இவங்க பொம்பள சாமியார் இல்லை... சம்பள சாமியார்!

ரஞ்சிதமே ரஞ்சிதமே... ரம் பாட்டில் கேட்கும் ரஞ்சிதமே... முன்கதை சுருக்கம்: கொரோனாவுக்கு முன்பு கரூரில் தொழிலதிபர் குரூப் ஒன்று பெண் சாமியார் ஒருவரை குறி சொல்ல வைத்து பணத்தை அள்ளோ அள்ளு என்று அள்ளியது. கொரோனாவுக்கு பிறகு பழையபடி தொழில் போணியாகவில்லை. தொழிலதிபர்கள் சாமியாடியை துரத்த பார்க்க... பெண் சாமியாரோ, நிஜமாகவே சாமி ஆடி தொழிலதிபர்களை தெறித்து ஓடவிட்டிருக்கிறார். இப்படியொரு வில்லங்க சாமியார் விவகாரம் நம்மை தேடி வர... கரூர், பெரிய தொப்பார்பட்டியில் ஆஜரானோம்... மரத்தடியில் அமர்ந்து பல்குத்திக்கொண்டிருந்த பெரியவர் ஒருவர்தான் பேசினார். “ஏழெட்டு வருஷம் இருக்குமுங்க. கரூர்ல இருந்து ரெண்டு பேர் வந்து எங்க ஊரை ஒட்டி நாலு ஏக்கர் நிலம் வாங்குனாரு. யார் என்னன்னு விசாரிச்சப்போ, “கரூர்ல டெக்ஸ்டைல் பிசினஸ் பண்றோம். இங்கயும் டெக்ஸ்டைல் வைக்கப் போறோம்’ன்னு சொன்னாரு. கொஞ்சநாள் கழிச்சு, அந்த இடத்தை சுத்தி காம்பவுண்ட் கட்டி, அதுக்குள்ள ஒரு குதிரை சிலை, ஒரு கருப்பசாமி சிலையை வெச்சிட்டாங்க. ஒருநாள் வெள்ளிக்கிழமை கெடா வெட்டி, பூஜை செய்யப்போறதா சொல்லி சுத்துவட்டார சனங்களை எல்லாம் கூப்பிட்டாங்க. நாங்க போனப்ப வாட்டசாட்டமா ஒரு பொம்பளையாளு, கருப்பசாமிக்கு பூஜை செஞ்சிட்டு இருந்தாங்க. எங்களுக்கு கெடா விருந்து போட்டுட்டு, ‘அடுத்த வெள்ளிக்கிழமையும் வாங்க, கெடா விருந்து இருக்கு’ன்னு சொல்லி அனுப்புனாங்க.கெடா விருந்து கிடைக்குமேன்னு ஆசையா போனோம். அங்க பார்த்தா எங்களுக்கு பக்குன்னு இருந்துச்சு. முத வாரம் சாமிக்கு பூஜை செஞ்ச அதே பொம்பளயாளு கருப்பு சேலையைக் கட்டிக்கிட்டு ஆணி செருப்பை போட்டுக்கிட்டு கையில பெரிய அருவாளோடு ஆவேசமா நின்னுட்டு இருந்தாங்க. எங்களை எல்லாம் பார்த்து நாக்கைத் துருத்தி துருத்தி... ‘ஏய் இங்க வாங்கடா, ஆத்தாகிட்ட வாங்கடா”ன்னு கத்தவும் பயந்து ஓடப் பார்த்தோம். ஆனா, அவங்களோட ஆளுங்கதான் எங்ககிட்ட ‘பயப்படாதீங்க, ஆத்தா உங்களுக்கு இலவசமா அருள் வாக்கு சொல்லத்தான் கூப்பிடுது’ன்னு சொன்னாங்க. அன்னைக்கும் எங்களுக்கு நாக்குக்கு ருசியா கெடா விருந்து போட்டாங்க. இது இப்படியே தொடர ஆரம்பிச்சது..