எடப்பாடி மாநாடு அமைச்சர்கள் முதலீடு அதிர்ச்சியில் ஸ்டாலின்!

“அரசியல்ல இதெல்லாம் சகஜமப்பா... ஆனால், முதல்வர் ஸ்டாலின் தான் பாவம்...” என்று யாரிடமோ செல்போனில் பேசிவிட்டு வந்தமர்ந்தார் வம்பானாந்தா. அவருக்கு சூடான ஃபில்டர் காபியைப் பரிமாறிய சிஷ்யை, “என்ன சுவாமி, போனில் எக்ஸ்குளூசிவ் தகவல் போல...” என்று கேட்க செய்திக் கச்சேரியை தொடங்கினார் வம்பு.”ஆமாம், எக்ஸ்குளூசிவ் தான். மதுரையில் ஆகஸ்ட் 20 அன்று அ.தி.மு.க மாநாடு களைகட்டிவிட்டது. ஹெலிகாப்டரில் இருந்தெல்லாம் பூ மழை பொழிந்திருக்கிறார்கள். இதற்கு அ.தி.மு.க. மாஜிக்கள் சிலர் எடப்பாடி எதிர்பார்த்த அளவுக்கு நன்கொடை அளிக்கவில்லை என்பது ஊரறிந்த விஷயம். ஆனால், எடப்பாடியே எதிர்பார்க்காத வகையில், தி.மு.க-வின் அமைச்சர்கள், மாவட்டச் செயலாளர்கள் சிலர் லம்ப்பாக அ.தி.மு.க மாநாட்டுக்கு அள்ளிக் கொடுத்திருக்கிறார்கள் என்பதுதான் யாரும் அறிந்திராத ரகசியம்..தென் மாவட்டத்தில் கோலோச்சும் முக்கியமான அமைச்சர் ஒருவர், கடந்த ஆட்சியில் தி.மு.க எம்.எல்.ஏ-வாக இருந்தபோதிருந்தே அ.தி.மு.க-வுடன் படு நெருக்கமாக இருந்தவர். அப்போது குவாரி, கிரஷர் தொழிலில் கோலோச்சிய அந்த தி.மு.க. எம்.எல்.ஏ., அன்றைய வருவாய்த்துறை அமைச்சரான ஆர்.பி.உதயகுமாருடன் கிட்டத்தட்ட தொழில் பார்ட்னர் போல செயல்பட்டார். அந்த நெருக்கத்தில்தான் கடந்த உள்ளாட்சி தேர்தலின்போதும் தென் மாவட்டத்தின் இரு நகராட்சிகளில் தி.மு.க சார்பில் டம்மி வேட்பாளர்களை நிறுத்தி, அது பிறகு பெரும் சர்ச்சையானது. இப்போது அந்த எம்.எல்.ஏ பசையான முக்கிய துறையின் அமைச்சராகவும் ஆகிவிட்டார். தொடர்ந்து அதே பழைய பாசத்தில்தான் எடப்பாடியின் மதுரை மாநாட்டுக்கு மூன்று பெரிய ஸ்வீட் பாக்ஸ்களை அன்பாக அளித்திருக்கிறாராம் அந்த அமைச்சர். இதுபோக நிலம் தொடர்பாக அ.தி.மு.க-வின் ‘செல்லமான’ புள்ளி ஒருவருக்காக அவர் செய்திருக்கும் தகிடுதத்தம் ஒன்றும் வெளியே வரக் காத்திருக்கிறதாம்.தலைக்கு மேலே வழக்குகள் கத்தியாக தொங்கும் தென் மாவட்டத்தின் மற்றொரு அமைச்சரும் மாநாட்டுக்காக நேரடியாக ஸ்வீட் பாக்ஸ் வழங்காமல், சில பெரிய விஷயங்களுக்கான ஸ்பான்ஸரை ஏற்றுக்கொண்டாராம். தெற்கே முக்கியமான நகரத்தின் மாவட்டச் செயலாளராக இருக்கும் ’வீரமான’ அந்த பிரமுகரும் மாநாட்டுக்கு நன்கொடையாக கணிசமாக வாரி இறைத்தாராம். பின்னணியை விசாரித்தால், ‘கட்சி வேறு, வியாபாரம் வேறு... இன்றைக்கு தி.