டிஸ்யூம் டிஸ்யூம் : இந்தியா என்றாலே வடஇந்தியா மட்டும்தானா?

`வாய்த்துடுக்கு அமைச்சர்கள்’ பட்டியலில் இடம்பெற தி.மு.க. அமைச்சர் எ.வ.வேலுவுக்கும் ஆசை வந்துவிட்டதுபோல. `இந்தியா என்றால் அது வடக்கில் இருக்கும் ஓர் ஊர். நம்மூர் தமிழ்நாடுதான். முடிந்தால் நம்மூரை திராவிட நாடு ஆக்க முயற்சிப்போம்’ என அவர் பேசியது, நாடாளுமன்றத்தின் ஹாட் டாபிக்.`பெரிய பெரிய தலைவர்களைக் கொடுத்த தமிழ்நாட்டில் இப்படியான அமைச்சர்களும் இருக்கிறார்கள். தமிழ்நாடு இந்தியாவின் அங்கம் இல்லையா?’ எனக் கடுமையாக சாடியிருக்கிறார், பிரதமர் மோடி. எ.வ.வேலு பேசியது சரியா?“ சமூக நீதிகூட இவர்கள் போடும் பிச்சைதான்’’-தடா பெரியசாமி, பா.ஜ.க எஸ்.சி அணியின் மாநில தலைவர்`` அமைச்சர் எ.வ.வேலு, `இந்தியா என்றாலே வடமாநிலம்தான்’ என்று பேசியுள்ளார். அதற்கு எதிர்ப்புகள் கிளம்பவே, `நாங்கள் அப்படி சொல்லவே இல்லை’ என்று தி.மு.க.வினர் பல்டி அடிக்கின்றனர். இயல்பாகவே தி.மு.க.வினருக்கு பிரிவினைவாத எண்ணம் இருக்கிறது. அதனால்தான், மத்திய அரசு என்று சொல்லிக் கொண்டு இருந்ததை, ஒன்றிய அரசு என்று பேசி வருகின்றனர். அதுவே, பிரிவினை சிந்தனையைத் திணிக்கிறது. தொடர்ந்து தேசத்துக்கு எதிரான பிரிவினைவாத சிந்தனையை தி.மு.க ஏற்படுத்தி வருகிறது என்பதுதான் எங்களுடைய குற்றச்சாட்டு. அதுவே எ.வ.வேலு மூலமாக பிரதிபலித்துள்ளது.இதில், இரண்டு விஷயங்கள் உள்ளன. ஒன்று, மத்திய அரசை ஒன்றிய அரசு எனக் கூறுவது. மத்திய அரசு என்று சொல்வதனால் என்ன வரப்போகிறது? இரண்டாவது, `எல்லாம் தி.மு.கவும் கலைஞரும் கொடுத்த பிச்சை’ என்று சொல்லி வருவது. இதுபோன்ற வார்த்தைகளைத் தொடர்ந்து பயன்படுத்தி வருகிறார்கள்.இதை ஏன் சொல்கிறேன் என்றால் தி.மு.க.வின் ஆர்.எஸ்.பாரதி, பட்டியலின சமூகத்தைச் சேர்ந்த நீதிபதி ஒருவர் கலந்துகொண்ட நிகழ்வில் பேசியபோது, `அவர் நீதிபதியானதுகூட கருணாநிதி போட்ட பிச்சை’ என்று பேசியிருந்தார். அது பெரும் சர்ச்சையை ஏற்படுத்தியது. அதாவது, இவர்களைப் பொறுத்தவரை சமூகநீதிகூட அவர்கள் போடும் பிச்சைதான்.தி.மு.க. அமைச்சர்களாக இருக்கட்டும். இல்லை, பிற தி.மு.க உறுப்பினர்களாக இருக்கட்டும். அவர்கள் அனைவருக்குமே இதுபோன்ற ஓர் எண்ணம் இருக்கிறது. சமூக நீதி பற்றிப் பேசும் தி.மு.க.விடம் நான் கேட்கிறேன்.. `எது சமூக நீதி? இப்படி பேசுவதெல்லாம் சமூக நீதியா?’. ஆளும் அரசாக தி.மு.க இருப்பதால்தான் இதேபோல் பேசுகிறார்கள். இதுவே, ஆட்சியில் இல்லாமல் இருந்திருந்தால் இப்படிப் பேசுவார்களா?பொன்முடி தொடங்கி, தயாநிதி மாறன் வரை ’பட்டியலினத்தவர்களா நீங்கள் ?’ என்று குறிப்பிட்டு, இழிவாகப் பேசியுள்ளனர். இவர்கள் அனைவரிடமும் சாதிய மனோபாவம் இருக்கிறது, ஏற்றத்தாழ்வு சிந்தனையும் இருக்கிறது. `திராவிட அரசியலில் வளர்ந்தோம், பெரியார் சிந்தனையை பின்பற்றினோம்’ என இவர்கள் சொல்வது எல்லாமே ஏமாற்று வேலை. “தேசபக்தியைப் பற்றிப் பேச தகுதியிருக்கிறதா?’’-ஐ.பரந்தாமன் எம்.