டிஷ்யூம் டிஸ்யூம்: அருந்ததியர் என்றால் மலம் அள்ளுபவர்களா?

வாயைக் கொடுத்து வம்பில் மாட்டிக் கொள்வதில், தி.மு.க எம்.பி ஆ.ராசாவை மிஞ்சும் ஒருவர் அக்கட்சியில் கிடையாது எனலாம். தி.மு.க தலைமையை சங்கடத்தில் ஆழ்த்துவதால்தான், சில காலம் அவரது வாய்க்கு பூட்டு போடப்பட்டிருந்தது. ஆனால், `தன்னால் அப்படி அமைதியாக இருக்க முடியாது' என்பதை திருச்சி கூட்டத்தில் உணர்த்திவிட்டார். அருந்ததியர் சமூக மக்களை ‘மலம் அள்ளுபவர்கள்’ என அவர் குறிப்பிட்டு பேசியதுதான் சர்ச்சைக்கு தொடக்கப்புள்ளி. ஆ.ராசா பேசியது சரியா? ``சினிமாவில் மட்டும்தான் தி.மு.க.வின் சமூக நீதி!”-பூவை ஜெகன்மூர்த்தி, புரட்சி பாரதம் கட்சி தி.மு.க.வை பொருத்தவரை ஆ.ராசா மட்டுமல்ல, அந்தக் கட்சியைச் சேர்ந்த மூத்த தலைவர்கள், அமைச்சர்கள், எம்.எல்.ஏ.க்கள் என அனைவருமே பட்டியலின மக்களை அலட்சியமாகப் பார்ப்பது வாடிக்கைதான். அவர்களைப் பார்த்து, `நாங்கள் போட்ட பிச்சை', `நாங்கள் இல்லையென்றால் நீங்கள் இந்த இடத்துக்கு வந்திருக்க முடியாது' என்று சொல்வதெல்லாம் அவர்களுக்குக் கைவந்த கதை. அதைத்தான் ஆ.ராசாவும் பேசியிருக்கிறார். அருந்ததி இன மக்களுக்கு கல்வியிலும் வேலைவாய்ப்பிலும் ஒதுக்கீடு கொடுத்துள்ளோம் என்று சொல்லலாம். ஆனால், `மலம் அள்ளுபவர்கள்' என்று குறிப்பிட்டு கொச்சையாக சொல்வது எந்தவிதத்தில் நியாயம்? இது தவறுதானே. அவரும் ஒரு பட்டியலினத்தைச் சேர்ந்தவர். அவரே இப்படிப் பேசுவது தவறு; வன்மையாக கண்டிக்கத்தக்கது. ஆ.ராசா ஒன்றை நினைவில் கொள்ளவேண்டும். புதுக்கோட்டை மாவட்டத்தில் உள்ள வேங்கைவயலில் இன்னும் நாற்றம் அடித்துக் கொண்டுதான் இருக்கிறது. ஆனால், ‘மணிப்பூர் விளையாட்டு வீரர்களுக்கு தமிழ்நாட்டில் பயிற்சி தருகிறோம்’ என்று தி.மு.க தலைவர் கூறுகிறார். வேங்கைவயல் விவகாரத்தில் என்ன நடவடிக்கை எடுத்தார்கள்? இன்னும் வேங்கை வயலுக்குச் சென்று பார்க்கவில்லையே... அதேநேரம், ஸ்டாலின் சொன்னால் தி.மு.க.வில் யாரும் அடங்கிப் போக மாட்டார்கள். பட்டியலின மக்களை அவமதிக்கும் தி.மு.க.வினர் திரைப்படத்தில் மட்டும்தான் சமூக நீதி பற்றி பெருமையாகப் பேசிக்கொள்வார்கள். ஆனால், நிஜத்தில் மிக மோசமாகவே பிறரை நடத்துகிறார்கள். மற்றவர்களுக்கு ஒரு நியாயம், இவர்களுக்கு ஒரு நியாயமா? பட்டியலின மக்களுக்கு, சிறப்பு நிதி திட்டம் என்று அரசு நிதியை ஒதுக்குகிறார்கள். அதை முழுக்க முழுக்க பட்டியலின மக்களுக்குத்தான் செலவு செய்ய வேண்டும். ஆனால், இம்முறை 1,540 கோடி ரூபாயை எடுத்து மகளிர் உரிமைத் தொகை திட்டத்துக்குப் பயன்படுத்தி இருக்கிறார்கள். அதேபோல், 2,310 கோடி ரூபாயை பொது விநியோக திட்டத்துக்கு எனப் பயன்படுத்தியுள்ளனர். இது எவ்வாறு சமூக நீதி ஆகும்? இதுதான் திராவிட மாடல் அரசா?.