மதிவேந்தனுக்கு எதிராக கொந்தளிக்கும் விவசாயிகள்...அமைச்சரும் ஏழைபாழைகளும் ஒண்ணா?

நாமக்கல் மாவட்டம் மோகனூர் அருகே சுமார் ஆயிரத்து 500 ஏக்கர் விளைநிலங்களை சிப்காட்டிற்கு எடுக்க தயாராகிறது அரசு. ஆனால், இதற்கு எதிர்ப்பு தெரிவிக்கும் விவசாயிகள், வனத்துறை அமைச்சர் மதிவேந்தன் தனது நிலத்தின் மதிப்பை உயர்த்திக்கொள்ளவே சிப்காட்டை இங்கு கொண்டுவருகிறார் என்று போர்க்கொடி தூக்கியிருப்பதால் கிடுகிடுக்கிறது ஏரியா! நாமக்கல் - திருச்சி சாலையில் இருக்கிறது மோகனூர். இதன் அருகே வலையபட்டி, புதுப்பட்டி, பரளி, அரூர், லத்துவாடி உள்ளிட்ட கிராமங்கள் இருக்கின்றன. இங்குதான் சுமார் 1,500 ஏக்கர் வரை சிப்காட்டிற்கு விளைநிலங்களைக் கையகப்படுத்த முதல்கட்டப் பணிகள் தொடங்கியிருக்கின்றன. இதை எதிர்த்து கலெக்டரிடம் மனு கொடுத்திருக்கும் விவசாயிகள் பிச்சை எடுக்கும் போராட்டம், கால்நடைகளை ஒப்படைக்கும் போராட்டம், மெழுகுவத்தி ஏந்தி போராட்டம் என பலவகைகளில் போராடி வருகிறார்கள். தவிர, அவர்கள் வைக்கும் முக்கிய குற்றச்சாட்டே, “அமைச்சர் மதிவேந்தனின் நிலம் இங்கு இருப்பதால், அதன் மதிப்பை உயர்த்துவதற்காகதான் சிப்காட் கொண்டுவரப்படுகிறது” என்பதுதான். .இதுகுறித்து விவசாய முன்னேற்றக் கழக பொதுச்செயலாளர் பாலசுப்ரமணியத்தை சந்தித்துப் பேசினோம். “பொன் விளையும் பூமி சார் இது. தமிழ்நாட்டுல நாட்டு வெங்காயம் அதிகம் விளையறது இங்கேதான். இங்கே விளையற நாட்டு வெங்காயம் வெளிநாடுகளுக்கு ஏற்றுமதி ஆகுது. மஞ்சள், மக்காச்சோளம், மரவள்ளி இதெல்லாமும் இங்கே விளையுது.இங்கே சிப்காட்டுக்கு நிலம் எடுத்தா, அஞ்சு கிராமத்துலயும் சேர்த்து 15,000 விவசாயிகள் மற்றும் விவசாயத் தொழிலாளிகள் நேரடியாகவும், மறைமுகமாகவும் பாதிக்கப்படுவாங்க. இங்கே சிப்காட்டுக்கு நிலம் எடுக்கிற ஏரியாவை சுத்தி அமைச்சர் மதிவேந்தன் பேர்லயும் அவர் அப்பா பேர்லயும் 60 ஏக்கர் நிலம் இருக்கு. அந்த நிலத்தோட மதிப்பை உயர்த்தத்தான், சிப்காட் திட்டத்தையே இங்க கொண்டுவர்றாங்களோன்னு சந்தேகமா இருக்கு. எத்தனையோ போராட்டம் நடத்திட்டோம். அமைச்சர் எட்டிக்கூட பார்க்கல. இதுவரைக்கும் சிப்காட்டுக்காக தமிழ்நாட்டுல 38,000 ஏக்கர் நிலம் எடுத்திருக்காங்க. அதுல 15,000 ஏக்கர் நிலம் மட்டுமே பயன்பாட்டுல இருக்கு. மீதி நிலம் எல்லாமே சும்மாதான் கிடக்கு. சும்மா கிடக்கிற நிலத்துல தொழிற்சாலை அமைக்கலாம். அத விட்டுட்டு விவசாய நிலத்தப் பிடுங்கினா எப்படி?.ஏற்கெனவே சாயப்பட்டறை, ஆக்கிரமிப்பு, மணல் திருட்டுன்னு காவேரி ஆறு செத்துக்கிட்டிருக்கு. நிலத்தடி நீர் அதளபாதாளத்துக்கு இறங்கிடுச்சு. இப்போ சிப்காட் அமைச்சா, நிலத்தடி நீர் உறிஞ்சப்பட்டு பாதிப்புகள் இன்னும் அதிகமாகாதா? சிப்காட்டை இங்க அமைக்கக் கூடாது. மீறி அமைச்சா 15 ஆயிரம் குடும்பங்களும் போராட்டத்துல குதிக்கும்” என்றார் ஆவேசமாக!.