டிஷ்யூம்...டிஷ்யூம் : தேவரிடம் மன்னிப்பு கேட்டாரா அண்ணா?

அ.தி.மு.க.வை சீண்டாவிட்டால் அண்ணாமலைக்கு பொழுதே போகாதுபோல. லேட்டஸ்டாக, ‘1956ம் ஆண்டு, முத்துராமலிங்க தேவருக்கு பயந்து மதுரையில் அண்ணா மதுரையில் ஒளிந்துகொண்டிருந்தார், பிறகு பகிரங்க மன்னிப்பு கேட்டார்’ எனக் கொளுத்திப்போட்டது, அ.தி.மு.க.வில் அனல் பரப்பியுள்ளது. அண்ணாமலை பேசியது சரியா? இவர்கள் என்ன சொல்கிறார்கள்? ``அண்ணாமலையிடம் ஆதாரம் இருக்கிறதா?" டி.ஜெயக்குமார், முன்னாள் அமைச்சர், அ.தி.மு.க நடக்காத ஒன்றை நடந்ததுபோலவும், நேரில் பார்த்ததுபோலவும் அண்ணாமலை பேசுகிறார். பா.ஜ.க.வை வளர்ப்பதற்காக, மறைந்த தலைவர்களைப் பற்றி உண்மைக்கு மாறாகப் பேசுவதும் விமர்சிப்பதும் சரியல்ல. ஏற்கெனவே, ஜெயலலிதா குறித்து இப்படித்தான் பேசினார். பிறகு மன்னிப்பு கேட்டார். அண்ணா உன்னதமான தலைவர். அவருக்கும் முத்துராமலிங்க தேவருக்கும் மோதல் ஏற்பட்டது என்று எதை ஆதாரமாக வைத்துப் பேசுகிறார் என்று புரியவில்லை. இவரின் பேச்சு அ.தி.மு.க. தொண்டர்களை கொந்தளிக்க வைத்திருக்கிறது. அரசியலுக்கு வந்தே இரண்டு ஆண்டுகள்தான் ஆகின்றன. ஆனால், முதிர்ந்த அரசியல்வாதி என்ற நினைப்பில் அண்ணாமலை பேசுவது வேடிக்கையாக இருக்கிறது. அண்ணாமலை பேசுவதையெல்லாம் கைகட்டி கேட்க வேண்டிய அவசியம் இல்லை. செஞ்சிக் கோட்டை ஏறுகிறவர்கள் எல்லாம் ராஜா தேசிங்கு கிடையாது. மீசை வைத்தவர்கள் எல்லாம் கட்டபொம்மன் ஆகிவிட முடியாது. இதைப் புரிந்துகொண்டால் அவருக்கு எதிர்காலம் இருக்கும் என நினைக்கிறேன். அண்ணா என்பது வெறும் பெயரல்ல, திராவிட அரசியலின் அடிநாதம். எனவே, வரலாறு தெரியாமல் ஏதையாவது பேசி இமேஜை கெடுத்துக்கொள்ள வேண்டாம். இதைக் கூட்டணி கட்சி என்ற முறையிலும் பொதுவான மனிதனாகவும் அவருக்கு சொல்கிறேன். அண்ணா குறித்து அவர் பேசியதற்கு வருத்தம் தெரிவித்தே ஆகவேண்டும்..``அண்ணாவே இதை மறுக்கவில்லை!" நாச்சியப்பன், மாநில தலைவர். பா.ஜ.க. ஆன்மிகப்பிரிவு பா.ஜ.க, தமிழகத்துக்குள் மட்டுமே கட்டுண்டு கிடக்கிற இயக்கம் அல்ல. அது, தேசிய இயக்கம். ஆனால். கும்மிடிப்பூண்டியை தாண்டினால் திராவிட கட்சிகளை யாருக்கும் தெரியாது. எனவே, பொய்யான தகவல்களைச் சொல்லி பா.ஜ.கவை வளர்க்க வேண்டிய அவசியம் இல்லை. ஒரு விஷயத்தை வெளியில் பேசும் முன்னர், அதைப் பலமுறை ஆய்வு செய்த பிறகே அண்ணாமலை பேசுவார். மதுரை மீனாட்சி அம்மன் கோயிலில் நடந்த தமிழ் வளர்ச்சி மாநாட்டில் பங்கேற்ற அண்ணா, மீனாட்சி அம்மன் குறித்து தவறாகப் பேசியது உண்மை. அதற்கு முத்துராமலிங்க தேவர் பதிலடி கொடுத்ததும் அதற்குப் பயந்து அவர் தலைமறைவாக இருந்து மன்னிப்பு கோரியதும் உண்மை. இதுகுறித்த செய்திகள் அன்றைய நாளிதழ்களில் வெளியாகியுள்ளன. அன்றைய நாட்களில் அண்ணாவே இதை மறுக்கவில்லை. அ.தி.மு.க எங்கள் கூட்டணி கட்சி. கூட்டணிக்குள் எந்தத் தவறான புரிதலும் வரக்கூடாது என்பதால் வளைந்து கொடுக்கிறோம். அதற்காக, அவர்களிடம் கேட்டுவிட்டுத்தான் பேசவேண்டும் என எந்த வரையறையும் இல்லை. அண்ணா விவகாரத்தில் எந்த உள்நோக்கமும் இல்லாமல் வரலாற்று உண்மையைத்தான் சொன்னார், அண்ணாமலை. இதில் அவர்களுக்கு எங்கே இடிக்கிறது? - கணேஷ்குமார்