அரசு ஊழியர்களுக்கு அல்வா அசதியில் தூங்கும் வீட்டுவசதி வாரியம்!

கறையான் புற்றுக்கட்ட கருநாகம் குடிபுகும் என்பார்கள்... அதுபோலவே வீட்டு வசதி வாரியத்தால் கட்டப்படும் வீடுகளை அரசியல்வாதிகள் ஆட்டையைப் போடுவது சகஜமாகிவிட்டது. அந்த வகையில் சென்னையில் அரசு தலைமைச் செயலக ஊழியர்களுக்காகக் கட்டப்பட்ட அடுக்குமாடிக் குடியிருப்புகளே அரசியல் முதலைகளால் விழுங்கப்பட்டிருக்கின்றன என்பதுதான் லேட்டஸ்ட் சீட்டிங்.இந்த விவகாரம் தொடர்பாக அரசு ஊழியர்கள் சிலரிடம் பேசினோம். “வீட்டு வசதி வாரியம் தொடங்கிய காலத்திலிருந்து அண்ணா நகர், பெசன்ட் நகர், கே.கே.நகர், அசோக் நகர், கொரட்டூர், சாஸ்திரி நகர் உள்ளிட்ட பகுதிகளில் குடியிருப்புகள் ஏற்படுத்தப்பட்டு உரியவர்களுக்கு வீடுகள் ஒதுக்கப்பட்டன. ஆனால் அடுத்தடுத்த காலகட்டங்களில் அரசியல்வாதிகளின் தலையீடு எட்டிப்பார்த்தது. இதன் உச்சகட்டமாக இப்போது, வீட்டு வசதி வாரியத்தில் வீடு பெறுவது அரசு தலைமைச் செயலக ஊழியர்களுக்கே பெரும் சவாலாக மாறியிருக்கிறது.மற்ற அரசு ஊழியர்களைப் போல், தலைமைச் செயலக ஊழியர்களுக்குப் பணிமாறுதல் என்பது கிடையாது. எனவே அவர்கள் பணிக்காலம் முழுவதும் சென்னையில்தான் வசித்தாகவேண்டும். அதேசமயம், சென்னை பெரு நகரமாக வளர்ச்சியடைந்துவிட்ட சூழ்நிலையில், சாதாரண ஊழியர்களால் சிட்டியில் வீடு எடுத்துத் தங்குவது பொருளாதார சிரமங்களை ஏற்படுத்தும். பலரும் புறநகரில் வசிக்கின்றனர். அவர்கள் தினமும் காலையும் மாலையும் இரண்டு மணி நேரம் பயணம் செய்து அலுவலகத்திற்கும், வீட்டிற்கும் அலைகின்றனர். அவர்களுக்குத் தரப்படும் வாடகை அலவன்ஸ் போதுமானதாக இல்லை..இந்தச் சூழ்நிலையில் அவர்களது சுமையைக் குறைக்க ஒரே வழி, வீட்டு வசதி வாரியத்தின் குடியிருப்பிற்கு இடம் பெயர்வதுதான். அதற்காக விண்ணப்பித்துவிட்டு பல ஆண்டுகளாக காத்திருப்போருக்கு, இன்னும் வீடுகள் கிடைத்தபாடில்லை.இதற்கு முக்கியக் காரணம், இங்குள்ள ஹவுசிங் போர்டுகள் ஒவ்வொன்றின் நிர்வாகமும் தனித்தனியாக உள்ளது. அதாவது ஒருவர் அண்ணாநகரில் பத்து ஆண்டுகளுக்கு முன்பு விண்ணப்பம் செய்திருக்கிறார் என்றால், அவருடைய சீனியாரிட்டி அண்ணா நகரில் மட்டுமே செல்லுபடியாகும். பிற பகுதிகளில் வீடு காலியானாலும் அவரால் அதைக் கேட்டுப் பெற முடியாது. அதனால் வீடு கேட்டு விண்ணப்பிப்பவர்களின் எண்ணிக்கை கூடிக்கொண்டே செல்கிறது.