கஞ்சா வேட்டையில் கல்லா கட்டினாரா? - விஜிலென்ஸ் ரெய்டில் விழிபிதுங்கும் எஸ்.ஐ.!

-கே.பழனிவேல்அக்யூஸ்ட்களுடன் பழகியதாலோ என்னவோ அக்யூஸ்ட்களாகவே மாறிவருகிறார்கள் காவலர்கள். அந்த வகையில் லேட்டஸ்டாக விஜிலென்ஸ் வகையில் சிக்கியிருக்கிறார் நாமக்கல் எஸ்.ஐ. ஒருவர். இவர் முன்பு ஸ்டாலின் வீட்டில் பாதுகாப்பு படையில் இருந்தவர் என்பதுதான் இதில் ஹைலைட்!.தமிழகத்தைத் தொடர்ந்து தாக்கிக்கொண்டிருக்கும் ரெய்டு புயலில் சமீபத்தில் சிக்கியிருப்பவர், அரசியல்வாதியோ, தொழிலதிபரோ அல்ல. காக்கிச் சட்டைக்காரர். வருமான வரித்துறையும் அமலாக்கத் துறையும் மட்டும் அதிரடிகாட்டினால் எப்படி? நாங்களும் இருக்கோம்ல என்று விஜிலென்ஸ் விழித்தெழுந்ததில் சிக்கியிருக்கிறார், நாமக்கல் நகர் எஸ்.ஐ. ஒருவர்.கஞ்சா, லாட்டரி, சந்துக்கடை என களைகட்டும் நாமக்கல் நகரின் போலீஸ் ஸ்டேஷனில் எஸ்.ஐ.யாக பணிபுரிபவர் பூபதி. மோகனூரில் உள்ள இவரின் வீட்டில்தான், லஞ்ச ஒழிப்புத் துறை ஜூன் 28ம் தேதி அதிகாலையில் அதிரடியாகப் புகுந்து சோதனை செய்துள்ளது. இவர் ராசிபுரம் மற்றும் நாமக்கல் காவல் நிலையங்களில் பணிபுரிந்தபோது பல்வேறு புகார்களில் சிக்கியிருக்கிறார். குறிப்பாக, கடத்தல் மாஃபியாவிடம் இருந்து போதைப் பொருளைக் கைப்பற்றியது, அதை விடுவிக்க பேச்சுவார்த்தை நடத்தியது என அண்ணார் நடத்திய அடேங்கப்பா டீல்கள் ஏராளம் என்கிறார்கள் அவரைப் பற்றி அறிந்தவர்கள். இதனாலேயே லஞ்ச ஒழிப்புத் துறை இவரது வீட்டை ரவுண்டு கட்டி அடித்திருக்கிறது. இந்த விவகாரம் குறித்து தனிப்படை போலீஸாரிடம் பேசினோம். “காவலராக இருந்த பூபதி, 2016-ல் எஸ்.ஐ. ஆனார். அப்புறம் ஸ்டாலின் எதிர்க்கட்சித் தலைவரா இருந்தப்ப, அவரோட கமாண்டோ படையில இருந்தாரு. பிறகு ஸ்டாலின் வீட்டுப் பாதுகாவலராகவும் இருந்தாரு. இப்பகூட உதயநிதி பாதுகாப்பு டீம்ல கேட்டுப் பார்த்தாரு. அது கிடைக்காம, அமைச்சர் மதிவேந்தன் பாதுகாப்பு அதிகாரியா வலம் வந்தாரு. உளவுத்துறை இவர் மீதுள்ள புகார்களைச் சொன்னதால, அங்கிருந்து ஒரு மாசத்துலயே அனுப்பிவிட்டுட்டாங்க” என்று பூபதி குறித்து முன்னோட்டம் கொடுத்தவர்கள் ரெய்டு விஷயத்திற்கு வந்தார்கள். ‘’வீரபாண்டி ஆறுமுகம் இருந்தபோது அவரை ‘அப்பா’என்றழைத்த காவல் அதிகாரியும் நாமகிரிப்பேட்டையைச் சேர்ந்த ஜெயராஜ் என்பவரும் நண்பர்கள். ரிட்டயர்டு ஆன அந்த காவல் அதிகாரி கொடுத்த பணத்தை வைத்து ஃபைனான்ஸ் தொழில் செய்தார் ஜெயராஜ். அவரிடம் 20 லட்சம் வாங்கிய ராசிபுரத்தைச் சேர்ந்த ஒருவர் திருப்பிக் கொடுக்காமல் எஸ்கேப்பாக, 2018ல் ராசிபுரம் போலீஸில் புகார் ஆனது.அந்த நபரைப் பிடிக்க அமைக்கப்பட்ட தனிப்படையில் பூபதியும் ஒருவர். எஸ்கேப்பான நபரை கொடைக்கானலில் பிடித்த தனிப்படை 20 லட்சம் ரூபாயை மீட்டது. ஆனால், ஜெயராஜுக்கு 4 லட்சம் ரூபாய் மட்டுமே கொடுக்க, எஸ்.பி-யிடம் புகார் போனது. பூபதி, ரோந்து பிரிவுக்கு மாற்றப்பட்டார். பிறகு ஜெயராஜிடம் பூபதி ஏதோ டீலிங் போட்டு அதை முடித்துக் கொடுக்காததால் ஜெயராஜ் விஜிலென்ஸுக்கு போட்டுக்கொடுக்க, அதனால் வந்ததுதான் விஜிலென்ஸ் ரெய்டு. இதுல போதைப் பொருள் டீலிங் விவகாரத்தையும் விசாரிக்குறாங்க” என்றார்கள்.பூபதியிடம் விளக்கம் கேட்டோம். “ரெய்டு நடந்த இடத்துல எதுவும் சிக்கல. பாப்பாவுக்கு ஸ்கூல் ஸ்கூல் பீஸ் கட்ட வச்சிருந்த பணத்தைதான் விஜிலென்ஸ் கைப்பற்றி இருக்காங்க. 3,200 கிலோ போதைப் பொருள் பிடிச்சி, 30 அவார்டு வாங்கியிருக்கேன். என்னால பாதிக்கப்பட்ட கஞ்சா பேர்வழிகள் தவறா செல்றாங்க” என்றார்!அரெஸ்ட் பண்ணுங்க ஆபிஸர்!