மு.க-வில் இருப்போம். ஏதாவது பிரச்னை என்றால் நாளைக்கு அ.தி.மு.க-வுக்கு சென்றுவிடுவோம்... ஏன் செந்தில்பாலாஜி கதை என்ன? அ.தி.மு.கவில் அவர் ஊழல் செய்தபோது பொங்கி எழுந்து கண்டித்த அதே ஸ்டாலின்தானே, முதல்வரான பிறகு செந்தில்பாலாஜியை கட்சியில் சேர்த்து அமைச்சர் பதவி கொடுத்து அழகு பார்த்தது மட்டும் இல்லாமல், இப்போது ஊழல் வழக்கில் இருந்து அவரை காப்பாற்றத் துடிக்கிறார். அதனால், இந்த கொடுக்கல் வாங்கலை எல்லாம் கண்டுக்கொள்ளப்படாது’ என்று கண்சிமிட்டுகிறார்கள் சம்பந்தப்பட்ட பிரமுகர்கள்!.“சரி இந்த விஷயம் ஆட்சி மேலிடத்துக்கு தெரியுமா சுவாமி?””அதெல்லாம் தகவல் பாஸ் ஆகிவிட்டது. ஏற்கெனவே அந்த அமைச்சர் மீது கடுகடுப்பில் இருந்த முதல்வர், இப்போது அ.தி.மு.க மாநாட்டுக்கு ஸ்வீட் பாக்ஸ் கொடுத்த விஷயத்தை அறிந்ததும் அதிர்ச்சியாகிவிட்டார். இதையடுத்து, மூத்த அமைச்சர் ஒருவரிடம் பேசிய ஸ்டாலின் தரப்பு, ‘அவர்கிட்ட எல்லாம் நான் பேசுறதுக்கே விரும்பலை. நீங்க கொஞ்சம் கண்டிச்சி வையுங்க. அடுத்த அமைச்சரவை மாற்றத்துல பார்த்துக்கலாம்’ என்று சொல்லியிருக்கிறார்... அதற்கு அந்த மூத்த அமைச்சரோ, ‘அதெல்லாம் அந்தாளு கேட்க மாட்டாரு. துடைச்சிக்கிட்டு போயிடுவாரு...’ என்று கமென்ட் அடித்ததுதான் அதிர்ச்சியின் உச்சம்.” “சத்தமில்லாமல் மூன்றாவது அணி உருவாவதற்கான சாத்தியம் உருவாகியிருக்கிறதே கவனித்தீர்களா சுவாமி?” “வி.சி.க தலைவர் திருமாவுக்கு நடிகர் விஜய் பிறந்தநாள் வாழ்த்து சொன்னது தானே? விஜய் மீது எப்போதுமே கரிசனம் கொண்டவர் திருமா. இதற்கு முன்பாக ஜூன் 22-ம் தேதி நடிகர் விஜய் பிறந்தநாளன்று, திருமாவளவன் செல்போனில் வாழ்த்து சொல்ல முயற்சி செய்தார். ஆனால், அப்போது விஜய் ’லியோ’ பட டப்பிங்கில் பிஸியாக இருந்ததால், திருமாவிடம் பேச முடியாமல் போனது. இதை நினைவில் வைத்துகொண்டு தான், திருமா பிறந்தாளில் அவரது செல்போனில் தொடர்பு கொண்டு விஜய் வாழ்த்து தெரிவித்துள்ளார். தனது அரசியல் நிலைப்பாட்டில் கொஞ்சம் வேகம் எடுக்க ஆரம்பித்தபோது விஜய் தன் ரசிகர்களுக்கு அதிகாரப்பூர்வமாக பிறப்பித்த முதல் உத்தரவு, அம்பேத்கர் பிறந்த நாளன்று அனைவரும் அவரது சிலைக்கு மாலை அணிவிக்கவேண்டும் என்பதுதான்… கூட்டிக்கழித்துப்பார்த்தால் கூட்டணிக் கணக்கு கூடி வரும் போலிருக்கிறது …”. ”சினிமாவைப்போல அரசியலையும் ஓ.