விஷயம் ஊருக்குள்ளே பரவ ஆரம்பிச்சதும் கூட்டம் குவிய ஆரம்பிச்சது. ஆளாளுக்கு அந்த பொம்பளைகிட்ட குறி கேட்க ஆரம்பிச்சாங்க. அந்த பொம்பளையும், ‘ஆத்தாளுக்கு ரம் பாட்டில் வாங்கிட்டு வாங்கடா... ஃபுல் பாட்டில் ஓல்டு மங் ரம் வாங்கிட்டு வாங்கடா’ன்னு பிராண்ட் பேரு எல்லாம் சொல்லி கேட்க ஆரம்பிச்சது. தெரியாம ஒருத்தன் லோக்கல் சரக்கு வாங்கிட்டு போனதுக்கு மூஞ்சியிலேயே விட்டெறிஞ்சிருச்சு. டாஸ்மாக்லேர்ந்து பெட்டி பெட்டியா சரக்கு பாட்டில்கள் வந்திச்சு. போதாக்குறைக்கு வசூலும் கொட்டொ கொட்டுன்னு கொட்டுச்சு. அதனால சந்தோஷப்பட்ட நிலத்துக்காரங்க, அந்தப் பொம்பளைக்குப் போகவர ஒரு ஜீப்பை வாங்கிக்கொடுத்தாங்க. வசூலாகற தொகையில ஒரு பங்கை சாமியாடிக்குத் தந்துட்டு, நிலத்துக்காரங்க மீதியை எடுத்துகிட்டாங்க.இப்படி குறி சொல்லி, குடியும் வசூலுமா இருந்த இந்த கும்பலுக்கு கொரோனா வெச்சுது ஆப்பு. கொரோனா சமயத்துல கூட்டம் குறைஞ்சதோட, போலீஸ் கெடுபிடியும் அதிகமாச்சு. அதனால, ரெண்டு வருஷம் தொழிலை மூட்டி கட்டி வெச்சுட்டாங்க. கொரோனாவுக்கு அப்புறமா பழையபடி பிக் அப் ஆயிடும்னு நினைச்சாங்க. ஆனா இப்ப அஞ்சாறு பேர்கூட வர்றதில்லை.ஆக, இனிமே பழையபடி தொழில்பிக்கப் ஆகாதுன்னு முடிவு பண்ணி, நிலத்தை வாங்கின கரூர் பார்ட்டிங்க சாமியாடியை துரத்த பார்த்தாங்க. இதனால ஆத்தாளுக்கு பயங்கரக் கோபம் வந்திடுச்சு. ‘ஏண்டா, என்னை முதலீடா வெச்சி கோடி கோடியா சம்பாதிச்சிட்டு இப்ப என்னையே இடத்தை காலி பண்ணச் சொல்றீங்களாடா? நான் நினைச்சா இடத்தோட சேர்த்து உங்களையும் காலி பண்ணிருவேன்னு!’ன்னு மிரட்டி, குறி சொன்ன இடத்துக்குப் பூட்டுப் போட்டு வெச்சிட்டாங்க. இது சம்பந்தமா ஏகப்பட்ட கட்டப் பஞ்சாயத்துகள் நடந்தும், செல்வாக்கான சிலரு ஆத்தாவுக்கு சப்போர்ட் பண்றதால கரூர்க்காரங்க என்ன செய்யறதுன்னு தெரியாம முழிச்சிக்கிட்டு இருக்காங்க” என்று முடித்தனர்.இத்தனையையும் கேட்டுவிட்டு ஆத்தாளைப் பார்க்காமல் வர முடியுமா? அவரை தேடிச் சென்றபோது கேட் பூட்டியிருக்க... உள்ளே மரத்தடியில் ரம்மியமாக படுத்திருந்தார் ரஞ்சிதா. நாம் கேட்டில் இருந்த பூட்டை ஆட்ட... நிமிர்ந்து நம்மைப் பார்த்து முறைத்தார். நாம் வெளியே இருந்தபடியே விஷயத்தைச் சொன்னதும், “உள்ளே வரக்கூடாது” என்றவர், “இந்த இடத்துல தினமும் நான் குறிசொன்னப்போ, கூடைகூடையா வருமானம் கொட்டுச்சு... அப்ப அவங்களுக்கு இனிச்சதாமா? இப்ப கூட்டம் இல்லைன்ன உடனே கசக்குதா? இந்த இடம் எவ்வளவு விலைக்குப் போகுமோ அதுக்கும் மேல சம்பாதிச்சுக் கொடுத்திருக்கேன். நீ இப்ப கிளம்பிப் போடா... வெள்ளிக்கிழமை பாட்டிலோட வாடா குறி சொல்றேன்” என்றவர் குப்புறப்படுத்துக்கொண்டார்.எவ்வளவோ யோசித்தும், ஆத்தா குப்புறப்படுத்தது எதற்கான குறியீடு என்பது மட்டும் விளங்கவே இல்லை! - கரூர் அரவிந்த்

இவங்க பொம்பள சாமியார் இல்லை... சம்பள சாமியார்!

Related Stories