’சொறி நாயா இருந்தாலும் சோறு போடுங்க’ பின்னணியில் பீட்டா..! பீதியில் மக்கள்!

எந்தத் திசையில் இருந்து எப்போது வருமோ என்று அடிவயிற்றில் நெருப்பைக் கட்டிக்கொண்டு அலைகிற அளவுக்கு தெருவுக்குத் தெரு பெருகித் திரிகின்றன, தெருநாய்கள். மனதை திடப்படுத்திக் கொண்டு கடந்தாலும் ‘ஹைதராபாத்தில் ஐந்து வயதுச் சிறுவன் தெருநாய்கள் கடித்து பலி. சென்னையில் வெறி நாய்களாக மாறும் தெருநாய்கள். காஞ்சிபுரத்தில் பத்துப்பேரைக் கடித்துக் குதறிய தெருநாய்கள். உத்தரபிரதேசத்தில் பன்னிரண்டு வயதுச் சிறுவன் தெருநாய்கள் கடித்து பலி!’ என்று படித்த செய்திகள் நினவுக்கு வந்து பதறவைக்கின்றன.இப்படி ஒவ்வொரு நாளும் தெருநாய்க்கடியால் பாதிக்கப்படுவோர் எண்ணிக்கை எகிறிக்கொண்டே போவதைத் தடுக்க வழிதேடாமல், ‘ தெருவில் உள்ள நாய்களுக்கு அப்பகுதி மக்கள் உணவிடவேண்டும். அவற்றுக்கு உடம்பு சரியில்லாமல் போனால் கால்நடை மருத்துவரிடம் அழைத்துச் செல்லவேண்டும்!’ என்றெல்லாம் மத்திய அரசு உத்தரவிட்டிருப்பது, எரிச்சலைக் கிளப்பியிருப்பதோடு, இதற்குப் பின்னால் வெளிநாட்டின் பீட்டா மற்றும் மெடிக்கல் மாஃபியாக்களின் சதியும் இருக்கிறதோ என்ற கேள்வியையும் எழுப்பியிருக்கிறது.இதுகுறித்த விவரங்களைத் தெரிந்துக்கொள்ள, விலங்குகள் நல ஆர்வலர் முரளிதரனிடம் பேசினோம், “இந்தியாவில் தெருநாய்கள் தொல்லையைத் தடுக்க, அவற்றைப் பிடித்துக் கொல்லும் வழக்கம் இருந்தது. அவற்றை இப்படித் துன்புறுத்துவதைத் தடுக்கவும் அவற்றின் பெருக்கத்தைக் கட்டுப்படுத்தவும் தெரு நாய்களுக்கு கருத்தடை செய்யும் முறை கொண்டுவரப்பட்டது. அதற்கான வழிமுறைகளை வகுக்க, 2001-ஆம் ஆண்டு ‘அனிமல் பர்த் கன்ட்ரோல் ஆக்ட்’ கொண்டுவரப்பட்டது..அந்தச் சட்டத்தில்தான் 2023ம் ஆண்டு திருத்தம் ஒன்று கொண்டுவரப்பட்டுள்ளது. அதில் முதல் விஷயமாக, தெரு நாய்களை, ‘கம்யூனிட்டி அனிமல்’ அதாவது சமுதாய விலங்கு என்று பெயர் மாற்றியுள்ளார்கள். இப்படி மாற்றிவிட்டதால், ‘சமுதாய விலங்கைக் பாதுகாப்பது சமுதாயத்தின் கடமை என்றாகிவிடுகிறது. எனவே ஒரு தெருவில் சில நாய்கள் வசிக்கின்றன என்றால், அவற்றுக்கு நீர், உணவு போன்றவற்றை அந்த ஏரியாவாசிகள் கட்டாயம் வழங்க வேண்டும். அந்த நாய்களுக்கு உடல்நிலை சரியில்லை என்றால் சிகிச்சைக்கு ஏற்பாடு செய்வது தொடங்கி கருத்தடை ஆப்ரேஷன் செய்வது வரை அனைத்தும் அந்த ஏரியா மக்களின் பொறுப்பு!” என்றவர், கொஞ்சம் நிறுத்திவிட்டுத் தொடர்ந்தார். “மத்திய அரசின் இந்தச் சட்டம் முழுக்க முழுக்க முரணானது. பொதுவாக நாய்கள் கூட்டமாக வாழும் குணம் கொண்டவை. எனவே தெருவில் ஒரு நாய்க்குச் சோறு போடத் தொடங்கினால், அது மேலும் பல நாய்களை அங்கே அழைத்து வந்துவிடும். அப்படிக் கூடும் நாய்கள் அந்த இடத்தை தங்கள் இடமாக பாவிக்கத் தொடங்கிவிடும். இதனால் அந்தத் தெருவழியாக போவோர் வருவோரையெல்லாம் விரட்டும் விதமாக, கூட்டமாகத் துரத்தும், கடிக்கும். தெருநாய்களுக்கு ரேபீஸ், கனைன் டிஸ்டம்பர் போன்ற நோய்கள் எளிதில் தாக்கும் வாய்ப்புகள் உள்ளது. அப்படிப்பட்ட நாய்கள் மனிதர்களைக் கடித்தால், அவர்களுக்கும் அந்தத் தொற்று பரவிவிடும்.