டிஸ்யூம்... டிஸ்யூம் : மதம் மாறுவதுபோல சாதி மாறலாமா?

கவிப்பேரரசு வைரமுத்து சர்ச்சைப் பேரரசராகிவருகிறார். அவ்வப்போது எதையாவது பேசி வைரலாவது அவரது வாடிக்கையாகிவிட்டது. அந்த வரிசையில், நாங்குநேரி சம்பவத்தைக் குறிப்பிட்டு, ‘மதம் மாறுவதுபோல் சாதி மாறுவதை சட்டமாக்குங்கள்’ என்று ட்வீட் போட, சலசலப்பு கிளைவிட்டிருக்கிறது. வைரமுத்துவின் கருத்தை இவர்கள் எப்படிப் பார்க்கிறார்கள்? “சட்டம் கொண்டு வருவது சாத்தியமில்லை!” வானதி சீனிவாசன், எம்.எல்.ஏ, பா.ஜ.க. மதம் மாறுவதால் பிரச்னை தீர்ந்துவிடும் என்று சொல்வது தவறான புரிதல். ‘மதம் மாறினால் தீண்டாமைக் கொடுமை இருக்காது. கல்வி, வேலைவாய்ப்பில் முன்னுரிமை கிடைக்கும், பொருளாதாரரீதியாக உதவி கிடைக்கும்’ என்று ஆசைவார்த்தைகூறி ஏமாற்றுதல் உள்பட பல காரணங்களால் மதமாற்றம் நடைபெற்றுக் கொண்டிருக்கிறது. கிறிஸ்துவ மதத்தில் ஒரே தேவாலயங்கள் கிடையாது. அவர்களுக்குள்ளே தேவாலயங்கள் மாறுபடுகின்றன. ஒவ்வொரு நடைமுறைகளைப் பின்பற்றுபவர்களுக்கு ஒவ்வொரு தெய்வங்கள் அவர்களுக்குள்ளேயே உள்ளது. `இஸ்லாமிய மதத்திலும் தீண்டாமைக் கொடுமை இருக்கிறது' என்று சிலரால் சொல்லப்படுகிறது. புதிதாக மதம் மாறினால் அவர்களுக்கு பெண் கொடுப்பதில்லை. உருது பேசுபவருக்கு ஒரு மரியாதை, தமிழ் பேசுபவருக்கு ஒரு மரியாதை என்று இஸ்லாமியர்களுக்குள்ளே பிரித்துப் பார்க்கப்படுகிறது. இதை ஏன் சொல்கிறேன் என்றால், ஒவ்வொரு மதத்திலும் ஒவ்வொரு பாகுபாடு இருக்கிறது. இவற்றையெல்லாம் வைத்துப் பார்க்கும்போது சாதியை நாம் மாற்றமுடியுமா? நடைமுறை வாழ்க்கையில் சாத்தியம் உண்டா? சாதி எப்போது மாறுகிறது? ஒருவேளை, பெற்றோர் வேறு வேறு சாதியில் இருந்தால் பிள்ளைகள் ஏதேனும் ஒரு சாதியைப் பின்பற்ற வாய்ப்பு உண்டு. ஒரு நபருக்கு சாதியே வேண்டாம் என்றுகூட தேர்வு செய்துகொள்ள முடியும். ‘சாதிச் சான்றிதழ் வைத்துக்கொள்’ என்று யாரும் கட்டாயப்படுத்தவில்லை. ‘சாதியை வைத்துக்கொள்’ என்று சொல்வதற்கு அரசாங்கத்திடம் எந்த சட்டமும் இல்லை. எது அரசாங்கத்தின் கட்டுப்பாட்டில் இல்லையோ, அதற்கு அரசு சட்டம் கொண்டுவர முடியாது. இடஒதுக்கீடு வேண்டும், சாதிசார்ந்த சலுகைகள் வேண்டும் என்று நினைப்பவர்களுக்கே சாதி தேவைப்படுகிறது. திருமணம் என்று வரும்போது சாதி முக்கியப் பங்கு வகிக்கிறது. சாதி என்பது தனிப்பட்ட விருப்பத்துக்குள்தான் வருகிறதே தவிர, அரசின் தலையீடு இதில் எங்கே இருக்கிறது? அப்படியிருக்கும்போது, இதற்கு சட்டம் கொண்டுவருவது இயலாத காரியம். சட்டம் ஒரு தூண்டுகோல். சாதிரீதியிலான கொடுமைகளைத் தடுப்பதற்கும் அதன்பேரில் நடக்கும் அடக்குமுறைகளை ஒடுக்குவதற்கும் சமத்துவம் இல்லாத ஒரு சூழ்நிலையை மாற்றுவதற்குமான ஒரு கருவிதான் சட்டம். “தூண்டிவிட்டு வேடிக்கை பார்க்கிறார்கள்!'' ஹெலன் டேவிட்சன், தி.