டி.டி மயமாக்கிவிடுவார் போலவே கமல்?” “அரசியலில் எதிர்பார்த்த அளவுக்கு கமலால் சாதிக்க முடியவில்லை. கட்சியை கலைத்துவிடலாமா என்று ஒரு கட்டத்தில் யோசித்து வந்த கமல், இடைப்பட்ட காலத்தில் ஏற்படுத்திக்கொண்ட கமர்ஷியல் கமிட்மென்ட்களால் கைவிட முடியாமல் கட்சியையும் நடத்த வேண்டிய கட்டாயத்தில் உள்ளார். வரிசையாக அடுத்தடுத்து படங்கள், போதாக்குறைக்கு அடுத்த பிக் பாஸ் சீஸன் தொடங்கியிருப்பதால் அவரால் அரசியலில் முழுமையாக கவனம் செலுத்த முடியவில்லை. இதையொட்டி கமலால் பொதுச் செயலாளராக நியமிக்கப்பட்ட அருணாச்சலம் தான் கட்சியின் அத்தனை நடவடிக்கைகளையும் கவனித்துக்கொள்கிறார். இந்த நட்வடிக்கைகள் அவ்வப்போது ஆன்லைன் மூலம் கமலுக்கு அப்டேட் செய்யப்படுகிறது. இதை முன்வைத்துதான், ’சினிமா எப்படி ஓ.டி.டி. தளத்திற்கு சென்றுவிட்டதோ அதேபோல அரசியலையும் கொண்டுவந்துவிடுவார் கமல்’ என்று கவலை தெரிவிக்கிறார்கள் மய்யத்தினர். “ஒரு வழியாக தமிழக காங்கிரஸ் தலைவர் பதவி சர்ச்சைக்கு எண்ட் கார்ட் போடப்போகிறார்கள் போல?’ “ராக்கெட் வேகத்தில் 5 எம்.எல்.ஏக்கள், 2 மாவட்ட தலைவர்களுடன் அகில இந்திய தலைவர் மல்லிகார்ஜூன கார்கேவை டெல்லியில் சந்தித்தார் காங்கிரஸ் தலைவர் அழகிரி. ஆனால் அவர்களை பெங்களூரு வரச்சொல்லி உத்தரவு பிறப்பித்தார் கார்கே. தொடர்ந்து பெங்களூரு சென்று கார்கே மற்றும் மேலிட பார்வையாளர் தினேஷ் குண்டுராவை அழகிரி அன்கோவினர் சந்தித்து பேசினர். அப்போது இருவரும் சொல்லி வைத்ததுபோல், ‘காங்கிரஸ் பணிக்குழு உறுப்பினர்கள் மற்றும் ஏ.ஐ.சி.சி உறுப்பினர்கள் நியமனம் நடந்து முடிந்தபிறகுதான் மாநில காங்கிரஸ் தலைவர்கள் மாற்றம் குறித்து விவாதிக்கப்படும்’ என உறுதி அளிக்கவே குழப்ப ரேகையோடு சென்ற அழகிரி ஆயிரம் வாட்ஸ் பல்ப் பிரகாசத்துடன் சென்னை திரும்பினார்.” “அமலாக்கத்துறை கர்நாடகாவிலும் தனது அதிரடியைக் காட்ட ஆரம்பித்துவிட்டதே சுவாமி?” “கர்நாடகத்தில்முதல்வர் பதவியை எதிர்பார்த்து பணத்தை தண்ணீராய் இறைத்த சிவக்குமார் துணை முதல்வராக இருக்கிறார். இவரது பின்னால் 50 எம்.