விவசாயிகளுக்கு ஆதரவாக போராட்டத்தில் ஈடுபட்டிருக்கும் கொ.ம.தே.க. கட்சியின் நாமக்கல் தெற்கு மாவட்டச் செயலாளர் மாதேஸ்வரன், “அந்தப் பகுதியில உள்ள ஒட்டுமொத்த விவசாய நிலங்களையும் அழிக்க பிளான் போடுறாங்க. விவசாயிகள் இப்பத்தான் ஸ்கீம் வாட்டர் கொண்டு வந்து செலவு செஞ்சு, மேட்டாங்காடாகக் கிடந்ததை விவசாய நிலமா மாத்தியிருக்காங்க. இப்ப போய் நிலத்த அபகரிச்சா எப்படி?சந்தை மதிப்பு காசு தர்றேன்னு ஆசை காட்டுறாங்க. ஆனா, கைடு லைன் காசை மட்டும் தான் தருவாங்க. இன்னைக்கு ஏக்கரு 50 லட்சம் ரூபாய்க்கு விக்குது. இவங்க கைடு லைன் வேல்யூன்னு சொல்லி 2 லட்சம், மூணு லட்சம் தருவாங்க. மக்களுக்கு எவ்வளவு நஷ்டம்? சிப்காட் அமைச்சா அந்தப் பகுதி நீர், காற்று கண்டிப்பா மாசுபடும்..சிப்காட்ல என்ன தொழிற்சாலை வருமுன்னு அரசாங்கம் சொல்றதில்ல. சாயப்பட்டறை, தோல் தொழிற்சாலை வந்தா கேன்சர் தொடங்கி எல்லா நோயுமே வரும். ஏற்கெனவே நாமக்கல் மாவட்டத்துல சாயப்பட்டறை தண்ணீர் காவிரியில கலக்குறதால தண்ணீர் மாசுபட்டு கேன்சர் அதிகமா வருது.அமைச்சர் இடத்தையும் சிப்காட்டுக்கு கொடுக்கிறார்னு சொல்றாங்க. அமைச்சருக்கு எல்லா பக்கமும் நிலம் இருக்குது. இங்க கொடுத்திட்டு வேற இடத்துக்குப் போயிடுவாரு. ஏழை பாழைங்க இருக்கிற ஒரு ஏக்கர், ரெண்டு ஏக்கர கொடுத்துட்டு எங்க போவாங்க? அரசாங்கம் சிப்காட்ன்னு சொல்லி அவங்க வாழ்வாதாரத்தை அழிக்கிறத வேடிக்கை பார்த்துகிட்டு இருக்க முடியாது” என்றார்..நாமக்கல் மாவட்ட கலெக்டர் ஷ்ரேயா சிங்கிடம் பேச முயற்சித்தோம். மேடம் ‘பிஸி’என்றவர்கள், “நாமக்கல்லுக்கு சிப்காட் 2021 பட்ஜெட்டுலதான் அறிவிச்சாங்க. 800 முதல் 1000 ஏக்கர் வரை தேவைப்படும். அந்த இடத்த ஒருமித்த கருத்தோடதான் தேர்வு செஞ்சாங்க. ஆனா, இப்ப ஏனோ விவசாயிகள் எதிர்க்கிறாங்க” என்றார்கள்.அமைச்சர் மதிவேந்தனின் தந்தை டாக்டர் மாயவன், “புதுப்பட்டி ஏரியாவுல நிலம் எங்களுக்கு இருப்பது உண்மைதான். சிப்காட்டுக்கும் அந்த நிலத்துக்கும் என்ன சம்பந்தம்? எங்க பேரை தேவையில்லாம இழுத்துவிடறாங்க” என்றார்.இறுதியாக அமைச்சர் மதிவேந்தனிடமே பேசினோம். ”அந்த ஏரியாவில் எங்களுடைய பூர்வீக நிலம் உண்டு. அப்பப்ப ஒரு ஏக்கர், ரெண்டு ஏக்கர்னு நிலம் வாங்கிப் போட்டிருந்தோம். கலெக்டரே, ‘உங்க நிலம் சிப்காட் எடுக்கப்படுற எல்லையில வந்தா கொடுப்பீங்களா?’னு கேட்டாங்க. நாங்க மறுப்பேதும் சொல்லல. அப்படியிருக்கும்போது விவசாயிகள் சொல்ற குற்றச்சாட்டு நியாயம் இல்லை” என்றார் பொறுமையாக!அமைச்சர் நிலத்தை கொடுக்கலாம் தான். ஆனால், சாமானிய விவசாயியும் அமைச்சரும் ஒன்றா?! - கே.பழனிவேல்

மதிவேந்தனுக்கு எதிராக கொந்தளிக்கும் விவசாயிகள்...அமைச்சரும் ஏழைபாழைகளும் ஒண்ணா?

Related Stories