கடந்த 2015 முதல் 2021 - ஆம் ஆண்டுவரை இந்தியா முழுவதும் நாய்களால் கடிபட்டவர்களின் எண்ணிக்கை 4 கோடியே 10 லட்சம். கடந்த ஜனவரி 2022 முதல் ஜூலை 2022 வரை மட்டுமே 14.50 லட்சம் பேர் நாய்க்கடிக்கு ஆளாகியுள்ளனர். இந்தியாவில் ஆண்டுக்கு சுமார், இருபதாயிரம்பேர் வெறி நாய் கடியால் இறந்து வருகின்றனர். இந்த சூழ்நிலையில் மத்திய அரசு கொண்டுவந்திருக்கும் இந்தச் சட்ட திருத்தம் நாயிடம் கடி வாங்கும் மக்களின் எண்ணிக்கையே அதிகரிக்கவே செய்யும்..இன்னொரு முக்கியமான விஷயம், இந்தச் சட்டத்திற்கு முன் தெருநாய்க்கு யாராவது உணவளித்தால், அவரை ஏரியாவாசிகள் தடுக்க முடிந்தது.தடுத்தால், நாய்களுக்கு உணவளிப்போர் காவல்நிலையம், விலங்குகள் நலவாரியம் போன்றவற்றுக்குச் சென்று புகாரளிக்க முடியும். எனவே இனி தெரு நாய்களுக்கு உணவளிப்பதைத் தடுக்கவே முடியாது.” என்று சொன்னவர், அடுத்து சொன்னதுதான் பகீர் ரகம். “மத்திய அரசின் இந்தத் திட்டத்திற்குப் பின்புலத்தில் மேனகா காந்தி இருப்பதோடு, பீட்டா, புளூ கிராஸ் போன்ற அமைப்புகளும் உள்ளன. அமெரிக்கா போன்ற மேற்கத்திய நாடுகளில் தெரு நாய்களைப் பிடித்துக் கொல்வதுதான் பீட்டாவின் வேலை. அப்படியிருக்க, இங்கே இந்தியாவில் ‘தெரு நாய்களை பாதுகாக்கவேண்டும்!’ என்று பீட்டா குரல் கொடுப்பது, மருந்து மாஃபியாக்களுடன் சேர்ந்து வடிக்கும் முதலைக் கண்ணீர் என்றே சொல்லலாம்.நாய்க்கடிகள் அதிகமாகும்போது, ரேபீஸ் போன்ற தடுப்பூசிகளின் தேவையும் அதிகரிக்கும். சாதாரணமாக ஒருவரை வெறி நாய் கடித்தால், ஐந்து ஊசிகள் போடவேண்டும். ஒரு ஊசிக்கான மருந்தின் விலை கிட்டத்தட்ட 400 ரூபாய். அப்படியென்றால் ஐந்து ஊசிகளுக்கு 2000 ரூபாய் செலவாகும். இனி தடுப்பூசி வியாபாரம் கோடிக்கணக்கில் ஆகும். அதை ஏற்றுமதி செய்யும் அயல்நாட்டு நிறுவனங்களுக்கு கொள்ளை லாபம் கிடைக்கும்.இதுதான் இந்த சட்டம் இயற்றப்பட்டதன் பின்னால் உள்ள சூட்சுமம். கடந்த சில நாட்களுக்கு முன்பு ஜி20 மாநாடு புனேவிலும், ஜம்முவிலும் நடந்தபோது, அங்கிருந்த உள்ளூர் நாய்களையெல்லாம் நிர்வாகம் அப்புறப்படுத்திவிட்டது. அதாவது உள்ளூர் மக்கள் நாய்க்கு சோறு போட்டு கடிவாங்க வேண்டும். ஆனால் வெளிநாட்டினர் வந்தால் மட்டும் அவற்றை அப்புறப்படுத்திவிடுவார்களா?’’ என்று முடித்தார், வேதனை பொங்க.இந்த விவகாரம் தொடர்பாக பீட்டா அமைப்பின் இயக்குநர் பூர்வா ஜோஷிபுராவிடம் கேட்டபோது, ‘உணவிடும் மனிதர்களிடம் நாய்கள் சாதுவாகவும், நன்றியுடனும் இருக்கும்.’’ என்றார்.இந்த விவகாரம் தொடர்பாக மத்திய கால்நடை அமைச்சர் புருஷோத்தம ரூபாலாவை தொடர்பு கொள்ள முயற்சித்தோம். ஆனால் முடியவில்லை. முன்னாள் மத்திய அமைச்சர் மேனகா காந்தியை தொடர்பு கொண்டு கேட்டபோது, 'இந்தக் குற்றச்சாட்டு சிறிதும் ஆதாரம் அற்றது. இந்தியாவில் தெரு நாய்க்கடிகள் அதிகமாக இருப்பதற்குக் காரணம், அவற்றை முறையாகப் பராமரிக்காததும், கொடுமைப்படுத்துவதும்தான்! தற்போது இந்தச் சட்ட திருத்தத்தின் மூலம் மக்கள் நாய்களுக்கு தினமும் உணவளிப்பர். இதனால் நாய்கள் சாதுவாகப் பழகும். அவற்றைப் பிடித்து குடும்பக்கட்டுப்பாடு செய்வதும் எளிதாகும்” என்றார், அமைதியாக. நாய்கள் விஷயத்தில் இனி யாரும் வாலாட்ட முடியாதோ? -அபிநவ்