இதில் இன்னொரு சிக்கலும் உள்ளது. ஒரு பகுதியில் வீட்டு வசதி வாரியத்தால் குடியிருப்புப் பகுதி கட்டப்படும்போது, அதை வாடகைக்கு விடும் விதிமுறைகள் பற்றி போர்ட் ஆஃப் டைரக்டர்ஸ் கலந்துபேசி, சில வரைமுறைகளை விதிப்பார்கள். அதன்படி அரசு ஊழியர்களைத் தாண்டி பொது ஒதுக்கீடு என்ற பெயரில் தனியார்களுக்கும் இதில் வீடுகள் ஒதுக்கப்படுகின்றன.அப்படிப் பொது ஒதுக்கீட்டில் பல காலத்திற்கு முன்பு பெற்ற வீடுகளை தனி நபர்கள் இன்னமும் காலி செய்யாமல் தலைமுறை தலைமுறையாக வைத்துள்ளனர். இது சென்னையில் உள்ள அனைத்து ஹவுசிங் போர்டுக்கும் பொருந்தும். இதை விசாரித்து எந்த அதிகாரிகளும் நடவடிக்கை எடுப்பதில்லை. பொது ஒதுக்கீட்டை பொதுமக்களும் பெரிதாக அனுபவிப்பது இல்லை. பல இடங்களில் வீடுகளை அரசியல்வாதிகளும், அவர்களின் குடும்பங்களுமே ஆக்ரமித்துள்ளன. இதில் எந்தக்கட்சியினரும் சளைத்தவர்கள் இல்லை” என்றனர்..தலைமைச் செயலக ஊழியர்கள் சங்கத்தலைவர் வெங்கடேசனிடம் பேசினோம். ”தற்போது சைதாப்பேட்டை தாடண்டர் நகரில் வீட்டு வசதி வாரியம் சார்பில் ஒரு குடியிருப்பு கட்டப்பட்டு வருகிறது. அந்த இடம் பொதுப்பணித்துறைக்குச் சொந்தமானது. அங்கே பொதுப்பணித்துறை அதிகாரிகளுக்கு குறிப்பிட்ட சதவிகித வீடுகள் ஒதுக்கப்படும். மீதமுள்ள வீடுகளையே எங்களைப் போன்ற பிற அரசு ஊழியர்கள் கேட்டு விண்ணப்பிக்க முடியும். இந்தச் சூழலில் அங்கும் போட்டியாக பொது ஒதுக்கீடு தலையிடுகிறது. எனவேதான், ‘பொது ஒதுக்கீட்டு முறையை ரத்து செய்ய வேண்டும். பல தலைமுறைகள் தாண்டி குவார்டர்ஸில் தங்கியுள்ளவர்களைக் கண்டுபிடித்து காலி செய்யவேண்டும். சென்னையிலேயே தங்கியிருக்கும் தலைமைச் செயலக ஊழியர்களுக்கு முன்னுரிமை வழங்கி, தாடண்டர் நகர் குடியிருப்பில் 25 சதவிகித இடஒதுக்கீடு வழங்க வேண்டும்’ என்ற கோரிக்கைகளை முன் வைத்துள்ளோம்” என்றார்.இந்தப் பிரச்னை தொடர்பாக வீட்டு வசதி வாரியத் தலைவர் பூச்சி முருகனிடம் பேசினோம்... “வீட்டு வசதி வாரியத்தின் வேலை, வீடு கட்டுவது மற்றும் அதைப் பராமரிப்பது மட்டுமே. மற்றபடி வீடுகளை ஒதுக்கித் தருவது தொடர்பாக நாங்கள் எந்த முடிவையும் எடுப்பதில்லை. அந்த அதிகாரம் அரசாங்கத்திற்கு மட்டுமே உண்டு” என்றார் சுருக்கமாக.இந்த விவகாரம் தொடர்பாக அமைச்சர் முத்துசாமியிடம் கேட்பதற்காகத் தொடர்பு கொண்டோம். பலமுறை அழைத்தும் அவர் போனை எடுக்கவில்லை. அனுப்பிய குறுஞ்செய்திக்கும் பதில் இல்லை.அமைச்சர் தன் கட்சிக்காரர்களுக்கு மட்டுமே செய்து கொடுத்தவகையில் கொஞ்சம் அசதியாக இருக்கிறாரோ என்னவோ! -அபிநவ்

அரசு ஊழியர்களுக்கு அல்வா அசதியில் தூங்கும் வீட்டுவசதி வாரியம்!

Related Stories