``ஆ.ராசா பேச்சை, திரித்துப் பரப்புகிறார்கள்!”கிருஷ்ணசாமி, தி.மு.க. ஆதிதிராவிடர் நலத்துறை மாநில செயலாளர் ஆ.ராசா, இழிவாகப் பேச வாய்ப்பில்லை. அவரே, மற்ற சமுதாயத்தினரால் இழிவுபடுத்தப்பட்டவர்தான். அருந்ததியர் இன மக்களுக்கு உள்ஒதுக்கீட்டை தி.மு.க அரசு கொடுத்தபோது, அனைத்து சமுதாயமும் அதனை ஏற்றுக் கொண்டது. யாரும் பிரித்துப் பார்க்கவில்லை. அது நியாயமானது என்பதை ஏற்றுக் கொண்டார்கள். ஆதிதிராவிடர், தேவேந்திரகுல வேளாளர், அருந்ததியர் ஆகியோரில் அதிகம் படித்தவர்கள் தேவந்திரகுல வேளாளர்கள்தான். இரண்டாவது, ஆதிதிராவிடர். அருந்ததியர் சமூகத்தில் அவ்வளவாக யாரும் படித்திருக்க மாட்டார்கள். அவர்களின் நிலையை அறிந்துதான் 3 சதவிகித உள்ஒதுக்கீட்டை கலைஞர் வழங்கினார். அந்த உள்ஒதுக்கீட்டால் அருந்ததியர் சமூகத்தினரைச் சேர்ந்த மாணவர்கள் பொறியியல், மருத்துவம் எனப் படித்து சாதனை படைத்து வருகின்றனர். அரசியலுக்காக ஆ.ராசா பேசியது திரித்துச் சொல்லப்படுகிறது. தவறாக புரிந்து கொள்ளப்படுகிறது. `ஆதிதிராவிடர் வகுப்பில் அருந்ததியினருக்கு கலைஞர் செய்தது பெரிய விஷயம்' என்று பெருமையாகத்தான் பேசினார் ஆ.ராசா. அதை பா.ஜ.க. உள்ளிட்ட மற்ற கட்சிகள் அரசியலாக்குகின்றன. எம்.ஜி.ஆர். காலத்தில் கொங்கு மண்டலம் முழுவதும் அ.தி.மு.க. வசம்தான் இருந்தது. அருந்ததியர் சமுதாயத்துக்கு தி.மு.க கொண்டுவந்த உள்ஒதுக்கீட்டுக்குப் பிறகு, அவர்கள் தி.மு.க. பக்கம் சாய்ந்துவிட்டனர். ஈரோடு கிழக்குத் தொகுதி இடைத்தேர்தலில்கூட அருந்ததியர் சமூக மக்கள் அனைவரும், ‘உள்ஒதுக்கீடு ரொம்பவே பலன் அளிக்கிறது. எங்கள் ஓட்டு தி.மு.க.வுக்குத்தான்’ என்று ஆர்வத்தோடு சொல்லி அளித்த வாக்குகள்தான், அதிக வித்தியாசத்தில் காங்கிரஸை வெற்றிபெற வைத்தது. முதல்வர் ஸ்டாலின் உத்தரவின்படி, நாங்கள்தான் ஈரோட்டில் முதன்முதலாக அம்பேத்கர் சிலையை நிறுவினோம். அதுவே, அருந்ததியர் சமூக மக்களுக்கான வெற்றிதான். அம்மக்களின் வாக்குகளைப் பிரிக்கவே இதுபோன்று திரித்துக் கூறப்பட்டு வருகிறது. ஆ.ராசா பேசுவதில் சமூக நீதிதான் இருக்கும், ஆவேசமாகப் பேசுபவர். எதுவாக இருந்தாலும் துணிச்சலாக சொல்லக்கூடியவர். அதனால், அவர் பேசியதை திரித்துப் பரப்புகின்றனர். - தர்ஷினி