மு.க மகளிர் அணி செயலாளர் சாதி மாறுவதாலோ, மதம் மாறுவதாலோ பிரச்னை தீர்ந்துவிடுமா என்ற கருத்துக்குள் நான் வரவில்லை. யாராக இருந்தாலும் சக மனிதரை மனிதராக மதிக்க வேண்டும். எல்லாரும் ஒன்றுதான் என்று பார்க்கக்கூடிய தன்மை அனைவருக்கும் வரவேண்டும். `அனைவரும் ஒரு தாய் மக்கள்.. நாம் அனைவரும் சகோதரர்கள்' என்ற எண்ணம் வரவேண்டும்.. குறிப்பாக, குழந்தைகளிடம் பெற்றோர்கள், ‘எல்லாரும் மனிதர்கள், வேறுபாடு பார்க்கக்கூடாது. அனைவரும் சமம்’ என்று சிறுவயதிலே கற்றுக்கொடுத்து வளர்த்தால் நாங்குநேரிபோல் ஒரு சம்பவம் மீண்டும் எங்கும் அரங்கேறாது. கவிஞர் வைரமுத்து, `மதம் மாறுவதுபோல் சாதி மாறுவதையும் சட்டமாக்குங்கள்' என்று சொல்லியிருப்பது அவருடைய தனிப்பட்ட கருத்து. அதற்குள் நான் செல்லவில்லை. சிறு வயதிலே பிள்ளைகளுக்கு பெற்றோர், சாதி சொல்லி வளர்க்காமல் எல்லாரும் சமம் என்று சொல்ல வேண்டும். ஜனநாயக நாடான இந்தியாவின் 77வது சுதந்திர தினத்தை அனைத்து மதத்தினரும் ஒன்றுகூடி யாரிடமும் வேற்றுமை காட்டாமல் கொண்டாடி வருகிறோம். அப்படி இருக்கும்போது இங்கு அனைவரும் சமம் என்பதை நாம் புரிந்துகொள்ள வேண்டும். சாதியோ, மதமோ பின்பற்றுவதால் என்ன கிடைக்கப்போகிறது? இங்கு பலர் சாதியோ, மதமோ பெரிதாக பார்ப்பதற்கு முக்கிய காரணம் சுற்றுப்புறமும் அக்கம்பக்கத்தில் இருப்பவர்களும்தான். அவர்களை எல்லாம் கண்டுகொள்ளாமல் நமது வேலையை பார்த்துக் கொண்டுபோனால் இந்த விஷயங்கள் எல்லாம் பெரிதாகத் தெரியாது. ‘இவர்கள் என்ன சொல்வார்களோ? அவர்கள் என்ன சொல்வார்களோ?’ என்ற யோசனையை விட்டுவிட்டு நாம் எல்லாவற்றையும் கடந்துபோனால் இங்கு பிரச்னைகளே எழாது. குடும்பமே ஆணி வேர். அங்கு சொல்லிக் கொடுக்கப்படுபவையே சமுதாயத்தில் ஏற்படும் ஒவ்வொரு நிகழ்வுக்கும் காரணமாக மாறும். ‘சாதிகள் இல்லையடி பாப்பா’ என்று பாரதியார் சொல்லியிருக்கிறாரே. யாரும் சாதி பார்க்காமல் இருந்தால்தான் சாதிரீதியாக நடைபெறும் கொடூரங்களைத் தவிர்க்க முடியும். மாணவர் சமுதாயம் இதுபோல் நடந்துகொள்வதற்கு காரணம், ஒரு சிலர், அரசியல் சுயலாபத்துக்காக மறந்தும் மறைந்தும் கொண்டிருக்கும் சாதியை தூண்டிவிட்டு வேடிக்கை பார்க்கிறார்கள். இவற்றில் இருந்து மக்கள் விழிப்புணர்வு பெறவேண்டும். - தர்ஷினி