அமைச்சர் நேருவை குளிர்விக்க எஃப்.ஐ.ஆர்?..கொதிக்கும் திருச்சி சிவா மருமகன்...

-ஷானுதிருச்சியில் தி.மு.க தலைவர்களான நேரு மற்றும் திருச்சி சிவா ஆகியோரின் ஆதரவாளர்களுக்கு இடையில் ஏற்பட்ட கலவரத்தின் சூடே இன்னும் தணியவில்லை. அதற்குள் திருச்சி சிவாவின் மருமகன் முத்துக்குமார் மீது வழக்கு பதிவு செய்து எரியும் நெருப்பில் பெட்ரோலை ஊற்றியிருக்கிறது செசன்ஸ் கோர்ட் காவல் நிலையம்!.'திருச்சி சிவா மருமகன் மீது வழக்குப்பதிவு... அவர் தலைமறைவு' என்று ஊடகங்களில் செய்தி வெளியாகி , திருச்சியில் பாரன்ஹீட் எகிறிக்கொண்டிருந்த நேரத்தில் தனது அலுவலகத்தில் கூலாக அமர்ந்திருந்தார் முத்துக்குமார். அவரை நேரில் சந்தித்துப் பேசினோம்... "கடந்த மே 3ம் தேதி, என்னுடைய கிளையன்ட் மொய்தீன், அவரது பைக்கை திருடியவரை பிடித்துவைத்திருப்பதாகச் சொன்னார். நான் அங்கே சென்றபோது, திருட்டுடன் தொடர்புடைய விஜயசாரதி என்பவர் பொதுமக்களால் தாக்கப்பட்டுக் கிடந்தார். அவரை செசன்ஸ் கோர்ட் காவல் நிலையம் அழைத்து சென்றபோது அரசு மருத்துவமனைக்கு அனுப்பச் சொன்னார்கள். அவர் எங்களோடு வராமல், தானாகவேபோய் அட்மிட் ஆகிவிட்டார். பிறகு நான் சென்னை சென்றுவிட்டேன். சம்பவம் நடந்து பத்து நாட்களுக்குப் பிறகு, விஜயசாரதியை கொலை செய்ய முயற்சித்ததாக என் மீது வழக்குப் போட்டிருக்கிறார்கள். இதையடுத்து நான் முன் ஜாமீனுக்கு விண்ணப்பித்தேன். மே 19ம் தேதி அந்த முன் ஜாமீன் விசாரணைக்கு வந்தபோது, ' நான் தாக்கியதால் விஜயசாரதிக்கு சிறுநீரகம் பழுதடைந்து அரசு மருத்துவமனையில் சிகிச்சை பெறுகிறார்' என்றார், அரசு தரப்பு வழக்கறிஞர். ஆனால், விஜயசாரதி மே 15ம் தேதியே டிஸ்சார்ஜ் ஆகிவிட்டதாக அரசு மருத்துவமனை ரெக்கார்டுகளில் இருக்கிறது. உள்ளூர் அமைச்சர் நேருவிடம் நல்ல பெயர் எடுக்க வேண்டும் என்பதற்காகதான் காவல்துறையினர் இப்படி செய்கிறார்கள். எப்போதெல்லாம் திருச்சி சிவா, அமைச்சர் நேருவுக்குப் போட்டியாக வருகிறாரோ அப்போதெல்லாம் எங்கள் குடும்பத்து நபர்கள் மீது பொய் வழக்குப் போடுவது வாடிக்கையாகி விட்டது” என்று பொங்கினார். கண்டோன்மென்ட் சரக காவல்துறை உதவி ஆணையர் கென்னடியோ, "விஜயசாரதி கொடுத்த புகாரின் அடிப்படையில்தான் வழக்கு பதிவு செய்திருக்கிறோம். வண்டியை திருடியவரை தன் அலுவலகத்தில் வைத்து அடித்திருக்கிறார் முத்துக்குமார். விஜய சாரதிக்கு உள்காயம் பலமாக இருக்கிறது. மூன்றுமுறை டயாலிசிஸ் செய்துதான் வீட்டிற்கு அனுப்பி இருக்கிறார்கள். ஆள் பிழைப்பது ரொம்ப கஷ்டம். இந்த வண்டி திருட்டு விவகாரத்தில் வேறு ஏதோ மர்மம் இருக்கிறது அதைத்தான் நாங்கள் விசாரிக்கிறோம்.” என்றார். விஜயசாரதியைத் தேடி அரசு மருத்துவமனை சென்றபோது அவர் டிஸ்சார்ஜ் ஆகிவிட்டதாகத் தகவல் கிடைத்தது. மொபைலில் தொடர்புகொண்டபோது, அவர் மனைவி செல்வி பேசினார்... " பெரிய இடத்து பொல்லாப்பு எல்லாம் எங்களுக்கு வேணாம். தயவு செய்து இதுக்குமேல எதுவும் கேட்காதீங்க" என்றார், கண்ணீர் மல்க. யாராக இருந்தாலும் தேவை நேர்மையான நடவடிக்கை மட்டுமே!

அமைச்சர் நேருவை குளிர்விக்க எஃப்.ஐ.ஆர்?..கொதிக்கும் திருச்சி சிவா மருமகன்...

Related Stories