எல்.ஏ-க்கள் இருப்பதாகச் சொல்லப்படுகிறது. ஆனாலும், அண்ணாருக்கு முதல்வர் ஏக்கம் போகவில்லையாம். இந்த நிலையில்தான் சிவக்குமார் மீதான் பிடியை இறுக்கத் தொடங்கியிருக்கிறது டெல்லி பா.ஜ.க. மேலிடம். அதாவது இவரின் தாயார், மனைவி, மகள் என அனைவர் மீதும் அமலாக்கத்துறை தொடர்ந்த வழக்கு இருக்கிறது. எனவே இவர் ஆட்சியை கவிழ்த்துவிட்டு. பா.ஜ.கவுடன் கை கோக்க வேண்டும். இதை வரும் டிசம்பர் மாதத்துக்குள் செய்ய வேண்டும். அப்படி செய்தால் சிவக்குமார்தான் முதல்வர். அது மட்டுமல்ல. அவர் குடும்பத்தினர் மீதான வழக்குகளும் ஒன்றும் இல்லாமல் ஆக்கப்படும்’ என்று ‘ஆஃபர்’ கொடுத்திருக்கிறது டெல்லி பா.ஜ.க மேலிடம். இதையடுத்து காங்கிரஸ் மேலிடம் அண்ணாருக்கு ஷேடோ வாட்ச் போட்டிருக்கிறது. தற்போதைய நிலவரப்படி அவருக்கு 20 எம்.எல்.ஏ-க்களின் ஆதரவு மட்டுமே இருப்பதாக டெல்லி காங்கிரஸுக்கு ‘சீக்ரெட் நோட்’போட்டிருக்கிறது கர்நாடக மாநில உளவுத்துறை.’’.வம்பானந்தாவுக்கு சூடாக இன்னொரு காபியை வழங்கினார் சிஷ்யை. அதை உறிஞ்சியபடியே செய்திகளை சொல்லத் தொடங்கினார் வம்பு… “வருகின்ற செப்டம்பர் 18-ம் தேதி விநாயகர் சதுர்த்தி விழாவை பா.ஜ.க. தனக்கு சாதகமாக பயன்படுத்திகொள்ள வியூகம் வகுத்து வருகிறது. அண்ணாமலையின் முதற்கட்ட நடைபயணம் வரும் ஆகஸ்ட் 22-ம் தேதியுடன் முடிவடைகிறது. இதற்கு பிறகு தமிழக பா.ஜ.க. நிர்வாகிகள் விநாயகர் சதுர்த்தி விழாவில் கவனம் செலுத்த கமலாலயத்தில் இருந்து உத்தரவு பறந்திருக்கிறதாம். அதன்படி, பூத்துக்கு ஒரு பிள்ளையார் சிலையை பா.ஜ.க. சார்பில் வைக்க முடிவு செய்யப்பட்டுள்ளது.இதற்காக உள்ளூர் காவல்நிலையத்தில் விநாயகர் சிலை வைக்க அனுமதி கேட்டு மனு செய்வது, வெரைட்டியான விநாயகர் சிலைகள் செய்ய ஆர்டர் கொடுப்பது போன்ற பணிகளை மேற்கொள்ளவும் பா.ஜ.க. நிர்வாகிகளுக்கு உத்தரவு பறந்திருக்கிறது. தவிர, ஒரு வார காலம் வரையாவது பூத்துக்களில் வைக்கப்படும் விநாயகர் சிலைகளை மக்கள் வழிபடவைக்கவேண்டும் என்றும் பக்திமயமான உத்தரவு பறந்திருக்கிறது” என்றபடியே புல்லட்டை உதைத்துக் கிளம்பினார் வம்பு! - சுவாமி வம்பானந்தா