எல்.ஏ., தி.மு.க.``அமைச்சர் எ.வ.வேலு பேசியதை, இந்தியாவின் பிரதமர் நாடாளுமன்றத்தில் பேசுகிறார். அதற்கு முன்பு, அமைச்சர் எ.வ.வேலு பேசியதை முழுமையாக கேட்டாரா என்று தெரியவில்லை. அது மிகப்பெரிய கேள்விக்குறியாக இருக்கிறது. பிரதமர் மோடிக்கு அமைச்சர் பேசியது, அதுவும் தமிழில் பேசியது முழுமையாக கிடைத்ததா? அதனை முழுமையாக அவர் பார்த்தாரா? கேட்டாரா இவை அனைத்தும் தொடர் கேள்விகளாவே நிற்கின்றன.பா.ஜ.க.வில் இருக்கும் தலைவர்கள் அல்லது தொழில்நுட்ப அணியில் இருப்பவர்கள் யார் யாரோ சமூக வலைதளங்களில் பதிவிடுவதை நம்பி, அதனை முழுமையாகப் பார்க்காமல் நாடாளுமன்றத்தில் பிரதமர் பேசுவதை இந்திய ஜனநாயகத்தின் கேலிக்கூத்தாகவே பார்க்கிறேன். இது பெரும் வேதனை தரக் கூடிய ஒன்று..ஒரு நாட்டினுடைய பிரஜையாக, நம்பிக்கையில்லா தீர்மானத்தின் மீதான விவாதத்தில் பிரதமர் மோடி பேசுவார் என்று பெரும் எதிர்பார்ப்பு வைத்த எங்களுக்கு ஏமாற்றம்தான். ஆனால், எடிட் செய்து முழுமை இல்லாத ஒரு காணொளியை பார்த்துவிட்டு பிரதமர் பேசுவதைப் பார்த்தால், `அவரது வாதத்திறன் இவ்வளவுதானா?’ என எண்ணத் தோன்றுகிறது.பிரிவினைவாதத்தை தி.மு.க ஆதரித்ததே கிடையாது. அமைச்சர் பேசியதாக குற்றச்சாட்டுகளை முன்வைக்கிறார்கள். அவர் எங்கு பேசினார், எப்போது பேசினார் என்று முழு விவரத்தை சொன்னார்களா? சமூக வலைதளத்தில் வந்த ஒரு வீடியோவை வைத்து முடிவு செய்துவிடுவீர்களா? மீண்டும் சொல்கிறேன் பிரிவினைவாதத்தை தி.மு.க என்றுமே ஆதரிக்காது.மணிப்பூர் பிரச்னையை திசை திருப்பி இதுபோன்ற குற்றச்சாட்டுகளை வைத்து, ஒட்டுமொத்த கவனத்தையும் மாற்றிவிட்டார் பிரதமர் மோடி. இவர்களின் வாதம் தரமற்றதாகவே இருக்கிறது.கார்கில் போரின்போது தமிழ்நாட்டில் கலைஞர் ஆட்சியில் இருந்தபோதுதான் அதிக நிதி வசூல் செய்து கொடுக்கப்பட்டது. எந்தெந்த சூழ்நிலைகளில் இந்தியாவுக்கு பாதிப்பு ஏற்பட்டிருக்கிறதோ அப்போதெல்லாம் தி.மு.க தலைமையிலான அரசு, மத்திய அரசுக்குப் பக்கபலமாக இருந்திருக்கிறது. காந்தியை கொலை செய்த கோட்சேவை நாயகனாகப் போற்றுகிறவர்களுக்கு தேசபக்தியைப் பற்றிப் பேச என்ன தகுதி இருக்கிறது?எதிர்க்கட்சிகள் ஒரு தீர்மானத்தை நாடாளுமன்றத்தில் கொண்டுவந்தால் உடனே, `அவர்கள் எல்லாரும் பாகிஸ்தானுக்கு ஆதரவு அளிக்கிறார்கள்’ என்று பேசுகிறாரே பிரதமர் மோடி, இதை எந்தவிதமான வாதமாக எடுத்துகொள்வது ?தேசத்தின் அமைதியையும் சட்டம் ஒழுங்கை சீர்குலைக்கும் வகையிலும் மிகப்பெரிய வன்முறையை ஏற்படுத்துகிற கட்சிகள் பஜ்ரங் தள், ஆர்.எஸ்.எஸ், பா.ஜ.க.தான். இவர்கள் தேச ஒற்றுமையை பற்றிப் பேச கொஞ்சம்கூட தகுதியில்லாதவர்கள். மொழி, மதம், இனம், சிறுபான்மையினர் என பிரித்துப் பார்க்கும் கட்சி பா.ஜ.க.தான். இவர்களுக்கு தேசத்தின் மீது அக்கறையோ, பற்றோ கிடையாது. இன்னும் சொல்லப் போனால் பா.ஜ.க ஒரு தேச விரோத கட்சி. - தர்ஷினி

டிஸ்யூம் டிஸ்யூம் : இந்தியா என்றாலே வடஇந்தியா மட்டும்தானா?

Related Stories