலைவர் பெருமாள் ஆகியோர் உதவியாக இருக்காங்க. அந்த கும்பல்தான் இப்போ என்னைத் தொடர்ச்சியா மிரட்ட ஆரம்பிச்சிருக்கு. இதுபத்தி காவல்துறையில புகார் கொடுத்திருக்கேன்” என்றார் படபடப்பாக..இது குறித்து தமிழக மணல் வியாபாரிகள் சங்கத் தலைவரும் மணல் லாரி உரிமையாளர் சங்க தலைவருமான யுவராஜாவிடம் பேசினோம்... “கேரளத்தில் மணல் அள்ளத் தடை விதிக்கப்பட்டுள்ளது. கர்நாடகத்தில் மணல் அள்ள கட்டுப்பாடுகள் விதிக்கப்பட்டுள்ளன. ஆனாலும், அந்த மாநிலங்களில் கட்டுமானப் பணிகள் நடந்துகொண்டுதான் இருக்கின்றன. காரணம் தமிழகத்தில் இருந்து கடத்தப்படும் மணல்தான்.தினமும் காலை 7 மணி முதல் மாலை 5 மணிவரை மட்டுமே குவாரிகள் செயல்படவேண்டும். ஒரு குவாரியில் ஒரு நாளைக்கு 80 லாரிகள் மட்டுமே மணல் அள்ள வேண்டும்; ஆனால், சட்டப்படியான மணல் குவாரிகள், சட்டவிரோத மணல் குவாரிகள் என அனைத்துக் குவாரிகளிலும் 24 மணி நேரமும் மணல் அள்ளப்படுகிறது. ஒரு மணி நேரத்திற்கு 134 லாரிகள் வீதம் ஒரு நாளைக்கு 3,200க்கும் அதிகமான லாரிகளில் மணல் சட்டவிரோதமாகக் கடத்தப்படுகிறது. இது அரசு அனுமதிக்கப்பட்ட அளவை விட 40 மடங்குக்கும் அதிகம்..அதே போன்று மணல் குவாரிகளில் அதிகபட்சமாக ஒரு மீட்டர், அதாவது 3.33 அடி ஆழத்திற்கு மட்டும்தான் மணல் அள்ளப்பட வேண்டும். ஆனால், பெரும்பான்மையான மணல் குவாரிகளில் 5 மீட்டர் முதல் 7 மீட்டர் வரை, அதாவது 25 அடி ஆழம் வரை மணல் அள்ளப்படுகிறது. ஆறு சக்கர சரக்கு லாரிகளில் 2 யூனிட்டுகளும், 10 சக்கர சரக்கு உந்துகளில் 3 யூனிட்டுகளும் மட்டும்தான் மணல் ஏற்ற வேண்டும். ஆனால், அனுமதிக்கப்பட்டதைவிட இரு மடங்குக்கும் கூடுதலாக மணல் ஏற்றப்படுகிறது” என்றார்.தமிழகத்தில் சில வி.ஏ.ஓ-க்கள் மணல் திருட்டைத் தடுக்கத் தங்களது உயிரை துச்சமென நினைத்துப் பணி செய்துவரும் நேரத்தில், பல வி.ஏ.ஓ-க்கள் மணல் மாஃபியாவுகளுக்கு ஆதரவாகச் செயல்பட்டு வருகிறார்கள் என்ற குற்றச்சாட்டுக்களும் இருக்கத்தான் செய்கிறது. யாராக இருந்தாலும், கடைசியில் ஜெயிப்பது மண்தான்..பாக்ஸ்நான் அப்படிச் சொல்லவேயில்லை!சமீபத்தில் அருப்புக்கோட்டை வி.ஏ.ஓ பிரித்விராஜ் ராஜினாமா கடிதம் ஒன்றை எழுதி பரபரப்பை ஏற்படுத்தியிருந்தார். இதுபற்றி கேட்டால் அவர் அடித்ததோ மிகப் பெரிய பல்டி. “என் மனைவி சூர்யபிரபாவின் சிகிச்சைக்காக கோவைக்கும் அருப்புக்கோட்டைக்கும் அடிக்கடி அலைய வேண்டியுள்ளது. இதனால் நான் அரசுப் பணியை ராஜினாமா செய்கிறேன் என்றுதான் குறிப்பிட்டேன். ’நேர்மையாகப் பணியாற்ற முடியவில்லை. அதனால் ராஜினாமா செய்கிறேன்’ என்று யாரிடமும் சொல்லவில்லை, எங்கும் குறிப்பிடவில்லை. ஆனால், அது மீடியாவில் நேர்மையாக வேலை செய்ய முடியவில்லை. அதனால் ராஜினாமா செய்கிறேன் என்று தவறுதாக வெளிவந்து விட்டது” என்றார் - கார்த்திக் - பாபு, அண்ணாதுரை, கிருஷ்ணன்

விரக்தி... ஏமாற்றம், ஓட்டம், மிரட்டும் மணல் மாஃபியா

Related Stories