கூண்டோடு ராஜினாமா செய்வோம்! மிரட்டும் பூண்டி ஆதரவாளர்கள்...

டெல்டாவுக்கென அமைச்சர்கள் யாருமே இல்லையே என்ற குறையை, டி.ஆர்.பி.ராஜாவுக்கு அமைச்சர் பதவி அளித்து முதல்வர் தீர்த்துவைத்திருக்கிறார். ஆனால், அதுவே திருவாரூர் உடன்பிறப்புகளிடையே சலசலப்பை ஏற்படுத்தியிருக்கிறது டெல்டா தி.மு.கவில் ஏற்பட்டிருக்கும் உல்டா நிலவரம்!திருவாரூர் உடன்பிறப்புகளிடம் பேசினோம். “திருவாரூர் மாவட்டச் செயலாளராக இருந்த பூண்டி கலைச்செல்வன் கொல்லப்பட்ட பிறகு அவரின் தம்பி பூண்டி கலைவாணன் மாவட்டச் செயலாளராக நியமிக்கப்பட்டார். கருணாநிதி மறைவிற்குப் பின் நடைபெற்ற திருவாரூர் இடைத்தேர்தலில் பூண்டி கலைவாணனுக்கு வாய்ப்பு கொடுக்கப்பட்டு எம்.எல்.ஏ. ஆனார். 2021 சட்டமன்றத் தேர்தலிலும் போட்டியிட்டு அவரே மீண்டும் எம்.எல்.ஏ. ஆகியிருக்கிறார். கட்சியின் சீனியரும் மாவட்டச் செயலாளருமான அவருக்குத்தான் அமைச்சர் பதவி கொடுக்கப்படும் என்று அவரின் ஆதரவாளர்கள் எதிர்பார்த்தனர்.அதேசமயம், ‘2011, 2016, 2021 என தொடர்ந்து மூன்றாவது முறையாக மன்னார்குடி எம்.எல்.ஏ.வாக இருப்பவர். தி.மு.க. பொருளாளரின் மகன், சட்டமன்ற மதிப்பீட்டுக் குழுத் தலைவர் என பல்வேறு தகுதிகளை கொண்டிருக்கும் டி.ஆர்.பி.ராஜாவுக்குத்தான் அமைச்சர் பதவி’ என்று ராஜாவின் ஆதரவாளர்கள் கச்சைகட்டி வந்தனர். அதற்கேற்ப தற்போது டி.ஆர்.பி.ராஜாவுக்கு அமைச்சர் பதவி கிடைக்கவே, பூண்டி கலைவாணன் தரப்பினர் கொந்தளித்துப் போயிருக்கிறார்கள். ‘திருவாரூரை தி.மு.க. கோட்டையாக மாற்றி கழகத்திற்கும் மக்களுக்கும் தன்னை முழுமையாக அர்ப்பணித்த பூண்டி கலைவாணனுக்காகத்தான் நாங்கள் கழகத்தில் இருக்கிறோம். அவர் ஒரு வார்த்தை சொல்லட்டும்... கூண்டோடு ராஜினாமா செய்துவிடுவோம். இங்கு வாரிசுகளுக்கு மட்டுமே பட்டாபிஷேகம்நடக்கிறது. கும்பகர்ணன் மாதிரி தூங்கிக்கொண்டிருந்த ஐ.டி. விங்க்கை மேலும் சோம்பலாக்கி கோமா நிலைக்கு கொண்டு போனதுதான் ராஜாவின் சாதனை. கழகத்தில் உழைத்தவனுக்கான அங்கீகாரம் என்பது தலைவர் கலைஞர் அவர்களோடு முடிந்துவிட்டது’ என்றெல்லாம் சமூக வலைதளங்களில் பொங்கியிருக்கின்றனர்” என்றார்கள்..இதுகுறித்து, பூண்டி கலைவாணனிடமே கேட்டோம். “எல்லோருக்கும் இயல்பாக உள்ள விஷயம்தானே இது. தங்களுக்கு வேண்டியவர்களுக்கு பதவி கிடைக்கவில்லையே என்ற ஆதங்கத்தில் அவர்கள் ஏதாவது பதிவு போடுவார்கள். டி.ஆர்.பி.ராஜாவுக்கு அமைச்சர் பதவி கொடுக்கப்பட்டதும் நானே அவருக்கே போன் செய்து வாழ்த்துச் சொன்னேன். எங்கள் மாவட்டத்திற்கு அமைச்சர் பதவி கொடுக்கப்பட்டதில் எனக்கு மகிழ்ச்சிதான்” என்றார் பெருந்தன்மையுடன்!புதிய அமைச்சர் டிஆர்.பி. ராஜாவின் கருத்தை அறிய தொடர்பு கொண்டோம். பிஸியாக இருக்கவே, அவரது ஆதரவாளர்கள் சிலரிடம் பேசினோம். “கலைவாணன் ஆதரவாளர்கள் ஒரு சிலரைத் தவிர அனைவரும் அமைச்சர் ராஜாவிடம் சரண்டராகிவிட்டனர். அதிகம் ஆட்டம் போட்டால் இருக்கும் பதவியும் காலியாகிவிடும் என்று அவர்களுக்கே தெரியும். ஒட்டுமொத்த டெல்டா மாவட்டங்களுக்கும் அமைச்சர் இல்லை என்ற குறையும் தீர்ந்துவிட்டது!” என்றனர் உற்சாகத்துடன்.சிலர் வெளியே சிரித்தாலும் உள்ளே அழுதுக்கொண்டுதான் இருக்கிறார்கள்! - ஆர்.விவேக் ஆனந்தன்

கூண்டோடு ராஜினாமா செய்வோம்! மிரட்டும் பூண்டி ஆதரவாளர்கள்...

Related Stories